جدة اوباما وشوية حاجات

تحديث:
انا اسفة خطأ شائع... المقصودة هي جدة اوباما مش عمته، عمته اتقفشت في هجرة غير شرعية، ده غير اخوه اللي اتقفش بهروين... العيلة دي ضايعة باين عليها
المهم، مش لاقية اللنك لانه كان منشور في الاهرام وانتوا عارفين الاهرام مانع الارشيف الا بفلوس
لا وبيقول انه مفلس

الحاجة جدة اوباما حبت تزور ابن اخوها وتنزل عليه في البيض الابيض تباركهوله وتنام في اودة المسافرين وتلاعب البت ميليا والبت ساشا وتجيب لهم سكر نبات وتحكي لهم حكاية ست الحسن وامنا الغولة

فيه حاجة مش عادية؟

وبعد شوية راحت الكنيسة تتنصر

فيه حاجة غريبة؟

وبعدين اهلها قالوا لها ح نولع في امك لو عملتي العملة دي

في اي حاجة خارجة عن المألوف؟

راحت الولية قالت خلاص خلاص مش ح اتنصر

كل ده لحد كده شغال وعادي وبيحصل كل يوم 

قوووووووووووووووووووم الولية تعليقا تقول ايه؟

تقول: في الحقيقة انا مسلمة ومؤمنة بالاسلام لكن انا كنت عايزة ازور باراك وما رضيتش احرجه لو رحت له وانا مسلمة

!!!!!!!!!!!!!!!!!!!!

هو فيه فرع للمنوفية في كينيا؟

---------------

في عشر ايام خليتين تجسس لصالح اسرائيل اتظبطوا في لبنان، لا سمعناهم بيقولوا على اسرائيل ليبرمان قرد، ولا شفناهم عملوا هيصة وهوليلة، مع ان دي ايه؟ اسرائيل

وايه؟

بتتجسس على المقاومة مش بتساعد المقاومة

وايه؟

مجندة ناس من الجيش اللبناني

ومع ذلك لا شتموا ولا شرشحوا ولا هللوا ولا زغردوا ولا وقفوا لاسرائيل تحت الشباك بالقبقاب.... ولاد الناس حاجة تانية برضه

---------------

كنا ناقصين انفلوانزا الخنازير اللي اوحش من انفلونزا الطيور وبيقولوا لا يمكن السيطرة عليها

ماحدش يقول لي مش بناكل خنزير... احنا ناس نحس، ممكن تنط لنا من البحر المتوسط ونصاب بيها واحنا مش بناكلها

زمان الهندوس شمتانين فينا وبيقولوا ان ربنا بينتقم مننا عشان عمالين ناكل في الحيوانات وسلط علينا الغضب الحيواني: جنون البقر، انفلوانزا الطيور واخرها والاكثر فتكا وهي انفلونزا الخنازير

ربنا يستر على السمك

على رأي سنبل: ماله الفول، ماله الفول