Wednesday 18 March 2009

slumdog millionaire

ده حلو بجد مش بيضحكوا علينا، لا وفيلم هندي وكل حاجة، بس حلو قوي، قوي قوي قوي
هو فيه حتة هندي لما اخوه ضميره صحي فجأة، بس تعدي يعني في اطار شخصية اخوه شغال، مش شغال قوي بس شغال شوية
لكن الفيلم كله حلو جدا فعلا، يستاهل، حملوه تورنت هنا
اه وعلى فكرة
انا شخصية اخوه عجبتني اكتر من شخصية البطل نفسه
at

51 comments:

  1. Nancy18 March 2009 at 06:37

    طب الحمدلله ان انتي طلعتي بتشوفي افلام اجنبي وبترفهي عن نفسك لا وبتشريكنا معاكي فيها كمان! اصل انا كنت فاكره ان دماغك كلها سياسة ومش فاضيه تتفرجي او تتابعي افلام اجنبي :)

    ReplyDelete
  2. Unknown18 March 2009 at 07:09

    destiny


    الفكره جميله قوى

    ReplyDelete
  3. مواطن مصري18 March 2009 at 08:50

    دي السينما الهندية بس خالد يوسف يمكن عمل في حين ميسرة ربع الي اتعمل في فلم سلم دوج مليونير


    فاكرة فلم الشعلة

    ReplyDelete
  4. Ramez18 March 2009 at 08:50

    فيلم ممتع واستمتعت بشقاوة الواد اخو جمال لما كانو صغيرين اكتر منة بس برضو اللي فية داء ميبطلوش رقصو الرقصة الجماعية الهندية بتاعتهم في اخر الفيلم

    ReplyDelete
  5. مواطن مصري18 March 2009 at 08:53

    اخو البطل نتيجة للمجتمع زي شخصة ابن عمرو سعد في حين ميسرة

    انا عجبنب اكثر حركة الكميرة مع ألاحداث بس البنت الي اسمها فريدة دي جامدة و عملت دور حلو بردو


    هي الحكومة الهندية لية ممقلتش على مخرج الفلم انو يشوهة سمعة الهند؟ زي ما حصل لحين ميسرة

    ReplyDelete
  6. حرة المداد18 March 2009 at 10:43

    إهداء الى من يحملون رايات العصيان ضد إجماع علماء الأمة بوجوب المقاطعة ....
    الى من لايزالون يجدون ..أو باأحرى يختلقون المبررات والحجج لعدم مقاطعتهم لبضائع ينتجها أعداء الأمة...
    الى من لا يزال لديهم شهية مفتوحة على مصراعيها ويسيل لعابهم عند المرور أمام مكدونالدز وكنتاكي وغيرها ناسين أو باأحرى متناسين شلالات دمائنا النازفة التي لم تجف يوما...
    وأشلاءنا المبعثرة تنهشها كلاب الارض...
    و كرامتنا المهدرة...
    وحقوقنا المسلوبة ...
    وأراضينا المحتلة...و...و...و...

    محطة وقود أمريكية تبدأ حملة لمقاطعة النفط العربي

    واشنطن-وكالة أمريكا إن أرابيك
    أعلن أمريكيون مناهضون للعرب والمسلمين وداعمون لإسرائيل عن أنشاء أول محطة في أمريكا على الإطلاق لا تبيع النفط العربي وعن حملة تدعو إلى إنشاء المزيد من محطات وقود السيارات لا تبيع ولا تستفيد من النفط القادم من الدول العربية، وتحمل عنوان 'نفط خالي من الإرهاب'. وتقول الحملة عن أهدافها إنها تكرس جهودها 'لتشجيع الأمريكيين على شراء الوقود القادم من دول لا تقوم بتصدير الإرهاب أو تمويله'، مضيفة أنها تقوم 'بتثقيف الشعب الأمريكي من خلال دعم الشركات التي تمتلك إمدادات من النفط الخام في دول خارج منطقة الشرق الأوسط، ومن خلال كشف الشركات التي لا تقوم بهذا'. كما تسعى الحملة ـ حسبما يقول على موقعها ـ إلى خلق جدل صحي فيما يتعلق بإيجاد أساليب بديلة لإنتاج الوقود واستهلاكه. هذا وقد خصص تلفزيون 'إن بي سي' الأمريكية خبرا عن محطة الوقود، واستضافت الناشط الأمريكي جو كوفمان المعروف بولائه لإسرائيل، والذي تحدث عن حملته ضد النفط العربي، وقال إن حملته تلقى نجاحا في أوساط الأمريكيين العاديين الذين لا يريدون أن تذهب أموالهم إلى الدول العربية الخليجية المنتجة للنفط. وقال كوفمان أن هناك أمريكيون يقودون سياراتهم لمسافات قد تبلغ 20 ميلا من أجل شراء الوقود من هذه المحطة تفاديا لدفع أموالهم في نفط يأتي من الدول العربية أو الإسلامية.

    انتهى الخبر...لكن تداعياته لم تنتهي!!!!!!!!!!!!!!!!!!!!!
    أما عنا فحدث ولا حرج عن بيعنا الغاز لاسرائيل بدولار ونصف للوحدة الواحدة بينما التكلفة الفعلية هي دولاران ونصف تقريبا للوحدة ويابلاش!!!!!
    يعني يوميا تخسر مصر ملايين الدولارات بلا مقابل وحكومتنا المحترمة تدعي الفقر وتتحجج بالازمة الاقتصادية العالمية ويتفتق ذهنها عن خطة شيطانية لتعويض خسائرها من لحمنا الحي بخصخصة مياه النيل وبيعها للفلاحين والمصيبة الأكبر في دارفورالسودان وخطة السيطرة على منابع النيل لتتحكم امريكا واسرائيل بأرواحنا ...وحسنة قليلة لاسرائيل تمنع بلاوي كتيرة عن أصحاب العروش والكروش !!!!!!!

    ReplyDelete
  7. Shimaa Esmail18 March 2009 at 12:05

    الأستاذة الفاضلة/ نوارة نجم.
    صاحبة مدونة / جبهة التهييس الشعبية.
    " تحية طيبة" وبعد..
    اعتذر عن الخروج من موضوع التدوينة، لقد أرسلت لك رسالة عبر البريد الإلكتروني تتعلق باستمارة استقصاء بيانات عن المدونات المصرية.
    أرجو الاهتمام والرد سريعا بالموافقة أو الرفض.
    تحياتي وتقديري
    شيماء إسماعيل
    باحثة بالماجستير- كلية الآداب جامعة القاهرة.

    ReplyDelete
  8. Unknown18 March 2009 at 14:42

    لا بس هو فيلم هندي على ابوه
    اقصد فيه كل عناصر الفيلم الهندي
    هو بس مافيهوش الرقص الكتير والتفقير اللي بيقعدوا يفقروه

    انا عجبني قوي اختيار برنامج من سيربح المليون وفكرة انه مع كل سؤال ينور حتة من حياته
    وعجبني قوي انه ما عرفش اجابة الشعار الوطني للهند

    وطبعا لما نزل في اللامؤاخذة عشان يقابل اميتاب بتشان
    هههههههههه

    وتطور الاحداث حلو وكل حاجة

    بس الشخصيات هندي هندي

    يعني البطل والبطلة الاتنين طول الوقت مسيرين ما بيعملوش اي حاجة وما بياخدوش اي قرار ولا بيعملوا رد فعل

    المحرك الاساسي للاحداث هو الاخ وهو اللي بياخد القرار

    انا اتفقعت موت لما في الاخر اداها المفتاح

    يعني واحد وهو عيل لطش صاحبة اخوه وساب اخوه وهو اصلا مجرم وقتال قتلا

    وهو السبب في انه يفرق ما بينه وما بين صاحبته في كل مرة يلتقوا فيها

    ايه فجأة كده يديها المفتاح ويقول لها امشي وهي اللي تبقى مترددة كمان

    وليه قرر في الاخر يعمل العملية الانتحارية دي؟

    بس اللي عجبني في رسم شخصية اخوه انه معمول انسان وله مبرراته مش انه معمول الشرير بتاع الافلام الهندي

    الاهم ان الفيلم ممتع زي ما رامز قال

    ما تقدرش ترمش وانت بتتفرج

    دي برضه من خصائص الفيلم الهندي

    :)

    انا مبسوطة انه اخد اوسكارات

    بس مستغربة

    اقصد الفيلم حلو وفكرته حلوة بس فيه اخطاء

    ممكن ياخد اوسكار واحد
    مش كل الاوسكارات دي

    ReplyDelete
  9. ahmed samir18 March 2009 at 15:29

    الأخ الكبير اتأثر بنجاح أخوه فى البرنامج
    هو عارف كويس ان اخوه لا مثقف و لا نيلة هو بس طيب
    و مع ذلك كسب فى البرنامج و اتحول لبطل شعبى

    و كمان الأخ الكبير فيه بذره خير صغيرة زى المشهد اللى كان بيصلى فيه و يطلب المغفرة من ربنا قبل ما يروح يقتل

    ReplyDelete
  10. Unknown18 March 2009 at 15:57

    امممممممممم
    انا حسيت ان مشهد الصلاة ده تمهيد او فرش لنهاية زي دي
    ودي غلطة في الفيلم
    لاني مش مفروض اتبين التمهيد قبل ما تحصل الواقعة اللي بيتمهد لها

    لازم يبقى عندي علامة استفهام ليه هو حط المشهد ده تتحل لما اشوف المشهد المترتب عليها

    الحاجة التانية
    انا لما هو اداها الموبايل توقعت انه في السؤال الاخير ح يتصل بصديق اللي هو اخوه فحترد عليه البنت

    ومش مفروض اني اتوقع اللي ح يحصل بعد كده

    انا مش ضد الفيلم خالص
    بالعكس
    انا حبيت الفيلم جدا جدا جدا جدا

    واتأثرت بيه قوي وشدني من اول لحظة لاخر لحظة

    واخطاء زي دي الجمهور بيعديها لما الفيلم بيبقى حلو ومسموح للجمهور انه يتسامح مع اخطاء صغيرة للفيلم الحلو

    لان الجمهور هدفه الاساسي هو انه يستمتع ومدام استمتع واتشد من اول لحظة لاخر لحظة يبقى خلاص جماهيريا الفيلم نجح

    لكن اظن ان معايير المهرجانات حاجة تانية

    يمكن فيلم المهرجان يبقى ما يشدش زي الفيلم الجماهيري
    بس اخطاء زي دي مش بتبقى موجودة فيه

    زي الفيلم اللي كسب السنة اللي فاتت

    كان اسمه ايه؟ اللي كان متصور في المكسيك ده

    ممكن يبقى ممل وخنيق بس مافيهوش الوقعات دي

    عشان كده انا مستغربة ان الفيلم سلمدوج مليونير اخد كل الجوائز دي

    فرحانة انه اخدها
    بس مستغربة
    لان صحيح المخرج والسيناريست انجليز بس فعلا الفيلم هندي

    ReplyDelete
  11. Anonymous18 March 2009 at 15:59

    مواطن مش هتبطل الفتي بقي
    الفيلم مش هندي بس الممثلين و المكان هندي لكن الاخراج انجليزي و ماخوذ عن قصة انجليزي و الفيلم كان عليه هجوم ساحق في الهند و اتهمو الغرب بمحاولة تشويه صورة البلد

    ReplyDelete
  12. Anonymous18 March 2009 at 16:05

    لا يا نوارة معلش اختلف معاكي الفيلم مش هندي خالص و اعتقد انه ده تاثير المكان و الشخصيات و اميتاب بتشان الي المؤلف و السيناريست اخدوه لرمز و اقصي احلام الطفل الي نط في الخرا عشان يوقع الصورة منه
    الفيلم مبدع و 7 جوايز اوسكار يستحقها و علي فكرة الفيلم رغم انه جايب اوسخ حتت في الهند لكن بعيد تماما عن سطحية حين ميسرة
    عايزة الحق حين ميسرة ينفع يبق فيلم هندي بجد لكن ده لاء
    المشهد الوحيد الي خنيق لما السياح الامريكان كالعادة هما الي دافعو عن جمال ضد الشرطي رغم ان عربيتهم اتقلبت

    ReplyDelete
  13. ahmed samir18 March 2009 at 16:06

    الاوسكار بيبقى ليه معاييره الخاصة
    يعنى فيلم زى هارفى ميلك بتاع شون بين كنت متوقع انه حياخد احسن ممثل عشان موضوعه

    بالنسبة للأخ الأكبر فى الفيلم انا كنت متعاطف معاه هو طلع زى ما المجتمع عايز يطلعه قتال قتلى ،اخوه الصغير هو اللى استثناء
    و يعنى مثلاُ الاخ الكبير مرديش ان اخوه يتعمى و أخده و هرب و اعتقد انه كان بيغير من حب أخوه للبنت عشان كده ساب ايديها و هى بتجرى ورا القطر و مع ذلك اما كبروا شوية كان بيساعد اخوه الصغير فى البحث عنها

    شخصية مركبة و ليها ابعاد نفسية مش زى شخصياتنا المسطحة اتجاه واحد يا خير يا شر

    ReplyDelete
  14. Unknown18 March 2009 at 16:07

    ايوة يا احمد
    الفيلم اخراج وسيناريو انجليزي
    مش عارفة مؤلف الرواية هندي وللا انجليزي

    بس الفيلم احداثه ورسمه للشخصيات هندي

    اقصد السيناريست بالذات متلبساه روح الهنود وهو بيكتب الفيلم

    ما اعتقدش انه متعمد يشوه صورة الهند

    ده حتى اتريق على الامريكان لما بتقول له:
    here is some of real america son

    وراحت مدياله ميت دولار

    عجبتني قوي اللقطة دي

    بس رسم الشخصيات وتطور الاحداث زي الافلام الهندي اللي احنا اتعودنا عليها

    التنفيذ بس هو المشدود شوية عن الافلام الهندي مافيهوش الاغاني الكتير والتفقير وكل ما ييجوا يبوسوا بعض ابن عمها يدخل طول الفيلم

    كاتب الرواية بقى متأثر بتشارلز ديكينز

    مش من حيث انه بيتكلم عن اطفال الشوارع

    بس فكرة ابن الشوارع البريء اللي اقرب لانه يبقى مراقب للاحداث او راوي ليها اكتر من انه مشارك فيها

    الشخصية التانية اللي بتبقى صديقة البطل وهو مطلعها اخوه في الفيلم ده
    وبتبقى هي البطل الحقيقي ومحرك الاحداث
    زي
    oliver twist
    والحب اللي بيدور عليه طول الفيلم
    زي
    great expectations

    ماشي شغال ممكن يتأثر بتشارلز ديكنز
    مافيهاش حاجة
    ماهو السينما الامريكاني كلها متأثرة بشكسبير

    كلها بلا استثناء يعني

    بس المفروض انه يطور شوية

    ههههههههههههه

    بس الفيلم حلو برضه

    ReplyDelete
  15. Unknown18 March 2009 at 16:08

    الفيلم حلو قوي
    بس مش فاهمة برضه اخد كل الاوسكارات دي ليه

    ReplyDelete
  16. مواطن مصري18 March 2009 at 16:31

    This comment has been removed by the author.

    ReplyDelete
  17. مواطن مصري18 March 2009 at 16:33

    أتفرج ي ا نوارة على فلم city of god


    هيعجببك اوييييييي
    http://www.youtube.com/watch?v=ng9q5-xkNmE

    ReplyDelete
  18. مواطن مصري18 March 2009 at 16:40

    الفلم بيتكلم عن الهند


    و الموسيقي الي واخد احسن موسيقي هندي

    http://www.youtube.com/watch?v=7StrcpdhC9w

    و بعدين الفلم بيتكلم عن الواقع الهندي القريب من الواقع المصري


    و كان مركز عن العشوائيات و عن الارهاب و عن الاتجار ب الاطفال و أستغلالهم

    الي هي المشاكل الي أتكلم عليها خالد يوسف في حين ميسرة


    بس النهاية للما اداها التلفون قالها روحي دوري علية

    عشان هي كانت بتحبة اوي

    ولما أتصل أتصل كان فاكر انو بيتصل باخوة بس ب الصدفة ردت هيا


    فلم دة ولا فلم براد بيت

    ReplyDelete
  19. Unknown18 March 2009 at 16:45

    احمد ابو كابيتال ليتر مش احمد ابو سمال ليتر

    :)

    لا حين ميسرة مش فيلم هندي
    حين ميسرة فيلم وساخة بطن

    واحد اكل كشري مسمم وطرشه في وشنا

    ده حين ميسرة


    لكن
    slumdog millionaire

    فيلم انساني
    فكرته حلوة قوي
    اقصد ال
    frame
    بتاعه
    انه يختار من سيربح المليون كإطار لرواية الاحداث ومع كل سؤال في البرنامج بيحصل تطور في الاحداث

    بصراحة تكنيك في منتهى الذكاء

    وسهل على السيناريست انه يروي الاحداث الكتير قوي دي من غير ما نتوه منه او يزهقنا

    وده المختلف في الفيلم
    هي عبقريته كلها في اختيار البرنامج كبرواز للاحداث

    لكن الفيلم احداثه هندي
    بمعنى: احداث كتير قوي قوي قوي
    ومتداخلة
    شخصيات كتير قوي وفيها شخصيات
    flat
    زي البنت
    البطل كان مش شخصية قد ما هو عين
    او كأنه بيقوم بدور الكاميرا زي ابطال روايات تشارلز ديكنز

    شخصية مامان عاملة زي فاجين في اوليفر تويست
    بس في اوليفر تويست شخصية فاجين كان فيها انسانية
    لكن مامان ما كانش فيه انسانية خالص

    شخصية الاخ هي الشخصية الوحيدة اللي محركة للاحداث

    وكأنه هو القدر اللي الفيلم بيتكلم عليه

    هو اللي بياخد كل القرارات من اول الفيلم لاخره
    هو حتى السبب في ان الواد ينزل في الخرا

    (انا عجبني قوي المشهد ده)
    وعجبني اكتر انه استخدمه في الاخر بعد ما الولد كسب في من سيربح المليون عشان يلاقي حبيبته
    وكأن من سيربح المليون هو المعادل الموضوعي للخرا اللي نزل فيه وهو صغير

    حلوووووووووة مووووووووووت

    اما مشهد الامريكان

    بالعكس انا شفت في المشهد ده تريقة على الامريكان وعلى سطحيتهم
    شايفة عيل طلعان ميتين ابوه وفاكرة ان حل مشكلته كلها في ميت دولار تديهاله

    بالعكس دي تريقة على سياسة امريكا اللي فاكرة انها تحل كل المشاكل بالدولارات

    زي ما قلت لك
    الفيلم حلو قوي
    بس فيه تكات صغيرة نعديها بمزاجنا
    لكن انا مستغربة انه يحصد كل الجوائز دي في مهرجان المفروض انه بيحكم على الحرفية اكتر

    مشهد ان اخوه يديها مفتاح العربية ويقرر فجأة بدون مقدمات - اللهم الا المشهد اللي جايبه بيصلي (حتة هندي موت) - بصراحة بضني قوي

    عشان الاحداث كتير والشخصيات كتير ما كانش عنده فرصة انه يفرش اكتر للتنازع اللي جوة اخوه بحيث اني في الاخر اعرف اصدق انه ممكن يهرب البنت ويبعتها لاخوه اللي هو طول الفيلم بيحاول يفرق ما بينهم

    ReplyDelete
  20. Unknown18 March 2009 at 16:59

    اه
    وعلى فكرة يا احمد ابو كابيتال ليتر

    امممممممم
    مش عارفة اصيغها ازاي
    بس مافيش داعي للانسياق ورا كهنوت المهرجانات

    هي تمشي دي؟

    مافيش كلمة كده انا توا اخترعتها

    بس عموما
    اللي اقصده
    ان ممكن المهرجان يدي جايزة وفقا لمعايير تانية

    زي ان رجح كفة الاطار بتاعة الفيلم والانسانية اللي فيه والقضايا اللي بيناقشها
    على حساب الحاجات الصغيرة اللي باقول عليها

    ممكن
    وممكن يبقى فيه اسباب تانية
    انا شخصيا مبسوطة انه اخد جوايز كتير كده

    بس عايزة اعرف السبب الحقيقي للجوايز الكتير
    هل بسبب القضايا المحطوطة
    ده حاطط ستميت قضية في الفيلم
    هل بسبب الانسانية اللي فيه
    يعني ايه اللي خلاهم يتغاضوا عن السقطات الصغيرة في حين انهم ساعات بيطلعوا ميتين افلام تانية على حاجات اصغر من كده
    زي فيلم مالكوم اكس مثلا

    ReplyDelete
  21. AMOON18 March 2009 at 17:11

    شوفي ياست العرايس انا هديكي افكار جديدة لسينما الواقع .بصى نزبة كدة لنفسك وفضي يوم في الويك اند انا بفضي يوم الحد.واعملي الفيلم بتاعك انتي بالكاميرا بتاعتك انتي

    ReplyDelete
  22. Unknown18 March 2009 at 17:15

    مش فاهمة التعليق ده

    ReplyDelete
  23. مواطن مصري18 March 2009 at 17:17

    انا حتى الان مش عارف لية مش عاجبك فلم حين ميسرة و عاجبك سلم دوج مليونير


    مع ان الاتنين نفس الفكرة بأختلاف النهاية


    واحد نهاية الفلم فيها أمل و حين ميسرة نهايتنة مفيش فايدة

    ReplyDelete
  24. Unknown18 March 2009 at 17:37

    انا اقول لك يا مواطن

    فيلم حين ميسرة وفيلم سلمدوج مليونير
    نموذج لازاي الفكرة الواحدة ممكن تتعالج وحش وممكن تتعالج حلو

    حين ميسرة ده ينفع مقال رأي مش فيلم
    او يتنشر في صفحة الحوادث
    او بالاحرى خالد يوسف اخد صفحة الحوادث ولطعها على الشاشة
    من غير اي مسحة فن ولا حساسية ولا تفاعل مع الشخصيات
    كمان هو له وجهة نظر مسبقة
    زي ما كلنا لنا وجهات نظر
    بس هو مش متحرر منها
    هو عايز يوصل وجهة نظر معينة
    فلوى عنق الاحداث وعمل حاجات كتير مش منطقية عشان يوصل لنا وجهة نظره السياسية
    الحاجة التالتة
    انه بيكره شخصياته
    مش متعاطف خالص مع اي شخصية، ولا حتى البطل، مافيش اي جوانب انسانية للشخصيات خالص
    الحاجة الرابعة ان الاطار اللي هو اختاره للحدوتة اطار رخيص قوي عشان يجذب المشاهد وممجوج ومستخدم قبل كده لما مهري

    سلمدوج مليونير
    نفس الفكرة
    وشوف بيتكلم عن كام قضية؟
    بيتكلم عن التعذيب في اقسام الشرطة
    وبيتكلم عن عشوائيات الهند
    وبيتكلم عن العصابات المنتشرة في الهند
    وعن غياب القانون
    وعن الفتنة الطائفية ما بين الهندوس والمسلمين
    وعن تجارة الدعارة
    وعن سطحية الغرب في علاجه للمشكلات وتدخلاته التافهة اللي بتزود المشكلة مش بتعالجها
    وعن الثقافة الرأسمالية اللي بتسبب شره للفلوس
    وعن هروب الفقرا للاحلام
    وعن بيع الاحلام
    عن الناس اللي بتدوس على غيرها عشان تطلع

    شوف كام قضية؟

    اولا اختار لها اطار جذاب ويعد الى حد كبير جديد جدا وبيصب في هدف الفيلم
    اللي هو من سيربح المليون
    وعمل الخط بتاعه ولد رومانسي بيدور على الحب في وسط كل القرف ده
    وبالرغم انه ما جاتلوش الفرصة انه يرسم كل الشخصيات رسم مكتمل الا انه بيحبهم كلهم
    وكل واحد فيهم له مسحة انسانية
    الفيلم مليان انسانية
    وهو متعاطف مع شخصياته مش بيكرهها

    صحيح ما جاتلوش فرصة يدي نفس المسحة لمامان والراجل التاني اللي ناسية اسمه
    بس اساسا احنا ما كناش محتاجين قوي
    يعني اقصد تعدي لان الفيلم طويل ومافيش وقت لانه يدي تبرير لكل واحد

    بس الاخ مثلا عنده تبريرات كتير قوي
    يعني هو يمكن تجاهل الشخصيات الفلات بس عمق شخصية الاخ بحيث انك تتعاطف معاه من الاول للاخر وما تقدرش تكرهه ولا لحظة بالرغم من كل الشر اللي هو بيعمله

    عمل حدوتة حلوة وانسانية وممتعة
    من غير ما يرخص نفسه ومن غير ما يلعب على غرائز الناس
    ومن غير ما يشيطن شخصياته
    وقال كل اللي هو عايزه بخبث من غير ما يفرض وجهة نظره علينا ويمليها بوضوح

    حتى الحادثة اللي مش منطقية بتاعة استنارة اخوه اللي في الاخر

    تعدي في اطار انه عامله انسان من الاول

    ReplyDelete
  25. Unknown18 March 2009 at 17:38

    نسيت اقول لك حاجة

    انه ادا مسحة انسانية حتى لظابط الشرطة اللي بيعذب جمال

    ReplyDelete
  26. مواطن مصري18 March 2009 at 17:43

    نوار متفق ب النسبة لموضوع سلم دوج


    اما بخصوص
    مش متعاطف خالص مع اي شخصية، ولا حتى البطل، مافيش اي جوانب انسانية للشخصيات خالص



    لو رمزتي في حين ميسرة

    النزعة الانسانية انو لما اخواتة جعانين أتصرف و جابلهم أكل


    يمكن حين ميسرة مصدم للواقع الي هو عايشينة الي هو نفس الواقع الهندي

    ناس أغنياء أويييييي و ناس فقراء أوووووووووييييييييييي

    ReplyDelete
  27. Unknown18 March 2009 at 17:48

    يا سيدي انا مش باتكلم عن الفكرة
    انا باتكلم عن المعالجة

    الشخصيات في حين ميسرة شخصيات شيطانية ومجرمة ومافيهاش اي انسانية خالص

    ثم فيه لوي لعنق الاحداث بشكل مزعج جدا
    وفيه مباشرة فوق التحمل

    ده واحد قرفان رمى قرفه علينا وطرشه في وشنا

    مش مفروض - لو هو فنان - يعمل كده

    ولو هو قرفان قوي كده ومش قادر يتحكم في قرفه

    يفتح مدونة

    ما يعملش فيلم

    ReplyDelete
  28. مواطن مصري18 March 2009 at 17:54

    يعني يا نوارة فلم زي البرىء لعاطف الطيب الي كل شخصيات الفلم شيطانية

    يعمل بقى هو كمان مدونة و فلم هي فوضى تتعمل مدونة


    ما المدونة هي هي السينما بتناقش قضايا كثيرة

    ReplyDelete
  29. Unknown18 March 2009 at 18:02

    البرئ مش شخصياته شيطانية ولا حاجة
    البرئ العسكري اللي بيعذب ويقتل عشان هو مغفل وطيب وغبي

    وعلى كل حال البرئ كويس
    معقول يعني
    بس مش على مستوى سلمدوج مليونير

    هي فوضى ده بقى مش طراش
    ده شخاخ
    واسهال برضه بسبب تلبك معوي

    ReplyDelete
  30. Anonymous18 March 2009 at 18:03

    بصي يا نوارة
    ممكن اشضرحلك انتي ليه حاسة انو الفيلم هندي لانه غالبا الافلام الهندي الي شفناها في التمانينات كانت قايمة علي فكرة و قد يجمع الله الشتيتين بعدما يظنان كل الظن ان لا تلاقبا:) او و تضحكون و تضحك الاقطار بمبالغة فشيخة
    الفكرة عادي مش مشكلة شارلز ديكنز هرا امنا بيها لكن الهنود زودوها اوي
    سلامدوج ميليونير بيلعب علي نفس التيمة الهندي الي اترسخت في مخنا
    a. he 's cheating
    b. he's smart
    c. he's lucky
    d. it was written
    و انا شفت قمة العبقرية انه مفتاح الفيلم في حد ذاته مستقي من قصة الفيلم - من سيربح المليون و اسئلته الاربعة- و الجواب الي في اخر الفيلم هو طبعا
    it was written
    و الجواب ده بياخدنا لفكرة المقدر و المكتوب و ده مفهوم حياة واسع و النتيجة كانت تعدد الاشخصيات و الاحداث و الصدف
    الخلاصة
    كل فيلم هندي مرتبط بالمصير بس مش كل فيلم مرتبط بالمصير يبقي هندي
    الحاجة التانية انا شفت فيلم
    the curious case of benjamin button
    و قبل الحفلة كنت شبه متاكد انه هيلم الجوايز و كنت متاكد و متضايق ..:) يعني لو ماشي ورا المهرجانات كنت هحب الفيلم لاني كنت متاكد انه هو الي هياخد الجوايز
    و علي فكرة هو فيلم فكرته حلوة بس باظت منهم

    ReplyDelete
  31. الكلمة نور18 March 2009 at 18:03

    وربنا ساعات بتقولى درر
    ايه الحكمة دى
    ماشاء الله

    ReplyDelete
  32. مواطن مصري18 March 2009 at 18:05

    شكلك واخدة موقف من العبقري يوسف شاهين و خالد يوسف و مش بعيد يسري نصر الله

    ReplyDelete
  33. Anonymous18 March 2009 at 18:17

    علي فكرة الاخ مش فجاءة بقي كويس الاخ طول الفيلم متناقض زي اي انسان
    هو الي حبسه في الحمام و هو الي سرق الصورة و هو الي دافع عنه لما كانو هيعموه يعني عادي انه فجاءة يتقلب

    ReplyDelete
  34. Anonymous18 March 2009 at 18:24

    yeah
    z music and camera moves it just fantastic . i really enjoy it .
    the most fantastic is the dream come true ... true love can live ... true dream can come true some times u have to work hard other time u need to let the fate say the word . :)
    glad u like it :)
    thanks

    ReplyDelete
  35. Unknown18 March 2009 at 18:26

    احمد بكابيتل ليتر
    :)))

    بص يا سيدي
    انت شكلك واخد موقف من الافلام الهندي

    انا شخصيا مش واخدة نفس الموقف

    انا شايفة ان الفيلم الهندي فيه عناصر كتير قوي جذابة وحلوة ومليانة بهارات زي الاكل بتاعهم

    بس الفيلم الهندي مش فيلم مهرجانات (اقصد الفيلم الهندي التقليدي)
    لان الشطة فيه زيادة عن اللزوم
    بتعمل غازات
    :)
    انا مش عارفة الكلام عن الافلام جاب السيرة دي ليه؟
    هههههههههههه
    كمان رسم الشخصيات وحش
    الكويس كويس بدرجة ميلودرامية
    والوحش وحش ناقص له ديل وشوكة وقرون

    واغاني كتير كتير كتير

    تصوير المآسي جنوني
    ومليان صدف صدف صدف وطول الوقت الابن بيضرب ابوه بالقلم وهو مش عارف انه ابوه والام بتتبرع لابنها بالدم وهي مش عارفة انه ابنها وكدهون يعني

    سلمدوج مليونير

    تحديث للنوع ده من الافلام
    يعني خفف البهارات
    عمل تكا
    مش اكل هندي على ابوه
    اكل هندي للسياح
    بس ال
    root
    واحد

    انا مش واحدة متخصصة ولا حاجة انا واحدة على باب الله

    وبما اني واحدة على باب الله
    مدام اتضايقت من مشهد الاخ وهو بيهرب البنت يبقى المشهد يضايق

    يعني انا ح اشوف الفيلم تاني ان شاء الله

    بس انا باستحضر حالتي وانا باتفرج على الفيلم
    طول ما انا باتفرج متاخدة وفي حالة كده ما بين الوعي وللا وعي
    ولو البيت اتهد عليا وانا باتفرج على الفيلم ما كنتش حسيت

    اول ما الاخ ادا البنت المفتاح فقت وقلت: ايه ده؟

    كده يبقى فيه حاجة غلط

    لكن انا مش معترضة ابدا على التأثر بشخصيات تشارلز ديكنز ابدا

    انا قلت لك مافيهاش حاجة لما يتأثر بيه وحتى قلت لك السينما الامريكاني كلها متأثرة بشكسبير

    من اولها لاخرها

    مش عيب انه يتأثر بتشارلز ديكنز

    وانا متحمسة للفيلم قوي
    كل حاجة فيه عاجباني ما عدا المشهد اللي فوقني اللي قلت لك عليه

    حتى شيطنة شخصية مامان انا قابلاها

    انا سؤالي تقني مائة بالمائة

    ايه اللي خلا لجنة التحكيم تتغاضى عن التفاصيل الصغيرة دي؟

    هل الاختيار المبتكر بتاع من سيربح المليون؟

    هل البراعة في طرح قضايا كتير من غير ما تتوه ولا تزهق؟

    هل الانسانية الشديدة اللي في الفيلم؟

    ده بس كان سؤالي

    مش اعتراض
    بس تساؤل

    ReplyDelete
  36. Unknown18 March 2009 at 18:31

    الكلمة نور

    والله يا فندم تشكر
    بس انا قلت كلام كتير انهي حتة اللي عاجباك


    مواطن
    لا يسري نصر الله كويس

    هو خلل شوية بس كويس

    انونيمس

    هي ليه الموسيقى اخدت جايزة والولد ما اخدش جايزة؟

    انا شايفة ان الطفلين: جمال وسليم
    كانوا يستاهلوا جوايز
    بالذات الطفل اللي عمل دور سليم وهو مراهق

    ReplyDelete
  37. mido18 March 2009 at 18:42

    الفيلم اللى أخد جوايز أوسكار كتير سنة 2007
    اسمه

    NO country for old men

    ده فيلم جميل جدا

    انا عندى الفيلم الهندى بس لسه مشفتوش

    ReplyDelete
  38. Unknown18 March 2009 at 18:44

    اسم الله عليك يا ميدو
    no country for old men
    فيلم عرص بصراحة
    انا نمت وانا باتفرج عليه
    بس هو فيلم مهرجانات
    اقصد يعني معمول حرفيا حلو
    بمعنى ان المشاهد العادي اللي زيي ممكن ينام اه
    لكن مش ممكن في نص الاحداث يقول: ايه ده؟

    ReplyDelete
  39. Unknown18 March 2009 at 18:50

    اه
    والحاجة التانية اللي نكدت عليا وانا باتفرج على سلمدوج مليونير

    غير ان اخوه هربها انه اول ما اداها التليفون توقعت على طول ان البطل ح يطلب الاستعانة بصديق وانها ح ترد عليه

    وكان لسة فاضل كتير على المشهد ده
    يعني فيه مشاهد كتير كانت ما بين مشهد وهي بتاخد التليفون ومشهد استعانته بصديق

    دي حاجة برضه نكدت عليا وفوقتني

    ReplyDelete
  40. Unknown18 March 2009 at 19:16

    اه يا احمد بكابيتال ليتر
    :)

    ايوة اخوه مرسوم بشكل انساني

    لكن فيه حاجة اساسية

    انه هو على طول خط الفيلم هو اللي بيسعى دايما انه يفرق ما بين اخوه وبين البنت
    هو مديله تبريرات انسانية تخليني اعذره طول الوقت
    من اول ما كانت البنت واقفة في المطر وقال له نجيبها فقال له لا دي ح تبقى عبء علينا
    وبعدين عمل نفسه نايم عشان يدي اخوه فرصه انه يجيبها وما رضيش يعرفه انه صاحي عشان لا يتورط في انه يطردها ولا يتورط في انه يوافق على وجودها

    لو عمل النهاية زي البداية كنت ممكن اصدقها اكتر

    زي ان البنت تسرق المفتاح والتليفون وهو يشوفها ويعمل نفسه نايم زي ما عمل اول مرة خالص في الفيلم

    او

    انه كان يعمل مشهد واحد بس يحسسني ان الولد اتهز

    لان طول الفيلم انا متعاطفة مع سليم لانه عايز يعيش
    وبيعمل كل ماهو مشين ومجرم ومقرف بس عشان عايز يعيش
    وده منبع تعاطفي معاه

    عشان ياخد قرار انه خلاص زهق وانه مش ح يلعب اللعبة دي تاني

    لازم كان يعمل مشهد واحد بس احس ان سليم اتهز من جواه وشاف ان الحكاية كلها مش جايبة تمنها

    طبعا انا مش باعدل على السيناريست ولا حاجة

    :)))))

    انا بس باقول لك بوصفي مشاهدة عادية
    اتنكدت من مشهد ضايقني في فيلم عاجبني

    ReplyDelete
  41. Anonymous18 March 2009 at 19:17

    ميدو
    عندك الفيلم الهندي؟؟
    مش فيلم هندييييييييييييييييي
    والله مش هندي
    طيب ما فيلم chocolat في فرنسا يبقي فيلم فرنسي
    و الاب الروحي فيه في امريكا و فيه احداث في ايطاليا ده يبقي ايه انتاج مشترك؟؟؟
    علي كدة فيلم فيفا زلاطة طلع فيلم مكسيكي بقي

    ReplyDelete
  42. Anonymous18 March 2009 at 19:24

    لا يا نوارة مش لازم يعمل مشهد يبين انه سليم اتهز من جواه اقولك ليه
    سليم هو تنويع علي القدر الي انتي قلتي بعضمة لسانك انه دايما كان بيحاول يفرق بين جمال و الحتة بتاعته
    عمركيش شفتي قدر او مصير يكتشف ان الدنيا فانية و متسواش؟؟؟؟

    ReplyDelete
  43. Unknown18 March 2009 at 19:30

    لا انت كده بتحمل الفيلم فوق ما يحتمل وح تجيب للناس تكفير حرام عليك
    :)
    انا قلت كأنه هو القدر ما قلتش هو القدر

    ليه بقى؟
    لانه مات في الاخر
    وموتته كانت اقرب لعملية انتحارية
    فيه قدر بينتحر؟

    ReplyDelete
  44. Unknown18 March 2009 at 19:31

    وبعدين هو مش لازم يغلب الرمزية على المنطقية

    مدام رسم الشخصية بشكل معين لازم يخليها لاخر الفيلم تتصرف بما يتسق مع رسمه ولو عايز يغير سلوكها لازم يعمل لها حاجة تبرر التغيير

    ReplyDelete
  45. Anonymous18 March 2009 at 19:34

    لا مانتحرش.. و عموما انا مقلتش القدر انا قلت تنويعة يعني ماهو مش ممكن هيصورو القدر علي انه كائن هلامي
    هو مجرد تنويعة زي مامان و زي مقد البرنامج الرزل و زي الظابط
    و عموما بلاش تلبسيني تهمة :)
    الله و رسوله اعلم

    ReplyDelete
  46. Anonymous18 March 2009 at 19:39

    الأداء التمثيلي للأطفال في الفيلم كان أفضل من الممثلين الكبار ... الممثله اللي لعبت دور لاتيكا كانت الأسواء من حيث الأداء (بغض النظر عن كونها جميله) أفضل عناصر الفيلم كان السيناريو القوي المترابط... واللي حصل علي جائزة الأوسكارأحسن سيناريو مأخوذ عن روايه كتبها كاتب هندي...
    الفيلم يستحق جميع جوائز الأوسكار التي حصل عيها.. السيناريو، الاخراج، الموسيقي، أفضل أغنية، أفضل فيلم، وثلاث جوائز أخري...
    قصة الحب في الفيلم واللي بتنشأ بين البطل والبطله منذ ان كانا طفلان صغيران، ورغم جميع الصعوبات التي تواجههما الا انهم لا يستسلموا أبدا، وتشعر ان البطل يفعل كل شئ من أجل شخص واحد فقط وهي لاتيكا، ذهب للبرنامج أملا ان تكون من مشاهدينه، أما هي فمغلوبة علي أمرها.

    ReplyDelete
  47. soreal18 March 2009 at 20:14

    my brother recommended the movie to me... if he didnt i would have never watched it :P

    it nice and refreshing, but a bit cheesy for me.

    torrents are the way to go ;)

    ReplyDelete
  48. Anonymous18 March 2009 at 22:25

    إنتى مستغربه ليه إن الفيلم فاز بجوايز أوسكار كثيرة
    الفيلم يستحق فعلاُ

    اولا أظن اننا متفقين ان الفيلم يستحق اوسكار أحسن سيناريو

    وبالنسبة للمخرج فالمخرج عبقرى يستحق أوسكار أحسن مخرج
    عرف يعمل فيلم مميز بميزانية محدودة ويكفيه ان صنع نجوم تمثيل محترفين من مجموعة من الاطفال والمراهقين عمرهم ما مثلو قبل كده

    أما التصوير فدا كان حكاية لوحده ويستحق أوسكار يكفى تشوفى حركة الكاميرا فى مشهد مطاردة الاطفال فى اول الفيلم او مشهد الأطفال فى القطار

    أما الموسيقى التصويرية والأغانى المصاحبة للفيلم فعملها واحد عبقرى أسمه A.R. Rahman
    يستحق اوسكار فعلاً ودى من اكثر الحاجات إلي عجبتنى جدا لدرجة إنى حملتها علشان اسمعها لوحدها رغم إنى مش بحب الأغانى الهندية

    واكيد تجمع كل العناصر دى تخلى الفيلم يستحق اوسكار أحسن فيلم

    على فكره الفيلم واخذ 71 جائزة فى مهرجانات تانية غير جوائز اوسكار
    شوفى كده
    http://www.imdb.com/title/tt1010048/awards

    ومش عارف مين ده إلى يقارن القرف إلى إسمه حين ميسره مع الفيلم ده
    كفايه بس السيناريو المرقع واسلوب الإخراج التجارى الرخيص بتاع حين ميسره

    ReplyDelete
  49. الكلمة نور19 March 2009 at 02:29

    70% من اللى قولتيه عن السينما
    والشخصيات وطبيعتهاوالطبيعه الانسانية لابطال الافلام وطبيعية الحوار كمان ورايك فى حين ميسرة
    ورايك فى الفن
    والتلاتين فى المية الباقيين كلامك عن افلام ماشوفتهاش بس انا غالبا باحب الافلام الهادية
    لان حياة البشر العادية غالبا لو شوفتيها سينما ممكن تملى بعد شوية

    ReplyDelete
  50. Anonymous19 March 2009 at 12:11

    You know dear to give a chance to unknown actor to be a star be sure he will do his best + the role is so simple so touching, but the music when it makes you feel up and down between being happy and being sad add the new rhythm and melody to our ears used to western and American music.
    Here is a link to download the movie music and other interesting indian stuff .. enjoy 
    http://www.bollywoodworld.com/
    thanks

    ReplyDelete
  51. Anonymous20 March 2009 at 06:53

    http://www.sostypasha.com/2009/02/slumdog-millionaire.html

    كتبت بردو ريبورت عن الفيلم :)
    اتمنى تزوريه أستاذتنا

    ReplyDelete

Note: only a member of this blog may post a comment.