ورقة اجابات نظرية ام حلموس

احم
طبعا بسم الله الرحمن الرحيم في الاول
وطبعا اول حاجة الحمد لله رب العالمين والماتش ما كانش سهل لكن الحمد لله رب العالمين بفضل ربنا في الاول وبفضل المدرب والجامهور والحمد لله رب العالمين وطبعا الجون اللي ابي جابته طبعا الحمد لله رب العالمين حسم المباراة لصالحنا واحنا بنشكر امن الاستاد وان شاء الله باذن المباراة الجاية تكون احسن

ورقة الاجابة على امتحان مادة نظرية ام حلموس والله الموفق
النظرية الاولى:

ييييييييييييييييييييي هو انت برضه بتعاني من نفس المشكل؟ بصي يا ستي انا بقى والله نيتي زي اللبن الحليب ولا باركز اللي سايق راجل وللا ست انا بس بعيد عنك خلقي ضيق وباسوق زي سواقين الميكروباظ
وحيث ان شغلي في المساء وحيث ان الطريق من بيتي لشغلي مش هاي واي باي حال من الاحوال اذ انه كوبري اكتوبر فاذن انا باخرج في نفس توقيت لا مؤاخذة التقفيش اذ ان كل شانب وفيتاء بيخرجوا والشانب وفقه الله وسدد خطاه بيبقى مش عارف يركز في الطريق وللا في رجل البت اللي راكبة جنبه، طيب يا سيد ربنا يهنيك برجل البت اللي راكبة جنبك وسع وسيبني انا اروح شغلي

اديله طلاكس صغنتوت كدهون مافيش اقول معلهيش خليها عليكي يا بتش يا نوصة الراجل الله يكون في عونة برضه ارعش له بالنور يبص في المرايا وهو بيميل سنة عشان يوسع لي واول يا اوختشي ما يبص لوشي يروح مزنق عليا
وابدا لا ممكن ابدا يعديني
في الاول كنت فاكراهم بيستحأروني عشان عربيتي ام قسط ربعميت جنيه مصري فقط لا غير
وبعدين ناس عربيتهم احقر من عربيتي وبيعملوا نفس الحكاية قلت لا بقى....يبقى انا اكيد عيني اليمين فيها حاجة غلط او العضمة العليا من الخد الايسر شكلها استفزازي
لحد ما صديق ربنا يستر طريقه قال لي ماهو بيبص في المراية يالاقي واحدة ست عايزة تخطيه ازاي والمزة جنبه؟ ده حتى يبقى شكله وحش قدامها
طبعا انا ما ارضايش يبقى شكله وحش قدام المزة وفلوس البنزين تروح عليه
طب طلاكس...شد شوية يا عم دوس بنزيل خلينا نروح اشغالنا
بالطبع لا
يعني معقولة ح يعطل نفسه عن المهمة الوطنية اللي هو بيأديها؟
انت طبعا عارفة ان لساني ازفر منه مافيش
بس الحقيقة مش عارفة ليه مش باشتم في الشارع....لاروبتن الموضوع محتاج شوية تدريبات
افضل كده محتارة اختار مين فيهم لحد ما ييجي سواق تاكس ربنا يستره ويقعدهوله في عينه وعافيته ويطلع راسه من الشباك: ما تتحرك يا عم الامور

مرة بقى قرقرت اني اتخذ موأف ايجابي رحت بقى مستقتلة وحشرت نفسي شماله ويا يوسع لي يا نلبس في بعض فلقى نفسه منضطر يوسع لي وبعدين موأفه جيدام المزة بجى شين جوي والعالاجة بناتهم بجت واعرة جوي واخدت منحنى خطر هدئ السرعة

اللي كان ماشي يهؤ بالعربية يا اخوتشي فجأتن داس بنزيل وراح جاري ورايا وقعد يزنق عليا كل اللي عرفت اعمله اني قلت له: انت عبيط؟
راح ضاحك ضحكة انتصار واندفع بقوة وسط تشجيع صاخب من المزة اللي جنبه ثم عاد للهأ بالعربية مرة اخرى ووقف الكوبري تاني

عايزة اقعد في الاوضة ادرب نفسي على اني اشتم في الشارع لان الشتيمة في المدونات مش بتجيب النتيجة المرجوة حيث ان في الشارع بيرجع ابوك عند اخوك

النظرية الثانية:
عشان هاذوها النوع من الرجالة اللي انت بتحكي عليه ما عندوش كرامة غير قدام الحيطة الواطية، خلي اي ظابط شرطة يدي له على قفاه ح يقول له بمنتهى الحب والحنان والحنين وعينيه بتقول: كمووووووواااااااااان
طيب ايه اللي خلا هذا الصينف من الذكور يفتكر ان الستات حيطة واطية؟
امممممممممم مش عارفة
يمكن عشان بيبقوا اطول مننا؟
على فكرة، برضه يا اوختشي فيه بنات تجيب للواحد شلل في العصب السابع
تقول لك: انا احب الراجل يبقى شخصيته اقوى من شخصيتي يشخط فيا يضربني ويخوفني
طب ما تختصر وتقول عايزة اتجوز الاشكيف

النظرية الثالثة:
هو انت مش عارفة يا اوختشي انه بيختبر اخلاقها؟

وبعد شوية يسيبها بعد ما تتلبسه روح يوسف واهبل ويتخن صوته ويقول: زي ما اتأخرت معايا برة ممكن تتأخر مع غيري انا كنت باشوف اذا كانت فعلا مش بتتأخر عشان اخلاقها وللا مجرد عشاني
!!!!!!!!!!!!!!!

وبهذه الموناسبة احب اسمعك الاغنية دي:
كنت زيماااااااان راكبة تاكسي ما شانب سائق تاكسي انما ايه؟ جيمس وبوند: مغرق شعره فازلين وشايل اورته كلها بالفتلة عند الحلاق ولابس انسيال فضي وحاطط بارفان ماركة فسا كلاب وقال لي الاتي: اسمحي لي يا انسة اشتشيرك في حاجة بوصفك اخت ليا
(ما تستغربيش المشوار كان طويل فعلا اخد ساعة الا ربع فطبيعي بعد العشرة دي نبقى اخوات)
قلت له اتفضل (انا باحب ارغي مع سواقين التاكسي) قال: دوقت انا كنت ماشي ما بنت مسيبة شعرها وبتحط موناكير وبتلبس قصير ع الركبة ومش بتصلي المهم قلت لها ما ينفعش القصير ولازمن تحطي التحجيبة قامت طولت الجيبة بس مش للاخر يعني..يعني مثلا فوق لا مؤاخذة بز الرجل ببتاع نص شبر كدهون وحطت التحجيبة، طبعا قلت لها ما ينفعش الموناكير مع التحجيبة قامت بطلت تحط موناكير قلت لها ما ينفعش تبقى حاطة التحجيبة وما تصليش قامت بقت تصلي..بس ايه؟ مش اول ما الادان يدن يعني..يعني بعد الادان بنص ساعة كدهون...طب انا اعمل ايه دوقت؟
طبعا حواجبيني لزقت في منبت شعري وانا باسأله: تعمل ايه في ايه يافندم؟

السائق: ماهو حضرتشك انا خايف هي مثلا تفكر ان طبعا البنات مش لاقيين جواز وانا طبعا كعادل وكعريس لقطة اي بنت تتمناني فطبعا تكون بتعمل الحاجات دهين عشان تتجوزني هي ح تلاقي زيي فين؟

قلت له: اه يعني انت خايف تقلع الحجاب وتبطل صلاة بعد ما تتجوزك؟

هو: لا ...ماهو حضرتشك ما تآخذنيش البنات بقت ناصحة دوقت...الكلام ده كان زمان..لكن
طبعا انا كعادل وكعريس لقطة دوقت البت تقول لك انا افضل حاطة التحجيبة واصلي عشان احافظ عليه...وانا مش عارف اعمل ايه دوقت
!!!!!!!!!!!!!!!!!!!
وهنا الجمتني المفاجأة واسقط في يدي ولم اجد ردا يناسب عادل العريس اللقطة غير اني اقول له: اي حتة ع اليمين لو سمحت

هذا والله اعلى واعلم وبه الهداية والتوفيق
شكرا لساعي البريد
وياريت تتوصوا بينا وانتوا بتصلحوا المومتحان ربنا ما يغلب لكوا ثانوي عامية