المحافظة جاااااااااااات

امي..والله انا فخورة اني تربية الست دي ربنا يخليها لي قولوا آمين، امي قالت لي وانت ح تكلمي المحافظة امتى؟ لما تصحي يا كتكوتة الساعة اتنين الضهر؟ هاتي نمرة مديرة المكتب الاعلامي وانا كلمها، المهم كلمتهم وقلبت الدنيا ولقت المحافظ بيتصل بيها بعد شوية، على فكرة دي مش اول دقة جدعنة عبد العظيم وزير يعملها، قبل كده كنت كتبت في الوفد عن عبد المنعم و..آه انتوا ما تعرفوش عبد المنعم صحيح، هو ولد خريج مؤسسة والمفروض ان له حق في شقة وكشك وما عرفش يتصرف ولا يروح ولا ييجي، المهم كتب شكوى ونشرتها له في الوفد قوم مدام عزة من مكتب المحافظ الاعلامي اتصلت وادتهم نمرة عبد المنعم، هو صحيح لما مدام عزة قالت له تعالى بكرة قال لها: انا ما يناسبنيش غير يوم الاتنين لما ارجع من المصيف :) اصله راح يشتغل وينبسط شوية، بس اللي زيه عشان ينبسط لازم يشتغل، على العموم المشكلة في طريقها للحل ان شاء الله
نرجع بقى للمجاري
المحافظ اتصل برئيس الحي ورئيس الحي اتصل بماما وجه بنفسه وجاب عربية تشيل الزبالة اللي مرمية في الصناديق تحت بقالها ردح من الزمن وقال ان موضوع المجاري ده مش مسئولية الحي ده مسئولية مجلس الادارة ومع ذلك قال ح ابعت لكوا عربيات تشفط على ما تحلوا المشكلة، طبعا قبل ما امي تنزل كنت سخنتها على الاخر وقعدت اقول لها: دول اساتذة جامعة؟ دول بيربوا النشء؟ بيعلموا الشباب ايه؟ يعني سويتها تمام وطلعتها من تحت ايدي بتقول يا شر اشتر، لما نزلت قالت لرئيس الحي: ما تعملوا تحقيق وتعدموا بتوع مجلس الادارة، طبعا افكار الاعدام والشنق دي بتاعتي زي ما انتوا عارفين بس انا صدرتها هي، كان ساعتها واقف عضو مجلس ادارة وزعل منها، المهم بعد شوية جالها وقال لها وجهة نظره وبصراحة الراجل معذور
الراجل ده هو ودكتور تاني كل ما يطلبوا جمعية عمومية عشان يعملوا شبكة صرف صحي تانية تصلح الموقف من جذوره قوم الاعضاء ما يجوش، تلات جمعيات عمومية ولا حد فيهم جه، ولا حد فيهم عايز يدفع ولا يلم من السكان مع ان السكان مستعدين يدفعوا قوم الدكتور تفتق ذهنه عن انه يسيب المجاري لحد ما توصل للدور الاربعتاشر عشان يعاقب الكام دكتور اعضاء مجلس الادارة ويخلي كل الناس تتخانق معاهم وتشتمهم يقوموا يتنحرروا، هو حل غريب شوية بس الراجل كان فاض بيه وزهق وبقاله سنين ح يبوس رجل بتوع مجلس الادارة عشان يعقدوا الجمعية العمومية لانه ما يقدرش يلم مبلغ كبير كده الا بموافقة الجمعية العمومية
ماما قالت له طب واحنا ذنبا ايه نعيش في القرف ده؟ وبعدين انا ما عملتش معجزة انا كلمت المحافظ زي اي مواطن انا مش صحفية من اللي بالك فيهم انا مغضوب عليا من الحكومة والمعارضة مع بعض ومع ذلك الراجل كلمني واتصرف ولو اي حد فيكوا كلمه كان ح يتصرف
بس الدكتور كان عايز يعاقب اللي مش عايزين يعقدوا الجمعية العمومية! طب هم ينفع يترفدوا؟ يعني ينفع يقولوا نعمل جمعية عمومية واللي مش ح يحضر يترفد؟ وينطرد من الشقة ويتحط تحت اتوبيس او نركبه عبارة؟
ياريت
المهم انا اخدت لكوا كام فيديو من مرور القاهرة بعد ما اتنظم واتظبط وبقى زي الفل بعد تطبيق قانون المرور، بانزل الفيديوهات اهي وح اوريكوا استنوا عليا