قريب قوي ح يتقبض عليك بتهمة انك اخو بن لادن في الانسانية

الست دي مجرمة اثيمة وقاتلة لئيمة، آه اللي فوق دي، انت بتستهون بيها؟ الست دي اولا متجوزة ابن اخو خالد الشيخ محمد، دي اول تهمة، تاني تهمة..لعلمك الست المستموتة دي واللي بتقول انها اتعذبت بشكل متواصل على مدى خمس سنين حاولت تقتل ظابط امريكاني، آه، كان معاها مسدس واطلقت عليه النار، هو صحيح ربك مع الامريكان جابر وربنا رد كيدها الى نحرها وطب الشرعي بيقول انها هي اللي مصابة وعندها طلقة في قفصها الصدري دلوقت، لكن ده ما يمنعش من انها متهمة بمحاولة قتل ضابط امريكي، آه ح تقول لي بقى الضابط الامريكاني كان رايح يقبض عليها بدون وجه حق، وانه اصلا محتل ومش مفروض يبقى موجود في افغانستان، ثم يعني ضربت كام طلقة مافيش ولا واحدة صابته وهي اللي اتصابت كده على طول وللا عشان هو ضرب عليها نار وخايف من المسائلة فبيتبلى عليها؟....ده منطق؟ ايه منطق الارهابيين ده؟ ده مش منطق ناس عقلانية
الناس العقلانية تقول لك ما تتجوزش حد قريب حد ممكن يطلع قريب حد ارهابي او ح يبقى ارهابي او ممكن يتهم انه ارهابي
اقول لك، ما تتجوزش خالص، حد ضامن حد دلوقت؟ ما يمكن تتجوز واحدة ما شاء الله عليها وعلى اخلاقها ليلاتي سكرانة في فنادق خمس نجوم واهلها بسم الله ما شاء الله امها ست رقاصة محترمة وابوها راجل شفيق محترم وبعدين ابوها يطلع له ابن عم له بنت خالة متجوزة واحد يبقى ابن مرات واحد اخو راجل متجوز واحدة جدها سليمان الحلبي وللا حاجة...حد عارف؟
وبعدين كلنا لادم وادم من تراب يعني كلنا اخوات في الانسانية يعني بالطول بالعرض فيه صلة قرابة بينك وبين واحد من بتوع القاعدة ويمكن اسامة بن لادن ماهو هو ابن ادم وانت ابن ادم يعني انت اخوه شقيقه اهو
طب سلم نفسك بقى المكان محاصر...انت متهم بالانتماء للقاعدة