هو يعني مسلسل نور ده مش زي بقية المسلسلات؟

وبيقولوا الناس في السعودية بقوا يطلقوا نسوانهم عشان عينهم زاغت على النسوان اللي في المسلسل؟
لا معلش واسعة دي
اكيد حالات الطلاق اللي حصلت مالهاش دعوة بالمسلسل، لان قبل المسلسل فيه نانسي عجرم وهيفاء وهبي، ده اولا، ثانيا يعني المسلسل مثلا يفرق كتير عن نوتس لاندينج مثلا؟ فاكرينه؟ يفرق كتير عن الجرئ والجميلات؟ طبعا انا واحد مش باتفرج على مسلسلات فلا شفت ده ولا دهون ولا دوكهمة لكن اهو مسلسل يعني قال وبيقولوا بيبوظ اخلاق الناس، والناس دول اللي هم احنا يعني العرب!!!!!!!! على اساس ان اللي فاتح صالات القمار في اوروبا هم البوركينافاسويين مش العرب، على اساس ان اكتر ناس بتنفع محلات الخمور في السوق الحرة هم الزنزباريين مش العرب، على اساس اننا ناس مؤدبين ومهذبين والعيبة ما تطلعش مننا ناقصة ومستنيين الاتراك هم اللي يبوظوا اخلاقنا
وبعدين يعني الراجل قبل ما يطلق مراته ما بصش في المراية؟ ما شافش نفسه قبل ما يتنمرد على مراته
مش عارفة حاسة ان فيه سر ورا الدعاية الزيادة لمسلسل نور ده..الا هو اسمه نور وللا الواد هو اللي اسمه نور وللا البت؟ نور؟ اه الواد اسمه مهند باين؟
المهم يعني اني شفت صورته وواد ماسخ وبيض وبيقولوا شاذ كمان
والحقيقة انا مش مصدقة الصدمة الحضارية بمسلسل تركي يعني انا حاسة ان ده جزء من الدعاية عشان يخلوا الناس تتفرج اكتر