مدرستي

انا كنت في كلية السلام، بس قبل ما تتحول تجريبي، ما اتحولتش تجريبي غير وانا في اخر سنة في المدرسة، وكنت باحب المدرسة قوي، وفاكرة المدرسين بتوعي اسم اسم، ومادة مادة، وكنت باحب معظمهم
المدرسين والنظار بتوعي كانوا اصلا خريجين المدرسة بتاعتنا من ايام ما كانت "الانجلش ميشين" والمدرسات كلهم كانوا عاملين زي بكيزة، بالذات مدرسات الانجليزي والناظرات.
في الابتدائي كانت الناظرة مسز ليندا، وبعدين مسز فاطمة حيدر، وفي الاعدادي والثانوي كانت مسز عياد والوكيلة كانت ميسز بيشوي وكانت كل يوم تدربنا على الاغاني في الطابور.
وللا مدرسات الموسيقى، كانوا كلهم حلوين قوي، كانت عندنا مسز ليلى زي القمر، وبعدين مسز نيفين دي كانت هابلة، وكل حصة تخلينا نغني اهلا بالعيد، وكان عندنا في الثانوي مسز وداد، الست دي كانت شيك قوي، ورقيقة وبكيزة خالص، عمري ما شفتها لابسة طقم مرتين، والوانها كانت رقيقة، تبص لها عينك ترتاح
اكتر مدرسات كنت باحبهم ويحبوني كانوا مدرسات الانجليزي والفرنساوي
المدرسين الرجالة عمرهم ما حبوني غير سير قيس وسير عادل، وبصراحة كان ليهم حق
المدرس سايب مدرسة الولاد (كان عندنا قسم ولاد في اعدادي وثانوي والابتدائي كان مختلط) اللي هو اصلا متخرج منها وجاي يدرس في مدرسة البنات عشان البنات هادية ومؤدبة وبتصوصو لما بتتكلم
يلاقي قدامه شيطانة يبقى يعمل ايه؟
اولا: قعدت في المدرسة اتناشر سنة، عمري في حياتي ما نزلت على السلم ابدا
لو الفصل في الدور الاول التاني الخامس حتى لازم انزل كل مرة على الترابزين ومسز عياد تشوفني واول ما تشوفني اروح ناطة وجارية وتبعت ورايا المشرفين يلفوا ورايا الحوش كله، واتشعلق على النخل، وانزل تحت عربيات المدرسين لحد ما يغمى على المشرفات من الجري ورايا
ثانيا: لما كنت بابقى في فصل في الدور الارضي عمري ما دخلت ولا خرجت من الباب ابدا، الدخول من الشباك والخروج من الشباك حتى لو المدرس او المدرسة بعتوني اجيب حاجة، قدامهم بمنتهى الثقة انط من الشباك بسرعة وارجع جايبة لهم اللي هم بعتوني عشانه من الشباك برضه وهم يأسوا يقنعوني اني اخرج وادخل من الباب
ثالثا: عمري ما عملت واجب ابدا، ابدا، ابدا، ابدا....لا ياربي حرام..فضلت اعمل الواجب لحد رابعة ابتدائي، بداية من خامسة ابتدائي قررت ما اعملش واجب: ما عملتيش الواجب ليه؟
- عشان انا باقعد تمن ساعات في المدرسة..مش معقولة اروح البيت كمان اعمل الواجب..انا طفلة، يعني من حقي العب واتفرج على الكارتون
- اه طبعا عايزة تلعبي وتفشلي
- طبعا عايزة العب ما انا عندي عشر سنين يعني لو ما لعبتش دلوقت امال ح العب وانا قد حضرتك..
- الله ده انت قليلة الادب..طب اتفضلي على مكتب الوكيلة لحد ما اجيلك بعد الحصة
انزل مكتب الوكيلة، وما يعرفوش ياخدوا مني حق ولا باطل والكلمة بعشرة امثالها وازيد
واول ما احس انهم ح يعملوا لي استدعاء ولي امر استعبط واعيط واقول لهم انا امي وابويا مطلقين وباعاني من تفكك اسري
اقوم اصعب عليهم ويطبطبوا عليا: طب حاولي يا حبيبتي تلاقي لنفسك جو تعملي فيه الواجب
واخرج من عند الوكيلة وانا باكتم الضحكة، والله كانوا طيبين: ايه دخل الطلاق في عمايل الواجب؟ يعني امي وابويا كانوا كاتبين قسيمة الطلاق في كراسة الواجب؟
رابعا: يبقى المدرس وللا المدرسة قاعدين في امان الله بيشرحوا والفصل كله ساكت اروح قايلة تعليق بصوت واطي يسمع اللي حواليا بس قوم كل اللي حواليا يضحكوا وانا قاعدة ساكتة
خامسا: كنت بازهق من القعدة مدة طويلة..في وسط الحصة، فجأتن المدرس يلاقيني متشعلقة في السقف، وللا بانط من الشباك، وللا واقفة على الدسك، وللا اقل حاجة عمالة احرك وافرك واشتته وهو بيشرح
يييييييييييييييييييييييييييييييييييييييي
انا لو كنت مدرسة وعندي عيلة كده والله كنت خنقتها ودفنتها مكانها
انا مش فاهمة كانوا مستحمليني ازاي
ويفضلوا يحايلوا فيا ويكلموني بالراحة وكل حصة يبصوا لي: نوارة تعالي لي في اودة المدرسين بعد الحصة
ويفضلوا يتكلموا معايا
مافيش حد نجح معايا غير مدام اميرة بتاعة الفرنساوي
قالت لي انت مش ح تقومي من هنا غير لما تديني وعد انك مش ح تتكلمي في حصتي ولا ح تتشاقي تاني
- والله يا ميس
- انا مش باحب الحلفان..انا عايزة كلمة شرف
بارول د`نوور..سا فا؟
- سا فا مدام..
وسبحان الله يا اخي...بارول د'نوور ...ما اتكلمتش لاخر السنة في حصتها
انا مش ناسياهم ابدا، خصوصا انها بعد كل حصة تناديني وتقول لي: انا باحترمك يا نوارة
مش ناسية اي حد فيهم، ولا ناسية انهم صبروا عليا وانا كنت اشقى بنت في المدرسة وكان سير عادل يقول لي ح نوديكي مدرسة البويز...اقول له: يا ريت..يمكن الاقي عريس
:)
مافيش مدرسين سخفا مروا عليا وفعلا بقى مش لاقية له عذر غير سير احمد بتاع العربي
وطبعا ميس ناهد بتاعة العربي برضه اللي اتسببت في عقدة حياتي، ازاي بقى:
كنا في سنة اولى ابتدائي وكلنا بنبدل ثنانا القدمانية
كان فيه بنت معانا كلبوظة وخدودها حمرا ومدورة وشعرها اثفر، وفيه واد كان شبه علي الشريف، اه والله علي الشريف بس عنده ثت ثنين، المهم الواد علي الشريف باس البت الكلبوظة في خدها
وع اللي جرا من مراسيلك
ميس ناهد طلعتهم برة قدام الفصل وتقمصت شخصية زكي رستم:
يا سافل يا مجرم...وانت كمان سافلة انك تسمحي له بكده...الولد ما يعيبوش حاجة..لكن انت بنت لازم تحافظي على سمعتك...الازاز لما بيتكسر بيتصلح؟ السمعة لما بتروح ما بترجعش تاني
واحنا قاعدين نسرسع في نفس واحد: عملوا ايه يا ميث..عملوا ايه يا ميث؟
راحت باصة لنا وهي بتنطر قصتها:بـ...بـ...بـ...باسها
رحنا احنا طبعا - مع اننا كنا شايفينه وما حسناش ان فيه حاجة - اول ما قالت كده قلنا: هيييييييييييييييه
وحطينا ايدينا على بقنا
تخيلوا الحكاية دي معقداني انا، امال البت المكلبظة والواد علي الشريف عملت فيهم ايه؟ دول زمانهم في مصحة نفسية لحد دلوقت
مستر احمد ده بقى كان راجل رخم وكان بيضربني كتير ومستقصدني فعلا
مستقصدني بمعنى انه ما كانش بيستحملني زي ما انا متعودة ان بقية المدرسين يستحملوني
بس هو ما كانش خريج المدرسة بتاعتنا، وانا كان عندي احساس ان اللي مش خريج المدرسة بتاعتنا يبقى اكيد بيكرهنا كلنا، طبعا مافيش حاجة كده، بس احنا كان عندنا انتماء للمدرسة نقله لينا المدرسين اللي معظمهم خريجين المدرسة.
في اخر سنة، ثانوية عامية، المدرسة اتحولت تجريبي، الحكومة خدتها، سوزان خدتها، ومشيت ميسز عياد، لسة فاكرة والبنات كلهم كلهم، وانا اولهم، ملمومين حوالين مسز عياد اللي كنت باجننها وباخلي المشرفين بتوعها يجروا ورايا الحوش كله، وكلنا قلبنا ح ينط من مكانه من كتر العياط، وانا ماسكة فيها وباقول لها ما تسيبناش يا ميسز عياد...والست عمالة تكتم العياط..طول عمرها في المدرسة دي من وهي عندها خمس سنين لحد ما كانت اياميها فوق الستين - المدارس الخاصة اللي اصلها ارسالية كانت بتطنش حكاية بلوغ سن المعاش دي مالم الموظف نفسه يقول مش عايز اشتغل - ومسز بشوي اللي كانت بتغني لنا مشيت، وبعد ما هم مشيوا...جابوا لنا ناظرة...اعوذ بالله، كانت تدخل على المدرسين وهم بيدوا الحصة ازاي؟ طول عمرنا ميسز عياد لما تحب تعدي على الفصل الاول تبعت المشرفة تخبط على الباب وتقول للمدرس او المدرسة قدامنا: ميسز عياد بتستأذن انها تمر على الفصل، والمدرسة او المدرس يقولوا لها خليها تتفضل
الناظرة الجديدة دي كانت تزق الباب برجلها من غير ما تخبط
اه والله العظيم من غير ما تخبط وفجأة نلاقيها، يمكن الصدمة اللي حصلت لنا من الاسلوب ده في الادارة كانت اكبر من الصدمة اللي حصلت للمدرسين نفسهم
انا فاكرة انها مرة عملت كده راح الفصل كله معيط...كلنا بلا استثناء، وفيه بنت كانت بتبحث معانا انها تكلم الناظرة وتفهمها ان كده عيب قوي انها تدخل من غير ما تخبط: يمكن مش عارفة...او يمكن مامتها ما قالتلهاش
:)
بس احنا اثنيناها عن عزمها: دي كبيرة، يعني اكيد حد قال لها.
وجابوا لنا وكيل مدرسة بدل ميسز بشوي وميسز امال يهزأنا في الطابور
انا فاكرة ميسز امال دي ما كانش حد بيحبها لانها مرة زقت بنت في كتفها في الطابور، والبنت جابت باباها وكانت كارثة وكنا بنبص لميسز امال دي بصة مش ولابد، عيب حد يزق حد في كتفه
خصوصا اننا بداية من اولى اعدادي مافيش ضرب
كان فيه ضرب في ابتدائي بالمسطرة، بس من اولى اعدادي البنات ما تنضربش
عشان كده الحكومة قالت ان المدرسة فاسدة وانهم بيبوظوا العيال، مع اننا كانت نتايجنا حلوة جدا وعمرنا ما كان عندنا نسبة سقوط ابدا، ولا واحد في المية حتى، انا عمري ما شفت بنت ولا ولد عادوا السنة عندنا
غير بنت واحدة بس في طول الاتناشر سنة اللي كنت فيها في المدرسة
بعد ما ميسز عياد وميسز بشوي وحتى مسز امال مشيوا
ابتدا المدرسين اللي قضوا حياتهم كلها في المدرسة من سن خمس سنين لحد ما كبروا يمشوا واحد ورا التاني وواحدة ورا التانية
وبقت حصة الموسيقى مش موجودة
ومدرسات الموسيقى الحلوين مشيوا
ومدرسات الرسم
- على فكرة احنا مرة جبنا لمدرسة الرسم كومة سكر من كتر شقاوتنا -
كلهم فضلوا يمشوا
ومش عارفة بقي منهم حد وللا لا؟
نفسي اروح ادخل المدرسة واعرف بقت عاملة ازاي دلوقت لما سوزي اخدتها
احنا صحيح المدرسة كانت خاصة قبل ما سوزي تاخدها لكن برضه كانت تابعة للحكومة، بدليل سموها السلام يعني، انا فاكرة اني كنت باحب المدرسة قوي وما كرهتهاش غير لما سوزي اخدتها
يا ترى العيال اللي فيها دلوقت بيحبوها زي ما انا كنت باحبها؟
ويا ترى المدرسين بتوعي اللي انا فاكراهم واحد واحد من اول ما دخلت المدرسة لحد ثانوية عامة يا ترى عاملين ايه؟ انا بادعي لهم يجزيهم عني الخير عشان استحملوني، وعلموني - بالحب والصبر - حاجات عمري ما كنت ح اتعلمها بالعنف والضرب