ايه بقى؟ انتوا ح تخلونا ندافع عن عبد الناصر وللا ايه؟

استغفر الله العظيم يارب، في زمن الهزائم، الخيانة وجهة نظر، والذل خيار استراتيجي، وثوابت الامة فيها نظر، وتاريخها يتشوه، وجواهرها تترمي في الزبالة، وزبالة العدو تتلبس عقد حوالين الرقبة
ايه يا ناس هو فيه ايه؟ ايه اللي بيحصل؟ مالها برامج التلافزيون المصري؟ ومالها الجرايد ومالهم السادة الكتاب الافاضل؟ مالهم؟
انتوا ح تضطرونا ندافع عن عبد الناصر وللا ايه؟ ايه المصيبة دي؟
انا صخصيا تحفظاتي كتير قوي على عبد الناصر انا ما باحبوش، بس ملخص تحفظاتي في الغنوة دي: ما كانش والله العشم، تعمل كده يا حسين، واللي بنيته اتهدم، وراح في غمضة عين يا حسين، يا حسين يا حسين يا حسين
على اساس انه كان مفروض في قانون الاصلاح الزراعي يسن قوانين ويحط نظام ما يخرش المية وما يسمحش لاي حد ييجي بعديه انه ينتزع الملكية من الفلاحين
وانه يحط سيستم ما يسمحش لاي حد يبهدل العمال بعد ما هو يموت
وانه لما عمل مجانية التعليم كان مفروض يسن قوانين ويحط برضه سيستم صارم يحافظ بيه على الكيف اللي بيتعلموه الكم الكبير اللي هو فتح قدامهم باب التعليم
وان دور مصر القومي انها تساند العرب ضد الاحتلال مش انها تساهم في حروب اهلية وان حرب اليمن انهكت الجيش
وانه انشغل بالجبهة الداخلية ورمى الجيش على واحد هو عارف كويس انه سكرانجي ونسوانجي، الله يرحمه بقى هو حر في حياته الشخصية بس ما كانش ينفع يبقى مشير
وما كانش ينفع اللي يشرف على قانون الاصلاح الزراعي يبقى واحد كان بيجري حافي ورا عربيات الرش وفي ظرف كام سنة بقى من اعيان المنوفية وعبد الناصر يطنش ويعمل مش واخد باله
وانه اوكل المهام لاهل الثقة مش اهل الكفاءة، واهل ثقته هو، ماهماش اهل الثقة على الاطلاق
وانه فيما يخص الحريات ساوى ما بين العملاء اللي كانوا هواهم مع الاحتلال والنظام البائد، وما بين ناس فعلا مخلصة وكل جريمتها انها كانت بتقدم نصيحة لقيادات الثورة عشان تدفع في الاتجاه الصحيح
ومع الوضع في الاعتبار انه من رابع المستحيلات فتح باب الحريات على المصراعيه في ظرف حروب وثورة وتربص دولي، بس ما كانش فيه داعي ابدا لاستخدام التعذيب، وما كانش فيه داعي لاعتقال الاخوان والشيوعيين وكأنهم مثلا زيهم زي الاقطاعيين واليهود اللي فعلا عدد كبير منهم لو ما كانش جاسوس يبقى على الاقل متعاطف مع اسرائيل وما حاربش معانا ضدها، الاخوان والشيوعيين كان ممكن احتواءهم او الوصول لحلول وسط، وجرا ايه لما يسمع نصايحهم هم فعلا كانوا مخلصين، او على الاقل ناس كتير منهم كانوا مخلصين
باختصار، حالة الفوضى وحب الذات اللي كان مسيطر على شخص عبد الناصر، واللي كان بيخليه، لانه برج الجدي، يحب يبقى تحت الاضواء لوحده ومش عايز الناس تحب حد غيره، عامل زي الراجل الغيار اللي مش عايز مراته تبص من الشباك، وممكن يقتل البواب عشان طلع لها اتنين كيلو قوطة
او عامل زي البطل التراجيدي اللي فيه سمات النبل لكن عنده خطأ في شخصيته هو اللي بيسبب سقوطه
لكن لما توصل الحكاية ان عبد الناصر يتشتم في التلفزيونات وفي بعض الصحف ومن بعض الكتاب عشان:
علم ولاد البوابين ومجانية التعليم هي السبب في ابن الجعان يمسك منصب ويرتشي
والفلاح بقى يعلم ولاده ويدخلهم الجامعة وده اثر على كفاءة الفلاح في الزراعة
وظلم الاقطاعيين وشوه صورتهم ومش كل البشوات كانوا وحشين
وتقسيم الاراضي لخمس فدادين هو اللي قضى على الزراعة
واحنا مالنا ومال فلسطين ومالنا ومال العرب يحشرنا في الحاجات دي ليه؟
ومالها الامتيازات الاجنبية مصر كانت كوزموبوليتان وهو لغى الامتيازات وطرد الاجانب اللي كانوا منضفين البلد
وطول عمر الدنيا فيها غني وفقير يعني ايه عايز يساوي بين الناس مافيش حاجة اسمها كده
وفتح عينين الفلاحين والعمال وخلاهم بقى عندهم حقد وبقى البواب يبوأ في صاحب العمارة
وفين ايام البشوات ولاد الاصول وايام الملك اللي كان فيه حرية حقيقية
كحك
كحك
كحك
ده معناتو ايه الكلام ده؟ ده مؤشر خطير جدا، معناه اننا اتكسرنا من جوانا
يعني ايه ايام الملك كانت احسن، ايام الملك كان فيه احتلال ماكانش فيه حرية، وكانت المفاضلة ما بين الانجليز والالمان
وبعدين ايه كلام الجرابيع ده؟
ده كلام جرابيع وناس قليلة الادب، ده كلام ولاد اصول ده؟ ولاد الاصول يقولوا لا تعلموا اولاد السفلة العلم؟ اولاد السفلة هم اللي يقولوا الكلام ده
اللي ابن اصل فعلا ومتربي على انه يحترم نفسه واهله واصله المفروض انه بيحترم كل الناس
وايه حكاية البشوات كان فيهم طيبين ومش كلهم شريرين، انا مالي شريرين وللا طيبين
دي حاجة المفروض انها لا تعني الناس اللي بتتعامل معاه في شغل، دي حاجة تعني مراته وعياله
مش مفروض اصلا السيستم يحط المستأجر تحت رحمة المالك، والاجري تحت رحمة المستأجر وهو ونصيبه بقى يا يطلع طيب وبيعزم عليه باللي يفيض منه يا يطلع ابن كلب ويدفن اللحمة عشان الفلاح ما يتسعرش
ويعني ايه الناس مش زي بعض؟ وطول عمر فيه اغنيا وفقرا
يعني اللي بيتكلم كده ما اخدش اقتصاد في المدرسة؟ وللا كان مختار احصا؟
ما يعرفش انك ممكن تعيش شحات حتى لو بتقبض عشرتلاف جنيه في الشهر اذا كانت الفروق بين الطبقات كبيرة قوي زي ماهي عندنا دلوقت؟
ولاد الاصول كانوا بيربطوا الفلاح في الشجرة ويضربوه بالكرباج مش عشان هو بهيم، بس عشان شكله وعيشته بتفكرهم بانهم حرامية وانهم مش مستحقين للارض دي وانهم اخدوها عشان اتعاونوا مع الانجليز وللا عشان جدهم كان ناظر زراعة وبيخنصر من الفلوس ويحوش عشان يشتري ارض وانه كبرها بالبهتان والظلم، او عشان جدهم كان تركي عاطل هاجر مصر عشان يبقى من الاعيان، او عشان جدهم كان اراجوز بيضحك الخديوي وعشان كده الخديوي انعم عليه بالبشاوية والارض
او عشان، ببساطة، هم يقدروا يعملوا كده وما حدش يحاسبهم، مافيش قانون ولا نظام يوقفهم عند حدهم ويضمن للمستأجر والاجري انه ياخد حقه، او العامل اللي ايده تتقطع وهو بيشتغل انه يتعوض
ويا اخي مافيش اعجب من اللي بيدافعوا عن وجود الامتيازات الاجنبية ويرجعوا يعيطوا على الاستثمارات الاجنبية اللي موجودة دلوقت واللي تسببت في انهيار الاقتصاد المصري وزيادة البطالة وغياب التنمية وغلاء اسعار الاراضي ومواد البناء، طب ما دي زي دي...وللا هي غباوة وخلاص؟ مزاج يعني؟
وايه حكاية دخلنا في اللي مالناش فيه دي؟ ايه الكلام الغبي ده؟ ازاي مالناش فيه؟ وازاي مصر كانت ح تنتصر على الاحتلال لو كانت محاطة بدول محتلة من كل ناحية، وازاي مصر تقدر يبقى لها سعر لو ما لهاش دور اقليمي، زي ماحاصل لنا دلوقت، البنك الدولي بيبيع ويشتري فينا، لاننا مالناش اي امتداد في العالم العربي ولاننا انعزلنا وما بقاش لينا دور
في بنود اتفاقية كامب ديفيد مكتوب ان دور مصر في المنطقة يقتصر على المساعدة في عمليات السلام اللي بين اسرائيل وبين بقية الدول العربية، لكن في حالات الصراع مصر مالهاش اي دور
(ارجع لكتاب سلام لا فصل عنصري بتاع جيمي كارتر الاهبل)
وعليه فالاتفاقية لم تحيد مصر، وانما اخدتها للانحياز لاسرائيل،طب بالمخ كده، باي مخ في الدنيا مهما كان محاط بمقالب زبالة، ادي احنا اتعاملنا مع اسرائيل اقتصاديا وانحازنا ليها سياسيا، ايه اللي اخدناه؟
السؤال المطروح: اخدنا ايه من فلسطين ومن العرب؟ له اجابات كتير
السؤال اللي مالوش غير اجابات مخزية وتعر وتكسف: اخدنا ايه من السلام مع اسرائيل؟
تلاتين سنة، لو كنا عايشينهم تحت القصف ما كناش خسرنا اللي خسرناه من كل جهة
ايه الجنان ده؟ ثم مين قال ان عبد الناصر كان راديكالي؟ عبد الناصر وقع اتفاقية روجرز واعترف بحدود آمنة معترف بها لاسرائيل وفقا لقرار 242 اللي احنا لايدين عليه دلوقت
بس ما كانش ح يخطي خطوة من غير ما يبقى معاه كل العرب، مش اعمل شغل منايفة واخلع من الناس اللي معايا واروح اخلي اليهود والامريكان يضحكوا عليا ويستهبلوني ويقولوا لي: ح اجوزك هنومة يا قناوي يابني...قوم يا قناوي البس بدلة الفرح، وتطلع بدلة الفرح قميص الكتاف عشان يودوني مستشفى المجانين (ارجع للمصدر السابق)
السؤال بقى: ايه اللي بيخلي الاعلام الحكومي يلح في نقطة ايام الملك كانت احسن من بعد الثورة؟
مش ممكن عشان التوريث بس
فيه حاجة...ايام الملك اللي هي ايام الاحتلال يعني
ايه؟ امريكا ناوية تفرض الحماية..تاني؟ حماية اكتر من كده يعني؟