زهقت...انا عرفت شاهيناز اطلقت ليه

انا ما اقدرش استحمل راجل رغاي كده واللي يقوله يعيده واللي يعيده يزيده وما بيردش على الاسئلة لحد ما دوخ منى ودماغها لفت لحد ما قالت لسليمان جودة: ده استاذ سليمان قوي يا سؤال واسع..وكل ما تسأله سؤال، يجيب لها من اول ما ربنا نزل الحديد، انت ليه رافض الغرامة؟ - ما انا ح اقول لك..انا جاي لك جاي لك، بصي...سنة ستين كانت ابويا ماسك شركة توزيع الحديد....ويفضل يرغي يرغي يرغي ويقول لنا حسبة برما وكلام ما حدش فاهمه والبنية تقول له: ياراجل جاوب على سؤالي...ابدا
وبعدين امي ما خلتنيش اعرف اركز، اول ما طلع قعدت تقول: يا مامي...شكله يخوف قوي يا نوارة...
- ما تخافيش يا ماما
- لا شكله غريب...جسمه صغير وراسه كبيرة
- يا ماما خلقة ربنا...
- انا ما قلتش حاجة بس انا خايفة...هم ليه عاملين له البدلة دي؟ ليه مش لابس بدلة تعرض كتافه
وبعدين اسمعه بيرغي يرغي يرغي
وبعدين ماما تدخل: على فكرة مناخيره مش لايقة على بقه...
- طيب يا ماما...خلاص
وبعدين اسمعه يرغي يرغي يرغي
ماما: على فكرة ايديه مش لايقة ليه على راسه
- يا ماما خلقة ربنا
- انا خايفة
- ما تخافيش يا ماما ده في التلفزيون مش ح ييجي هنا في البيت
- هي منى بتبص له بقرف ليه؟
وبعدين قامت وهي بتقول: هم ليه ح يخلوه يصعب عليا؟ وعرفت اكمل بقية الحلقة
فيه كام سؤال اتسألوا وكنت عايزة اعرف اجابتهم، انا واحدة صاحبة علي علوكة واشرف كخة ومخي على قدي:
- انت محتكر الحديد ليه؟ ولما انت مش محتكره امال ايه سبب ارتفاع سعر الحديد؟
- ايه سر القانون الغريب اللي مرره مجلس الشعب واللي ما يخدمش حد غيرك انت بس بوضع حد اقصى لغرامة جريمة احتكار وهي تلتميت مليون يعني تدفعهم بصباع رجلك الصغير وكمان عدم اعفاء المبلغ عن الجريمة من العقوبة؟ انت اللي وراه وللا لا؟
- ايه علاقتك بجمال مبارك؟
- ازاي تجمع ما بين السلطة والمال ونضمن نزاهتك؟
- انت ليه متعالي على الناس؟ وعلى الصحافة؟ وايه سر انك فجأتن قررت تظهر في الاعلام والصحافة بعد ما قال: انا لا احترم الصحفيين؟
- حجم ثروتك قد ايه قبل انتماءك للحزب وبعده ما تنتمي للحزب؟
- ايه اللي خلاك تدخل الحزب الوطني اصلا؟
دي اسئلة اتسألت
حد سمعه بيجاوب عليها؟ معلش انا ح اروح اغسل ودني عشان والنبي ما سمعت الاجابة، انا سمعت خير اللهم اجعله خير كلام كتير مترصص جنب بعضه وما فهمتش منه حاجة غير انه عايز اعماله تبقى في ميزان حسانته
اللهم صلي ع النبي
اللهم قوي ايمانك يا اخ عز
وكل ما تقول له حاجة يقول لها اصل ده محتاج قوانين، تقول له طب مش بتعملوها ليه؟ يقول لها لسة ما حانش الوقت
لسة ما حانش الوقت لايه؟
لسة ما حانش الوقت ان اللي بيدفعوا ضرايب يتلقوا بيها خدمات وما تروحش لخدمة رجال الاعمال؟
لسة ما حانش الوقت للتوقف عن اصدار قوانين تخدم رجال الاعمال على حساب الشعب كله؟
لسة ما حانش الوقت على ان رجال الاعمال يشاركوا ولو بجزء بسيط في التنمية والمشاريع اللي بيعملوها تنفع اي حد في الدنيا غيرهم؟
لسة ما حانش الوقت على اننا نعرف بالظبط فلوسهم جات منين وبتزيد ازاي وبتروح فين وبيدفعوا ضرايب وللا لا ولما بيدفعوها بتروح فين؟ وليه هم كده وبقية الشعب كده؟ امريكا ايه؟ امريكا نسبة الطبقة المتوسطة العليا فيها حوالي ستين في المية، يعني اكتر من نص الشعب طبقة متوسطة عليا عندهم بيوت وعربيات، وطبعا الطبقة المتوسطة العليا اللي هناك مش مقلحفة زي اللي هنا
لسة ما حانش الوقت انه يا اما يتم الفصل ما بين خدمة الشعب في السلطة وما بين خدمة المصالح الشخصية في البزنس او على الاقل يتحط قوانين تراقبهم؟
لسة ما حانش الوقت لانهم يبطلوا يمصوا دمنا لما نشف؟
لسة ما حانش الوقت
طب ح يحين امتى؟ السنة الجاية؟ القرن الجاي؟ الالفية الجاية؟ امتى؟
اللي اعرفه ان العدالة وحقوق الناس دايما معادهم دلوقت حالا
بس شاهيناز فلتت بدماغها على فكرة ده تلاقيه اكل ودانها، ومنى النهاردة وهي خارجة ح تلبس في الباب من كتر ما داخت من لفه ودورانه ، المنوفية ولادة يا ولاد
وفي نهاية البرنامج احب اسمع اغنية سيد الحبايب يا حنانانا ننة
وسيخ نفسك بحديد عز