هي دي اوروبا يا هابلة؟ كحك

بقى الانتحار الاورومبي اجتمع عن بكرة ابيه

عشان يفصل في قضية الخلق

مش الخلق اللي هم يا خلق هو يا ناس ياهو

لا الخلق اللي هو الخلق يعني الدنيا اتخلقت ازاي

وتقرر في نهاية الاجتماع باغلبية ساحقة ماحقة رفض فكرة وحدانية الخالق

لانها ضد العلم وضد

"حقوق الإنسان"

في البحث العلمي

كحك

مش بتاع العيد

كحك تاني

ام الهبل بقى كده دخلنا في الهبل بجد يعني وكده يعني

اعضاء الانتحار الاورومبي بيشربوا طافية عاملة لهم دماغ وسخة

الانتحار الاورومبي قال ان العقل والمنطق والنظريات العلمية

بتؤكد تعدد الآلهة

بل وإن الانتحار الاورومبي طالب بإلغاء تدريس نظرية وحدانية الخالق

من المناهج لانها ضد حروق اللسان

والدليل على إن العالم اتخلق بآلهة كتير نظرية أصل الأنواع

!!!!!!!!!!!!

لا بجد حد يشرح لي فعلا لربتن أنا واحدة بافك الخط بصعوبة

يعني إيه دخل فينوس وأثينا وأولمبس وزيوس في نظرية أصل الأنواع؟

أساسا أساسا أوربما دي تولع بجاز وسخ ومليان صراصير كمان

ياللا في داهية عقبال امريكا

المشكلة مش فيهم وربنا

المشكلة فينا احنا

ايه بقى

بما اننا عادة دلاديل الخواجات بعيونهم الزرق وشعرهم الاصفر

السايح النايح على خلقتهم وخلقة اللي خلفوهم

فطبعا طبعا ح تلاقي كام نسناس طالع لنا يقول لنا

أعل هبل...ويحك يابن حلزة هل صبأت عن دين أباك

آآآآآمووووووون آآآآآآآآآآموووووووووون رب الأرباب

ويحطوا لنا تمثال "الإله" ست في ميدان رمسيس

والناس بدل ما تروح السيدة زينب

تروح وادي الملوك وتقول: يام حورس يقعد لها في عينها وعافيتها

يا أوزوريس سايقة عليك حبيبك بتاح لتقطم لي وسط ضرتي

ويحطوا بقى الأصنام بتاعتهم ويلفوا حواليها وهم بيغنوا

نحن غرابة عبس عبس

ويمشوا الرجالة عندنا في مصر لابسين جيبة وصندل وطرحة

والستات تمشي لابسة جيبة بس ومضفرة شعرها ضفاير صغننة

وعاملة عنيها بالكحل ابو شرطة

ويعملوا في السعودية دار الندوة تاني ويتخنوا حواجبهم

ويملوا دقنهم رز: ألا تستحم يا رجل

يا إلهي صب عليهم غضبك

أيييييييي شلت يدي

هاهاهاها إنها سليمة

ويطلع لهم الشيطان في دار الندوة دقنه حمرا ولابس احمر

ولو اتجرأ حد فينا وقال ياخونا لا إله إلا الله

ح يقولوا يا جاهل يا متخلف يا رجعي

في أوروبا والدول المتقدمة بيعبدوا آلهة كتير

ثراء

علم

تقدم

مش انت اللي قافش في إله واحد ما عندكش غيره

يا فقري يا مقشفر

ونعمل بقى آلهة بالعجوة وناكلها

ونرمي عروسة للنيل مع فارق بسيط ان العروسة ح تاكلها

المجاري والبلهارسيا

مش التماسيح

ويجيبوا صفافير توت تتوت تووووت توت تتوت توووووت

ويلفوا بيها حوالين الكعبة وهم بيصقفوا

وبما إن تجارة الرقيق رجعت من تاني ف حيعملوا سوق للنخاسة

ارقصي يا جارية ارقصي

إفففففففففففف هو أنا اتكتب عليا اجي في الزمن ده وأشوف كل نبوءات سيدنا محمد بتتحقق:

لا يذهب الليل والنهار حتى تعبد اللات والعزى . فقلت : يا رسول الله ! إن كنت لأظن حين أنزل الله : { هو الذي أرسل رسوله بالهدى ودين الحق ليظهره على الدين كله ولو كره المشركون } [ 9 / التوبة / 33 ] و [ 61 / الصف / 9 ] أن ذلك تاما قال : إنه سيكون من ذلك ما شاء الله . ثم يبعث الله ريحا طيبة . فتوفى كل من في قلبه مثقال حبة خردل من إيمان . فيبقى من لا خير فيه . فيرجعون إلى دين آبائهم

(رواه مسلم)

طيب إيه النظام؟

الريح الطيبة دي مش عايزة تيجي ليه؟

والله أنا مؤمنة

أهو

لا إله إلا الله محمد رسول الله

لا إله إلا الله محمد رسول الله

لا إله إلا الله وحده لا شريك له ملك وله الحمد وهو على كل شيء قدير

تعالي بقى يا ريح يا طيبة الله يكرمك

قبل ما اتجنن ويرفع عني القلم

اوروبا اتهبلت يا جدعان

انا ح اغير اسم المدونة واسميها جبهة ست العاقلين الشعبية

اذا كان اعضاء الانتحار الاورومبي ده عمرهم العقلي يبقى انا

بيدبا الفيلسوف

==

تحديث بس عشان ما حدش يخنقني بسفسطاط

أنا كمسلمة مافيش تعارض مابين إيماني والقرآن وما بين نظرية داروين بتاتا

هي صحيح تظل نظرية

بس القرآن مافيهوش تفصيل يقطع بكيفية الخلق ومدة عملية الخلق

ومافيهوش أي جزم تفصيلي يقطع الطريق على العلماء إنهم يبحثوا في نشأة البشر

ويجربوا في النظريات ويخطئوا ويصيبوا ويفضلوا محتفظين بإيمانهم

في حال ما إذا كانوا مسلمين يعني

فياريت يعني احنا مالناش دعوة بالمولد اللي هم عاملينه

لكن إصرار الانتحار الاورومبي على إن نظرية داروين بتؤكد إن مافيش ربنا واحد

ده إصرار سريالي شوية

====

نص المشروع بالانجليزي اهو

http://assembly.coe.int/Main.asp?link=/Documents/WorkingDocs/Doc07/EDOC11297.htm

المشروع بيقول ان نظرية "الخلق" اللي بتقول ان

superior intelligence

هو اللي خلق العالم

- وده طبعا مقصود بيه ربنا -

النظرية دي مش علمية ومافيش عليها دليل علمي

والتقرير ذكر ان المسلمين والمسيحيين هم المصرين على فكرة القوة الخارقة

هي اللي خالقة العالم وان كلامهم مش علمي

والغريب ان التقرير ما جابش سيرة اليهود

هم اليهود مش مؤمنين بربنا زي المسلمين والمسيحيين يعني وللا ايه؟

اشمعنى يعني المسلمين والمسيحيين اللي اتشتموا؟

وانا عارفة وقلت ان زنوج المنازل ح يطلعوا لنا ويبغبغوا ورا اوروبا طبعا

ما هو اصلنا عاملين زي صدى الصوت

وواحد مش هامه في كل حياته غير الفراعنة اللي ماتوا من الاف السنين

والسعودية اللي بتطلع له في الضلمة

ايه دخل السعودية دلوقت وللا هو اي هبش في الكلام وخلاص؟

وبالمناسبة الفرس شعرهم ناعم

:)

الفراعنة هم اللي كرت

ومش معنى ان جدودي فراعنة اني اعبد امون رع

واللي عايز يعبد امون رع يغور في داهية معاه

وايه بقى الكلام العلمي اللي احنا محتاجينه دلوقت

اننا ندرس في المدارس ان مافيش دليل علمي على ربنا؟

طب ياللا في داهية

التقرير ما ذكرش زيوس صحيح

بس قال ان فكرة ان قوة واحدة بس هي اللي خلقت العالم دي فكرة

ضد نظرية التطور ومش علمية وضد حقوق الانسان

وزي ما قلت كنت متوقعة بغبغانات تقول ورا اوروبا اللي هي بتقوله

بس ما كنتش متوقعاهم بالسرعة دي