الظاهر بقى إيران هي راخرة ح تنضرب
والظاهر بقى العرب ح يستخرجوا أوسخ ما في ندالتهم معاها
كالعادة
والظاهر بقى سوريا ح تتشقلط هي كمان
والظاهر بقى إن العرب مش ح يبقوا موجودين أساسا عشان يستندلوا مع سوريا
والظاهر بقى إننا نستاهل كده وأكتر من كده
والظاهر بقى إن أمريكا كويسة
أمال ربنا ناصرها قوي كده ليه؟
وعمالة تخرج من نصر لنصر
قال ويقولوا عليها موروطة في العراق
الظاهر بقى إن العرب غاويين يضحكوا على نفسهم
عشان الظاهر بقى إننا مش ملاحظين إن تلات إربع مليون عراقي ماتوا
قصاد تلات آلاف أمريكي
يعني الألف الأمريكاني بربع مليون
يعني الأمريكاني واقف عليهم بمتين وخمسين عراقي
يا بلااااااااااااااش
يتعوضوا يا سيدي
ماهم حاطين إيديهم على كل احتياطي البترول اللي في العالم
لا مش أكبر احتياطي بترول
كل الاحتياطي البترول اللي في الدنيا
وبيصرفوا على الحرب في العراق من فلوس العراق
والظاهر بقى إن العرب شاربين كالعادة التمثيلية اللي عاملها الجمهوريية والديمقراطيين علينا
والظاهر بقى إننا برضه واكلين الطعم بتاع عربي وفارس
وسني وشيعي
والظاهر بقى إننا أكلناه وبلعنا بكوكاكولا وهضمناه واتكرعنا كمان
صحة وعافية
صحة وعافية
والظاهر بقى إني مكتئبة
وللا زهقانة
وللا قرفانة
وللا....أقول لكوا...خدوا حمام سخن واعملوا ماسك ترمس
هابي فالنتاين
آه...فالنتاين
الله يرحمه
آخر كلمة قالها طرشي
No comments:
Post a Comment
Note: only a member of this blog may post a comment.