لمعرفة عظمة وإنسانية وتقوى الرئيس "الشهيد" صدام حسين
ولرؤية إنجازاته العظيمة
رجاء اتباع الرابط
تحذير: الفيديو يحتوي على مشاهد بالغة القسوة
اللي أعصابه مش ح تستحمل بلاش يتفرج
ها؟ اتفرجتوا؟
قدرتوا تكملوا فرجة للآخر
تكسير عظام وقطع ألسنة وتعذيب وحشي لبني آدمين
أنا عايزة واحد يقول لي مين في الدنيا يستاهل كده؟
ولا شارون نفسه يستاهل يتعمل فيه كده
ولا كلب أجرب يستاهل يتعمل فيه كده
والناس اللي بتقول إن صدام تاب
طيب، ربنا تواب صحيح
وغفور
بس التوبة من الظلم تستوجب رد المظالم
أو على الاقل الاستسماح وطلب الصفح من اللي وقع عليه الظلم
أو أضعف الإيمان
الإقرار للمظلومين بأنه ظلمهم
صدام عمل كده؟
دفع تعويض للناس دي
استسمحهم؟
طلب منهم المغفرة عشان ربنا يغفر له؟
ممكن واحد فيكوا بس يحط نفسه مكان البني آدمين اللي اتعمل فيهم كده؟
حد يرضاها على نفسه؟
تقولوا لي تاب؟
يعني أنا أعمل في الناس ده كله
وحتى ما أعتذرش عن اللي عملته
وأقول أستغفر الله العظيم وأتشاهد قدام المشنقة
وابقى خلاص كده ميت فل وسبعتاشر وفي الفردوس الأعلى؟
ده إيه الحلاوة دي
طب ما كنتوا تقولوا من الأول كان الواحد عمل كل اللي في نفسه وقبل ما أموت أتشاهد وخلاص
No comments:
Post a Comment
Note: only a member of this blog may post a comment.