يا اخوانا كريم عامر مهدد بأنه يتسجن تسع سنين
هل يستحق شاب عنده اتنين وعشرين سنة
كتب رأي على مدونة إنه يتسجن تسع سنين؟
أيا كان الكلام اللي بيقوله
بالتأكيد أنا غير متفقة مع كريم في رأيه ولا في حرف واحد من اللي كتبه
والحمد لله
لكن لمجرد إن إنسان بيكتب
وعلى مدونة، يعني مش في جرنال مصري ولا في وسيلة إعلامية عربية
رأي، حتى لو مختلفين معاه، يقوم يتسجن
يتسجن
يتسجن؟
إزاي بس يا ناس
شاب عنده اتنين وعشرين سنة يضيع من عمره تسع سنين
ومستقبله يتحطم عشان كلام كتبه
أنا مش عارفة أستوعب
ومش عارفة أفهم الناس اللي بتتصرف على إنها واخدة توكيل من ربنا
ونصبوا لنا الجنة والنار على الأرض
واللي يختلف معاهم يرفعوا عليه دعوى حسبة ويسجنوه؟
هي دي الدعوة إلى سبيل الله بالحكمة والموعظة الحسنة؟
يعني اللي عايزين يسجنوه، فاكرين إيه بالظبط؟
بعد ما يضيع مستقبله ويتسجن ح يخرج يقول: صحيح الإسلام ده دين جمييييييييييييل
بيحطم الناس ويكسر مناخيرهم؟
ح يستفيدوا إيه لما واحد زي ده يتسجن؟
ما يتشطروا على اللي غرق العبارة
واللي غلا البصل
واللي جوع الناس
واللي بينتهكوا الناس ويعذبوهم في أقسام البوليس
خلاص
كل الناس حلوة وكريم هو الشيطان الرجيم؟
جلسة النطق بالحكم على كريم ح تبقى يوم
واحد فبراير الخميس اللي جاي
يمكن ما اقدرش احضر عشان عندي معاد مهم الساعة خمسة
ويمكن احاول اروح اذا كان الصبح بدري صد رد
هو ح يبقى في محكمة محرم بيك في اسكندرية
معلش
أنا كلامي بالذات موجه للمسلمين اللي مفروض إنهم متدينين
كريم لو اتسجن
مش مستقبله بس اللي ح يضيع
قلبه كمان
كل الشباب الصغير بيتقلب في العقيدة وبيحب يبقى مختلف
وبيرجع تاني
بس لو كريم اتسجن
مش ممكن أبدا يرجع تاني
لو صورة الإسلام في ذهن كريم إنه عبارة عن ناس بتلاحقه بدون أي سبب عشان تؤذيه وتظلمه
يبقى الناس اللي بتقول إنها عايزة تدعو إلى الله بتعمل إيه بقى؟
ربنا خلق الإنسان حر
وكريم ما عملش حاجة غير إنه كتب رأيه في مدونته
اللي مش عاجبه الكلام ما يدخلش المدونة
يدخل ويشتمه زي ما انا باتشتم طول الوقت
بس يتحطم؟
مافيش أي نصر للإسالم والمسلمين في سجن كريم
دي ح تبقى هزيمة كبرى
مش عايزة أقول للمسلمين كلهم
خسارة كبيرة ح تلحق بكل المسلمين
خسارة لا تعوض ولا تقدر بثمن
إنسان راح خالص وبلا رجعة
مش عارفة الناس ناسية ليه: لأن يهدي بك الله رجلا خير لك من حمر النعم
ما قالش لأن ينكل الله بك رجلا
قال يهدي
هي دي وسيلة للهداية؟
متهيألي إللي فعلا مؤمن بالإسلام
ويعرفه كويس
يعرف إن المسلمين
بهدلوا الإسلام قوي
ومسئولية كل مسلم، يعرف الإسلام ويعرف ربنا كويس
إنه يدافع عن دينه ضد الناس اللي عايزة تصوره على إنه دين متوحش
بيلاحق الناس عشان ينتقم منهم
وينكل بيهم
مش عارفة ليه حاسة إن اللي باشوفه حاجة تانية خالص غير الدين اللي قريت عنه في القرآن
حاسة إن الناس بتتصرف مع الإسلام - بالذات بعض المتدينين - على إنه دين مخبرين
مش دين رحمة
ملحوظة لكل المدونين:
إذا كريم اتسجن
يبقى تعملوا حسابكوا تقفلوا مدوناتكوا
كلكوا بكافة توجهاتكوا وعقائدكوا
احنا بندون لأنها متنفسنا للتعبير
لكن إذا كريم يتسجن عشان رأي
ممكن ما يعجبش كتير من الناس
افتكروا يعني إن كلنا ما بنعجبش حد بشكل أو بآخر
يبقى أحسن نجيب ضرفها
No comments:
Post a Comment
Note: only a member of this blog may post a comment.