حبيبي يا كايدهم

الله أكبر





حصوة في عين اللي ما يصلي ع النبي





وآدي انتصار جديد للمقاومة اللبنانية





اللي شكلهم كده مش تبعنا




أقصد يعني مش عرب





دان حالوتش تم إقالته لأنه تسبب في هزيمة إسرائيل في الحرب



ويتم الآن التحقيق مع ليفني توطئة لاقالتها

وحصل ده بعد تحقيقات أثبتت إنه هو وليفني مسئولين عن الهزيمة التي لحقت بإسرائيل في تموز الماض






هم اللي قالوا كده






الغريب إن اسرائيل اعترفت بالهزيمة من أول يوم





إيهود أولمرت اعترف بنفسه بالهزيمة






أصل إيهود أولمرت طيب






زي ما الريس بتاعنا قال عليه






آه والله طيب






طيب قوي كمان







لو ما كانش طيب، وبركة، وبهلول







ما كانش أعلن بمنتهى العبط إن إسرائيل لأول مرة في حياتها






تلقى دعم عربي كامل لا ينقصه سوى سوريا






للقضاء على حزب الله







وما كانش بريالته قال






إن مصر والسعودية والأردن بتسانده مساندة كاملة في حربه على لبنان







وما كانش بطيبة قلبه اللي هو قلب خساية






أعلن إن جنبلاط اتصل بيه وقال له اقضي على حزب الله بسرعة





شهل يعني واعمل لك همة






وخللا كل الحكام العرب يتبلوا






اللي قال: لا أصل احنا خايفين على لبنان






واللي رجع في تصرحات البتاع ده زي العيل





واللي قطع خنس وما سمعنالوش حس من ساعتها





واللي قلب التربيزة وقال اصل حزب الله هو اللي قتل الحريري






مع انه قبلها بسنة قال حزب الله فوق الشبهات





المهم إن أولمرت أبو قلب زي قلب الخساية






بمنتهى البهللة قال: آه احنا اتهزمنا ليه؟ نياهانياهانياهاااااااا






وما حدش قال إن اسرائيل انتصرت غير العرب وقوى 14 آذار





والواد الاهبل بتاع أمريكا اللي اسمه بوش ده





قال: بكرة تشوفوا إن إسرائيل انتصرت





بكرة إمتى ما تعرفش





موقف الحكومات العربية من حزب الله بالذات





موقف مرضي






مش زي اي موقف وسخ هم متعودين ياخدوه






يعني موقفهم من المقاومة الفلسطينية لأن مصلحتهم في وجود إسرائيل






الحقيقة إن وجود إسرائيل هو أحد أسباب استمرارهم في الحكم لحد النهاردة







لأن أي حركة ح تعملها الشعوب






ح يقولوا لهم: اسسسسسسسكت إسرائيل ع الباب






مش وقته دلوقت





لما نحل قضية فلسطين يا حلوين






نبقى نجيب لكوا حرية وديمقراطية وأكل وشرب وصندوق بيبسي كمان






موقفهم من ضرب أفغانستان فيه فايدة كبيرة ليهم





عشان يقولوا لأمريكا: احنا ساعدناكوا






كل سنة وانت طيب يا باشا






اهرش بحاجة بقى







زي ما الحكومة المصرية طلبت فلوس من أمريكا





تعويضا عن الخسائر اللي خسرتها مصر في حرب أفغاستان! كل سنة وانت طيب يا باشا






ونفس الحكاية في ضرب العراق





كل سنة وانت طيب يا باشا





شوف لنا حسنة معاك في العراق






موقفهم من إيران إنهم خايفين على عروشهم







إنما إيه سر موقفهم من حزب الله






حزب الله مش في خطته إنه يحرر فلسطين دلوقت حالا






وعلاقته بإيران علاقة ندية ومش ناوي يبسط لها نفوذ في لبنان






لسبب بسيط





إن حزب الله أعلن مرارا وتكرارا إنه مش ناوي ينفرد بالسلطة





بل وأعلن كمان مؤخرا




إنه مش عايز يبقى له حصة في الحكومة الجديدة خااااالص







وقصة السنة والشيعة اللي هي ذريعة الحكومات العربية عشان تفضل على كراسيها






حزب الله منفض منها تماما






ولا داخل طرف خالص في أي صراعات مذهبية أو دينية





رغم المحاولات الحثيثة لإقحامه فيها بالاستفزاز مرة





وبالتهديد مرات





ولا هم هنا





موسى نبي عيسى نبي محمد نبي وكل من له نبي يصلي عليه







يعني فعليا مافيش أي خطر بيهدد الحكومات العربية






من ناحية حزب الله بالذات






بس الحكومات العربية، وبعض من المواطنين العرب






متغاظين





متغاظين








متتتتغااااااااظيييييييييييييين







استحلى العرب فكرة إن العرب جرب






وإننا ضعفا






لا حول لنا ولا قوة





وآدي الله وآدي حكمته







وإن شاء الله لما يبقى ينزل سيدنا عيسى ويقتل الدجال







يبقى ح ننتصر بقى ساعتها






لكن احنا دلوقت مش موصوف لنا النصر







يجي واحد صغير







زعيم حزب صغير







في بلد صغيرة








يثبت للعرب بالدليل القطعي أن "إنتوا بتستعبطوا" مافيش حاجة اسمها ما نقدرش








ما حدش مصدق







حتى الناس العادية مش مصدقة







لدرجة إن واحدة قالت لي: ما يمكن بتوع حزب الله دول بيحضروا جن...أصل فيه ناس بتسحر بالقرآن








وواحدة تقول لي تعرفي الأوراد اللي بيقراها حزب الله قبل الحرب؟







أصلي عايزة اقراها على حد







طب وأنا ح اعرفها منين؟







طب نقعد قدام قناة المنار ونشوف الأوراد بتاعتهم







أصل فيه ناس من الجيش الإسرائيلي بيقولوا إنهم كانوا بيشوفوا مقاتلين في حزب الله







ضخام وضوافرهم طويلة وروسهم مقطوعة






أكيد عفاريت صح؟






طبعا طنشت لحد ما واحدة صاحبتي قالت لي إن جريدة الشرق الأوسط السعودية






كتبت خبر بيقول إن فيه جنود إسرائيليين كانوا بيقولوا كده






وإنهم عرضوهم على أطباء نفسيين عشان الهلاوس اللي جات لهم







الحكومات العربية مش بس متغاظة






هي كمان خايفة






لأن زي ما قلنا، وجودها مربوط بوجود إسرائيل






طب ليه مش بنخلص من إسرائيل ؟






عشان إسرائيل بعبع

يامي يامي يا مي

امشي يا إسرائيل

خلاص خلاص العرب ح يناموا

إسرائيل دي بعبع بعبع

بس احنا نعرف نحايلها ونلهيها عننا

لو رضيت نسالمها يبقى كتر خيرها

امشي يا بعبع




بعبع؟






أمال العيال دول ادوهم علقة سخنة إزاي على رأي عمرو موسى؟







ومش انتصروا عليهم مرة





دي مرتين






واحد بمنتهى الثقة قال لي: إسرائيل هي اللي سابت لهم الجنوب







لو عايزاه ح تاخده






طب الحكومات وعرفناها







ليه فيه ناس من المواطنين العاديين بيتكلموا كده؟






وفقا لعلم النفس







لما أبقى أنا فاشلة بسبب كسلي وتكاسلي






وحد غيري ينجح بمجهود بسيط في اللي انا فشلت فيه







رد الفعل الطبيعي إني أقلل من نجاحه






وأشكك فيه






ويمكن أتهمه







زي ما واحد فاشل وعواطلي عشان قاعد في البيت زي خيبيتها







ويلاقي واحدة ست اشتغلت وهو الراجل قاعد فاشل







يبتدي بقى يقول اصلها استغفر الله العظيم







وباعت شرفها للمدير







اصلها ادت رشوة






اصلها معاها واسطة






فيه حاجة تانية






وائل عباس مرة قال لي: والله اللبنانيين دول في نعمة مش حاسين بيها






لو مش عاجبهم السنيورة اللي سايبهم يعتصموا في الشارع






من غير ما يسلط عليهم أمن الدولة





يجيبوه وياخدوا اللي عندنا






بس كل واحد بيلبس اللي على مقاسه يا وائل






معلش






أنا عارفة إن الشوفونية المصرية مش ح تسمح بأني أتكلم كده







بس دي الحقيقة






لما تنزل في الشارع خمسين نفر







يبقى لازم تنضرب





لكن لما تنزل مليون ونص وفي أيام الذروة اتنين مليون






وريني مين اللي يقدر عليك







خصوصا إنهم نزلوا من غير ما يكسروا بسكلتة واحدة






ولا ازازة كوكاكولا






احنا آخر مرة نزلنا فيها الشارع نزول حقيقي






في سبعتاشر وتمنتاشر يناير






كسرنا البلد كلها كلللللللهاااااا





يبقى بقى مش لو مش عاجبهم السنيورة يجيبوه






السنيورة هو اللي لو مش عاجباه المعارضة المؤدبة






يتفضل يجي






وما يضحكنيش غير اللي بيقولوا: اصل حزب الله متحالف مع إيران وسوريا






مين بقى اللي بيقول كده؟





خدامين أمريكا وفرنسا





مش حلفاء







خدامين





وخدامين سرير كمان






كل الناس لها حلفاء






يعني شافيز عميل لإيران عشان متحالف معاها؟







طب على رأي سماحة السيد حسن نصر الله






وأنا باحب أقول عليه سماحة السيد






اللي يمسك على حزب الله منفعة واحدة أخدتها إيران من وجود حزب الله في الجنوب







ولا تصب في مصلحة لبنان






يتفضل يقول عليها







وهو المسلمين لما كانوا بيقاتلوا الروم كانوا عملاء للفرس؟







ولما كانوا بيقاتلوا الفرس كانوا عملاء للروم؟






العميل هو اللي يضر بمصلحة وطنه في سبيل مصالح العدو






عشان يحافظ على كرسيه






زي حكام العرب






اللي ما اتكسفوش يكلموا أولمرت عشان يقولوا له: فسح حزب الله يا معلم






والموكوس عامل زي الرقاصة اللي بتتصل بمرات الزبون تاني يوم عشان تقول لها:





جوزك نسي الفانلة






ابقي خليه يعدي ياخدها

ملحوظة: أنا عارفة التعليقات اللي ح تيجي

وفيه رد استباقي زي ضربات الأمن الاسباقية كده

مش عاجبك حزب الله "الرافضي" اللي ادى اسرائيل علقة

ورينا مرجلتك يا سبع البرمبة

وللا أنت مستني سيدنا عيسى لما ينزل عشان يقتل الدجال؟

أنا خايفة ينزل يقتل اللي موجودين دلوقت

آخر نكتة بقى سمعتها

في الأول طبعا كانوا بيقولوا حزب الله عايز يبسط النفوذ الشيعي في المنطقة

بعد الاعتصامات، نفس الناس، هم هم قالوا:

حزب الله مش بيقاتل في سبيل الله

إزاي يقاتل في سبيل الله وهو عايز يعمل وحدة وطنية؟

بس سيبك يا قمر انت

مالقوش في الورد عيب

يا كايدهم