Friday, 1 July 2011

لجنة الوساخ الوطني

طب ربنا ينفخ في صورة غبائهم ويعملوها.. ويا ريت يعملوها معايا انا بالذات، عشان اشوف غلاوتي بقى عند اللي انا باحرضهم ولا بس فالحين تبربشوا لي وتقولوا لي يا آنسة في الميدان؟ 
ايه بقى القبض على محرضي الانترنت دي؟ ايه الجملة اساسا؟ انتوا اتجننتوا؟ ده ولا يوم من ايامك يا مخلوع... محاكمات عسكرية ومتاحف وعذرية واخرتها القبض على "المحرضين"؟ ايه ايه ايه؟ احنا فين هنا؟ ده المخلوع عمره ما عملها
وقابضين على عيل ناشط عنده القلب اللي هو لؤي نجاتي ومسمينه بلطجي؟ 
طب احنا بقى بلطجية ومحرضين واجندات وماسون وشعب ابن تيت واللي عاجبه ع الكحل يتكحل اللي مش عاجبه يترحل، وحنقدم بلاغ في لجنة الوساخ الوطني دي عشان بتحرض على النشطاء، ايه مالكم؟ مش عارفين تحكموا البلد ليه؟ نشطاء ايه اللي بلطجية ومحرضين وماسون ووقيعة بين الشرطة والشعب على اساس ان الشرطة والشعب كانوا سمن على عسل قبل كده
وايه الجمل دي:
واوضت اللجنة بضرورة الفحص الأمنى لمثيرى الشغب، والتعاون الكامل بين هيئات الدولة وجهاز الشرطة والمجتمع المدنى المنظم بضرورة التنبؤ بالأحداث التى تهدد الاستقرار، والمتزامنة مع القرارات والأحكام القضائية التى تقضى على الفساد، وفى القضاء على فلول منظومة الفساد والنظام البائد
!!!!!!!!!!!!!!!!!!!!!!!!!!!!!
حضارتكم النظام البائد... ولا مش واخدين بالكم؟
والفحص الامني ده بيتعمل ازاي راخر.. زي فحص العذرية كده؟ وجهاز الشرطة ده بتتعاونوا معاه ازاي يعني اكتر من ان كل قيادات العادلي بتشتغل في اماكنها وكل قتلة الثوار بيشتغلوا في اماكنهم ومافيش حد اتحاسب غير نجم الشاشة الاوحد امين الشرطة السني اللي بقى بطل تليفونات الفضائيات وخليتوه هو اللي قتل المتظاهرين لوحده، وهو عذب الناس لوحده، وهو اللي اكل الجبنة..
بالنوسبة لضرورة التنبؤ بالاحداث.. ايوووةةةة.. انا عايزاكم تتنبأوا بالاحداث كده، زي ما تنبأتوا بيها لما سيبتوا علينا كلاب الداخلية تضرب فينا بغازات لسه كلنا بنعاني من حرقان في الانف والعين ودوخة بسببها لحد دلوقت
والمحامي احمد ابو خليل قال لي انه قال للظابط انتوا ليه بتصعدوا انتوا تقدروا تلموا الموضوع قام الظابط قال له: لازم يحصل ضرب جامد.. دي اوامر
ثم اسمع بقى يا معلم:
وأشارت إلى أهمية كشف وتجريم التمويلات مجهولة المصدر ومن الجهات الأجنبية تحت زعم الديمقراطية،
اييييييييييووووووةةةة
انا معاكم.. كده صح.. واول تجريم يبقى للمعونة الامريكية.. ماهو عدم اللا مؤاغزة، ما تجيش تجرم لي مركز بياخد تمويل من مؤسسة تحت السلم في تنزانيا والمعونة الامريكية واكلة البلد.. مش عايزينها احنا بقى المعونة
وايوة بعد اذنك حضرتك احنا حنحل الداخلية.. الداخلية الموجودة دي مش نافعة
دي تتحل ويتبني مكانها جهاز امني يخدم المواطن مش يقبض على "المحرضين" اللي هم المواطنين، بحيث المواطن لما يشوف ظابط شرطة يبقى زي الافلام كده الامريكاني يجري عليه لما يخاف، مش يجري منه من كتر الخوف
ويالا بقى.. حطوا ايدكم في الكوبس خلي الثورة تعرف تحشد اكتر من الاول عشان ننضف ونخلص
انا بس عندي مشكلة.. تليفوني مش عايز يسكت.. يا عيال ما تخافوش يا عيال، احضر الشنطة، وتجيبوا لي زيارات كنتاكي، احنا ناس اجندات ومش مقامنا ناكل عيش وحلاوة
وانا مش احسن من اللي اتعرضوا على النيابة على العسكرية ودخلوا السجن الحربي وسموهم بلطجية وهم تفتهم اطهر حاجة في البلد دي
---------
اه نسيت.. بمناسبة التحريض
احنا النهاردة عندنا جمعة الشهيد
وعندنا مسيرة الساعة اربعة عصرا من مسجد عمر مكرم لمجلس الوزرا
وانا باحرضكم جميعا انكم تنزلوا الجمعة دي، وتمشوا في المسيرة دي، وباسخنكم اخر حاجة وباقولكم ان الشنب اللي حيقعد في بيته وفيه دم ناس سال وما اتاخدش حقه يبقى يمسح كلمة ذكر من البطاقة وما يحطش انثى عشان ما يجيبلناش احنا الكلام، ممكن يحط كانجرو
at

74 comments:

  1. بنت مصرية جدعة1 July 2011 at 06:00

    "خد لى شوق ف حاجة تانية" اهى نوترة جبتها على بلاطة احنا عيال بلطجية محرضين و ده نظامنا

    ReplyDelete
  2. Ahmed Elsherbiny1 July 2011 at 06:01

    عاش يا نوارة والله. و لو بعد الشر رحتي النيابة العسكرية مش هتروحي من غيرنا، جمهورية تويتر كلها هتيجي معاكي، ماهو برضه المحرض لأخيه المحرض كالبنيان المرصوص

    ReplyDelete
  3. lailol1 July 2011 at 06:17

    ربنا يسترها معاكم وربنا يحميكم ويحافظ عليكم والله منصورين باذن الله

    ReplyDelete
  4. كائن مهدد بالانقراض1 July 2011 at 06:22

    بموت انا فى بلطجتك يانوارة
    احنا معاكو من المنوفية جايين على الميداان باذن الله
    على الله نعرف نكفر عن ذنوبنا القذرة كلها من اول مبارك لحد الجمل واللى قبلهم واللى بعدهم

    ReplyDelete
  5. Ziad Mohamed1 July 2011 at 06:28

    على النعمة ب 100 رااااااجل .... مش ناسيين التحرير يا ولاااااااد الو .. ة

    ReplyDelete
  6. طارق عبدالوهاب1 July 2011 at 06:35

    اجى معاكىىىىىىىى هتاكلى كنتاكى لوحدك حرام عليكى طيب والله دول عالم عبيطه وكلهم من الفلول وبياكلو فول وناس وسخه اه وسخه يلا يلا خدونى ع السجن واكلونى عيش وكنتاكى

    ReplyDelete
  7. Anonymous1 July 2011 at 06:37

    ربنا معاكم ويوفقكم
    ودعواتي لك ولكل الناشطين في مصر الحبيبة

    ReplyDelete
  8. إسلام الوشاحي1 July 2011 at 06:59

    قاله تفهم في السياسة ياض يا مزيكا ؟؟ إلا أفهم يأسطي حنفي :ده أنا الشعب،،،،طب تعرف إيه عن سياسة الوفاق ؟؟ أعرف إن يابخت من وفق راسين في الحلال ،،،،،،قاله دي سياسة أمك دي يا مزيكا !!!!

    ReplyDelete
  9. Michael Gerges1 July 2011 at 07:29

    b3d elshar 3leky ya Nawaretna ... enshalla ana ya rab we enty la2 :)

    ReplyDelete
  10. sayed othman1 July 2011 at 08:00

    والله جدعه يا نواره وبنت ابوكى بصحيح - وارجل من رجاله البطابق بتوع الاخوان - لاعقى الحزاء الميرى
    مش هتخدو البلد يا اخوان - مش هنقدم تقسيم مصر على طبق من فضه لامريكا بركوب الاخوان للسلطه

    ReplyDelete
  11. maf2ou3a1 July 2011 at 09:47

    yallah 7'aleha dam e7na fe el tahrir

    ReplyDelete
  12. eng mohamed hamdon1 July 2011 at 09:48

    سيبك انتى والله جامده

    ReplyDelete
  13. prof-osama1 July 2011 at 10:01

    صباح الهلوسة والزبالة والمستوى الحقير فى الكتابة .. ان طبعا مع اى قانون يلم المجاذيب امثالك من الشوارع ويرميهم فى مصحة للامراض العقلية

    ReplyDelete
  14. prof-osama1 July 2011 at 10:03

    اليوم لقائنا المتكرر مع احد الجمع الفاشلة لابطال ال22 ومغاوير الدستور صديقى ..ونحيطكم علما يا نشامى ان الشعب اتخنق من حضراتكم ... وفقد الدعم الشعبى والراى العام خطاء فاحش.. واللى هيمشى ورا نوارة خلل هينال اللى يستحقة

    ReplyDelete
  15. prof-osama1 July 2011 at 10:04

    يااااااااااة امتى الانفلات الامنى يرجع تانى و يبقى فى البلد كلها ,,,,الواحد زهق و اتخنق من الاستقرار اللى كان فى الايام اللى فاتت ,,,,كفاية بقة استقرار دة كان جايب البلد لوراء ,,,ثورة ثورة ثورة.....لازم المصريين يطهرو ارض مصر من المصريين لحد ما تنضف من المصريين....هو مش هنعمل حظر تجوال تانى ولاا اية

    ReplyDelete
  16. محمد نور الدين1 July 2011 at 10:09

    ست الكل صباح الخير


    لم أفاجأ بالخبر

    لم أفاجأ بالخبر لأنك صادقة، حتى أخطاؤك كانت صداقة ، بمعنى تقييمك لبعض المؤسسات و الأشخاص في بداية الثورة وأثناءها كانت نابعة من تقييم بدا لك صحيحا . وأنا واحد ممن لفتوا انتباهك لاندفاعك المفرط أيام الرسائل . ولقد طالبتك بالحفاظ على خط الرجعة لأنني كنت متيقن أنك ستصدمين على الأقل في البعض ممن كنت تعتقدين،وكنت صادقة، أنهم حلفاء الثورة .
    نوارة تحمليني في هذه الجملة : الثورة ليست صحن كشري أنت آكلته . الثورة شيء مركب ومعقد وتتداخل فيه عوامل كثيرة داخلية وخارجية وبخاصة إقليمية. وثورة مصر تتعرض هذه الأيام إلى ضغوط خارجية قوية قد تؤثر على مسارها ، وهذا ما يحدث هذه الأيام في تونس وإذا تابعت حكاية المخرجة التي قدمت فيلما تتهجم فيه على الإسلام ، ثم حرضوا السلفيين فقاموا بتخريب قاعة السينما. لقد كانت مسرحية محبوكة. وأطرافها معروفة.
    الخارج لن يسمح بسهولة للربيع العربي أن ينبت ورودا وأزهارا جميلة . وهناك قوى داخلية ستساعده على ذلك وهذه القوى لاتزال تملك القوة و النفوذ و المال و الجاه و الملك العريض .
    المعركة لا تزال في بدايتها ما يتطلب وعيا حاد وحذرا شديدا وتحالفا واسعا وهذا يبدو لي غير متوفر عند شباب الثورة على الأقل في هذه اللحظة .
    تحياتي
    ملحوظة
    نوارة لقد بعث لك رسالة على الفيس بوك وتتطلب الرد في أقرب وقت الرجاء لا تتأخري في ذلك .

    ReplyDelete
  17. خواطر شابة1 July 2011 at 10:12

    "وباقولكم ان الشنب اللي حيقعد في بيته وفيه دم ناس سال وما اتاخدش حقه يبقى يمسح كلمة ذكر من البطاقة وما يحطش انثى عشان ما يجيبلناش احنا الكلام، ممكن يحط كانجرو
    هههه والله العظيم انت أجدع بنت وأخف دم ربي ينصركم ويجعل كيد من يعاديكم في نحره ان شاء الله

    ReplyDelete
  18. Amal Egypt1 July 2011 at 10:20

    يعجبني الناس لما تجيب م الآخرن إحنا لسه هنطبطب بروح أمهم، أبوهم على أبو اللي جابهم، ده على اعتبار إن كلهم أولاد مبارك :-))

    ReplyDelete
  19. Amal Egypt1 July 2011 at 10:21

    أيوه كده يعجبني اللي يجيب م الآخر، هو احنا لسه هنطبطب، أبوهم على أبو اللي جابهم، ده على اعتبار إن كلهم أولاد مبارك. أشوفك بعد أربعة إن كان لنا مسيرة :-))

    ReplyDelete
  20. misha و lado1 July 2011 at 10:27

    وراكي يا نوارة لحد ما نأخد حقنا من كل الاوساخ

    ReplyDelete
  21. ابو حسوني1 July 2011 at 10:33

    اتمنى ان يسجنوك كم يوم حتى يحافظ الظلم على عادته مع عائلتك وتحطافظي انتي على مسيرة اسلافك هو انت احسن من الفاجومي ولا احسن من صافيناز انشاء الله يسجنوك حتى لا يبقى لاهل الظلم باقية ويكون النصر للمظلومين

    قلوبنا معكم يا احرار من اخوانكم في العر اق

    ReplyDelete
  22. ساعي الخير1 July 2011 at 10:36

    لا للفوضي

    المسيرات في الوقت ده هتسمح

    بدخول البلطجية و الفلول

    و تبقي فوضي و حرب أهلية

    أيه مصلحة داخلية الثورة

    أنها تضرب أهالي الشهدا

    أزاي شرطة الثورة تميز

    بين فلول الفساد و بين الثوار

    و أزاي الثوار يميزوا بين شرطة الثورة

    و فلول الشرطة

    يا نوارة

    لا للحرب الأهلية و خلط الأمور

    لا للفوضي

    و موفقين للخير

    ReplyDelete
  23. الخوجة1 July 2011 at 10:44

    طيب بناء علية وعلى ماتقدم انا وجميع اولادى نازلين النهاردة علشان اشوف عرص مين هيقرب لنوارة انا ماكنتش نازل لاكن انا واولادى هنحمى بنت مصر مفكرة مصر ..انتوا لجنة ايه بتشتغلوا بنفس اسلوبكم القديم كلب مين ..علشان تعرفوا ان انتم بتحطوا ايديكم مع ناس غلط واذا الاستاذ اللى بيطالب القبض على نوارة مش عيب على راجل يطلب القبض على بنت مصر بنتنا كلنا ولعلمك فى بلدنا صعب اوى انك تدقق النظر فى بنت شوف انته عملت ايه ولعلمك انا منوفى لاكن لااقبل مجرد ذكر اسم نوارة بنتنا باى سوء ولعلمك انته كده اسمحلى كله سلف ودين ومهما كانت فهى المفكرة والصحفية بالنسبة لى راجل قربت اسلم نمر لن تجدوا بنت مخلصه لبلدها مثل نوارة نوارة غير ياجماعه مافيش نسخة منها تانية وبالنسبه لى انا محرضه ومفكرة ومخططة سواء رضيتم او لم ترضوا ولم التقى بها ابدا وربنا يديها الصحة والعافية

    ReplyDelete
  24. الخوجة1 July 2011 at 10:59

    #JUN1 #JAN25 نوارة جزمتها برقبه مائه راجل من عينتك #Egypt #Tahrir #VIVA NAWARANEGM طوال عمر بلدنا تحترم النساء مهما عملوا وطول عمرنا بنسمع ليهم ونحترمهم ولما يكونوا مخلصين ياسلام نقول عليها اصيله .ولقد جاد علينا المولى عز وجل بابنه مفكرة مخلصة تحب بلدها ولايستطيع احد ان يشكك فى وطنيتها او نبل اهدافها هى نوارة نجم ومن لايعرفها فهذا هو الجهل بعينه ..وعندما يلعب رجل دور النسوان احسن له ان يدور على جحر وينام فيه مع اخوته من الحيوانات امثاله وان يطلب شخص او لجنة بالقبض عليها فهنا الشك وانحراف المسار بعينه ..وهبت نفسها لبلدها نسيت ذاتها يكون هذا جزاؤها مننا وعن اى وفاق تتحدثون وعن اى لجنة تتحدثون اقول لكم ..من أنتم ؟؟ ..من أنتم .. من أنتم ...VIVA NAWARANEGM

    ReplyDelete
  25. ساعي الخير1 July 2011 at 11:15

    يا نوارة الأنتصار يا حضرات القارئين يا كل الناس يا بشر يا عالم يا جدعان يا بني آدمين
    ممكن أعرف هو مين اللي هيحاسب مين
    ده الشعب أغلبه متورط في الفساد و لسه الفساد موجود و نابه أزرق لأن الفساد فساد القوانين و اللوائح و النظم يا ناس النظام متغيرش و لا جراله حاجة النظام ما اتغيرش يا نوارة النظام ما اتغيرش يا جدعان النظام ما اتغيرش يا رجالة النظام ما اتغيرش يا خلق
    رحيل الأشخاص حاجة و تغير النظام حاجة الملك فاروق مشي و النظام فضل قاعد لعهد حسني مبارك
    و هي هي القضية الفساد و الرشوة و راجعوا بيان ثورة يوليو ليه بقي الفساد موجود علشان النظام فاسد الفكر فاسد مش الأشخاص
    و الدليل فاروق و باشاواته و مبارك و مراته


    كلام قلته زمان و محدش سأل صح يا نوارة


    علشان النظام يتغير

    مش لازم مسيرة لكن لازم نظام صح

    نظام جديد

    بيقولوا بالأنتخابات و الديمقراطية

    و ما يضرش من غير أنتخابات

    بس محدش يفتح بقه عن الزفت

    الديمقراطية بعد كده

    ReplyDelete
  26. ساعي الخير1 July 2011 at 11:17

    ما هو كمان مين يعرف يفرق بين البلطجي

    و المواطن المظلوم

    و أزاي أفرق بين الضابط الشريف

    و الضابط اللي عامل فيها شريف

    و بيستغل الأوضاع علشان يمارس فساده

    بحجة أستعادة الأمن

    الحل في الرقابة الشعبية بالمتطوعين

    و اللجان القضائية و لجان الجيش مندوب أو اتنين مش أكتر


    و طبعاً قوة تدخل سريع من الجيش

    غير كده

    مين يفرق بين الحلو و الوحش

    و يا خوفي لبكرة يفرقنا


    كلام برضه اتقال زمااااااان

    و محدش أتبناه


    صح يا نوارة

    ReplyDelete
  27. ساعي الخير1 July 2011 at 11:20

    لازلت في مدونة ساعي الخير لا أعرض

    سوي تدوينة واحدة لأهميتها

    و هي تتعلق بتطهير جهاز الشرطة

    و الرقابة الشعبية

    أسقاط النظام يجب أن يصاحبه بناء

    نظام و إلا الأمور تبقي فوضي


    برضه كلام قديم قلناه

    بس لما ربنا خلق العقول كله واحد

    عجبه مخه

    ReplyDelete
  28. Abo Amr1 July 2011 at 11:47

    لا خير فينا ان نسينا الدم
    لا خير فينا ان نسينا الدم
    لا خير فينا ان نسيما الدم

    ReplyDelete
  29. ebn1 July 2011 at 11:51

    هههههههههههههههه

    اوعي التحرررريض يا معلم

    كنت مستني النوت ديه من ساعة ما قرأت الخبر الوسخ ده !!

    قالك القبض علي مثيري الانترنت

    يا اخي هــع .. محرضي الانترنت مش عاجبنهم طبعاً عشان عملوا ثورة طيرت راسهم الكبيرة و خايفين لتجيب ديوله و دلاديله كمان

    ماشي يا عم احنا محرضين ... و حرضني حرض ...

    و الدور قرب عليكوا و هنقصقص ديلكوا و ريشكوا عشان تنقطونا بسكاتكوا و تتلموا و تعرفوا يعني شعب مصر عمل ثورة و مش هيخرس تاني لأمثالكوا

    توقيع : محرض

    ReplyDelete
  30. مؤمن1 July 2011 at 11:58

    عشرة على عشرة ربنا معاكي يا محرضة ههههههه

    ReplyDelete
  31. إيمان هلال1 July 2011 at 12:58

    ايه اخبار الناس فى ميدان التحريض يا محرضه ،، عايزين اخبار يا كبير بدل ما اروح ابلغ عنك

    ReplyDelete
  32. Ghadeer.Ahmed1 July 2011 at 13:24

    تصدقي يابت انتى اسم على مسمى نوارة فعلا للعقول
    وب بميت راجل يسلم ابوكي اللى رباكى وشال من قلبك معنى الخوف
    وخليهم يقولوا اللى يقولوه ماهما حاسين ان رجليهم قربت تيجي
    بس عموما حلووووو اوى الاستفزاز بتاعهم دا على رأيك حطوا يديهم في الكوبس وشكلنا هنخليها لهم ماس كهربااائي

    ReplyDelete
  33. Ghadeer.Ahmed1 July 2011 at 13:25

    تصدقي يبت انتى اسم على مسمى نوارة فعلا للعقول
    يسلم ابوكي اللى رباكى وشال من قلبك معنى الخوف
    خليهم كدا خايفين لاتيجي رجليهم وحلوووو اوى الاستفزاز دا خليهم على رأيك يحطوا ايديهم في الكوبسبس احنا هنخليها لهم ماس كهربااائي

    ReplyDelete
  34. ابن طفيل1 July 2011 at 13:42

    هوه مش انتي اللي كنتي بتقولي قصايد شعر في المجلس العسكري .. طيب افهمي وخلي الناس معاكي تفهم .. برنامج بيتعمل على الهادي لتشتيت شباب الثورة .. ويفهموكوا ان فيه حكومة ثورة وهي حكومة اصلاح بطيء واجهاض للثورة.. ويفهموكوا ان الداخلية نزلت بقوتها والداخلية كانت ولا زالت بتجهز لحرب مع عدوها الأوحد وهو الشعب بعد نكسة وهزيمة 28 يناير.. عارف ان الابقاء على خيط رفيع بين الشعب وبين الجيش ضروري.. أنا بحترم الجيش لكن مش راضي عن وقوفه متفرجا لحد ما يشوف مين اللي هيكسب المعركة .. واقف صمام أمان لمصر لكن مش للثوار والثورة

    ReplyDelete
  35. blueroseash1 July 2011 at 13:53

    انا وبناتي التلاتة اللي لسه ماطلعوش من البيضة معاكي على الاقل يعرفو من دلوقتي مرمطة السجن الحربي عشان لما يكبرو مايخافوش يبقو اخدو التطعيم من صغرهم
    انت بنت بميت راجل

    ReplyDelete
  36. Ahmed . M . Abdulrahman1 July 2011 at 14:12

    الخلاصه يانواره

    ان الوساخه ماذالت منتشره فى ماء الدوله

    تعكر صفوها لتعكر مزاجنا

    دا لان " الوفاق الوطنى" ماهو الا موتمر لاعضاء الحزب الوطنى

    وعامة لو انتى رحتى رحله للنيابه العسكريه

    ودا اظنه مش معقول

    متنسيش تبقى تسالى المحقق او اي من كان يحدثك

    ليه ديماً المشاهير من من يظهروا على التلفاز عندما يذهبوا للنيابه العسكريه لا يكولون انه كان " تحقيق" بل يقوله انه كان مجرد " فنجان قهوه " وكاننا جالسين على الشاطئ

    وعامه متحطيش فى راسك وركزى على اهداف ثورتنا الاساسيه

    "الضمير و التطهير والبناء " هم المبادئ الرئيسيه فى تلك اللحظات والاهداف المنشوده و الامانى المرجوه

    وربنا معاكى يانواره

    سلام مؤقتاً

    ReplyDelete
  37. abdomagid1 July 2011 at 14:13

    يا نوارة عاوزين نجيب من الاخر ونخلص عاوزين نسقط كبير الفلول بدل الهرى اللى احنا عايشين فية وطول ماهو قاعد هو والمجلس العميل دة هانفضل محلك سر لا هانغير نظام ولا بلد هاتتعدل

    ReplyDelete
  38. مصري بالغربة1 July 2011 at 14:36

    ي

    ReplyDelete
  39. مصري بالغربة1 July 2011 at 14:38

    مش ناسيين التحرير يا ولاد ال 00000
    ديه الثورة كانت بالنسبة لكم ناكسة

    هنروح ونقول لمين
    ظباطنا معر000

    اختوا علقة ما اختوهاش في سنيين

    التراس اهلاوي

    ReplyDelete
  40. مصري بالغربة1 July 2011 at 14:42

    انا من راي ان اساسا المجلس العسكري ده من مخلفات النظام وعليه علامات استفهام كتيرة جدا جدا
    وعشان كده هما اساسا مش معترفيين بالثورة من البداية
    بس ركبوا الموجه لما لاقوا ان الثورة هي اللي هتنتصر في الاخر
    يعني بالغصب عنهم لو بايديهم ما ينجحوش الثورة لان مصالحهم كلهم من النظام السابق
    مين اللي عين طنطاوي اساسا وزير الدفاع من عام 1990 تقريبا
    هوه حسني مبارك المخلوع
    والغريبه انه ما اتغيرش ابدا ليه لانه من مؤيدي المخلوع
    يعني فجأة كده حس وشعر طنطاوي ان فيه فساد في البلد
    كنت فيين من 30 سنه
    وعملت ايه للفساد وانت في الوزارة
    المجلس ده اساسا ايام الثورة وقبلها كان بيمجد بمبارك
    والصور والفيديوهات قبل الثورة وخلالها تشهد
    حسبي الله ونعم الوكيل

    ReplyDelete
  41. moo1 July 2011 at 14:48

    ومازالت الخطط تحاك والاستعدادات والامدادات تتوالى على معاقل النظام البائد وما يبدوا لنا انه معنا صار ستارا ثقيلا يحول بيننا وبين ان نتبين ان الانظام العفن يعاود بناء نفسه يا شرف يا عيسوى ان كنتم فى اى وقت قد حزتم ثقتنا فارحلوا حتى لا تدور عليكم الدوائر مع من سنواجه
    اللواء العيسوى يقول انه لم يامر باطلاق القنابل الا فى حدود استخدامها القانونى هو لسه فيه قانون بالشكل ده يلعن ابو القانون اللى يتعامل مع شعبه -اللى القانون موضوع لنشر العدل بين افراده ولحمايته - على انهم جزم لا يحق لهم التظلم مما وقع عليهم
    والى من يطالبون بدولة القانون والتعامل مع المتظلمين بكل حزم انها قولة باطل اريد بها باطل
    الشرطة يا سادة لاتعمل ولا تبدى اى استعداد لان تغير من اسلوب التعامل مع المعارضة السياسية وبالطبع الجيش اوسخ منها بمراحل والسادة الذين يتنفسون الان نسيم الحرية والامل فى محاسبة من سياتى وكل ثمار الثورة لا يريدون ان يعترفوا للمعارضين السياسيين -النشطاء - باى فضل بل يريدون ان تفتك بهم الشرطة والجيش وامنا الغولة وهم بذلك يريدون مصر خرساء لا تنادى بنصرة المظلوم حتى يتسنى لهم العيش فى بحبوحة لامن والفساد الذى ادى بنا الى كل هذا الخراب والسرقات والستعباد
    افيقوا با دراويش الامن ويا سدنة هيبة الدوله فان الشعب قد عرف ان له بلد يحميه

    ReplyDelete
  42. negmat lail1 July 2011 at 14:48

    ربنا معاكي وينصرك وينصرنا معاكي قادر يا كريم يا رب

    ReplyDelete
  43. moo1 July 2011 at 15:12

    ومازالت الخطط تحاك والاستعدادات والامدادات تتوالى على معاقل النظام البائد وما يبدوا لنا انه معنا صار ستارا ثقيلا يحول بيننا وبين ان نتبين ان الانظام العفن يعاود بناء نفسه يا شرف يا عيسوى ان كنتم فى اى وقت قد حزتم ثقتنا فارحلوا حتى لا تدور عليكم الدوائر مع من سنواجه
    اللواء العيسوى يقول انه لم يامر باطلاق القنابل الا فى حدود استخدامها القانونى هو لسه فيه قانون بالشكل ده يلعن ابو القانون اللى يتعامل مع شعبه -اللى القانون موضوع لنشر العدل بين افراده ولحمايته - على انهم جزم لا يحق لهم التظلم مما وقع عليهم
    والى من يطالبون بدولة القانون والتعامل مع المتظلمين بكل حزم انها قولة باطل اريد بها باطل
    الشرطة يا سادة لاتعمل ولا تبدى اى استعداد لان تغير من اسلوب التعامل مع المعارضة السياسية وبالطبع الجيش اوسخ منها بمراحل والسادة الذين يتنفسون الان نسيم الحرية والامل فى محاسبة من سياتى وكل ثمار الثورة لا يريدون ان يعترفوا للمعارضين السياسيين -النشطاء - باى فضل بل يريدون ان تفتك بهم الشرطة والجيش وامنا الغولة وهم بذلك يريدون مصر خرساء لا تنادى بنصرة المظلوم حتى يتسنى لهم العيش فى بحبوحة لامن والفساد الذى ادى بنا الى كل هذا الخراب والسرقات والستعباد
    افيقوا با دراويش الامن ويا سدنة هيبة الدوله فان الشعب قد عرف ان له بلد يحميه

    ReplyDelete
  44. mohamedfarid1 July 2011 at 15:34

    لابد من مجلس قيادة للثورة فهو أهم من المجلس الرئاسى ، والإعلان عن مجلس قيادة للثورة سيحميه ويدعمه بدلا من تساقط الوطنيين بالحوادث المشبوهه أو القتل الخطأ دون أن يدرى بهم أحد ، ومجلس قيادة الثورة سيوجه ويحاسب المجلس الرئاسى والحكومة والمجلس العسكرى أيا ما يكوم الحاكم ، المهم الإعلان رسميا ً عن مجلس قيادة للثورة ، لقد ناديت بهذا منذ بداية الثورة أرجوا التنبيه أن من أهم أسباب إجهاض الثورة عدم وجود مجلس قيادة قوى معلن عنه وعن مقر قيادته .

    ReplyDelete
  45. mohamedfarid1 July 2011 at 15:37

    انا فى قمة الحزن والأسى على السناريوهات المفضوحه والتى نراها بمنتهى الوضوح منذ قيام الثورة وكما ناديت بأعلى صوتى أرجوا ألا نجرى خلف الشائعات وخلف الأحداث الجارية وكلها قنوات وشائعات وممرات ليتوه الشعب المصرى عن أداء واجبه والمشاركه فى بناء مصر إن المفهوم الأساسى للثورة هو تغيير النظام ونحن لم نغير سوء بعض رؤوس النظام ولكن النظام كما هو تسيير الأعمال كما هى ، من سئ إلى أسوأ ، إن القائمين على المسؤليات جميعها فى مصر الآن لايريدوننا أن نفكر فى مستقبل مصر الخطوات التى تلى الثورة معروفة تماما ً وإلى الآن لم يتم تنفيذ خطوة واحدة من هذه الخطوات ، حسبنا الله ونعم الوكيل نحن ننغرس فى الطين ويتم إيهامنا أنهم مع الثورة ، وللأسف بافعالهم وإتجاهاتهم وقتلهم للثورة يوجهوننا إلى ثورة ثانية هى أعمق وأخطر وقد نصل إلى نوذج الثورة الفرنسية فهل يريد المجلس العسكرى والحكومة وجميع القيادات الحاكمة الآن أن تصل مصر إلى هذا الدمار حسبى الله ونعم الوكيل ، لابد أن يضع كل المصريين أيديهم متشابكة ببرامج قومية للنهوض بالبلاد ، ولابد من مجلس قيادة للثورة ، ولابد من لجنة تأسيسية لعمل دستور ديمقراطى جديد فورا ً ، لابد من لجان تشريعية لإستخراج قوانين الدولة فى جميع المؤسسات المصرية نابعة من الدستور الديمقراطى الجديد وإلغاء جميع القوانين القديمة التى ألغيت بالفعل بإلغاء الدستور القديم ومع ذلك فنحن نتعامل بهذه القوانين منذ إلغاء العمل بالدستور71 كيف يكون ذلك ، ولابد من تغيير جميع القيادات بالدولة على جميع المستويات إن عقول القياديين الآن بالدولة قد وقفت عند هذا الحد ليس هناك جديد ولا يعرفون معنى التخطيط والتنظيم والتنسيق لمصر ديمقراطى جديد ، لابد من تطهير البلاد من الفاسدين جميعا ً ، لابد من برامج قومية للأحزاب تساهم فيه الدولة بجميع مؤسساتها والشعب بجميع فئاته فلنوجه الشعب إلى الترابط والمحبة والتآخى وإسترجاع الوطنية التى قتلها النظام السابق فى الشعب وهذه البرامج الجماعية التى يشارك بها الشعب ستصل بنا إلى الوطنية وحب البلاد ، هذا البرنامج من أهم أهدافه تعريف الشعب على كل الأحزاب تاريخا ً وقيادات وأفكار ومبادئ وأهداف وبرامج المراد منها النهوض بالبلاد ، تعريف الشعب من هم مرشحى مجلس الشعب ومن هم مرشحى مجلس الشورى ومن هم مرشحى الرئاسة ، وكل هذا بوثائق معتمده من المؤرخين والمفكرين والسياسيين والوطنيين والصحفيين الشرفاء ووزارة العدل وجميع الجهات التى تضمن صحة بيانات الأحزاب بمحتوياتها وقياداتها ومرشحى البرلمان والرئاسة هذا البرنامج يكون فى صورة أفلام يتم إخراجها عن طريق التليفزيون المصرى والسينما المصرية وتعرض على جموع الشعب فى جميع الأماكن المناسبة لذلك لضمان محو الجهاله عن الشعب بالأحزاب والمرشحين على مختلف أنواعهم وألوانهم ، وهذا لضمان مشاركة نسبة 75% على الأقل بما فيهم نسبة الثلاثون بالمائة الأميين من الشعب بإنتخابات حره نزيهه وكل يعرف إلى من ينضم من الأحزاب ولماذا ومن نختار من المرشحين ولماذا وفى النهاية ليعبر الأحزاب فعليا ً عن الشعب وتعبر المجالس البرلمانية عن الشعب وتكون إنتخابات نزيهه مبنية على العلم والمعرفة وليس الجهل والفساد والرشوة والعصبية والجهل ، لابد من هيكله جديدة لمجلس الشعب فى ظل هذا الضعف الحزبى والتوتر القائم من فساد العصر البائد وهذا الهيكل يؤدى إلى التعددية الحزبية داخل المجلس ولو بالمقادير المحدده بهذا الهيكل لفترة رئاسية واحده أو فترتين رئاسيتين حتى نضمن ثبات وإستقرار جميع الأحزاب داخل البلاد وممارسة أعمالها ونشاطها بطريقة فعالة لصالح البلاد ولقد نشرت هذا الموضوع منذ قيام الثورة بإسم نهضة مصر وحضارتها ، وهذا الهيكل يضمن مرور قرارات قوية مبنية على الإختلاف والمنافسة والموافقة من ثلاث فئات داخل المجلس فئة الأحزاب وهى متساوية المقاعد داخل المجلس وفئة المستقلين وهى تعادل نفس عدد مقاعد الأحزاب مجتمعين والفئة الثالثة والبديلة هى أعضاء جميع النقابات العمالية والمهنية كبديل لفئة العمال والفلاحين مع ملاحظة ضمان عمل نقابات مهنية لمن ليس لديهم نقابة حتى الآن ، ويكون عدد مقاعدها مساوى لمقاعد الأحزاب مجتمعين أيضا ً وتفيلات هذا الموضوع وأسابه وأهدافه نشرتها كما ذكرت فى نهضة مصر وحضارتها ،مطلوب برنامج إقتصادى لجميع المؤسسات بالدولة نابع من نظام إشتراكى رأسمالى مشترك ينمى القطاع العام كركائز للدولة وأملاك الشعب والدولة وبجانبه ينافسه القطاع الخاص وخطوات أخرى عديدة مطلوبة لنهضة مصر وحضارتها متى سنبدأ وإلى أين نحن ذاهبون بفكر هذه القيادات العقيمة ، والله الموفق

    ReplyDelete
  46. mohamedfarid1 July 2011 at 15:39

    لابد من مجلس قيادة للثورة فهو أهم من المجلس الرئاسى ، والإعلان عن مجلس قيادة للثورة سيحميه ويدعمه بدلا من تساقط الوطنيين بالحوادث المشبوهه أو القتل الخطأ دون أن يدرى بهم أحد ، ومجلس قيادة الثورة سيوجه ويحاسب المجلس الرئاسى والحكومة والمجلس العسكرى أيا ما يكوم الحاكم ، المهم الإعلان رسميا ً عن مجلس قيادة للثورة ، لقد ناديت بهذا منذ بداية الثورة أرجوا التنبيه أن من أهم أسباب إجهاض الثورة عدم وجود مجلس قيادة قوى معلن عنه وعن مقر قيادته .

    ReplyDelete
  47. mohamedfarid1 July 2011 at 15:39

    لابد من مجلس قيادة للثورة فهو أهم من المجلس الرئاسى ، والإعلان عن مجلس قيادة للثورة سيحميه ويدعمه بدلا من تساقط الوطنيين بالحوادث المشبوهه أو القتل الخطأ دون أن يدرى بهم أحد ، ومجلس قيادة الثورة سيوجه ويحاسب المجلس الرئاسى والحكومة والمجلس العسكرى أيا ما يكوم الحاكم ، المهم الإعلان رسميا ً عن مجلس قيادة للثورة ، لقد ناديت بهذا منذ بداية الثورة أرجوا التنبيه أن من أهم أسباب إجهاض الثورة عدم وجود مجلس قيادة قوى معلن عنه وعن مقر قيادته .

    ReplyDelete
  48. mahmoud1 July 2011 at 16:11

    هم الاوساخ دول مش عارفين مين اللي موت الطيارين المصريين وعمل خيانة عظمي مين اللي ساب سينا صحرا مين الحزب اللي ركع لامريكا واسرائيل واخد منهم تمن بيع مصر معونات ديموقراطية ايه يا اوساخ دي تراب الفلوس اللي نهبتوها من امريكا تمن خيانتكم ولا عشان سكتين لكم وكمان معونات الديموقراطية معترف بيها يابايعين غازنا وارضنا لليهود يا اوساخ تحريض ايه ده البلد كانت بتغرق لولا الثورة ياريت التحريض كله يبقي كده يفوقنا ويرجع كرامتنا ويخلي العالم يشهد لنا والاوساخ بتوعنا بيخونونها جاتكم القرف والله نهايتكم سودا ان شاء الله

    ReplyDelete
  49. hardway1 July 2011 at 17:36

    علشان كده....اه اه علشان كده
    روحتي تستحمي و تريحي شوية.........
    معقول ريحتك فاحت كده ووصلت للجنةالوساخ الوطني
    هي دي مش لجانكم يا متعهدي الثورات الخايبة

    ReplyDelete
  50. hardway1 July 2011 at 17:48

    علشان كده....اه اه علشان كده
    روحتي تستحمي و تريحي شوية.........
    معقول ريحتك فاحت كده ووصلت للجنةالوساخ الوطني
    هي دي مش لجانكم يا متعهدي الثورات الخايبة

    ReplyDelete
  51. heeba_alrahib1 July 2011 at 19:14

    هههههههههههه
    ايه ده يا بت يا نوارة
    جاء ذلك عقب هجوم يسرى الشرقاوى، عضو المؤتمر، على بعض النشطاء السياسيين، ومن بينهم نوارة نجم، وطالب بالقبض عليها فوراً بتهمة التحريض على إثارة البلبلة،
    يعنى ايه بُلبُلة دي يا نوارة
    ههههههههههههههههههه

    ReplyDelete
  52. Unknown1 July 2011 at 19:59

    انا ناشط اذن انا مدون اذا انا بلطجي اذا انا محرض اذا انا هتحاكم
    لول

    ReplyDelete
  53. lawyer1 July 2011 at 20:00

    احنا مش نزلين نتظاهر و نطالب و نرجع احنا نزلين معتصمين لحد ما كل حقوقنا ترجع و كل اهداف الثورة تتحقق

    ReplyDelete
  54. حسن محمد على1 July 2011 at 22:10

    انتى محرضة فعلا -محرضة ضد الفساد وضد القتلة واللصزص الكبار قوى ,واللجنة وجهاز الكسب غير المشروع مش هايسبوكى ,وهايستدعوكى للكشف عن اموالك المهربة وقصورك وبنوكك ومنتجعاتك ومصانعك ويخوتك وسياراتك الفارهة الخ...الخ...الخ اللجنة مش هاتسبيك

    ReplyDelete
  55. حسن محمد على1 July 2011 at 22:16

    لاادرى لماذا, كلما ذكرت كلمة "اللجنة" شممت "تلك الرائحة" بس خلاص

    ReplyDelete
  56. صوت الحق1 July 2011 at 22:42

    اللهم اقتل كل من قتل الثورة ............... آآميين

    http://www.facebook.com/photo.php?fbid=10150359078426562&set=a.10150359078331562.424333.618456561&type=1

    ReplyDelete
  57. hardway1 July 2011 at 23:35

    ده المخلوع عمره ما عملها
    .................................
    ماهو من غبائه...لم يفعلها..وبعدين
    ماتسيحيش اوي..ان الوفاق و الداخلية
    والجيش و المخابرات والامن الوطني..كل ده
    عايز يقبض علي نوارة..مش اوي كده...التسييح زاد شوية..والميديا عالية
    .................................
    والفحص الامني ده بيتعمل ازاي راخر.
    لالالالا...الفحص الامني ده هـيريحـك جدا..جدا
    هيفكك..فكه هتريحك جدا وتتعودي عليه لدرجة انت هتتطلبيه بنفسك سيصبح أدمان عندك..انت نفسك ها تروحي تتطلبي انك تتفحصي امنيا
    عارفه يا نـرنـر أنك فيك حاجة لله
    روحتي علشان تستحمي تقولي قلبك حاسس أنك هتتفحص أمنيا

    ReplyDelete
  58. hardway1 July 2011 at 23:36

    ده المخلوع عمره ما عملها
    .................................
    ماهو من غبائه...لم يفعلها..وبعدين
    ماتسيحيش اوي..ان الوفاق و الداخلية
    والجيش و المخابرات والامن الوطني..كل ده
    عايز يقبض علي نوارة..مش اوي كده...التسييح زاد شوية..والميديا عالية
    .................................
    والفحص الامني ده بيتعمل ازاي راخر.
    لالالالا...الفحص الامني ده هـيريحـك جدا..جدا
    هيفكك..فكه هتريحك جدا وتتعودي عليه لدرجة انت هتتطلبيه بنفسك سيصبح أدمان عندك..انت نفسك ها تروحي تتطلبي انك تتفحصي امنيا
    عارفه يا نـرنـر أنك فيك حاجة لله
    روحتي علشان تستحمي تقولي قلبك حاسس أنك هتتفحص أمنيا

    ReplyDelete
  59. واحد من الناس2 July 2011 at 00:54

    ألف مبروك يا بنت نجم والله إنتى بنت حلال وتستاهلى كل خير

    ReplyDelete
  60. مدونة سلامتك يا دماغي2 July 2011 at 00:58

    بصي يا نوارة .. علاقة الشعب بالمجلس العسكري زي علاقة الست اللي عارفة إن جوزها بيخونها بس خايفة تتكلم لتخرب البيت.

    ReplyDelete
  61. خالد عبده2 July 2011 at 01:45

    لاتهتمى انهم اشبه بكلاب الصحراء لايسمعون الا انفسهم ولايسمعهم احد

    ReplyDelete
  62. Unknown2 July 2011 at 02:00

    معلش استاذه نواره معلش ياشعب مصر الابى منزلتش النهارده عندى امتحان بكره يابانى وكمان عبال مااروح الميدان سفر فااعذرنى ياشعب والجايات كتير هخلص الامتحانات واجيلكم
    عاش شعب مصر الابى
    عيش حريه كرامه انسانيه

    ReplyDelete
  63. saleh111432 July 2011 at 03:00

    الحُرّة الكريمة نوارة
    خمس حقائق لا بد من أخذها بعين الإعتبار :
    1- المجلس العسكري هو مجلس حُكم مؤقت بفترة إنتقالية محدودة المفترض أن تكون نهايتها في أيلول/ سبتمبر 2011 لحين إجراء الإنتخابات البرلمانية والرئاسية.
    2- المجلس العسكري الحاكم عاجز عجزاً حقيقياً عن اتخاذ الكثير من القرارات المتعلقة بمطالب الشعب باستكمال الثورة سواء ما يتعلق بتطهير البلاد من آثار عدوان النظام البائد أو ما يتعلق بالسير بهذا البلد في طريق النهوض .
    3- عجز المجلس العسكري عن السير في إستكمال عملية الهدم وعجزه عن مباشرة عملية البناء يعود لأسباب ذاتية أصيلة في المجلس لا يُمكن معالجتها، كما يعود لأسباب أخرى طارئة على المجلس قابلة للعلاج .
    أما الأسباب الأصيلة في المجلس فتتمثل بثلاثة أسباب : أولها أن من الطبيعي أن لا يكون لدى العَسْكَر بوصفهم العسكري أي تصور سواء لكيفية إتمام عملية هدم النظام الذي لفظه الشعب أو لمشروع بناء دولة أو نهضة أمة، فمثل هذا الفهم والإدراك إنما يكون عند الأحزاب السياسية أو عند المفكريين السياسيين وليس عند العسكريين. وثانيها أن هذا المجلس لم يأتِ عبر إنقلاب عسكري لحكم البلاد، فلم يكن مُهيئاً ولا مُعداً لمثل هذه المهمة، وإنما فُرضَ عليه الحُكم فرضاً لتسيير شؤون البلاد في فترة إنتقالية تُمهد لاختيار الشعب حكامه. وثالثها أن رئيس المجلس كان جزءاً من تركيبة النظام السابق ولم يخطر بباله قبل الثورة القيام بأي عمل لتغييره .
    وأما الأسباب الطارئة فتتمثل بالضغوط الخارجية والداخلية على حد سواء. الخارجية معروفة وأما الداخلية فربما تتعلق بالإعتبارات العسكرية للرئيس المخلوع ، وربما تتعلق بالصلات الشخصية التي كانت تربطه بالمجلس لا سيما برئيسه، وربما بتعهدات قدمها المجلس للرئيس المخلوع كضمان لقبوله بالتنحي عن الحكم ، وربما – كما يُقال - تعرضَ المجلس لتهديدات بفتح ملفات يخشى من فتحها. فهنا قائمة الإحتمالات تطول وكلها ظنية ولا أهمية لها لوجود الأسباب الأخرى التي تشل المجلس عن العمل الفعّال .
    4- المجلس العسكري يُريد نقل السلطة للشعب بأسرع وقت لكن بعض القوى السياسية تسعى للتأجيل !
    5- في هذه الفترة الإنتقالية القصيرة ليس من مصلحة البلاد حصول المواجهة أو الصدام بين الشعب والمجلس العسكري أو بين الشعب وأي من أجهزة الدولة المصرية، بل أن الصدام في هذه المرحلة الإنتقالية الخطرة لا يخدم سوى قوى ما يُسمى ب " الثورة المضادة " .

    بناء على الحقائق الخمس المذكورة أعلاه فإن الحل الذي يُمكّن الشعب من إستكمال ثورته بهدم وتطهير البلاد من كل ما يتعلق بالنظام البائد وبالسير في عملية بناء الدولة ونهضة الأمة يتمثل بالآتي :
    1- إستمرار التوجيه والنصح والإرشاد للمجلس العسكري حتى يتمكن من القيام بمهمته على أفضل وجه ممكن .
    2- إستمرار الرقابة والمحاسبة للمجلس على أعماله وقراراته لكن دون الدخول في أي شكل من أشكال الصدام العنيف سواء مع الجيش مباشرة أو مع الداخلية .
    3- إقتصار التظاهرات في ميدان التحرير أو في غيره على الضرورات القصوى .
    4- تعليق جميع المطالبات الفئوية بما فيها مطالب أهالي الشهداء إلى حين يستعيد الشعب سلطانه.
    5- إذا كان يُخشى من أي تلاعب بمحاكمات رموز النظام السابق فالأفضل تأجيل البت فيها إلى حين إنتقال السلطة للشعب.
    6- التعجيل بعملية نقل سلطات المجلس العسكري إلى الشعب .
    7- في هذه الفترة الإنتقالية على جميع الأحزاب والقوى السياسية والمفكرين الإنشغال بتهيئة نفسها لمرحلة ما بعد حكم المجلس العسكري لاستكمال عمليتي الهدم والبناء .
    8- على نوارة وعلى كل من يحمل هموم هذا الشعب من الثوار الإبقاء ولو على شعرة معاوية سواء مع المجلس العسكري أو مع كافة القوى السياسية الفاعلة على الأرض المصرية.

    ReplyDelete
  64. mido2 July 2011 at 03:29

    ما حدث هو تماما مفتاح الفوضى القادمة القاضمة
    الشرطة وجنودهم من البلطجية ضربو اهالى الشهداء والدنيا سخنت ولسه هاتولع
    الخطوة اللى بعدها يلمو نجوم الثورة والعقول المتميزة من الثوار فى المعتقلات ولا يبقى غير ثوار بلا عقل
    يدخلو البلطجية وسط الثوار وتبتدى المعجنة والضرب والقتل
    تعم الفوضى و التقتيل فى الشارع اضعاف ما حدث فى ال18 يوم المعهودة لثورة مصر
    تفرض احكام عرفية
    تفرض حكومة على الشعب
    الشرطة هاترفع الجزم فوق رؤس الشعب
    وممكن تفاجأ ان جمال فاز فى انتخابات مجلس الشعب لوحده وكمان انتخابات الرئاسة وانتخابات الدنيا كلها بأغلبية ساحقة
    لا ... انا جاى يا ولاد الكـ....

    ReplyDelete
  65. Rasha Ahmed2 July 2011 at 04:51

    طب ياريت!ياريت يستغبوا تاني نفسي فيها عشان تيجي علي دماغهم المتخلفه دي!!!انا بس نفسي افهم في ناس فاسده كده؟!وكاره البلد دي للدرجادي؟؟مش عايزاها تتقدم وتنضف بقي ؟!!!طب رجاله يعملوها عشان فعلا يولعوها بجد!

    ReplyDelete
  66. تعليق2 July 2011 at 07:57

    يا بن طفيل المجلس العسكري حاجة تانية خالص غير اللي بتتكلم عليه نوارة هي قصدها المجلس إياه بتاع يحيى الجملكه بتاع الأخ اللي بيقولك كل شوية عاوز أستقيل و هم مش سايبني أروح طب و أنت إيه إللي جابك أساسآ أخت نوارة المفروض يكون فيه جمعة تطهير ج\يدة ليحيى الجمل و للعيسوي و للداخلية و لعقول بعض أعضاء المجلس إياه علشان يتحركوا ولو لمرة واحدة من غير ضغط حد يقول لهم إن الحزكة بركة

    ReplyDelete
  67. حازم الهواري2 July 2011 at 08:08

    بصي يا نوارة ولا يهمك كلام الفكيه الدستورى ده ولا اللى اسمه يسرى الشرقاوي وعلى فكرة دول اخرهم مسح جزم اللى موجود فى الحكم وفعلا دول اوسخ من انجبة مصر بجد لان خلاص بقى اللى عامل زحمة فى البلد ومقوى البلطجية ومضيع البلد نوراة نجم وملك عادل والشباب اللى بيروح يموت علشان بلده هما دول البلطجية اما اللى كروشهم متر قدامهم ومش بيطلعو برة التكييف دول هما اللى خايفين على البلد وطبعا نجيب سويرس بطل قومى وحبيب الوفاق القومي .............ومن الاخر انا شايف ان الوفاق الوطني والمؤتمر الوطني والاجماع الوطني والحزب الوطني كلهم عيلة وسخة واحدة ما يتخيروش عن بعض ومش عايزين اى حاجة وطني خلاص بيجينا امساك من الكلمة وطني دي وكل اللى اللى بيطلعولنا فى التليفزيون ولابسين بدل والواحد فيهم لغده مدلدل مترين وصدعوا دماغنا عن الوافقا والنفاق وخلاص كرهونا فى البلد وطول الوقت نازلين شتيمة فى الثورة والثوار دول شويةه بهايم فعلا والبهايم ليها فايدة عنهم لانهم فعلا كلهم نفاق وعايزين يروحوا الشفخانة وكل كلب يجينا يكلمنا عن دور الشرطة واننا لازم نقف مع الشوربة واننا لازم نطبطب على البشوات ظباط الشرطة وهيبة الشرطة ملعوووووووووووووون ابو اكبر شنب فى الشرطة كان بيعذب الناس وبيهنها شرطة ايه لالى عايزيزنا نحترمهم ؟؟؟؟مش لما هما يحترموا نفسهم شوية ويبطلوا يشتموا الناس بالام وبالعرض اى ظابط شرطة مالوش لازمة فى الحياة اصلا محمى تحت النجمة والطبنجة اول شىء بيشتم بيه الام والعرض وهو اساسا من غير البدلة والطبنجة والله العظيم يتلبع بيه كورة وممكن يتعلم عليه ويتصور كمان ويتحطله مكياج ........يعنى من الاخر دول لا علم ولا ثقافة ولا شهادة ولا اخلاقولا تربية ولا حتى قوة بدنية دول شوية عيال ولاد ميت كلب كلهم وانا بقولها اهووووووووووووو انتم مش رجالة لان الراجل المحترم يحفظ امن اهله مش يتعدى على اهله واخركم تتشطروا على نوارة والبنات اللى زيها يا شوية عاهرات انما قدام البلطجية وتجار المخدرات بناااااااااات ثانوى..........العلقاة بينا وما بينكم يا ابناء الداخلية بقت زفت الطين ودوركم معانا من الاول طين فعلا انتم اللى باديكم تصلحوا العلاقة دي لو احترمتوا نفسكم وبقيتم رجالة وبطلوا شغل الصيع وقلة الادب اللى انتم فيها واعرفوا ان امهاتكم مش اغلى من امهاتنا وانكم ولا ليكم لازمة من غير الشعب اللى بتهنوه ده وانكم فعلا اسواء شىء فى مصر وسمعتكم بقت زي الطين يعنى دنيتكم هباب وانشاء الله اخرتكم هباب برضه .........ارجعوا لربكم واعرفوا ان اشد الناس عذابا يوم القيامة اشدهم عذاب للناس فى الدنيا

    ReplyDelete
  68. كيوبيد2 July 2011 at 10:29

    ههههههههههههههه وربنا واحشنى موت واحلى تحية وسلام ليكى من الصعيد اول مره ارجع بعد انقطاع طويل تطلعى محرضه على الفتنة بين الشرطه والشعب هم بس يفكرو يقربو منك وحنا ناكلهم بلا لجنة الوساخ الوطنى بلا الحمار الوطنى سيبك منهم دول لسه عايشين فى زمان المخلوع احنا معكى وشباب مصر كلهم معنا على راى عم احمد بتاع تونس انا بخد كلمته وبقوله لهم جميعا المصرين معدش خوف

    ReplyDelete
  69. freedom4ever252 July 2011 at 11:16

    انتي طبعاّ عارفه المخلوع عمره ما عملها ليه .عشان ماكنش متصور ان النشطاء دوول وشباب النت يقدروا يعملوا ثورة فكان سايبهم يتسلّو. بس دلوقتي لازم اللي كلفهم بالسلطه وقاللهم (وصيتكم البلد اوعوا ياخدها حد من الاحرار ينضفها ويعكنن بيها على حبايبي امريكا واسرائيل) لازم يعملوا اكتر من كده والا البلد هتفلت من ايدهم وهتطهر من الفساد ويوصل للبرلمان والرئاسه الناس اللي بيعبروا بجد عن الشعب ويحققوا مصالحه (وده اكيد لا في مصلحة كبار الفاسدين ولا في مصلحة امريكا واسرائيل). عشان كده لازم نفضل ضاغطين عليهم عشان يضطروا يصلحوا البلد ويطهروا مؤسساتها ويسلموا السلطه لناس منتخبين بجد من الشعب.عشان كده لازم نوريهم الوش التاني ونعرفهم اننا صاحيين لهم اوي. وده بالتأكيد هيبقى يوم الجمعه الجايه .وساعتها (اما يطلعوا يعلنوا اتخاذ اجراءات سريعه لتنفيذ مطالب الثورة وتشكيل لجان من شخصيات نزيهه وثوريه للأشراف على تنفيذ المطالب دي ووفق جدول زمني . وساعتها يبقى العين الحمره واظهار العصايه جاب نتيجه وقرروا يبقوا ناس محترمين وينضفوا غصب عنهم ويمشوا في الطريق اللي عايزه الشعب. أو يختاروا السيناريو التاني ويقرروا يلعبوا بالنار وينفضوا ويتجاهلوا الاعتصام ويغلطوا غلطة مبارك وساعتها هيتشكل مجلس قيادة للثورة ويدفعونا للمواجهه اللي لا نتمناها وحاولنا كتير نتجنبها(لكن اهلاّ بها اذا فرضت علينا...
    بس في حاجه مهمه ...هل على الاقل الناس اللي طلعت في الثورة رأيهم زي رأينا وشايفين اللي احنا شايفينه ؟ وبيفكروا فعلاّ نفس تفكيرنا؟ وللا كان لازم نسيب الشعب يتعذب ويتألم 10-20 سنه كمان عشان لما يثور يبقى يثور بجد ومايرجعش غير لما ياخد حقه؟ ..اصل بصراحه العيّنات اللي بتعامل معاها ماتشجعش. على العموم 8 يوليو قررب وهنشوف

    ReplyDelete
  70. arabian_faithful2 July 2011 at 13:02

    أنا ماهنت فى وطنى ولا سخرت أكتافى

    وقفت فى وجه ظلامى يتيما عارياً حافى


    الله يرحمك يا شيخ إمام ويجازى أبوكى الخير والهداية :)


    أنا فعلاً مش بأقتنع برأيك فى حاجات كتير بس مش ده المهم
    المهم أن الواحد لمس فيكى إخلاص وسلامة نية وده يخلينى مؤمن بأن لو حد لمسك أو إتهمك بالخيانة يبقى بالنسبة ليا ده عدو وإحنا نفخر بالموت فى سبيل الدفاع عن أى مصرى وطنى مخلص لوجه الله تعالى

    ربنا يجازيكى خير يا أستاذتنا ويلهمك الحكمة دائماً أنا بس فعلاً مش فاهم لغاية دلوقتى أيه اللى حصل ومحدش طلع قالنا أيه اللى حصل بالظبط لغاية دلوقتى
    اللى نقدر نقوله يارب أحفظ مصر وأهل مصر

    ReplyDelete
  71. Mahmoud Mortada2 July 2011 at 14:00

    بجد انت بنت جدعة كل موقف الائيكى زى الفل رنا يحميكى يا بلطجية ويزود البلد منكم يا بلطجية ايه رايكم فى مصطلح البلطجى الوطنى لا مش الحزب الوطنى
    ولما سيسأل الناس يعنى ايه بلطجى يعنى يقول لك تنضرب ووينقطع هدومك ولما ترد وانت بالفالنة يقولك اهم البلطجية

    ReplyDelete
  72. Ahmad3 July 2011 at 04:23

    المتشردة حبيبة قلبي
    نوارة نجم

    ReplyDelete
  73. Hadeer Ghattas18 July 2011 at 18:31

    يا ناااااس!!

    حد يقوللى..

    كنت باشجع الثورة على الفيس بوك..

    أبقى كده محرضة؟؟

    يا حلااااااااااوة!!!

    هو التحريض بالسهولة دى؟؟

    طب استنونى عشان أروح أحرض شوية وآجى معاكم على المحاكمات!!

    نتقابل هناك..

    ReplyDelete
  74. محمد حامد20 July 2011 at 22:05

    طب والله العظيم انتى دمك زى العسل يا نواره ربنا يحفظك وانا من اكتر مؤدينيك

    ReplyDelete

Note: only a member of this blog may post a comment.