بلدي في خطر واللي يدوس لها على طرف حادبحه في الشارع

تحديث:
انا لبست ونازلة اهو ان شاء الله... نازلة وانا خايفة ومش مسامحة اي حد يتأخر عن بلدي، ولو اتأخرتوا عليها انا حاشيل القصيدة بتاعة تميم دي
<<<<<<
انا قلابة.. وحاقلب عليكم كلكم لو حصل اي حاجة لبلدي، وحاقلب على تميم كمان.. بس هه.. عشان اداني امل
تحديث:
ابوس ايديكم اقروا بلال فضل.... ويالا بينا على ماسبيرو دلوقت
تحديث:

الفلسطينيين زعلانين قوي وعمالين يعيطوا، لإن اللي بيحصل عندنا ده حيفشل لهم يوم 15 مايو، احنا لازم نحل المشكلة دي بسرعة قبل 15 مايو عشان الناس حاطين امل علينا، واسرائيل متحزمة وبترقص من اللي بيحصل عندنا لانها كده معتبرة ان يوم 15 مايو فشل، وحلني بقى على ما نحل اللي عندنا، المشكلة دي مش حتتحل الا مسلمين كتير قوي ينزلوا ماسبيرو ويبقى عددهم اكتر من المسيحيين ويطالبوا بحق المصري والمتورطين يتحاكموا، وينفع نحلها احنا المهم عددنا.. معلش، ناس كتير متعلقة في رقبتنا، مش لازم نخذلهم

انا ماليش فيه.. دلوقت انا لا باكلم الجيش، ولا باكلم العيسوي، ولا باكلم النائب العام

انا باكلم الناس اللي عملت الثورة، والمصريين اللي البلد دي مسئوليتهم يحموها ويحافظوا عليها

كنت في اعتصام ماسبيرو والوضع مش لطيف، مش لطيف ابدا

اولا، الاعلام المصري بقى قذر اخر تلات حاجات

مش صحيح ان كان فيه ضرب مولوتوف عند ماسبيرو، انا عند ماسبيرو من الساعة ستة ونص لحد الساعة حداشر ومافيش اي حاجة من الكلام ده

كان فيه عند رمسيس هيلتون تحديف طوب، ما كانش فيه ضرب نار

خلوا بالكم بقى، عشان الظاهر ان حتى صحف زي المصري اليوم والاهرام الى جانب سوابق اليوم السائع، ضالعين في مصايب بعلمهم ولا من غير علمهم، مش اي حاجة تتكتب تصدقوها

ثانيا: الناس هناك قلبها محروق

احساسهم ان خلاص بقى.. ما فيش غيرهم في البلد دي، ايام مبارك بينضربوا، وبعد ما مبارك مشي بينضربوا، و"ايه بقى؟ الثورة عملت لنا ايه؟ عملناها ليه الثورة دي؟ كسرنا كلام القساوسة ونزلنا ننام في التحرير ومات منا الشهدا ودي اخرتها؟ كنايسنا تتحرق؟"

ده الكلام اللي قالوه

وواد قلبه محروق عشان كان في امبابه وابوه لما عرف اللي بيحصل خلا امه تكلمه وتقول له ابوك بيموت عشان يرجع بسرعة لانه لو عرف اللي بيحصل كان راح يضرب.. وقلبه محروق عشان حاسس انه متهم انه جبان وما اخدش حقه بايده وما حدش خد له حقه، وده واد من شبرا، يعني من الاخر كده ما يعرفش الكلام بتاع المسيحيين ده اللي هو "احنا مش بنرد على الشر بشر" والكلام اللي هو بيعتبره ماصخ ده، ده لا مسلم ولا مسيحي، ده شبراوي.. شبرا دي دين لوحدها زي ما كلنا عارفين

وعيال عمالين يقولوا لي: فين المسلمين؟ احنا كنا فاكرين بعد الثورة المسلمين حيبقى عددهم اكتر من المسيحيين.. ولا بقى ما كانتش المشكلة في مبارك زي ما فهمتونا.. يبقى هم المسلمين بيكروهنا فعلا؟ مش مبارك هو اللي كان بيعمل فينا كده؟ امال مشيناه ليه وكنا حنموت في الشوارع؟ 

وطبعا سمعنا طراش طائفي بالهبل... مفهوم، والمفروض نستحمل

وممدوح جلال من الاخوان راح ساحب معاه اتنين سلفيين وجم ودخلوا وسمعوا كلام زي الطين، واستحملوا، والمفروض ناس قدهم الف مرة ييجوا ويستحملوا اللي حيسمعوه

احنا في خطر.. احنا في خطر

اسعااااف.. اسعااااااااف.. اسعاااااااااااااااااااااااف

مصر في خطر

والنهاردة كل اللي يشوفني يقول لي: فيه حاجة غلط.. دي خطة تقسيم خارجية وبتتنفذ

مالك عدلي قال لي باللفظ: دي خطة تقسيم رسمي

ومينا زكري قال لي: انا خايف يا نوارة شكلها خطة تقسيم

وماحدش حاطط في بطنه بطيخة صيفي غير تميم البرغوتي، بس تميم حاطط في بطنه بطيخة صيفي عشان مراهن علينا.. على الشعب، وبيقول لي المصريين مش حيستكوا على كده ومش حيسمحوا للخطة دي تتنفذ

اكسفوه بقى... اكسفوه وهو حاطط كل اللي في جيبه عليكم

ومش هو بس.. مصر الغلبانة دي اللي ما شافتش يوم عدل في حياتها، حاطة حالها ومالها وصيغتها عليكم

مافيش حل غير ان بكرة عدد المسلمين قدام ماسبيرو يبقى تلات اضعاف المسيحيين 

مش رايحين يطبطبوا، ولا راحين يهدوا

رايحين يقولوا: عايزين حق المصري. ويحرقوا آخر كارت لابن الوسخة اللي نايم في المستشفى ومش عايز يتحاكم والسعودية وامريكا صارفين مليارات.. مليارات، عشان يعملوا اللي بيعملوه عندنا ده وهو يفلت وما يتحاكمش، مش عشان سواد عينيه، عشان لما يتحاكم فضايحهم حتطلع

المظاهرة اللي في ماسبيرو لحد دلوقت طائفية، والمسلم اللي بيروح فرداني بيسمع احلى خرا، وبيستحمل، ولازم يستحمل، وغصب عن عين اللي خلفوه حيستحمل لحد ما الناس نارها تبرد، ولحد ما عدد المسلمين يبقى قد عدد المسيحيين تلات مرات هناك

ساعتها بقى مش حيبقى فيه هتاف الحماية الدولية الخرا ده

المظاهرة الطائفية ممكن تتحول لمظاهرة مصرية بكرة الصبح.. بس ده في ايد المسلمين بس

ومافيش حاجة اسمها خايف اروح لبعدين يتخانقوا معايا، ما يتخانقوا معاك يا اخي، يتخانقوا معاك وتستحمل وتسكت، يعني ما خفتش من الرصاص وخايف من اخوك يفش غله فيك؟ ما كنيسته اتحرقت.. كنيسته اتحرقت.. ده مالك عدلي بيقول لي دي عمرها ما حصلت من ايام الفتح الاسلامي، وانا مش عارفة حصلت ولا ما حصلتش من ايام الفتح الاسلامي، لكن انا ما اوعاش على كنيسة اتحرقت في عمري

حنصحى الصبح كلنا ونشرخ على اعتصام ماسبيرو بكرة

لا لنا صالح بجيش ولا بنائب عام ولا بشرطة.. لنا صالح ببلدنا وبس، مالهاش غيرنا، وطول عمرها مالهاش غيرنا، ولا حد بينفعها غيرنا

المسلمين حيروحوا اكتر من المسيحيين بكتير، والمسلم اللي مش حيروح يبقى بيخون بلده

والمسلم اللي حيروح مش حيروح يقولهم اهدوا.. عشان كده هو حيعصبهم اكتر

حيقولهم: انا جاي عشان عايزين حقنا من اللي عمل فينا كده في امبابة. بس. 

المسيحيين مش عايزين حماية دولية، فعلا مش عايزينها، بس واحد بيمسك الميكروفون ويخري الخرا ده والناس سخنانة بتقول وراه، لكن لما المسلمين يبقوا تلات اضعافهم ماحدش حيمسك الميكروفون ويقول الكلام ده، حنقول: عايزين حقوقنا.. احنا المصريين، عايزين حقوقنا

انا ما اعرفش حد يقعد لي على النت يشير لنكات ويقعد يحلل في بول ويقول: اصل دي فلول، اصل دول سلفيين، اصل دول مش سلفيين، اصل مؤامرة اصل نيلة على دماغه... ده بيض ده... حي على الجهاد

حي على الجهاد بقى

مصر محتاجانا.. مصر اتكعبلت وعايزة اللي يلحق يقومها، مش يقعد يتفرج عليها وهي واقعة عشان يعرف اتكعبلت في طوبة ولا في حفرة.. المهم انها اتكعبلت وخلاص

الكورة في ملعب المسلمين.. اللي مش حيروح يبقى خانها

واي حد تشوفه بيشحن طائفي وعايز اختي وعايز بنت خالتي وشنودة يمشي وسلاح الكنيسة والقرف ده اشمطه وخلي اللي ما يشتري يتفرج عليه، ده خاين ده، خاين، زي الجاسوس الاسرائيلي، وزي الفلول، ويمكن يكون جاسوس اسرائيلي فعلا انت ايش ضمنك؟ ده خاين وقاتل.. بيقتل مصر

مصر لو اتقسمت عشان واحدة ست انا مش عايزة ابص في وش جنس مسلم مصري هنا في البلد دي.. وايوة انا باحمل المسئولية للمسلمين المصريين... المسئولية مسئوليتهم دلوقت، ومصر محتاجاهم دلوقت، ومتعلقة في رقبتهم

وروها نفسكم... وروا الدنيا نفسكم اذا كنتوا مصريين بجد ولا لا