نداء الى اصحاب المقاومة الرحيمة.. ما تلعبش على الحصان الخسران.. بشار خلص

سوريا زي الفل، وان شاء الله جاية بالسلامة

بس انا ليا طلب عند الثوار السوريين، الناس اللي بتطلق هتافات طائفية زي "بدنا سني يخاف الله"، انا اقطع دراعي من لغلوغه ان بشار هو اللي زارعها، ممكن حد يقول لي: ما يمكن واحد حمار يا نوارة. لا.. في سوريا، الحمير مش كتير، والسوريين مش طائفيين، والهتاف ده مش شبه هتافات السوريين، ده واحد مدسوس، اي حد يهتف هتافات زي دي ينضرب، احنا لما كنا بنلاقي هتافات شبه دي في مصر كنا بنمسك اللي بيقول الهتاف ده ونديله واحدة سلمية سلمية لما يبان له صاحب. واكيد السني مش حيخاف الله اكتر من العلوي مدام طاغية، هو مبارك كان بيخاف الله؟ واكيد السوريين مش محتاجيني اقولهم الكلام ده، هم فاهمين كويس. اللي يقول كلام زي ده ينضرب، بشار عايز يعملها زي البحرين، لما لقى نفسه مش عارف يسيطر على الثورة بالقتل، والغاء الميدان، قلبها سنة وشيعة ودخل لبلده قوات احتلال سعودية تموت اهل البلد، ما تدوش بشار الفرصة دي

وربنا معاكم.. انتم سباع.. عنجد 

--------

انا مقدرة موقف فصائل المقاومة المريع

بشار في ايده كل اوراق فصائل المقاومة، ومقيم عنده شخصيات كبيرة ومهمة مطلوبة لاسرائيل، وعنده كل اسرار المقاومة، الفلسطينية واللبنانية. ولما يلاقي نفسه بيغرق، وهو بيغرق خلاص فعلا، حيستخدم كل الاوراق اللي في ايده، بس فيه لحظات الخيار فيها لازم يبقى اخلاقي وما ينفعش يبقى حاجة تانية.

انا عارفة انه مزنق ابن ستين في سبعين

بس حصل تغير دلوقت ولازم يتم مواجهته ما ينفعش التهرب منه

بشكل شخصي انا كنت مقدرة صمت فصائل المقاومة، وبالتحديد حزب الله، لإنه مزنق مهبب فعلا، بس خلاص

خلاص

ايوة طبعا اي حد ضد اسرائيل انا معاه... وده مبدأ، بس مش لازم انسى انا ضد اسرائيل ليه بالاساس. ما ينفعش اللي انا اتخندقت معاه ضد اسرائيل، وتغاضيت عن اخطاء عملها، افاجأ بيه بيعمل نفس ممارسات اسرائيل والا ابقى انا كلت على قفايا كده

حياة السوري خط احمر بلون الدم اللي سال

انتهى

انتهى

ما ينفعش 

دلوقت ما بقاش المقارنة ما بين انظمة استبدادية وبعضها: ده نظام استبدادي بس خاين وبيخدم اسرائيل، وده نظام استبدادي بس من قوى الممانعة ضد اسرائيل.. المقارنة دلوقت بقت ما بين الشعوب وبعضها، وكأن الشعب المصري والتونسي واليمني يستحقوا الحرية، بس الشعب السوري او البحريني ما يستحقوش

خدمة اسرائيل خيانة عظمى، عشان كده مبارك وبن علي خونة وعلي عبد الله صالح

بس كمان قتل الشعب خيانة عظمى، عشان كده بشار وملك البحرين خونة

وفيه فرق ما بين مواقف الدول اللي بتعتمد على المصالح - زي مثلا مصر وتونس ما علقوش على احداث اي ثورات عربية اخرى بشكل رسمي والا حنلبس مصيبة تصدير الثورة واحنا يا عيني علينا لا صدرنا ولا نيلنا احنا في حالنا - وفرق ما بين مواقف فصائل سياسية بتعتمد بشكل اساسي على اخلاقية قضيتها

ايوة صحيح بشار ممكن يصبح الصبح يسلم كل الورق اللي معاه عن المقاومة لاسرائيل، وفي الحالة دي حيموت ناس كتير من المقاومة، بس هو خلاص، بالفعل مات ناس كتير من السوريين، خلاص هو بقى قاتل ومطلوب للعدالة دلوقت، طيب انت مقاوم وندرت نفسك للموت، يعني انت مش احسن من السوري المدني اللي ماشي في الشارع فمات، ما بقاش ينفع

واخص بالذكر حزب الله، وعارفة ان المصابين بهوس كراهية الشيعة، او اللي بيشتغلوا لحساب امريكا واسرائيل، املهم يتصيدوا له الخطأ ده، بس انا ماليش دعوة بيهم دول، ماليش دعوة بيهم ويولعوا بجاز وسخ

حزب الله فصيل مقاوم، حقق انتصارات، وحرر ارضه، ومر بامتحانات عسكرية واخلاقية، ونجح فيها كلها وجاب خمسين من خمسين وممتاز وتلات نجوم

دلوقت امتحان الشهادة الكبيرة، وامتحان صعب

انا عارفة جدا انه امتحان صعب

حزب الله تحت ضرس بشار، وبشار زي النمر الجريح، واول ما حيجز حيجز عليهم

بس على فكرة.. هو كده كده حيجز على حزب الله، سواء حزب الله فضل ساكت وواكل سد الحنك، او اتكلم وقال: الظلم الحرام، والدم السوري مش اقل عندنا من الدم اللبناني

في الحالتين حيجز لإنه متشبث ومش حيسيب، وحيعمل كل اللي يقدر عليه عشان يفضل في السلطة

ولو حكمت انه عشان ياخد دعم من امريكا واسرئيل اللي - وياللعجب - مش واخدين موقف حاد لصالح الثورة السورية، لإنهم راميين على إن بشار يقدم لهم تنازلات مقابل انهم يحموه ويساعدوه في قمع الثورة - وهي تطلع منه على فكرة واوسخ منها يطلع منها كمان - ولو حكمت حيعمل كده، واول ناس حيتقدموا على الترابيزة حزب الله

انتهى
انتهى
ما بقاش ينفع حزب الله يفضل ساكت
لا اخلاقيا
ولا براجماتيا
ولا امنيا
الراجل قاتل.. وحصان خسران.. وندل وممكن يهبب اي حاجة عشان يفضل في السلطة
الامتحان صعب، بس هو الشهادة الكبيرة
وبصريح العبارة الفصائل الفلسطينية موقفها احسن كتير من مزنق حزب الله، لإن قضيتها شغالة على اي سيستم، مش بتعطل، ولإن حيوية قضيتها بتدي عذر دائم، ولإنهم سنة بالمفتشر كده
وحزب الله مهتم بثورة البحرين وله حق يهتم بثورة البحرين، وله حق يزعل من كلام الشيخ القرضاوي غفر الله له، ايوة غلط طبعا
طبعا غلط، بس كل انسان بيغلط، هو انسان، هو مش فصيل، ولا يمثل الا نفسه، وينفع مع القرضاوي، لإنه فرد، يتعامل بمنطق ميزان الحسنات والسيئات
لكن فصيل مقاوم ضد اسرائيل، فيه عملاء كتير لاسرائيل وامريكا بيتصيدوا له، فيه هاموش كتير مفعم بالكراهية الطائفية بيعف عليه، سقطته مش حتتعامل على انها سقطة
حزب الله في مسابقة من سيربح المليون وجاوب على كل الاسئلة صح.. حتى السؤال الصعب قوي بتاع الخناقة الايرانية - وبالمناسبة هي كانت خناقة مش ثورة.. جناحين من النظام بيتخانقوا وكل واحد منزل للتاني ناسه وبيقدمهم قرابين، لا اتكلموا عن تغيير النظام، ولا حتى اصلاح، ناهيك عن سيرة ولاية الفقيه يعني اللي ما بتتفتحش خالص من اي حد، الخناقة كانت على نتائج انتخابات وفضلت كده ولحد دلوقت هي كده - ومع ذلك السيد حسن نصر الله بنفسه قال انه لا موسوي خاين ولا نجاد مزور بس انا اللي يهمني سلامة الداخل الايراني وسلامة المواطن الايراني ويحلوا مشكلتهم ويحافظوا على الناس.. ودي كانت قراءة سليمة للموقف وموزونة بميزان الدهب
بس هو دلوقت في آخر سؤال
يا يكسب المليون، يا يخسر كل اللي كسبه قبل كده
ثم ان حزب الله ورط نفسه واتكلم عن الثورات خلاص.. ما ينفعش يسكت، ما ينفعش يحيي تونس ومصر واليمن والبحرين ويسكت عن سوريا
خلصت.. خلصت
السكوت الحالي فيه تخوين ضمني للسورييين، وكأن مافيش حد سوري حيساند المقاومة غير بشار.. لا معلش اعلى وعي قومي في العالم العربي كله هو الوعي السوري، والمقاومة عليها اجماع سوري، ومافيش حد بيعادي اسرائيل قد السوريين، وايوة الوطنية بتقاس بالعداء لاسرائيل واللي مش بيعادي اسرائيل مش بني ادم اساسا ناهيك على انه يبقى وطني
بس الشعب السوري شعب وطني، واكثر وطنية من بشار
انا عارفة اني حالاقي طراش كتير تعليقات في المدونة، وما يهمنيش الطراش، لإن طول الفترة اللي فاتت اللي كان بيعادي حزب الله، يا اما ناس معميين بالكراهية الطائفية، ودول هاموش فعلا، عدد من غير وزن، دول حتى في الثورة المصرية قالوا المظاهرات حرام، يا اما ناس مواليين لاسرائيل وامريكا، ومش حاقول عملا يا سيدي، يكفيك تقول مواليين لاسرائيل وامريكا عشان الناس تعرف انهم عملا
بس ماحدش بياخد مواقفة بناء على الطراش، والا كنا احنا كمان اخدنا موقفنا من المعارضة الايرانية بناء على الطراش اللي قالوه في مظاهراتهم لما شتموا فلسطين ولبنان والعرب والسنة وفجأتن كده لقينا نفسنا بنتشتم من المحيط للخليج بلا مبرر واضح.. بس الاخلاق اخلاق
الناس بتاخد مواقف اخلاقية خصوصا لما تبقى قضيتها اخلاقية
ومافيش داعي حد يبوظ طبخته على حبة ملح
انا باقول كلامي ده وانا على سفر نصيحة لوجه الله.. يا ريت لو حد يعرف يوصل الكلام ده لحزب الله، اجتماع عاجل كده لدراسة الموقف، واتخاذ القرار الاخلاقي، ونسمع اللي انا شخصيا منتظراه ومتوقعاه من حد مرجعيته الاساسية مرجعية اخلاقية
بالنسبة للاخوة اللي عارفين نفسهم وحيعلقوا.. ايوة ايوة.. انت طراش
--------
كان الاستاذ عصام سلطان انسحب من قناة المنار عشان عمرو المذيع سأله عن المسطرة اللي بنقيس عليها
هو يقصد مسطرة العداء لاسرائيل، وهو معاه حق، زي ما قلنا ايوة مش بس الوطنية، والانسانية كمان بتتقاس بالعداء لاسرائيل
بس اسرائيل مش اسم
اسرائيل كيان له ممارسات
ومش عارفة ليه الاستاذ عصام سلطان مشي
ليه ما قعدش وقال له: المسطرة اللي بنقيس عليها لونها احمر بدم العزل اللي ماتوا
النظام اللي يقتل شعبه يبقى زيه زي اسرائيل