خبز، حرية، عدالة اجتماعية

والسبب الحقيقي اللي ممكن يقودنا لديكتاتورية هو ان اغلبية الطبقة المتوسطة عايزة تاكل حق الفقرا وتعيشهم تحت رحمتها يشحتوا وحسبي الله ونعم الوكيل

انا مش لاقية مرشح رئاسة مبدئيا... وحاشوف مرشح مجلس الشعب اذا اولويته العدالة الاجتماعية حانتخبه، غير كده مش حانتخب مخلوق

كنت باتكلم عن هشام بسطويسي بس قال عن مجانية التعليم نفس اللي قاله البرادعي

اولا.. ماحدش يمد ايده على مجانية التعليم.. خالص، مافيش حاجة اسمها ادعم التعليم الفني واخلي التعليم الجامعي بفلوس عشان اصرف على التعليم الفني.. ايه ده ايه ده ايه ده؟

ندعم التعليم الفني، ونصرف على التعليم الجامعي، ونحسن المدارس الحكومية، ونرفع مستواها لحد ما تبقى احسن من المدارس الخاصة بل والمدارس الانترناشونال وده مش مستحيل ابدا، ده يتعمل في خمس سنين

ده المفروض يبقى الخطة العاجلة اللي تتعمل للتعليم، ويبقى التعليم عندنا زي انجلترا وفرنسا والسويد، واتضح اننا عندنا فلوس اكتر منهم هم التلاتة جمعاء

انا اصلا متغاظة من وجود المدارس الانترناشونال

ومش طالبة حد يليغها، ابسلوتلي، دي تفضل موجودة ويتبهدلوا ضرايب عشان نعرف نصرف على التعليم

انا اللي عايزاه، وده ينفع يتعمل في ظرف خمس سنين، ان المدرسة الحكومة تبقى هي المميزة، ولما حد يتحرم من المدرسة الحكومة يبقى متضايق، او مكسوف يقول انه خريج مدرسة خاصة، لأن ده معناه ان مستواه في التعليم قليل قوي قوي قوي وفشل في التعليم الحكومي لحد ما اهله طلعوه وودوه بقى مدرسة بفلوس عشان ياخد شهادة وخلاص

الوضع كده في انجلترا فعلا، وفي فرنسا، وفي السويد، واللي بيدخل مدرسة اهلية بيذوب خجلا، ولما فرنسا منعت المحجبات من دخول المدارس الحكومية المسلمين عملوا مظاهرات وقالوا ليه نضطر ندخل مدرسة اهلية واحنا لنا حق نتعلم كويس

بس الطبقة المتوسطة مش عايزين كده

طبعا الاغنيا مش عايزين ضريبة تصاعدية لأنهم عايزين يسرقوا وما يدفعوش مفهوم ده، وبيتحججوا بإن ده حيطفش الاستثمار، البلد اللي اقتصادها يعتمد على الاستثمار لدرجة انها تعمل استربتيز للمستثمرين يبقى ما عندهاش اقتصاد.. وما عندهاش شرف، وما عندهاش كرامة، وتبقى ماشية مع المستثمرين في الحرام، والمستثمرين قايلين لها: احنا مش بتوع جواز عايزة تعيشي معانا على كده اهلا وسهلا مش عايزة بالسلامة، وهي راضية

والمستثمر اللي مش عايز يدفع ضريبة عادلة يبقى عايز يسرق مش عايز يستثمر، احنا عايزين نجتذب الحرامية ليه؟ وعايزين نعيش مصر في الحرام ليه وهي مزة والف من يتمناها ويجيب لها مهر وشبكة وشقة مفروشة من مجاميعه؟ طب نظيف كان بيقول كده عشان نظيف ووزراته واللي معينه واللي مشغله واللي مصاحبه عاملين برتيتة حرامية وعايزين يوسعوا نشاطهم، وعايزين يحطوا مصر في المطبخ ويلبسوها جلابية مقطعة، ويخلوها تطبخ وتمسح وتكنس ولما ييجي ضيوف ينادوها ترقص لهم.. احنا ليه عايزين نعمل فيها كده تاني؟ ما خلاص بقى هي مش حتعمل كده تاني، هي حترجع لبيتها واودتها وتعيش زي ما مفروض تعيش

بعض الناس اللي من الطبقة المتوسطة ومش عايزين مجانية تعليم مش عايزينها لسبب حقير جدا.. مالوش علاقة بالميزانية، وان الفلوس اللي بتتصرف على مجانية التعليم كتير وممكن تتوفر، (لأن الفلوس اللي بتتصرف على التعليم 15 في المية من الميزانية والفلوس اللي بتتصرف على الداخلية 30 في المية)، وان مافيش مجانية تعليم حقيقية والكلام ده... هي مش عايزاه عشان مش عايزة ابنها يقعد جنب ابن البواب في المدرسة

بس كده

بدليل ان اللي بيعترضوا على مجانية التعليم مش معترضين على الصحة، ان المستشفيات كلها تبقى مستوى واحد مافيش حاجة اسمها مستشفى للبشوات ومستشفى لولاد الكلب.. ببساطة لأنه مش حيقعد مع البواب في نفس الاودة، فهم ما عندهمش مانع يبقى نظام الصحة في مصر زي انجلترا وفرنسا والسويد واي دولة محترمة عندها حد ادنى من العدالة الاجتماعية، وان العلاج الكويس بيبقى في مستشفيات الحكومة، لأن كل واحد حيبقى له اودة وهو مش حيضطر يختلط بالغلابة ولا حاجة، الى جانب انهم مش وحوش يعني، هم طبقيين طبقية وسخة، بس مش قتالين قتلا، ونفسهم البواب والسمكري وساكن العشوائيات يتعالج كويس في مستشفى كويسة، وما يدفعش فلوس لأن ده حقه، بس ما نفسوش ابنه يتربى مع الغلابة.

تلاتين سنة هو قاعد يمد ايده من الشباك ويديهم صدقة.. بس ما عندوش استعداد يبقى زيهم زيه.. او بالاحرى، ما عندوش استعداد يبقى زيهم زيه، امال يفك عقده على مين؟

بس معلش، ينفع ده يتعالج.. بس ناخد بالنا من المرض ده، ونواجهه، ما جراش حاجة، ما ينفعش الواحد يفضل يتهمهم ولو اني انا متغاظة منهم وحاسة انهم ظلمة وقاسيين، بس عادي يعني، ماهو مبارك اتسبب في امراض كتير، كل الناس اخدت بالها من مرض الطائفية اللي رباه مبارك على الغالي، كل الناس اخدت بالها من تحول الدين الى عصبية وحزبية بعد افراغه من قيمه وبقى الموضوع شكله اهلي وزمالك

لكن ماحدش اخد باله من مرض الطبقية القذرة اللي اصاب كتير من الطبقة المتوسطة اللي طول النهار يقولوا احنا المتعلمين احنا اللي حننضف البلد احنا اللي حنعل نهضة، ولما البسطويسي قال ينفع نرجع الكتاب (وبالمناسبة منهج تعليمي رائع لو شلنا منه عنصر الخرزانة يعني، لأنه بينمي الذكاء بدرجة عالية) واحد قال كتاب ايه؟ عيب البسطويسي انه ما كانش عايش برة، وميزة البرادعي انه عاش برة فبقى عنده خيال! وكل اعتراضهم على نسبة 50% عمال وفلاحين ان العمال والفلاحين بصمجية وما ينفعش يحطوا لنا تشريعاتنا احنا عايزين مثقفين واساتذة جامعة!

طب دي طبقية قذرة.. مش طبقية بس، دي طبقية قذرة

والطبقية القذرة دي كانت باينة من ساعة الاستفتاء وماحدش اخد باله منها لأن صوت خناقة المسلمين والمسيحيين كان اعلى، على اي حال انا مبسوطة من خناقة المسلمين والمسيحيين لأنها مش حتتكرر بالشكل ده تاني، لأن الناس عندها رغبة حقيقية انها تحسن من نفسها في كل حاجة، وكل ما تشوف مشكلة عايزة تعالجها

وحنعالجها دي.. اقصد خناقة المسلمين والمسيحيين، السلفيين اتخضوا وحسوا انهم بقوا مكروهين والناس بتحملهم مسئولية بلاوي كتير في البلد، والحقيقة هم متحملين مسئولية حاجات كتير حصلت ايام مبارك واثارها موجودة لحد دلوقت، بس هم كمان ما ينفعش يتشيطنوا كده، لأن كل واحد فينا، سواء كفرد، او كجزء من مجموعة، عمل حاجات مضرة بالبلد لأن المناخ فاسد، واعتقد انهم حيصححوا سكتهم، ما هو مبارك مشي، وهم يقدروا يمارسوا حريتهم في العقيدة من غير ما يقرفوا غيرهم، واعتقد انهم عايزين يصلحوا صورتهم اللي اتشوهت قوي وهم فعلا ما كانوش عايزين الامور توصل لكده، هم زي البيوريتانز بتوع امريكا، عايزين يمشوا يكلموا الناس في ربنا والصلاة والدين ويبقى لهم كوميونيتي وخلاص كده، واظنهم ابتدوا يحطوا نفسهم على التراك الصحيح وابتدوا ياخدوا بالهم ان فيه اخطاء لازم تتصلح حتى لو ما صرحوش بوضوح انهم بيصلحوا اخطاء

نفس الحكاية بالنسبة للمسيحيين، هم اخدوا بالهم انهم قعدوا فترة كبيرة سلبيين، ومنعزلين، وملمومين على روحهم كده ومسلمين دماغهم للقنوات الطائفية، وعايزين بقى يبتدوا يشاركوا ويكون لهم دور، صحيح مشاركتهم لسه لها طابع طائفي، وتحركهم لسه بتوجيهات من الكنيسة، بس دي اول مرة يعتصموا مثلا خارج الكنيسة، وده تطور، حاولوا ينزلوا الاستفتاء ويراقبوا، برضه الدافع كان طائفي، بس اهي خطوة اولى، احنا كنا فين؟ ابتدوا يعترضوا على المصالحات العرفية، طبعا القنوات والمواقع المسيحية الطائفية بتاعة الحقونا المسلمين بيموتونا لسه شغالة بس ابتدوا هم يخرجوا عن اطارها ويتعاملوا على ارض الواقع، ويحاولوا يتضامنوا ويحاولوا يشاركوا وكانوا بيراقبوا في الاستفتاء على اللجان وبيحاولوا يحسنوا من نفسهم ويبقوا ايجابيين على قد مايقدروا، المنهج الطائفي القبلي مش حيخلص بين يوم وليلة، ولسه طبعا لما بيسمعوا اسم مسيحي بيسخنوا له اكتر، زي مثلا مايكل نبيل اللي املي ومنايا انه ما يتعذبش وماحدش يمسه ولا يعذبه عشان ما يعملش بطل على امنا، واصلا هو غير معبر عن المسيحيين، لا هو مسيحي، ولا مؤمن بالمسيحية، ولا هو بيعبر عن انتماءات المسيحيين، بس اسمه مايكل فسخنوا له.. لكنهم حتى لما سخنوا ابتدوا يقولوا: احنا مش موافقين على ارائه بس هو حر يعبر عن نفسه، ما قالوش النغمة بتاعة زمان: اااااه عشان مسيحي قبضوا عليه، وده برضه خطوة واسعة جدا، بس واحدة واحدة هم بيحاولوا يغيروا الطريقة اللي عاشوا بيها تلاتين سنة

الناس كلها بتحاول تحسن من نفسها، وتحاول انها تعمل حاجة كويسة، وتشوف هي غلطت في ايه طول الفترة اللي فاتت وتحاول تصلحه، واول استفتاح كان بالمجموعات اللي لها صفة دينية عشان دي اكتر المجموعات المؤثرة في المجتمع ودي حاجة حلوة، انا مبسوطة ومتفائلة

بس الطبقة المتوسطة مش واخدة بالها ان مبارك تسبب في انها طبقية حقيرة

مش قصدي اشتم، قصدي ان الطبقية دي حقيرة، يعني ايه طبقية حقيرة؟ يعني طبقية واطية، يعني قليل الاصل الواطي بس هو اللي يتكلم بطريقة: مش الجهلة والبصمجية هم اللي حيشرعوا لنا قوانينا... قليل الاصل الواطي محدث النعمة بس هو اللي مش عايز مجانية تعليم لأنه مش عايز ابنه جنب ابن الزبال في المدرسة، دي حتى مش طبقية الناس الشيك ولا طبقية الارستقراطية الانجليزية اللي ما تبانش من كتر ماهي معمولة بشياكة.. دي طبقية الناس اللي اشتروا فيلا من فلوس المخدرات وبيرموا قشر البرتقان على السجادة الشينواه ومعلقين ملابسهم الداخلية على دراع تمثال فينوس الكبير وشكله وحش قوي وجنبه فازة صيني ضخمةةةةةةةةةةةةة، ومعلقين في البيت النجفة اللي بتتعلق في الفنادق، ويتنكروا لجيرانهم القدام، وام الواد تقوله ما تلعبش مع ابن البواب عايزين نصاحب ولاد الناس الهاي لايف انت مش اقل من حد فيهم يا ولا 

يعني حتى مش عارفين يبقوا طبقيين على الاصول وبحق ربنا، بقوا طبقيين طبقية: العيش البلدي ده ما يدخلش عندنا البيت.. ما ناكلش الا فينو

وده طبعا لأننا قعدنا تحت حكم عيلة واطية تلاتين سنة فطبعت علينا كلنا، معلش تتعالج، بس تتعالج بإن الناس تاخد بالها انها بتقول كلام ما ينفعش يتقال، ما ينفعش تقول الشعب جاهل ومش حيعرف ينتخب الا اذا كنت معلق ملابسك الداخلية على دراع تمثال فينوس، ما ينفعش تقول مش عايزين مجانية تعليم لأنك مش عايز ابنك يتعلم مع ابن الفقير، ما ينفعش تقول ال50% عمال وفلاحين دول شوية بصمجية وجهلة ما يحطوش لنا التشريعات الا اذا كنت بترمي قشر البرتقان على السجادة الشينواه... بلدي قوي يا حسين

وعلى رأي علاء سيف: انت معترض على فكرة الكوتة ممكن نتفاهم ونتناقش في جدواها، لكن حتقول الفلاحين والعمال جهلة وما ينفعش يشرعوا لنا يبقى غور مش عايز اعرفك

ايه الجهل ده؟ 

مين اللي قال ان الشرط في العامل والفلاح المرشح انه يبقى مش متعلم؟

ومين اللي قال ان المشاركة في التشريعات تستوجب ان كل المشاركين فيها لازم يبقوا متعلمين ومتخصصين في القانون؟ مش فيه حاجة اسمها فئة منتفعين؟ والعمال والفلاحين من فئات المنتفعين؟ المنتفعين في كل حتة في الدنيا لهم دور في التشريع، ايه الشغل البلدي ده.. حتى مش عارف تبقى طبقي صح؟ ايه دخل العلام في وضع قوانين يشارك فيها فئة اجتماعية؟ انت ما تعرفش ان حتى الناس اللي ما عندهاش نسبة تمييز ايجابي للمنتفعين لهم نقابات وكيانات بتشارك في وضع القوانين وبتشيل نواب وتحط نواب؟ اكلمكم بقى باللغة اللي بتفهموها مدام عقدة الخواجة واكلاكم؟ ما سافرتش بلاد الخواجات وشفت الرعاة والفلاحين لما بيواجهوا مشاكل بيدخلوا المجالس التشريعية بالمعيز والخرفان بتاعتهم ويشيلوا النائب اللي خرب بيتهم هيلا بيلا - حرفيا مش مجازا - ويعزلوه؟ 

اما اللي بيقولوا: المرشحين في نسبة العمال والفلاحين لا يمثلوا العمال والفلاحين فعلا... آه.. ده على اساس ان الفئات كانوا بيمثلوا الفئات فعلا؟ يعني احمد عز كان يمثلك لكن مرشح الفلاحين هو اللي ما كانش بيمثلهم، ما المجلس كله لا يمثل الشعب على بعضه بكل فئاته، ومرشحين العمال والفلاحين ظباط شرطة، طب ما مرشحين الفئات رجال اعمال.. لو الفلاحين مش ظباط شرطة، الفئات كمان مش رجال اعمال، ومالك فرحان قوي انك متعلم كده وبتعرف لغات؟ ايه الإحداث ده؟ 

ولما ممدوح شاهين يقول: الخمسين في المية عمال وفلاحين من مكتسبات ثورة يوليو وما ينفعش نفرط فيها. ناس تقعد تشتم في ثورة يوليو؟ الله يرحمه، لولا ثورة يوليو ما كنتش انت اتعلمت ويا ريتك ما اتعلمت عشان ما تنساش اصلك.. ياي ياي ياي

يعني الجيش اللي بناء مؤسسته هرمي وهايراركي بيحترم القاعدة الشعبية وانت لأ؟ اه.. عارفين ليه؟ عشان احنا رباية شرطة مش جيش.. ظابط الجيش بيخاف على العسكري بتاعه وشفت بعيني لما عسكري واحد اتصاب 3 ظباط الجيش اتخضوا عليه ازاي وقعدوا يشتموا في الشعب كله عشان عسكري اتصاب، وركعوا على الارض عشان يداووه بايديهم، انما ظابط الشرطة بيضرب العسكري... واحنا بقالنا 30 سنة متربيين على ايد اللي بيضرب العسكري

بس احنا مش عايزين نبقى تربية ميري خالص، احنا عايزين نبقى تربية مهذبة من غير ما نضطر نجيب ميري يعرفنا الصح من الغلط ويضطر اللواء ممدوح شاهين يفهم ناس المفروض انهم مثقفين ازاي انك ما ينفعش تتجاهل اكتر من نص الشعب وتحتقرهم والراجل ضغطه يعلا ويروح المستشفى عشان المثقفين بيشتموا له في الفقرا والشعب 

مرة مش عاجبهم تصويت الشعب في الاستفتاء، ومرة مش عاجبهم مجانية التعليم وعايزين يأصولوا منها، ومرة مش عاجبهم نسبة العمال والفلاحين، مش عشان معترضين على فكرة الكوتة - وهي وجهة نظر محترمة نعرف نتناقش فيها مع الناس المعترضة على فكرة الكوتة وسوا اختلفنا او اتفقنا ممكن نفضل نحترم بعض - لكن عشان الفلاحين والعمال مش بيعرفوا انجليزي وما يصحش يشرعوا لنا

لالالالالا إحداث إحداث إحداث

أنا اقولك بقى لو عايز تبقى طبقي صح، الناس الشيك اللي بجد، الراقية اللي بجد، تعمل كده زي بيل جيتس مثلا اللي بيقعد ينشر صوره ايام ما كان فقير دقة ويقول انا ده، او زي الاميرة ديانا اللي تلبس لبس الفلاحين الانجليز وتقول احنا اصلنا ده، تقوم الناس تقول: شوف اميرة ولابسة لبس الفلاحين وفخورة بأجدادها الفلاحين... لأن عندها ثقة في نفسها، ومش محتاجة تفضل تقول انا اميرة انا اميرة ومتعلمة ومثقفة وعندي علم، الجرابيع قلالات الاصل بس هم اللي بيتكبروا على القاعدة العامة للشعب وعايزين يميزوا نفسهم عنهم، عشان هو عايز يتبرا من اصله، فبيشتم في الناس اللي بتفكره باصله، فالناس تقولك: افتكر جدك المقشف اللي لولا ثورة يوليو ما كانش عرف يدخل ابوك مدرسة ويعلمه، وبعدين ربنا كرمه واشتغل ايام الانفتاح وعرف يدخلك مدرسة لغات ويطلعك بترطن

ماهو انت اللي بتضطر الناس تقولك الكلام ده.. عشان حتى لما حبيت تمثل انك طبقي، بقيت طبقي واطي، ومش ذنبك، ذنب العيلة الواطية اللي قعدت تلاتين سنة تكرف وطيانها علينا

-----------

الخلاصة... زي ما ابونا قال على التويتر (فيه قس لطيف قوي قاعد على التويتر وجميل جدا، مش باقولكم فيه تطور على الصعيد ده حصل جامد) قال: الثورة شعارها كان "خبز حرية عدالة اجتماعية" لو نسيتوا الشعار ده يبقى ثورتكم فشلت.

والناس اللي عاملة متدينة دي، ما تعرفش ان ربنا حيخرب بيتها عشان الافترا على الفقرا والتكبر والكبر؟ 

اللي يمد ايده على مجانية التعليم ومجانية الصحة وحق السكن وحق القطاع الاكبر من الشعب في انه يمثل في البرلمان اقطعها له انا شخصيا

اللي قرفان من الشعب ومستعر من اصله، يا نحاول نصلح له مخه ونخليه ما يرميش قشر البرتقان على السجادة، بدل ما يقول الشعب محتاج توعية، ياخد باله ان هو اللي محتاج يفوق كده، يا اما نوديه الجيش في الصحرا كده لحد ما يتربى، ولما يتحط عسكري يعرف ان كلنا ولاد تسعة

انا مرشحي اللي حانتخبه للمجلس او للرئاسة - واللي لسه ما اعرفش هو مين - هو اللي حيعمل لي التعليم الحكومي احسن من التعليم الخاص، وحيعمل لي ضريبة تصاعدية، وحيعمل لي المستشفيات الحكومي بيتعالج فيها رجال الاعمال، وحيتمسك بحق اغلبية الشعب في انهم يبقوا في البرلمان، وحيعمل لي حد ادنى وحد اقصى للأجور

الا حق الغلابة.. الا حق الغلابة ده مافيهوش فصال والا اولع لكم في نفسي في الشارع، اي حاجة تانية نتفاهم فيها.. 

ادوا الغلابة التعليم والصحة والسكن والحد الادنى للاجور والتمثيل في البرلمان وخدوا بقية البلد ان شالله تعملوها قراطيس ما يهمنيش تعملوا فيها ايه

غير كده، والله لو المرشح نازل لي من السما مع اتنين ملايكة.. حارميه من الشباك

واعرفوا ان ربنا عمل ده كله في مبارك عشان ظلمه للفقرا 

واعرفوا ان ربنا حيخرب بيتنا لو تجاهلنا حق الفقرا... القضاء على الفقر الاولوية الكبرى قبل الدستور وقبل القانون وقبل حتى الحريات، وقبل اي حاجة

وانا من موئعي هذا احب احيي السلفيين والمسيحيين لروحهم الايجابية ومحاولاتهم المستميتة انهم يغيروا من نفسهم ويصححوا اخطاء الماضي 

ومن موئعي هذا باقول للطبقة المتوسطة... انت عيانة يا حبيبتي.. ربنا يشفيك، بس مافيش دكتور حيقدر يساعدك لو انت ما ساعدتيش نفسك

تعالجي نفسك ازاي؟

اقولك: بدل ما تقعد تحكم على الشعب المصري من كلام الست اللي بتساعدك ولا بتساعد مراتك في تنضيف البيت وتقول: ده شعب متخلف، خلي هدفك: يوم ما الست اللي بتساعدك في البيت تبقى لها مسمى وظيفي، ولها مرتب، مش يومية وخدي كيس الرز وكيس السكر، ويبقى لها يونيفورم، وجهة هي تابعة ليها، وابنها بيتعلم مع ابنك في المدرسة ويمكن يبقى قاعد معاه في نفس الديسك، وانت وهي بتتعالجوا في نفس المستشفى تبقى الثورة دي نجحت

غير كده... الثورة دي تبقى فشلت

ولو دخل قناة السويس بس اتخصص للتعليم والصحة حيكفي ويفيض واللي احنا عايزينه ينجز في خمس سنين بس

وربنا يشفي بتوع "الشعب المصري محتاج توعية".. اه والله، يشفيكم.. امبارح قعدت اتناقش مع ناس على التويتر خلوقي اتفلقت من العياط لمدة ساعة ونص وصحيت الصبح قعدت اعيط برضه... الشعب المصري مش محتاج توعية.. الشعب المصري محتاج حقه يرجع له

قال عايزين نوعي الشعب قال... دي امراض دي، انت اللي مش عارف تقنع الشعب بيك، والعمال والفلاحين اسيادك وتاج راسك، ولو انت مش عارف تقنع الاغلبية في الشعب بوجهة نظرك تبقى انت اللي غلط مش هو اللي مش واعي، يا غلط في افكارك يا غلط في اسلوبك يا غلط في شكلك كده على بعضك.. دور على الغلط فيك واعرف ليه غيرك بيعرف يقنع الناس وانت لأ، ليه غيرك عاجب الناس وانت لأ

ليه كل الناس اللي قابلتهم في الشارع النهاردة اللي من اول البواب وبياع السجاير والشباب اللي ماشي في الشارع، والستات الموظفات، كل اللي شافوا مكالمة اللواء ممدوح شاهين مع يسري فودة امبارح، تعاطفوا مع اللواء ممدوح شاهين ضد تلاتة مثقفين وحسوا انه معذور ومعاه حق مع انه هو اللي كان متعصب وهم اللي كانوا هاديين؟ لو تلاتة مثقفين ما عرفوش يقنعوا المشاهد العادي على اختلاف وظائفهم وخلفياتهم واللواء ممدوح شاهين عرف بعصبيته دي كلها يقنعهم، اكيد مش هو اللي غلط، اكيد هم اللي غلط.. يا اما هم اللي مش عارفين يتواصلوا، يا اما هم اللي منطقهم غلط، يا صياغتهم غلط.. يشوفوا ليه كل اللي قابلتهم النهاردة مش متعاطفين معاهم؟ وليه اللي قاعدين على التويتر والفيس بوك ما بقوش عارفين يعبروا عن مطالب الشعب بعد ما كانوا البادئين لمبادرة الثورة؟ 

كل الافكار والعقائد المحترمة بتقول ان الاجماع هو الصح.. مافيش غير الفاشية والنازية هي اللي بتقول ان المجموع جاهل وغبي والنخبة هي اللي صح

في الاسلام بارك الله في الجماعة

في المسيحية مبارك الشعب

في الديمقراطية الاغلبية هي الحاكمة