الاربعاء والخميس... يوما الشائعات من كل اسبوع

ايه بقى الهطل ده؟ 

احنا كل اربع وخميس لازم الشائعات تنطلق وتهويل وهلاوس لحد ما اخدنا مناعة وكل مرة تطلع الاشاعات دي مالهاش اي وجود غير في خيالات مطلقيها

دلوقت انا عايزاكم تفهموا حاجة، ودي حاجة حيفهمها اللي معانا من يوم الثلاثاء 25 يناير:

النظام خلص كل اللي عنده

تلاتين الف ايه؟ ده احنا جهاز الشرطة كله من اوله لاخره جريناه قدامنا وعمل كل اللي يقدر عليه، وخلص كل القنابل، وكل الرصاص، الحي والمطاطي

ثم احنا دلوقت الميدان لما بيبقى فاضي خالص بيبقى نص مليون يعني لو كل عشرة مسكوا لهم واحد من بتوع القوات الخاصة دي خلصت الليلة

نصيحة لوجه الله خاصة للاستاذ عمر سليمان... مش نافع اللي بتعمله ده، الكلام ده كان اول يوم، تاني يوم، تالت يوم

مش بعد ما جرينا الشرطة قدامنا يوم الجمعة، ورنينا البلطجية علقة يوم الاربع، ومنعنا الحرس الجمهوري، وخلاص، دخلنا في الحيط وعدينا منه

الحيط ده تخوف بيه اللي لسه على البر، مش اللي خاض غمار كل سفالات النظام واجتازها وطلع النظام ده فشنك اخر حاجة، واتضح اننا قضينا تلاتين سنة خايفين من خيال مآتة

دماغنا شوية بقى.. دماغنا

ما بنخافش من حد

ما بنخافش غير من اللي خلقنا

يا مصريين ما عادش خوف.. يا مصريين ما عادش خوف.. 

انتوا عارفين احنا عددنا كام دلوقت مع انضمام العمال والنقابات؟ سليمان حيحارب شعب؟ طب خليه يجرب

اوحش الحاجات مرت خلاص وعدينا منها، الرصاص الحي والقنابل والعربيات اللي بتدوس الناس زي الصراصير والبلطجية والجمال والخيل مرت خلاص وعدينا منها، وعددنا زاد بعدها ما قلش، واصرارنا زاد ما قلش، واكتسبنا ثقة في نفسنا وفي ربنا قبل نفسنا، مافيش دلوقت في ايدهم حاجة غير انهم يقعدوا يقولوا لنا: ده احنا حنقطعكم.. اي والله.. حنقطعكم... هو اني مش جادر امسح بيكم البلاط؟ والله جادر.. بس مش حامسح... هو اني مش جادر امرمط بيكم الارض؟ والله جادر.. بس مش حامرمط

احنا في ميدان التحرير، وقاعدين في ميدان التحرير، واخدنا مجلس الشعب، وعددنا لما بيقل بيبقى نص مليون، ولما بيزيد بيبقى عامل زي يوم عرفة

اخر حاجة هدد بيها برنس الليالي ابو الغيط هي الجيش

طب خليه يجرب يدي اوامر للجيش بحاجة زي دي عشان يبقى اخر يوم لهم في البلد

سيبكم بقى من قوات خاصة وتلاتين الف والكلام الفارغ ده، دي خطة اللي كاتبها واحد ما نزلش ميدان التحرير اساسا عشان يعرف ايه اللي فيه، بفرض ان الاشاعة دي صحيحة، القوات دي لو لها وجود اساسا حتدخل الميدان على رجليها وتطلع منه على ضهرها من الاخر كده، قال وكاتبين في الخطة الهابلة دي حيفتحوا المنافذ عشان الناس تجري

مين اللي يجري ده؟ ما عندناش حد بيجري احنا الحمد لله، احنا عندنا رجالة تاكل الحديد تاكل الظلط.. والستات كمان، هم اللي بيجروا

بيجروا عشان مهما كانت تدريباتهم عالية، مافيش حد فيهم عنده استعداد يموت عشان مبارك... فيه مالا يقل عن مليون ونص انسان دلوقت في الميدان على استعداد انه يموت عشان مصر، ومافيش فرد واحد في الامن ولا في اي جهاز من اجهزة الدولة عنده استعداد يتعور بس عشان مبارك.. عرفتوا سر قوتنا ايه؟ عرفتوا ازاي واحنا عزل على كوبري قصر النيل قوات الامن تراجعت قدامنا وهي اللي معاها السلاح والقنابل؟

دلوقت لو سليمان قرر يورط الجيش فيه تلات سيناريوهات مالهمش رابع

1- قيادات الجيش نفسها حترفض انها تدي الامر ده لانها بكده بتخاطر بحياتها، اي قائد لو قلبه طاوعه يدي الامر ده (وده احتمال ضعيف جدا) ممكن اي ظابط صغير ولا حتى عسكري يروح ناشه على طول، واساسا عقيدة الجيش لا تسمح بحاجة زي دي، وفيه خبر بيقول ان رئيس الاركان بينه وبين سليمان خلافات، لان رئيس الاركان مش حيدي امر زي ده لو طلعوا له الشمس من المغرب

2- لو فرض وحصل الاحتمال الواحد في المية ان قيادات الجيش تنصاع لحاجة زي دي، ده معناه ان الجيش حيضرب في بعضه قبل ما يبتدي يضرب في المتظاهرين

3- لو فرض وفيه اي دبابة اتحركت تجاه المتظاهرين، انا انام لكم تحتها يا سيدي، لو واحد بس مات تحت دبابة جيش او برصاص جيش خلاص الليلة خلصت كده، دي حتبقى اخر لحظة لنظام مبارك في البلد دي، ودستوريا كده الجيش فقد شرعيته، ودي حاجة الجيش ما عندوش استعداد يغامر بيها

الجيش ممكن يعمل انقلاب على السلطة، مافيش جيش بيعمل انقلاب على الشعب انتوا مخكوا فين؟ 

ونمرة 2 و3 دي ممكن تحصل في الاحلام اساسا... الجيش مش حيمد ايده على مدني في الشارع، والظباط والعساكر مستعدين يولعوا في نفسهم قبل ما يضربوا على المتظاهرين، مش من خصائص افراد الجيش انهم يقتلوا المواطنين، ما اتدربوش على كده، دول مش شرطة ولا امن دولة.. والشرطة وامن الدولة طلعوا يجروا خلاص، والبلطجية بتوعهم كمان

باكرر تاااااني... اوحش السيناريوهات في الاحتجاجات دي عدت خلاص... عدت خلاص وعدينا منها وما عديناش منها بالساهل، قدمنا شهداء وقدمنا جرحى وتضحيات وبطولات وطلعنا ناس زي الفل وخير اجناد الارض بحق ومش باقي للنظام ده غير انه يتخن صوته ويكشر وينشر شائعات 

احنا ثابتين ان شاء الله... ومستمرين ان شاء الله، وربنا معانا، وقوتنا في ثباتنا وفي عددنا، وقوتنا في اننا ما نخافش، وما نجريش

ونقول يااااا رب

قلنا يا رب وبنقول يا رب وربنا ولا مرة اتخلى عنا ولا خذلنا

وحنقول يا رب تاني

وحنحرر بلدنا ان شاء الله