اه يا اسانج يا صايع يا بتاع النسوان

انت يا راجل ازاي تدور على النسوان بالليل في احلامهم وتدخل زي الحرامي وانا نايمة شوف قلة ادبه بعد كل اللي كان بينا؟

انت فاكر ان حاجة زي دي حتخفى عليا؟ زنوبيا صاحبتي جابت لي اللنك وفطمتني على كل حاجة يا هلاس يا فلاتي 

وربنا لاوريك يا اسانج... وطول ما في على الارض دولة السويد الميمونة عمر ما فيه ولية حتغلب ابدا

والختمة لاعمل فيك محضر في قسم ستوكهولم اتنين واخليهم يجرجروك ويلففوك كعب داير، حاقول لهم يا باشا مسك ايدي قال ايه بيعديني، وداير على النسوان في الاحلام يعلقهم الواحدة ورا التانية بعد ما عشمني واستغل براءتي وسذاجتي وقلة خبرتي وانه خامس راجل في حياتي وحلق لي شعره ظبايكي عشان يغرر بيا يا باشا، واتاريه من ورايا ييجي يضحك في وشي ويسيبني من هنا ويروح على احلام النسوان التانية عبر القارات من هنا الخاين ابو قلب جاحد، بس هه.. وساعتها بقى مش حيطلبوك بالانتربول، ده انت حتتحط على قائمة الارهاب صورتك كده تنور جنب صورة بن لادن ويلففوك على مصر والاردن وسوريا ثم يشيعوك على بلاد الاتحاد الاوروبي حيث الووتر بوردينج والشنكلة والشعلقة والتعليق والكهربا وفي الاخر حيرجعوك على مصر عشان تنتحر بعد ما يبلعوك علبة الصبغة اللي كل شوية تغير بيها لون شعرك ثم يشحنوك باسفكسيا الخنق على الجوانتانمو حيث يحتاسوا فيك بعد ما يقبضوا عليك ويقولوا مش حنعرف نخرجه اصل عذبناه قو وممكن يخرج ينتقم منا، كل ده عشان يقرروك ويعرفوا منك ازاي تبقى في سجن انجلترا وتلف الدنيا وتدخل في احلام النساء العذارى يا صايع يا ضايع يا حرماتي يا بتاع النسوان، انت اغتصبت مخنا كده

اسانج اغتصب مخنا ولسه سادر في غيه وبالع مصنع فياجرا مخية ومستمر في عمليته الوحشية واقتحامه لأحلام النسوان بالرغم من الاجراءات المشددة اللي اتخذها كل من الانتربول، مع شرطة بريطانيا، مع بلاد السويد الميمونة جابرة خاطر الولايا المغلولين من الرجالة اللي بيقلبوهم (نصيحة اختي في السويد والعروبة والدين والانسانية، اللي يقلبك اقلبيه وسويه على الهادي مش تعملي فضيحة لنفسك كده، تعالي مصر نعلمك ازاي تندميه انه سابك، هو كده ندم انه عرفك يا خايبة)، مع التايم الامريكية اللي بالدراع كده شالوا هذا الذئب البشري من قائمة شخصية العام بالرغم من ان القراء اختاروه، الا ان القراء المساكين تحت تأثير الاغتصاب الفكري وغير مسئولين عن تصرفاتهم، فقامت التايم مشكورة بمنح لقب شخصية العام للواد اللي وشه شكل فردة البلغة مقاس اربعة وخمسين لأنه ما بيغتصبش المخ، هو بيراقب الاكاونتات لصالح الاستخبارات العالمية، وبيوصلهم لحد المدرسة ويستناهم قدام باب المدرسة ليزوغوا ويروحوا السينما مع شباب وبعدين يروحهم لحد بيت الاستخبارات عشان مافيش حد يعاكسهم، وبيقفل الصفحات لصالح الأنظمة المستبدة زي ما عمل مع صفحة البرادعي، وده طبعا مسلك بناء، لأن اغتصاب المخ، لا مؤاخذة حيفتحه، لكن قفل الصفحات هو شكل من اشكال وضع حزام العفة على مخ الانسان مننا ونظرا للتاريخ المشرف والحافل والطويل لزاكربرج (الشهير بزكريا برج) في ختان الاكاونتات والصفحات لحماية الشرف والعرض الاستخباراتي الاستبدادي، فقد استحق عن جدارة تاج الجزيرة السلطانية، اما اسانج الفاجر اللي فعل الخطيئة في مخنا كلنا، رجالا ونساء (الستات عندهم الشجاعة انهم يقولوا احلامهم بأسانج، الله اعلم الرجالة يا قلبي بيحلموا بإيه وكاتمين في قلبهم) فإنه مجرم خطيييير ولكل مجرم عقاااااب، كله الا المنطقة اللي فوق دي يا اسانج اللي اسمها الراس.. من فضلك لو سمحت، نزل ايدك تحت، وعيش يا عم، بس تمد ايدك على الفوق نقطعها لك

اه يا شيريز... انا مش حاسكت على اللي اسانج عمله في مخي، ده خلا مخي هنادي خالص، ولبس مخي العار، ووشي بقع وشعري طقطق ابيض من ساعة اللي عمله ده، السويد اللي بتقوم بدور آمنة حتنتقم لي من الباشمهندز ولسه لما يفتحوا له قضية انه، لا مؤاخذة، بينط على احلام الحريم الابرياء وهم نايمين لا بيهم ولا عليهم

اسانج.. ايها الذئب الصحفي السيبري المتوحش

ايه يا راجل الصورة دي؟ انت اتصورتها وانت بتتجسس على لجنة السياسات؟ 

نيجي بقى لتفسير الاحلام بتاع ضحايا اسانج، شوفي بقى ياختي، الضاكتور اللي انت جايباه ده ما بيفهمش حاجة واصل في تفسير الاحلام

ان اسانج قاعد عندك في البيت وبياكل كل الاكل اللي في البيت، لازم كنتي تقولي بياكل ايه؟ حاجة حلوة، حاجة حادقة، لونها ايه؟ بس عموما الاكل خير وطول عمر، ماشي ياختي؟ الظاهر بقى حيجيله خير على ايدك يا بنت المحظوظة 

صاحبتك التانية اللي شافته في حفلة وهو واقف يخطب فيها، دي نصرة كبيرة قوي له ان شاء الله.. اه.. وربنا حينصفه ويقيد شمعته وينصره على مين يعاديه، اه والنبي

صاحبتك التانية اللي بيقولها انا الماستر اوف يور دريمز، دي خليها تتغطى كويس وهي نايمة.. نسوان صايعة ما اتربتش 

خير اللهم اجعله خير