عزيزتي قائدة المركبة

بما انك مش حتاخدي حق ولا باطل في الشارع بالاسلوب المتبع، وبما ان لو حصل خلاف بينك وبين ايتها راجل في الشارع الناس حتغلطك وتقف جنبه 

فيه طريقة انا شخصيا باتبعها وجايبة معايا لحد دلوقت نتائج مذهلة:

اعملي ما بدا لك، وساعة الجد قولي للشخص اللي كسرتي عليه ولا خطبتي له العربية: معلش سواقة ستات بقى

ياااااا ما تتخيليش السعادة اللي بتترسم على وشوشهم، مهما تعملي فيه، وانت مضطرة تعملي كده سواء انت غلطانة او هو غلطان، لو هو غلطان حتتبهدلي لو قاوحتي، لو انت غلطانة حتتبهدلي وتدفعي فلوس، طب وليه، اعملي زي ما باقولك

اخبطي له العربية، شلي امه وهو مستنيكي تركني، اكسري عليه، زنقي عليه، امشي بالراحة وشليه، او امشي بسرعة وافزعيه، على حسب مودك، ولو اتخانق معاك ابتسمي، وبربشي نص بربشة وقول بصوت رقيق: معلش.. سواقة ستات بقى

وبعدين انت كده بتكسبي فيه ثواب، عشان انا مش قادرة اقولك كم السعادة الخرافية اللي بيبقى فيها الزميل قائد المركبة اول ما بيسمع الجملة دي، من اول سواق التوك توك مرورا بالميكروباظ والنقل العام والتاكسي والروري وانتهاء بالملاكي، كلهم بلا استثناء بتحصل لهم حالة انهيار اول ما يسمعوا الجملة دي، وترتسم ابتسامة رضا وسعادة وفخر على وشوشهم، بجد يو ويل ميك هيز داي، وحيروح بيتهم سعيد جدا، انشالله تكوني مدغدغة له العربية، دي نصيحة مجربة

ومدام عرفتي كلمة سر تقدري بمنتهى الراحة تبلطجي في الشارع كما يحلو لك

بس على الله بختك المدوحس ما يوقعكيش في واحد زي وائل خليل، يتعصب لما يسمع الجملة دي ويقولك: مالها سواقة الستات؟ هو فيه سواقة لابسة بنطلون وسواقة لابسة جيبة؟ وبعدين مالهم الستات؟ انت ازاي تبصي لنفسك بصة زي دي؟ ازاي تفكري بالطريقة دي؟ ازاي ترضى على نفسك انك تحقري منها كده؟

وحيستلمك بقى، بس عموما ده نوع مش موجود كتير يعني، في الاغلب لو وقعتي فيه اعرفي ان انت اللي نحس