طل ملوحي ماتت ولا عايشة؟

 تحديث:
بالنسبة لبحر الظلمات الميل بتاع سفارة سوريا في مصر عمل فيلير
انا جبت موقع وزارة الداخلية وبعت شكوى في حتة ارسال الشكاوى لو سمحتوا ابعتوا الالتماس هنا
حادور على وزارة الخارجية واجيب لكم اللنك
لا مافيش وزارة خارجية، مافيش، ده ميل الاذاعة والتلفزيون السوري
--------
النظام السوري ملزوم يظهر طل زي ما كاميليا ظهرت في الفيديو كده، ويبقوا يقولوا بقى حسنة ولا مش حسنة، المهم هو مش حر فيها، على الاقل لو ماتت نعرف لها جتة، ولا حتى امها تعمل عزاها

مش معقولة بحر الظلمات ده

يعني ايه امها مش عارفة هي فين، وخلف ده يقول "الفرس الصغير مات" والعملية في النملية، ايه ده؟ هم عايشين في المغارة؟ 

لو ماتت يتعلموا من نظامنا ويضربوا شهادة طبية ويقولوا جالها الزايدة الدودية، بس امها تعرف مصيرها

ولو عايشة على الاقل يسمحوا لامها تقابلها وتطلع تقول لنا انها قابلت بنتها وانها بخير وعايشة، وامها مش حتقول اكتر من كده لما تشوفها، هي عارفة ان بنتها اسيرة

ده موقع السفارة السوري، عايزاكوا كلكوا تبعتوا ميلات مناشدة وتتصلوا بالارقام الموجودة اننا نعرف مصير طل الملوحي وهل هي عايشة ولا ميتة، ولو عايشة امها تزورها، مرة واحدة بس، تشوف بنتها مرة واحدة بس وتتأكد انها على قيد الحياة ومش حناخد كلام غير من امها

مش حناخد كلام غير من امها لان الكل دلوقت بياكل عيش على قفا البنية وبيسترزقوا من وراها

ولما بس نطمن على البنت ونعرف مصيرها يبقى لنا كلام تاني

عشان طل الملوحي مش الوحيدة اللي في سجون سوريا، وطل الملوحي مش المدونة الوحيدة اللي اتقبض عليها في سوريا، ونظام سوريا مش فجأة سنة 2010 وبعد مفاوضات واشنطن بقى ديكتاتور، طول عمره كده

بس نطمن على البنت الاول

انا حابعت الميل اهو، ومن بكرة الصبح كلنا نتصل بسفارة سوريا على التليفونات

ارجوكم، مافيش حاجة تخوف في الموضوع ده، دي حتى سوريا يعني، ما هياش امريكا ولا اسرائيل، مافيش مدعاة للخوف، السوريين بس هم اللي لهم حق يخافوا، لكن اي مواطن عربي ما يخافش، اعتبرها بنتك، اختك، زميلتك، دي بنت كويسة، ونشطاء في مصر كتير يعرفوها، وما عملتش حاجة، ولو عملت حاجة، يا سيدي افرض انها اتجسست لاسرائيل، دي عيلة عندها تسعتاشر سنة، امها تعرف بس هي من اهل الدنيا ولا من اهل الآخرة
اه.. حاجة كمان، اللي عايزين طل تطلع فعلا باخلاص هم اللي يبعتوا، بمعنى ان الرسالة يبقى هدفها اننا نعرف مصير طل، مش واحد بيسجل مواقف على قفا البنت وما يهموش انشالله تولع بجاز وسخ، المهم هو يعمل بطل
مناشدة اننا نعرف مصير طل وبس، البنت في ايد ناس الله اعلم حيعملوا فيها ايه
تصحيح:
رقم التليفون اللي موجود في اللنك غلط، ارقام التليفونات اهي
0237495210
0237495214
ومواعيد العمل من تمانية صباحا لاتنين ظهرا
وملحوظة تانية وتاني:
انا مش حاقف وقفات احتجاجية قدام السفارة السوري لاني صدقا عايزة البنت نعرف مصيرها وعايزاها تخرج، مش عايزاها تولع بجاز وسخ عشان ازايد انا واخوفهم اكتر واخليهم يخفوها اكتر واكتر ويمكن يلبسوها مصيبة كمان