شرح العوا غلط في ايه

انا متفهمة تماما الناس مش شايفة تشابه بين موقف العوا وموقف بشوي 

لان هي دي الناس اللي مش شايفة تشابه ما بين بوش واوباما

لان الناس بتشوف ان الاشيك اكيد احسن، مع ان الاشيك مش بالضرورة يبقى احسن، ممكن اقول لك انت غبي، وممكن اقول لك: حضرتك ما بتفهمش

الاتنين معناهم: انت غبي

التوضيح ده ان شاء الله حاكتبه في الدستور عشان مساحة القراءة تبقى اوسع لاني مصدقة تماما ان الناس مش شايفة التشابه مش لانهم طائفيين، هم فعلا مش شايفينه

العوا راجل اكاديمي، مفوه، شيك من الاخر كده، حاجة فخيمة، بس هو قال فيه سلاح في الكنيسة

صحيح انه طرح فكرته على شكل تساؤل، وصحيح انه صاغ كلامه بشياكة مش زي بشوي اللي بيدب الكلام بشكل بدائي، بس عشان تعرف كلامه حلو ولا وحش، صح ولا غلط فيه حاجتين تعملهم دلوقت حالا وانت قاعد

1- رد فعل المهابيش على كلام العوا كان ايه

2- تخيل ان العوا اسمه تادرس وانه قال نفس الكلام بس شيل كلمة كنيسة والاخوة الاقباط وحط مكانها كلمة جامع والاخوة المسلمون

دلوقت اعمل كده

اقصد لو عايز توصل للحق

انا عملت كده، انا حاكدب وحادعي؟ لا مش حاكدب ولا حادعي، سمعت العوا اول مرة استشيكت الكلام

وبعدين رجعت فرغت البرنامج على الكمبيوتر، وقلبت الكلام، بجد.. مش الكلام اللي اتنشر في الجرايد، لان ده تفسير الصحفيين، الكلام اللي هو قاله، شلت كلمة كنيسة، وحطيت كلمة جامع، وشلت كلمة اقباط وحطيت كلمة مسلمين

ولما عدت قراية الكلام لقيت نفسي زعلت على روحي

يعني انا نفسي اهو باعترف اني غلطت في الحكم واني احتاجت اعيد النظر وافرغ البرنامج الطويل ده واعمل عملية الاحلال والتبديل دي عشان افهم الكلام صح، وباعترف لكم اهو ان اسلوبه المفوه المرتب بهرني في الاول

ماهم السفسطائيين كانوا بيكسبوا المحاورات بالطريقة دي، الواحد عايز الحق ولا عايز الشياكة

انا شلت كمان كلمة سلاح وحطيت مكانها خطف المسيحيات عشان اخلي الاحلال والتبديل اكثر واقعية، انا شخصيا بازعل قوي من كلام خطف المسيحيات ده لانها اتهامات باطلة ليس عليها دليل وعاملة زي اتهامات الاسود اللي في البدروم

خلاص كده؟

طيب بعد ما تعمل كده (انا باكلم ناس عارفة ومتأكدة انهم عايزين يعرفوا الحق مش عايزين يهللوا وخلاص، وعارفة ان فيه ناس بتقرا تانية مش حتعمل كده لان الموضوع بالنسبة لهم مش حق وباطل، هو مش عايز يسمع غير وجهة نظره، فالبوست ده مش موجه لهم، البوست ده موجه لناس معينة انا عارفاهم بالاسم وعارفة من خلال تعليقاتهم بيفكروا ازاي، زي مثلا المهدي ومش فاهمة على سبيل المثال لا الحصر، مش هم بس فيه غيرهم، بس دول اللي حاضريني) المهم

معلش عطلوا نفسكوا شوية، واعملوا الحكاية دي زي ما انا عملت، مافيش حاجة احسن من المذاكرة عشان الواحد يحكم صح

خلاص كده ذاكرت كلام العوا وعملت التبديل ده وشفت وقعه عليك ايه؟ مش لازم ابدا توصل للنتيجة اللي انا وصلت لها، انا باقول لك الطريقة اللي توصل بيها لنتيجة اقرب ما يكون للصواب بالنسبة لك انت، لان مش كل الناس بتزعل من اللي انا بازعل منه، المهم بس توصل لنتيجة حقيقية مافيهاش مؤثرات خارجية مثل نصاعة الاسلوب، وفصاحة المنطق..إلخ

هات بقى كلام بشوي، الكلام اللي انتشر ما عندناش للاسف تسجيل له

برضه اعمل نفس الحكاية، سواء في موضوع الضيوف ده، او في موضوع القرآن

واعمل عملية الاحلال والتبديل اللي باقول لك عليها، وحاول انك تخليها واقعية، يعني هو مثلا قال المسلمين ضيوف، حط مكانها المسيحيين اقلية، هو اتكلم عن القرآن وقال ان فيه اية محطوطة ايام عثمان بن عفان، شيل القرآن وحط كلمة الانجيل، وشيل عثمان بن عفان وحط مكانها مثلا قسطنطين

خلاص كده

بعد ما قريت بشوي بالشكل المعكوس ده، كام مسلم  بيقول نفس الكلام بقالهم خمس سنين دلوقت؟ انا عاداهم على فكرة

علينا اننا نتفق على قانون يسري على الجميع.. ده في حال ما اذا كنت مسلم بجد، اقصد مسلم متفهم للفلسفة الاسلامية، او لنقطة الانطلاق بتاعة العقيدة الاسلامية وهي العدالة ومن نقطة الانطلاق دي بيتسلسل ضفيرة منطقية زي شريط الدي ان ايه كده، وبيوصل في النهاية لنتائج معينة، وده حال كل العقائد، المهم يعني، نقطة انطلاقك انت كمسلم العدالة، العدالة لا تفرض عليك منهج معين، ولكن تفرض عليك نتائج معينة، وهي غير الحرية اللي مبني عليها المسيحية، العدالة تعني: اعمل اللي انت عايزه، اتبع المنهج اللي انت عايزه على شرط توصل في النهاية لنتيجة ان الناس سواسية كأسنان المشط وان المنهج اللي بتتبعه لا يؤدي في النهاية ان حد يجور على حق حد

صح؟

طيب، قدامك اختيارين دلوقت:

يا اما انت شخص روحك رياضية، لا تأبه للطعن في القرآن، ولا في الرسول، ولا في العقيدة الاسلامية

مش بتتضايق لو حد قال لك يا عباد الكعبة؟ يبقى براحتك قول يا عباد الصليب

مش بتتضايق لو حد قال على القرآن الخرفان؟ يبقى براحتك قول الكتاب المكدس

مش بتتضايق لو حد قال المسلمين بيخطفوا البنات بدون دليل ولا بينة واحدة؟ براحتك قول يمكن المسيحيين عندهم سلاح وانت برضه ما عندكش دليل ولا بينة واحدة

بتضايق؟

انا شخصيا باتضايق، بس مش لازم تبقى زيي، انا باتضايق لاسباب برضه لها نقطة انطلاق وتسلسل منطقي وصلني لنتيجة ان ده كلام يضايق، بس فيه غيري مش لازم يتضايقوا

لكن لو كنت بتضايق زيي، ما تقولش كلام يخلي الرد عليك جارح في حاجة عزيزة عليك

ربنا بيقول على المشركين، على اللات والعزى ومناة وهبل: ولا تسبوا الذين يدعون من دون الله، فيسبوا الله عدوا بغير علم.

يبقى منين سامح لنفسك تقول على الناس: احنا الاغلبية وكلامنا هو اللي يمشي، بكتابهم المكدس، وربهم الخروف، عباد الصليب، النصارى، اللي احتمال يبقى عندهم سلاح في البدروم؟

العوا ما قالش الكلام بالبدائية دي، ببساطة لانه مش بدائي، ربنا انعم عليه بالبلاغة والعلم والاسلوب المبهر، ينفع يستخدمه لصالح اثارة الناس وتجريح ناس تانية؟

طب ربنا ما انعمش على بشوي لا ببلاغة ولا علم ولا اسلوب مبهر، الراجل مدب، انتوا متضايقين منه عشان مدب ومش بيعرف يزوق اسلوبه، ولا متضايقين منه عشان فحوى كلامه؟ لو الحكاية كلها انه مدب، نجيب لكم البابا شنودة يقول نفس المعنى باسلوب لطيف ومبهر وببلاغة، المسيحيين مش حيشوفوا ان الكلام يضايق، المسلمين بس هم اللي حيتضايقوا مهما كان الكلام بليغ وناصع، وشنودة عنده من الذكاء اللي عند العوا، مش ذنب بشوي ان الاي كيو بتاعه منخفض، دي خلقة ربنا

احمد خالد توفيق قال العوا كلامه موزون بالمازورة، صح.. ده يحمله مسئولية اكبر، احنا بنلعب شطرنج ولا عايزين نهدي الناس، ايه الهدف النهائي؟ افهم بس الهدف النهائي من كلام د.العوا عشان نشوف الكلام الموزون بالمازورة ده يؤدي للهدف ولا يؤدي الى انه يبقى قرينة لامعة في ايد مشعلي الفتنة؟

اوعى حد يقول لي الهدف الحقيقة، عشان الحقائق يستدل عليها بالادلة الدامغة، مش بالظن، ولا بالتساؤل الملغم والمبطن بمعاني قد تستغل في اغراض اظنها منافية لاهداف العوا

اذا كان هدفه تحقيق المواطنة زي ما هو قال بنفسه، كان كافي انه ينتقد الكنيسة لعدم انصياعها لاحكام القضاء، وكان كافي انه ينتقد بشوي على كلامه دون الخروج باستنتاجات ملغمة مافيش عليها ادلة مادية زي امتلاك سلاح او الظن بامتلاك سلاح او التساؤل اذا كانوا يتملكوا سلاح

اللي قاله بشوي قلة ادب، بس قلة الادب تدفع دفعا في سكة امتلاك سلاح؟ على كده السلفيين عندهم ترسانة نووية بقى

من حيث ان بشوي بيوجه رسالة فحواها: بقالكوا سنة واتنين وخمسة تتريقوا على كتابنا وثالوثنا وصليبنا وفاكرينا ما عندناش لسان؟ لا عندنا لسان ونقدر نقل ادبنا، وعندنا منطق ونقدر نرد، وعندنا حجة ونقدر نجرح، مش عشان ساكتين نبقى ما نقدرش

بس دي رسالة ظالمة

ظالمة لواحدة زيي مثلا، انا مسلمة، آمل أن أكون مؤمنة، معتزة بديني، واخترته وانا في الجامعة بعد  ما قريت كذا ديانة بمحض ارادتي وحريتي، وعمري في حياتي، ولا حتى بيني وبين نفسي، ما حقرت ديانة، ولا عقيدة، ولا ايمان، عشان بسبب دراستي للاديان المختلفة بشكل مش بطال، وبسبب اني كنت باقراهم وانا فعلا مش عايزة اخد منهم موقف مسبق ولو طلع معاهم حق كان عندي النية وقتها اني اغير للديانة اللي باقراها، بسبب كده، ربنا قدرني اني اشوف نقطة الانطلاق، او اللبنة الفلسفية اللي بتنطلق منها كل عقيدة (بما في ذلك الهندوسية ولو اني تعبت قوي عشان اجيب مصادر لها) والتسلسل المنطقي اللي بيخرج من اللبنة دي والنتيجة النهائية اللي بيوصل لها التسلسل واللي بيؤدي حتميا لشكل الديانة

لو انت بتحترم عقلك حتحترم عقل غيرك، ممكن المنظومة كلها، او الدي ان ايه بتاع العقيدة الفلانية ما اقنعكش، بس هو مش بيقنعك انت لكن بيقنع غيرك، ومين قال لك انك انبه من غيرك ولا افهم من غيرك عشان تحقر منظومة فكرية اقنعته وما اقنعتكش؟

لو انت مؤمن صحيح مش حتحقر غيرك، مش بتحقر غيرك الا لما تكون مهزوز والمنظومة الفكرية اللي انت بتدعي الانتماء لها مش قادرة تقنعك بنفسها وبشكل مستقل، وعشان كده بتلجأ انك تحقر غيرك وتقلل من غير عشان تثبت لنفسك ان انت صح، لو حاسس انك صح فعلا مش حتحتاج تطلع غيرك غلط بالتحقير والتسفيه والاهانة، لو انت حابب اختيارك لنفسك مش حتحس انك بتكره اختيارات غيرك، لو انت فاهم عقيدتك ومتبنيها عن اقتناع مش حتستغبى غيرك، كل الكلام اللي بتقوله على غيرك ده كلامك لنفسك، لو مؤمن بعمق مش محتاج عناصر خارجية تقنعك ان انت صح بدليل ان اللي مش معاك في الفريق عبيط واهبل وحمار، مش بتحتاج تعمل كده غير لما تحس ان فيه حاجة غلط في الفريق بتاعك، فبتدور على اغلاط اكبر في الفرق التانية عشان ترتاح وتستكين.. جدد ايمانك، انت عندك مشكلة لو ده سلوكك

طيب انا ذنبي ايه يا بشوي، انا صدقا وعمقا فعلا باحترم الدي ان ايه بتاع الديانات التانية والعقائد التانية كمان بما فيها الالحاد، عارفة تركبيتها، ومش اختياري، ومش راكبة على دماغي، بس فاهماها ومحترماها

وعمري ما سكت على قلة ادب ولا تطاول على اديان الناس

ذنبي ايه انا عشان بتحدف ناس بتقول على كتابك مكدس انك تخبطني في السكة؟ ماهو ده نفس الحكاية لما ييجي حد يرد على بشوي يقوم ياخد كل المسيحيين بذنبه

زي ما المسيحيين بيتاخدوا بذنب الامريكان

زي ما المسلمين بيتاخدوا بذنب القاعدة

زي ما اليهود بيتاخدوا بذنب الصهاينة

انا اتاخد بذنب الحويني واتخبطت طوبة في دماغي 

والعوا كمان اخد المسيحيين بذنب بشوي وشنودة واتهمهم بحيازة سلاح والناس دلوقت اللي نازل عليها فتشوا الكنايس فتشوا الكنايس

ليه؟ ايه القرينة؟ فين السلاح بتاع المسيحيين عمرنا شفنا لهم سلاح؟ فين عقد توريد السلاح؟ طيب اللي عارف ان فيه سلاح شافه فين؟ في انهي كنيسة وانهي بدروم؟ 

مافيش

فيه بس ابن وكيل المطرانية هرب سلاح، طلع بمب ما طلعش بمب، طلع من الصين من اسرائيل، ما يخصنيش

هو ابن شيخ الازهر لو تاجر مخدرات يبقى بالضرورة المسلمين كلهم شمامين؟ بالضرورة الازهر مخبي مخدرات في البدروم؟

ابن وكيل المطرانية مهرب سلاح. نقطة من اول السطر، فين الدليل على ان السلاح ده اتورد للكنيسة؟ هو تاجر السلاح عنده دين؟ تاجر السلاح بيبيع للسنة والشيعة سلاح في العراق، بيبيع لحزب الله واسرائيل اثناء الحرب سلاح، وابن وكيل المطرانية لو تاجر سلاح، حيبيع للي يشتري، مش حيطلب منه البطاقة، حيطلب منه المعلوم

ومع ذلك، لو فيه نسخة لعقد توريد سلاح للكنيسة طلعوها

لو فيه مكان معين حد عارف ان المكان ده في كنيسة فيه سلاح، يطلع يقول اسمه الثلاثي ورقم بطاقته ويبلغ النائب العام عن المكان ويبقى مستعد ان لو ما لقوش السلاح في المكان ده يتحاسب بتهمة ازعاج سلطات واثارة فتنة طائفية

الكلام من غير قرينة شهادة زور

اظن اي مؤمن من اي ديانة يعرف يعني ايه شهادة زور.... ولا ما يعرفش؟

انتهى