اون تي في تمنع ابراهيم عيسى من الظهور في بلدنا بالمصري

ما اعرفش ليه حتى اكثر الناس اشتراكية يقولوا: بس انا باحب ساويرس

ليه؟ تحب ساويرس ليه؟ ايه الفرق بينه وبين اي رجل اعمال تاني؟

الفرق الوحيد ان الاسلاميين بيكرهوه، وطبعا مش بيكرهوه حبا في العدالة الاجتماعية، بيكرهوه عشان مسيحي ومعاه فلوس مما يدل على ان الكنيسة اكلت البلد، مع انهم ربنا كارمهم بكتير تانيين، احمد عز، احمد بهجت، سيد البدوي (ده حتى بيقولوا عليه متدين ومش بيفوت فرض هههه) وصلاح دياب

هم كل دول مش مسلمين؟ 

لا العلمانيين بيحبوا ساويرس عشان الحرية والليبرالية، ولا الاسلاميين بيكرهوه عشان العدالة الاجتماعية، العلمانيين بيحبوه عندا في الاسلاميين، والاسلاميين بيكرهوه عندا في المسيحيين، والمسيحيين بيحبوه عندا في المسلمين، وهو اساسا مالوش في حد فيهم، هو له فلوسه وماله

انا شخصيا ما باحبش اي رجل اعمال في الدنيا، لان البني ادم عشان يبقى ملياردير لازم يبقى حرامي ومصاص دماء وبيتاجر في الانسانية كلها، امال جاب فلوسه دي منين؟ من تعبه وشقاه؟ ماحدش بيتعب اكتر من البنا، ولا الفلاح، ولا العامل اللي بيشتغل اتناشر ساعة، اشمعنى دول مش معاهم مليارات؟

هأ.. بيقولوا لك من عرق جبينه طلع مصاري ها الانسان، طيب كيف هيدا وكيف ملايينه وما مرة شايفينه عرقان

طبعا انا استغليت الفرصة عشان ابث افكاري الاشتراكية المسمومة السوداء، بمناسبة ان النظام المصري مارس ضغوط على نجيب ساويرس عشان يمنع ابراهيم عيسى

انا عارفة الخبر من امبارح، بس استنيت شوية عشان اعرف ملابسات الموضوع، مافيش ملابسات، كلموا ابراهيم قالوا له: متشكرين مش عايزينك تطلع تاني

فقال لهم: العفو.. تعالوا كلوا بسكوت

خلاص كده

الاسباب واضحة، بقاله تلات شهور بس وعمل في بلدنا بالمصري كل ده، ولو ما كانش عمل حاجة ما كانوش منعوه

ربنا يستر على الدستور بقى، بس غالبا مش حيعملوا للدستور حاجة، لان الاغلبية من المصريين بيتفرجوا على التلفزيون ومش بيقروا، فتأثير الفضائيات على ملايين بينما تأثير الجرنال، مهما وسع انتشاره، على الاف، وعادة الناس اللي بتقرا مش بتعمل حاجة، السميعة بس هم اللي بيعملوا حاجات، عشان كده كنت بازن في انه يعمل برنامج يقول فيه اللي بيكتبه في مقالاته

المهم يعني، انا مش باحب المغفلين ولا اللي بيشتغلوا نفسهم وعندهم هلاوس وخيالات

يعني رجل الاعمال رجل اعمال، لا مسيحي ولا مسلم، ورجل الاعمال له مصالح مع النظام، والنظام بيديله بالجزمة القديمة وينسل على راسه القبقاب وقت ما يحب ويسيبه وقت ما يحب واللي متساب متساب بمزاج النظام، ولما النظام بيحس بخطر بياخد اجراءات وصاحي لنا، كل ما كنت اكثر تقعرا، او اقل موهبة، او حاسب بتعمل ايه، النظام ما يخافش منك، او على الاقل بيبقى عارف انت بتوصل لحد فين ويفرملك وقت اللزوم، وكل رجال الاعمال في ام البلد دي تحت سيطرة النظام زي ما النظام بيخدم مصالحهم هم بيحلوا له عيشه وبيظبطوه

يعني ما يطلعليش واحد يقول لي انا باحب نجيب ساويرس اصله مع الحريات وليبرالي ومش عارفة ايه عشان الراجل بيطلع يقول كلمتين حلوين ويبتسم ابتسامة ساحرة، مافيش واحد متقيد بمليارات يفهم في الحريات ولا في العدل، ما يفهمش غير في الفلوس 

وما يطلعليش واحد يقول لي ساويرس الصليبي، لو اكل عيشه يستلزم انه يولع في الكنيسة والاقباط كلهم حيولع.. قصدي اكل كفياره

هو لطيف وشكله حلو ودمه خفيف وبيقول كلام يوري ويبلف، وده بسبب انه اسيوطي مش بسبب انه مختلف عن بقية رجال الاعمال

خلصونا بقى من ليلة بحب واكره دي

البلد مسروقة واللي نقدر نهبشه منهم نهبشه وما نقولش لا، جه لابراهيم فرصة يكلم الناس ويوصل لهم رسالته، قبل الفرصة، لان المال ماله، والبلد بلده، والناس ناسه، والنظام ورجال الاعمال عاملين بينه وبينهم سور ورا سور 

جه النظام ما عرفش يحتويه وابتدى يعمل قلق قالوا لزكي قدرة يدبح فدبح، لان زكي قدرة لا يملك انه ياخد اي قرار، له مصالح ومال ومحتال واللي يقول عليه المعلم نافذ.. عادي ما اتصدمش

لما كلمته لقيته بيضحك عادي، انا اللي قعدت اعيط عشان البرنامج صعب عليا لانه كان حلو ومفيد، بس هو واخد الموضوع بخفة شديدة وشكله كان متوقع وحاسس انه كسب لما سهاهم وقدر يكلم الناس تلات شهور

انا اللي متغاظة ومتضايقة، مش مصدومة اه، بس متضايقة، الشغل كان حلو،

بس نبص للجانب الايجابي ونقول انهم تلات شهور مثمرين والشعرة من دقن النظام المصري مكسب

بس على الله بقى اشوف ساويرس لابس الوش اياه