احمد عبد الفتاح في نجع حمادي

وبيقول ان الناس هناك قالت له ان الواد المسجل اللي نفذ العملية هو الذراع الايمن لنائب اسمه عبد الرحيم الغول وان الموضوع (ده كلام الناس مش كلام احمد) مالوش علاقة بالطفلة المغتصبة ولا حاجة، الموضوع اعقد من كده

ده اللي قاله الناس لاحمد ومش رأيه ولا حاجة

المهم هو لما يرجع ح يكتب بالتفصيل
انا ما بقتش عارفة حاجة خلاص، انا اللي عارفاه ان كل الناس زعلانة، حتى اللي بيقرفوا من اكل المسيحيين زعلانين
وطبعا "النغبة" قاعدة تنظر على تلاتين ام الناس، وعمالين يتوصلوا لنظريات عبقرية لها علاقة بان المشكلة في ان الناس اصلا طول عمرها بتكره المسيحيين لوجه الله، ويمكن تطلع المشكلة في ان ربنا خلق المسلمين اساسا، بس المرة دي الحمد لله ما وقعش في سكتي مسلم من بتوع: الاقباط صوتهم علي قوي ومحتاجين يتسكوا على دماغهم، ادي اخرة الاستقواء بالخارج، ماهم استفزازيين..الخ. الحمد لله مخروسين، يمكن عشان الحادثة متوحشة قوي بزيادة، وغالبا محرجين من نفسهم، المرة دي اي حد ماشي في الشارع ح يديهم بالجزمة لو قالوا البقين الحمضانين بتوع كل مرة، الموقف محرج زي موقف الجدار المحرج كده... فجر وغدر بزيادة
انا عمالة اقلبها يمين وشمال، الكلام اللي احمد عبد الفتاح بيقوله ما يطمنش، يكونوا مدبرينها عشان تعمل رد فعل عكسي ويلموا موضوع الطائفية ده وانس اند فور اول؟ ماهو لما يعملوا حادثة بالتوحش ده، وهم عارفين المسيحيين غلابة يعني اخرهم ح يعيطوا، المسلمين يحسوا ان الموضوع خرج من ايدهم واخد شكل متوحش ويبتدوا يلايموها مثلا؟ اصل الوفد من كام يوم كده قالت ان اقباط المهجر عملاء لاسرائيل وبتقول ان هاآرتس قالت كده. يكون مثلا قبل ما جمال ييجي بيعملوا حادثة تهز الناس عشان الناس كلها تحس انها في خطر وتبتدي تتكاتف وموضوع مسلم ومسيحي ده يتقفل؟ ومش بعيد يلبسوها لواحد من "اعداء الوطن" والمسلمين هبل والمسيحيين اهبل منهم وبالسلامة كده
والله ما عارفة انا بايني باخرف وللا ايه؟ الصدمة تعمل اكتر من كده، بس انا ملاحظة انهم بيقفلوا ملفات بقالهم شوية، ملف الانفاق، ملف المعارضة (القفا اللي الفريدم هاوس اداه للعيال بتوع المعارضة وسلم اساميهم للجرايد المصرية وفضحهم) ملف التزامات مصر تجاه فلسطين، دلوقت الملف الطائفي، كل الحاجات الصداع بتتقفل، سواء الشباشب اللي كانت رافعاها امريكا للنظام، او الدبابيس اللي كان محوشها النظام لامريكا يشكها بيها من ان لاخر، الله اعلم، يمكن، ويمكن اكون باهطرس، انا اصلا حاسة ان دماغي سايحة على بعضها امبارح باكتب على التويتر عايزة اكتب طائرات اسرائيلية تقصف الانفاق على الحدود المصرية، رحت كتبت طائرات مصرية تقصف الانفاق.. وعنها وعاديك بقى: ايه يا نوارة؟ طائرات مصرية؟
لا يا جماعة دي غلطت، طائرات مصرية ايه؟ هو فيه طيارة مصرية تقدر تعدي من فوق الحدود؟
وانا عمالة ابعت في تويتات: انا اسفة غلطت، ودول ابدا مش سامعني
يا عم طائرات مصرية ايه يا عم، هم عسكريين عمي اللي على الحدود اكتر من كده نتنتش
لحد ما مهندس حر قال لهم: خلاص يا شباب زلة لسان حصل خير مافيش داعي للتقطيم عارفين اننا ما نقدرش نطير طيارة ورق فوق حدودنا
هو انا ايه اللي خلاني احكي الحكاية دي؟ اه.. اني باخرف اليومين دول، استحملوني، بس وارد يعني، وارد ان قبل ما يجيبوا جمال بيبيضوا البيت ويغيروا السيراميك وزي ما كرهوا المصريين في الجزائريين والفلسطينيين وزي ماهم اللي قبل كده كرهوا المسلمين والمسيحيين في بعض، اهم يصالحوهم تاني بحادث دامي يشعر المسلمين بالخجل ويخليهم عايزين يصالحوا المسيحيين، والمسيحيين يحسوا بالظلم ويقبلوا اي طبطبة على كتفهم، عارف اللي يضرب ابنه يضرب ابنه يضرب ابنه لحد ما راس ابنه تتفتح؟ فجأتن كده يروح واخد ابنه في حضنه وابنه يقعد يعيط وخلاص يتصالحوا
خلااااااااااااااااااص قلت باهطرس بس اللي يعمل كدهو.. يعمل غيرها
اااااااااه يا قلبي... طب الناس الغلابة ذنبهم ايه يارب في ده كله؟
"يا عدرا حوشي يا عدرا.. فينك يا عدرا"

على الله يطلع لي واحد بروتستانت يقول لي ده شرك.. عاملين زي السلفية راخرين
---- 
الا صحيح واحدة صاحبتي باقول لها الشتا مش عايز ييجي قالت لي: "ربنا بيحبنا لاسباب مجهولة بالنسبة لي، لان فيروس الانفلوانزا بيبقى انشط في البرد واحنا بتبقى مناعتنا اقل، يعني لو الجو برد ح تلاقي مصر كلها عندها انفلوانزا خنازير، لا وعمالين يقولوا للمصريين اغسلوا ايديكوا، ما بيركبوش مواصلات دول؟ هم بيستحموا عشان يغسلوا ايديهم؟ هي رحمة من ربنا وما تسألنيش ليه؟ هو ادرى مني ومنك"
على فكرة صاحبتي دي بقت تكلم القطط والكلاب من كتر ماهي مش عارفة تتعامل مع البني ادمين