هو فيه اتنين فلسطينيين ماتوا؟

الله يرحمه حارس الحدود المصرية ويحسن اليه، هو مالوش ذنب في اي حاجة، وربنا يصبر اهله، وايا من كان اللي عمل كده ده عمل غبي فوق انه اجرامي

ولو ان قلبي بيقول لي ان اللي عمل كده مش فلسطيني (لانهم مش عايزين يقفلوا الحدود ولا يخسروا مصر) ولا اسرائيلي كمان، عروستي، مش عارفة ليه افتكرت المحلة، اللي ربى خير م اللي اشترى، قلب الام بقى

المهم يعني ده مجرد تخمين مش لازم قلب الام يطلع صح، لكن في كل الاحوال الله يرحم الفقيد

الاصابات في الجانب المصري 9 ربنا يشفيهم، وفي الجانب الفلسطيني 35 فيهم خمس حالات خطرة ومش ح ادعي لهم بقى احسن اطلع عميلة لحماس، خصوصا ان الامن المصري بيأكد انه ما اطلقش رصاصة واحدة، هم اصيبوا كده بسبب سواد قلوبهم

بس الخبر ده بيقول ان فيه اتنين فلسطينيين ماتوا

طبعا في داهية زي ما كلنا عارفين، دول فلسطينيين يعني مش مهم، بس انا عايزة اتأكد من صحة الخبر، اصل الخبر ده لو صحيح يبقى الامانة المهنية تحتم على تامر امين اللي نصب لنا عزا وقعد يتكلم عن جرائم حماس انه يقول برضه ان فيه اتنين فلسطينيين ماتوا

انا بس كل هدفي اني اتأكد من صحة الخبر لو حد يعرف مصدر تاني

واحد على التويتر بيقول السنة اللي فاتت كنا بنتخانق مع الجزيرة السنة دي بنتخانق مع فرد اللي هو جالاوي وده التطور الطبيعي

بس تصدقوا وزارة الخارجية المصرية طلعت بيان تدين فيه جالاوي؟ بس الشهادة لله مصطفى الفقي شتم تركيا برضه وقال هي مش ح تبقى احن على فلسطين مننا، اه والله 

ماهو انا شرحت لهم على التويتر طبيعة العلاقة بين مصر وفلسطين، مصر عاملة زي الراجل اللي راكن مراته في البيت وداير يخونها بس اول ما يعرف ان ابن الجيران صبح عليها يقلب الدنيا: مالك ومال مراتي؟ وفلسطين عاملة زي اللي اتجوزت وهي عندها اتناشر سنة وما تعرفش حد غير جوزها ده، حتى اللي تعرفهم دول كانوا بييجوا يزوروا جوزها في البيت وهي كانت بتحط لهم العشا، وبتحبه مش عايزة حد غيره، هي بس بتكلم ابن الجيران عشان تحرق دمه وتغيظه وتنتقم منه عشان كل يوم والتاني راجع لها على كتفه شعر حريمي

يعني طول ما فلسطين مركونة يبقى احنا مالنا ومال فلسطين ما ياما عملنا لها، اول ما حد تاني يتدخل: خلاص يا سيدي .. سيبك من فلسطين انا ح اخدها. نتجنن: لأ..مالك ومال فلسطين؟ دي بتاعتي...هات

هو ده اصل خناقتنا مع ايران، ومع قناة الجزيرة (اصلها بتجيب سيرة فلسطين كتير واحنا ما نحبش حد ينادي على حريمنا بالاسم كده، ما يقول لها يا ام محمد، او يا محمد على طول) ومع حزب الله، وبعد ما دولة باكملها قعدت تتخانق مع حزب، وبعدين قناة، وبعدين فريق كورة دلوقت بتتخانق مع شخص، السنة الجاية ح نتخانق مع نملة، ح نزنقها في الركنة ونقول لها: انت رخمة وبتطلعي على السرير وتقرصي فينا ومهما نرشك مش بتموتي يا رخمة

ووزارة الخارجية برضه تطلع بيان تدين فيه النملة، ويطلع في الاساس ان النملة دي شالت حتت سكر وهربتها لغزة 

وطبعا في خضم هذه العلاقة الشاذة بين مصر وفلسطين، الاخوة الادانب جم وقعدوا يتظاهروا في مصر وشايلين علم فلسطين وعملوا لنا شمبورة قام الفلسطينيين صعب عليهم نفسهم قوي عشان جات من الغريب وما جاتش منا، وازاي يعني كمان نضربهم؟ وبعد مرحلة الانكار النفسي والضلالات اللي عيشوا فيها نفسهم بتاعة اوهام العمال المصريين اللي مش عايزين يشتغلوا راحوا وقفوا على الحدود بيتخانقوا معانا

مش فاهمين انتوا، فاكرينهم بيتخانقوا معانا دفاعا عن القافلة، ابدا والله، دول مقموصين من جوزهم عشان شمت فيهم الغريب، بس 

طاااااب بقى

كل سنة والمسيحيين المصريين مقتولين بعد صلاة العيد في "مصادمات" طائفية، ناس خارجة من الكنيسة قام ناس ضربوا عليهم نار وجريوا، ولسة ما نعرفش مين دول، فدي مصادمات زي ما احنا كلنا شايفين كده

والالطف ان فيه واحد، اللي هو مواطن مصري بدون ذكر اسماء، قال ان اصابع ايران واضحة في العملية دي ويجب غلق الانفاق فورا

لا مش بيهزر، بيتكلم جد، ما داهية يطلع لنا تامر امين بكرة ويضيف الجريمة دي لقائمة جرائم حماس

بس فيه حاجة غريبة في الخبر، الخبر بيقول ان سيارة مجهولة اطلقت رصاص على المسيحيين وهم خارجين من صلاة العيد، وبرضه الخبر بيقول ان اللي عمل كده مسلمين، طب عرفوا منين انهم مسلمين؟ من المصادر الامنية طبعا، طب والمصادر الامنية عرفت منين انهم مسلمين وانها "مصادمات" طائفية مش تار مثلا الا يكون الامن عارف مين اللي عمل كده، وللا ايه؟

البلد اتهبلت

وفيه اجماع دولي على ان البلد اتهبلت، بس العالم منقسم، شوية فاتحين بقهم ومنبهرين (خصوصا اسرائيل، عمالة تقول: ايه ده يا جدعان؟  مش معقول، والله ما كلمتها انتوا كل حاجة بتجيبوها فيا؟ انا سايباها اهو) وشوية عمالين يقولوا يا عيني كانت صاحية وبتلعب، وشوية عمالين يقولوا خلاص بقى، ماحدش يزعلها تاني، امنا واتجننت ح نرميها؟ نصيبنا كده، وشوية بيتخانقوا: انتوا اتجننتوا وللا ايييييه؟ واحنا اللي جاي علينا بضحك

انا باقول لازم نقفل الانفاق برضه احتياطي يمكن مدخلنا لنا هوا نافد على نافوخنا
ضرب نار يابني ادمين.. وبوليس واقف بيتفرج