من الاقوال المأثورة في هذه الازمة اللي من غير لازمة

طبعا فيه ابداعات كتير، وان شاء الله ح احدث البوست كل ما اسمع ابداع جديد

ابداع اليوم:

مدحت شلبي: لازم نحس بالانتماء تجاه الفانلة المصري.

وقد قرر مجلس قيادة التويتر، ان ندرج البوكسر والبانتي المصري لقائمة الانتماء الوطني
----
تحديث:
عفت نصار على الجزيرة سبورت: المصري لما بيكون تحت ضغط بتبقى روحه "المعدنية" كويسة
---
تحديث:
جمال العاصي رئيس تحرير الطريق: مصر.. اللي هي مصر، صاحبة التاريخ والجغرافية، فضلت هي مصر
---------
تحديث:
متصل مصري: الف مبروك للاربعة وتمانين مليون
-----
تحديث:
جزائري على الجزيرة سبورت: احنا شعب عانى كثيرا، ونرجو من الاخوة المصريين ان يعطونا فرصة لنفرح
------
حالة نفاق مبالغ فيها للسودان اللي ما كانش حد سائل فيها وكانوا سايبينها تجوع وتحارب وتشحت وهي عندها اغنى الموارد لحد ما اتحوجت للصين
وفجأتن، كل من المصريين والجزائريين بيتنافسوا على نفاق السودان، زي نعيمة عاكف لما كانت طالعة في فيلم كل ما تروح عند حد يطردها وفجأة ورثت مليون جنيه بقى كل اللي كانوا بيطردوها بقوا يتمحلسوا لها
الجزائريين هتفوا باسم البشير، راح المصريين داخلين باغنية ما تعرفش لحقوا يألفوها ويلحنوها ويصورها امتى، عن السودان، وجمال السودان، وحلاوة السودان، ارض الاولياء، والصالحين، ارض العلم، والحضارة، والقنبلة الذرية هههههههههه
والله وباضت لك في القفص يا اووووووووووووساااااااااااااااا

----
تحديث:
دلوقت حالا على الهوا مذيع مش عارفة اسمه بيقرا رسالة وصلته: 
الرسالة: انا حلمت اننا ح نكسب بضربات الترجيح او بضربة الجزاء
المذيع: طب كلمني بقى انت قلقتني كده
----
تحديث:
متصل: والله والله والله، قدر الله وما شاء فعل، لان الجمهور ما كانش يستحمل جون تالت.. الحمد لله الحمد لله الحمد لله
---
ملحوسة:
تعليقا على تعليق جو اللي قال لنا: فضحتونا وسط الامم المتقدمة. احب انوه ان الاعلام المصرية الخفاقة صناعة صينية. وانا مش عارفة ايه المعجزة في العلم المصري عشان يتعمل في الصين، طب الجزائر اهي علمها عليه رسمة، هلال ونجمة وبتاع، واحنا مؤخرا ما بقاش عندنا توافق عقلي حركي ممكن ما نعرفش نرسم الهلال والنجمة، انما تلات الوان، كانوا يقولوا لي وانا اخيط لهم كام علم في البيت... او اخيطهم هم
---
تحديث
متصل: الو سلامو عليكو.. ايوة، انا عايز اقول اننا ما عملناش حاجة، واحنا مش ح نفضل نتهان ونسكت، وانا طالب اعتذار رسمي من حكومة الجزائر على البنت الجزائرية اللي عملت حركة وحشة للجمهور المصري
------
ضيف على مودرن سبورت: بيحملوا الاعلام المصري المسئولية؟ طب مين اعتذر عن البنت اللي درعت للجمهور انا اسف يعني
مدحت شلبي: لا مافيش اسف، ده حصل
-----
متصل على الجزيرة: الحقيقة احنا والجزائر شعب واحد، وما غلطناش فيهم، بينما بص الجزائريين وافتكر البنت اللي كانت في المدرجات
(قصده على اللي درعت - احنا ناس خجولة وعذارى)

 .