بالنوسبة للمسالخة

وعمالة ادور على الفيديو اللي بيقول فيه ايام مجزرة غزة ادي اخرة انتخابكوا لحماس مش لاقياه مش عارفة ليه؟

واحنا متخيلين ايه؟ النهاردة حماس قالوا لمصر: احنا مش مش عايزين المصالحة، احنا مش قادرين.. مش قادرين، هم ايه؟ حلاليف يعني؟ طوبة ما بيحسوش؟ واحد قعدت بلده تنضرب تلات اسابيع والمناظر الفظيعة اللي شفناها دي والصدمة اللي اهالت العالم كله بما فيه ريتشارد جولدستون اليهودي الصهيوني اللي اسرائيل بنفسها قالت لولا انه يهودي كان التقرير طلع اوحش. طلع في عز الضرب يقول لناسه اللي بتموت ادي اخرة انتخابكوا لحماس، بيتشمت فيهم عيني عينك، وما رضيش يجتمع مع حماس في مؤتمر الدوحة، مش كرامة لمصر، عشان حماس رايحة، مش عايز يشوف وشهم وهم بينضربوا، وهان عليه في عز الضرب يقول ان حماس هي السبب في الضرب وبقى بيريس يستشهد بيه، ومشارك في حصار ضد بلده عقابا ليهم على انتخاب حماس، كل ده وخلاص، واللي فات مات، رايح يأجل التقرير بتاع جولدستون وهيثم مناع طالع يصرخ ويقول دي جريمة دي جريمة، ريتشارد فولك اللي لا من جنسنا ولا من ملتنا قال عليه خاااااااااااايييييييين، قالها بالمفتشر، قال باللفظ "خان شعبه" والتقرير ماهواش عادل ولا حاجة، التقرير بيدين حماس ومع ذلك حماس مستعدة تدان لو ده ح يجيب للناس حقهم بادانة اسرائيل معاها، فيه اكتر من كده؟ فيه اكتر من ان ناس تقبل الادانة الدولية عشان فرحانة ان العدو ح يدان معاها؟ والتاني، برغم من كل كرهه لحماس، مستعد انه يرفع الادانة عن حماس، اللي بيقول عليها: اذبح، بس عشان يحمي اسرائيل، وياريت عرفناها بالتخمين، ده اسرائيل هي اللي فضحته؟ احنا ايه؟ ما عندناش احساس؟ طب ما عندناش احساس، فاكرين ان كل الناس زينا ما بتحسش؟ الناس مش قادرة، مش قادرة، ح يسلموا عليه ازاي؟

ده مش بس اجرم في حق الفلسطينيين، ده اجرم في حق العراقيين والافغان اللي كان ممكن يستغلوا السابقة دي عشان يقدموا الامريكان لمحكمة دولية وبرضه كانوا ح يلاقوا مقاومين عبط زي حماس يقبلوا الادانة على نفسهم بس عشان ينالوا من الامريكان، ماهم كده، ناس بتموت نفسها عشان ام الوطن، متوقعين منهم ايه؟ لا وكمان يتشتموا ويتقال عليهم بيسعوا لمصالحهم، جاتهم نيلة ده اكبر مصلحة انهم يملوا التلاجة بخمسة جنيه عيش فينو، ومش بس كده، السابقة دي كانت ممكن تساعد لبنان على ادانة اسرائيل، دي كانت ممكن تساعدنا احنا في مصر عشان الاسرى بتوعنا بتوع سبعة وستين، دي كانت فرصة ذهبية الله يخرب بيته، الله يخرب بيته، الله يخرب بيته، الله ينتقم منه دنيا وآخرة، ربنا يورينا فيه يوم الخاين سبت الزبالة الجربان، حسبي الله ونعم الوكيل فيه، حسبي الله ونعم الوكيل فيه

ده يتصالح فيه ايه ده؟

مصالح ايه وزفت ايه؟ لو باصين لمصالح كانوا هم اول ناس فرحوا بتأجيل التقرير وطظ في ادانة اسرائيل، المهم هم ينفدوا، دي كانت ح تبقى سابقة تاريخية، دي فرصة تاريخية وضاعت، هيثم مناع تاني، بيقول ان صحيح فيه فرصة للاستدراك بس الفرصة اللي ضاعت ما تتعوضش، وفاجأونا، فاجأونا

وعشان تبقوا فاهمين، حماس لو كانت من الاساس بتلعب لعبة سياسية كانت صالحت عباس دلوقت على طول، دلوقت حاليا، حماس جابت اسرى وعملت صفقة ناجحة، وفرحت بيوت كتير، وفي نفس الوقت عباس القرد عمل عملته السودا، وحماس بقى كانت ممكن تلبس دور المتسامحة وتتصالح معاه ويعملوا انتخابات وده كان ح يرفع اسهم حماس فوق ما ارتفعت في الفترة الاخيرة، وكانت حماس ح تكتسح الانتخابات في الظرف الحالي، كل حاجة في التوقيت ده في مصلحة فوز حماس في الانتخابات، بس هو اصلا الانتخابات ما كانتش لعبتهم من الاول، انا مش فاهمة ايه اللي طسهم في مخهم وخلاهم يبلعوا نصباية الديمقراطية دي؟ ياللا اهو نصيب، وانا مش عارفة والله في الورطة اللي هم فيها دي ح يعملوا ايه؟ يعني الورطة دي كانوا يقدروا يخرجوا منها بمصافحة عباس بس الحقيقة انا احترمتهم لما قالوا مش قادرين، والله عندهم دم واحساس وانا باحترم الناس اللي بتحس عموما، حتى لو احساسها ده ح يضر بمصلحتها، ما بقاش فيه حد عنده دم ولا احساس كتير اليومين دول، ومافيش حد متضرر من مرض الاحساس اللي عند حماس غير حماس نفسها، فتح مستفيدة اربعة وعشرين قيراط، وعباس بالذات، وكان مهندس حر قال مرة قبل كده انه عمل كده عشان يوقف المصالحة ما بينه وبين حماس لان ده في مصلحته، وطبعا هو دارس ردود افعالهم وعارف ان البعدا عندهم مشاعر وبيحسوا على دمهم مش خنازير زيه 

يعني لو كان لا قدر الله اللي ماتوا دول يقربوا لنا كان فيه ناس ح تتكلم عن المصالحة؟ وماحدش يقول لي فتح مش عباس، لا، مدام فتح قابلة عباس على راسها ولسة ما قلبتوش يبقى فتح هي عباس، مش هو ده ممثلهم؟ اسرائيل ماسكين عليه سي ديهات؟ ويضيع مستقبل بلده وبلاد تانية كتير عشان شركة موبايلات؟ ما تحاول تلخصها بشكل فردي كده عشان تستوعب:

الست اللي ولادها الاتنين اتقتلوا واللي قتلهم ابن اخت جوزها، ينفع جوزها يتصالح مع اخته؟ ينفع يتصالح مع ابن اخته ويعمل زي ما اخته طلبت وينجيه بكلمة واحدة والحي ابقى من الميت؟ اللي فيكوا يقدر عليها يقول لي اقدر

ينفع تدخل على مراتك وللا تدخلي على جوزك وتلاقيها مع اعز صحابك في اودة النوم وتصالحها عشان بينكوا عيال؟ انا مش باسخن ما بينهم ولا حاجة

بس مين غليظ الاحساس اللي يقدر يستحمل حاجة زي دي؟

المصالحة الوحيدة اللي تنفع، ان فتح تشيل عباس دلوقت حالا وفورا، ده مجرم حرب، ده اتفق مع ايهود باراك عشان يموت ناسه بشهادة اسرائيل

يعني اسرائيل كدابة، وودانا كدابة، وعينينا كدابة، وجولدستون كداب، وفولك كداب، وحماس كدابة، ومافيش حد صادق الا محمود عباس و"مافيش داعي للتخوين"؟ اللي ح يقول لي مافيش داعي للتخوين لو راجل يوريني وشه عشان انسل الشبشب عليه

وبعدين هم قالوا مش ح نتصالح؟ هم قالوا نأجل، عايزين يشوفوا ايه اللي ح يحصل في التقرير، عايزين يهدوا، يهدوا شوية طيب، اذا كنت انا مش هادية

انا مش فاهمة فتح خالص، ازاي ساكتين عليه لحد دلوقت؟ كل ده عشان الفلوس والاستثمارات؟ الله يخرب بيت الرأسمالية على الرأسماليين على اللي بدعها؟ الهي يارب تنهد على دماغهم قادر يا كريم، طول عمري اقول الرأسمالية ضد حقوق الانسان، اول مرة المس بايدي ان الرأسمالية بتقتل، بتقتل، وبتقتل اطفال وابرياء، واحد قتل عرفات، وقتل ناس كتير، ده سفاح، وطالع يقول انا ضد الكفاح المسلح، يا سلااااام رجل سلام قوي، ضد قتل الصهاينة لكن مع "ذبح" الفلسطينيين؟ واي واحد تشوفه شايل صاروخ اقتله؟ ثم فين القدومي؟ ها؟ بعد ما طلع المحضر وفضح الدنيا، وواحد من فتح طلع يدافع عن عباس يقول ايه؟ هههه، لا اسمعوا اسمعوا، بيقول: هو انا عارف المحضر ده، بس عباس ما كانش موجود..دحلان بس. ده اللي بيدافع عن عباس، ودي حاجة بقت ملحوظة في كل اللي بيدافعوا عن عباس: "عباس بيرقص بشرفه، بيقدم نمرته ويروح على طول عمره ما قعد مع الزباين، هو صحيح دحلان كان بيروح  البيت مع الزباين ويقسم مع عباس، بس عباس ماله؟" راح فين القدومي بقى؟ واتصالح ازاي مع عباس بعد ما قطعوا بعض؟

اذا كان ماسك عليه ذلة هو راخر فحماس لسة ما عليهاش ذلل لحد دلوقت، يتصالحوا ازاي يعني؟ يتصالحوا في ايه؟ على رأي ماما: دول لو كانوا متصالحين المفروض يتخانقوا..انتوا اتجننتوا وللا ايه؟

يا الناس كلها اتجننت يا انا ضربت، مش ممكن الناس اتجننت، اكيد انا اللي مجنونة

هو احمد نصر كان قال المكوك راكن فين؟