Saturday 1 August 2009

معلش انا باذاكر

بس حبيت اسقط بعض اللي ذاكرته على السياسة
عوكل مش شخصية درامية، ده زي شخصية عبد السلام النابلسي وعبد المنعم ابراهيم في الافلام، وقالوا لنا في المعهد ان ده غلط اننا نعمل شخصيات كده في الدراما
عبد الناصر والسادات شخصيات درامية
صحيح الاولاني بروتاجونيست والتاني انتاجونيست، بس مهمين الاتنين
انما عبد المنعم ابراهيم مش مهم
اسيبكوا بقى عشان اكمل مذاكرة
at

28 comments:

  1. مهندس مصري بيحب مصر1 August 2009 at 18:37

    هو ايه أصله ده ؟
    مش قلنا مش عايزين رطانة المثقفين
    يعني ايه بروتاجونيست و انتاجونيست ؟
    النبي عربي يا أبلة

    ReplyDelete
  2. tuhamy1 August 2009 at 19:22

    علشان مش عاوز أألف من نفسي
    هو ايه معني
    بروتاجونيست و انتاجونيست
    وبعدين سامحيني أنا ظلمتك

    لما نشاطك قل علي النت أنا قولت أكيد انتي في مصيف؟؟

    أتاريكي من بتوع- دور تاني- اللي بيذاكروا في الصيف

    احترامي ،،،،

    ReplyDelete
  3. Ahmed Fawzi1 August 2009 at 20:15

    .. مع إحترامى الشديد لأكاديمية رأفت الميهى بس مش موافق على كلمة غلط اللى قولتيها و مش موافق على تشبيه عوكل بشخصيات عبد السلام النابلسى و عبد المنعم إبراهيم
    1- ليه غلط إننا نعمل شخصيات زى دى ؟ إذا كانت هى اللى فضلت فى ذاكرة الجمهور أكثر من الشخصيات الأساسية ( عبد الحليم و فريد الأطرش و محرم فؤاد ) ؟؟
    أعتقد إن الشخصيات دى كانت حل عبقرى لظرف إنتاجى
    بطل له شعبية بسبب أغانيه لكن فى الوقت نفسه لا يتمتع بخفة ظل كافية أو مهارة فى التمثيل و له شروط فى بناء دوره فى الفيلم بتخللى الشخصية عاجزة و تحتاج لشخصية أخرى تكون أقدر على الفعل و أكثر إنسانية ( مش ملاك ) و لهاالقدرة على على جعل الجمهور يضحك و يتفاعل مع الفيلم و لا ينفصل عن المتابعة بين الأغنية و الأخرى ...
    إذن المشكلة و الخطأ تكمن فى البطل و ليس فى الشخصية المساعدة التى كانت فى الحقيقة علاج لمشكلة أخرى و فى النهاية هم أهم من البطل تقريبا .
    بالطبع الوصف ده كله لا ينطبق على عوكل ... ولو بحثنا عن شخصية يمكن تشبيه عوكل بها فى السينما المصرية تقريبا لن نجد سوى شخصية زوج تحية كاريوكا فى فيلم سمارة و مع ذلك سيكون تشابه فى بعض السمات و ليس بتطابق.
    أعتقد أننا سنجد شخصيات تشابه عبد الناصر و السادات فى الدراما بوفرة و لكن عوكل بالفعل حالة فريدة ..

    ReplyDelete
  4. هرطقة1 August 2009 at 20:25

    مفهوم ان عبدالناصر بروتاجونيست
    لكن ازاى السادات أنتاجونيست

    ReplyDelete
  5. TAFATEFO1 August 2009 at 21:34

    غلط .. حضرتك فاهمه غلط

    عبدالناصر والسادات ممكن يبقوا بروتاجونيست وأنتاجونيست لو كانوا الاتنين في نفس الشابتر

    لكن الصح ان عبدالناصر كان بروتاجونيست والسادات كان ديوتاجونيست لكن حسني فعلاً مش تريتاجونيست

    الفسلم خلص مع السادات وبدأ فيلم جديد بعد شهور من تولي حسني ملحقش يلعب فيهم دور .. لكن بدأ فيلم جديد هو فعلاً مش من أبطاله .. ولا حتى من السنيدة .. هو قايم فيه بدور سميحة صديقة الطلبة في خمسة باب مش دور فؤاد المهندس .. هو **** بس مش في دور بطولة وملوش تأثير يذكر على الأحداث

    ReplyDelete
  6. Anonymous1 August 2009 at 23:14

    pro
    Anti

    You are studying medicine!

    ReplyDelete
  7. Anonymous1 August 2009 at 23:15

    Go ahead Nawara and study well. God bless your steps.

    ReplyDelete
  8. Unknown2 August 2009 at 00:08

    لا مؤاغزة

    بروتاجونيست البطل
    وانتاجونيست عدو البطل
    يعني عطيل البروتاجونيست واياجو الانتاجونيست

    هاملت البروتاجونيست وعمه الملك انتاجونيست

    كمال الشناوي ومحمود المليجي يعني

    وحسني مبارك عبد المنعم ابراهيم

    او يمكن التاكسي اللي كمال الشناوي بياخده عشان يلحق شادية

    ReplyDelete
  9. Unknown2 August 2009 at 00:10

    مصر 30
    ممكن يتعمل شخصية صديق البطل بس تبقى لها دور في الدراما وتبقى شخصية هي في حد ذاتها ملونة زي صاحب هاملت كده
    ما يبقاش شخصية طالعة كده مالهاش لازمة
    لو مالهاش لازمة يبقى غلط تتحط

    وعوكل مالوش لازمة فعلا

    ReplyDelete
  10. Unknown2 August 2009 at 00:11

    مهندس مصري وتهامي

    لا مؤاغذة

    :)

    ReplyDelete
  11. Unknown2 August 2009 at 00:11

    هرطقة

    السادات عامل زي شخصية اياجو في عطيل
    شايف نفسه احسن من الكل ومش واخد فرصته
    ولما اخد فرصته بهدلنا

    ReplyDelete
  12. Unknown2 August 2009 at 00:12

    طفاطيفو

    الفيلم خلص؟
    :(

    طب واحنا في الاستراحة وللا ايه؟
    وللا دي فترة اعلانية؟
    اصل شكلها مش فيلم خالص
    مافيش اي اثارة ولا تشويق

    ReplyDelete
  13. Unknown2 August 2009 at 00:13

    سونيت
    ههههههههه
    لا مش طب

    متشكرة

    ReplyDelete
  14. احمد سعيد2 August 2009 at 00:13

    مصر 30

    ... ولو بحثنا عن شخصية يمكن تشبيه عوكل بها فى السينما المصرية تقريبا لن نجد سوى شخصية زوج تحية كاريوكا فى فيلم سمارة


    ----------------------

    نيااااااااااااااااااة

    بتاع انتى بتلعبى بالنار ياسمارة ؟؟؟

    طب مينفعش عبد الفتاح القصرى فى فيلم ابن حميدو ؟؟؟


    او حمدى احمد فى فيلم القاهرة 30 ؟؟؟


    او شخصيه بدران فى فيلم امير الانتقام ؟؟

    او الراجل الطويل بتاع هينضفووونا
    اللى جه فى فيلم ليله سقوط بغداد ؟؟؟

    ReplyDelete
  15. Unknown2 August 2009 at 00:14

    او يمكن يا طفاطيفو دور ازوريس في قصة ايزيس؟ مات قبل ما القصة تبتدي؟

    ReplyDelete
  16. Ahmed Fawzi2 August 2009 at 00:36

    مين قال إن الشخصيات دى كانت مالهاش لازمة ؟ .. قولى فيلم واحد الشخصية التانية كانت ممكن تتحذف .. حاتلاقى على طول إن البطل لوحده مش حايكفى الموضوع لا من حيث قدرته على الفعل لأن الشخصيات دى هى اللى بتقوم بالفعل و البطل بيقطف الثمرة فى الأخر أو يدخل يضرب و خلاص أو إنتاجيا فى جذب الجمهور ( خللى بالك بنتكلم على سينما مش مجرد دراما نظرية ).. و أكتر من كده فى أفلام كتير كانت الشخصية التانية هى اللى بتحفز البطل على الخروج من أزمة أو بتوجد معاه حالة حوار بينتج منها الحركة التالية للبطل ..
    فعليا بقى عوكل محرك خفى فى الأحداث ممكن برضه يبقى أقرب مثل له شخصية البرادعى فى المسلسل القديم اللى قام بدورها المخرج الجميل أحمد توفيق و كان بطولة عبدالله غيث و سهير البابلى ..
    كان شخصية محايدة أغلب الوقت بس فى الأخر طلع زعيم العصابة و هو ورا كل الشرور اللى حصلت
    بس مش ممكن مقارنته بزكى رستم فى رصيف نمرة 5 لأن زكى رستم فى الدور الطيب كان شخصية متفاعلة مع المجتمع قبل ما نكتشف إنه الزعيم و كان أكثر إبتكارية من عوكل

    ReplyDelete
  17. TAFATEFO2 August 2009 at 00:40

    أيوه الفيلم اللي فيه بطل الفيلم مصري خلص .. وبدأ فيلم جديد بتقوم فيه مصر بدور عهر ثانوي (شبيه بدور سميحة صديقة الطلبة في خمسة باب - ليست في دور بطولة نبيلة عبيد ولا سنيده في دور فؤاد المهندس ولكن عاهرة تقوم بدور ثانوي تؤديه كما هو مطلوب منها كملما جاءت عليها الكاميرا) .. الفيلم اللي بتقوم مصر فيه بدور بطولة خلص

    انتي محسيتيش؟؟

    ReplyDelete
  18. Fatma2 August 2009 at 00:46

    نوارة
    انت رهيييييييبة

    :D

    بس انا مش موافقاكي
    عوكل ليه دور كبيييير في حرق دمنا واستفزازنا
    شخصيات عبد السلام النابلسي وامثاله دورها انها تملا الفراغ بدون ما تحسي بيها لا سلبا ولا ايجابا
    انما الحقيقة عوكل دوره لا حصل ولا كان ولا له مثيل ابدا ابدا
    حالة فريدة من نوعها
    لازم يطلعولها تصنيف لوحدها تماما

    على الهامش
    كل ما ماما تبتدي موال انتو ماتعرفوش تعملوا حاجة من غيري هو انا هفضل طول عمري اعملكم كل حاجة انا انا انا افتح لاخواتي شخصية الام المصرية في كتابك واقولهم هاااا ماحدش ينسى نوارة جابت من الاخر في القصة هي مش متضايقة ولا حاجة دا جزء من الحالة بقيت بعد كدا يادوبك اشاور على الكتاب يضحكوا ويسكتوا :)وماما هتموت وتفهم في ايه

    ReplyDelete
  19. Unknown2 August 2009 at 01:18

    ههههههههههههههههههههه
    يااااه
    حتى مامة بكيزة هانم بنت شرين باشا بتعمل زي بقية الامهات المصريات

    ReplyDelete
  20. Unknown2 August 2009 at 01:20

    لا بقى يا طفاطيفو

    يمكن دور شفيق جلال في خلي بالك من زوزو: والقرش الابيضاني ينفع في اليوم الاسمراني يا عيني وكمان الاخضراني يا ليل

    مصر 30
    انا كمان باحب عبد السلام النابلسي
    بس هو لازمته انه لطيف

    وده اللي ينقص عوكل

    ReplyDelete
  21. Fatma2 August 2009 at 01:27

    ييييييييييييي
    يادي بكيزة
    وربنا انا ما بكيزة
    والنعمة ما بكيزة
    يا خرااااشيييي

    بطلي اوشاعات شككتيني في نفسي
    بقول لصحابي هو انا بكيزة
    لاقيتهم سرحوا فجأة وقالولي
    بصراحة فيكي شوية
    بس اللي بكيزة رسمي مامتك
    :(
    انا مش بكيزة
    يعني انا ماليش ذنب على فكرة دي حاجة يظهر وراثية
    انا مش بكيزة
    انا مش بكيزة
    عقدتيني

    بابا قرا كتابك ومبسوط بيه قوي وقالي البنت دي طيبة ومليانة احساس وبسيطة وقريبة من القلب وكان عايز يعزمك عندنا على الغدا وماما اقترحت تعملك شركسية قولتيلها لا الله يسترك مشيها ملوخية انا مش ناقصة بكيزة اكتر من كدا :P

    ReplyDelete
  22. lastcrazyboys2 August 2009 at 04:24

    !!هي دي المذاكرة يا استـــاذة


    أنا عــارف ان الحاجات دي بتحلى جدا ســاعة ما الواحد ما يبتدي يمسك الكتاب ..وتتعبي نفسك ليه صحيح..!افرضوا ذاكرت ونجحت ..وابوكوا برضه ساب البيت
    ؟؟؟؟؟

    بس حكــاية "ياجــو" دي بتثبت انــه الســادات كــان ذكي ولئيم ..وبتثبت نظرية واحد حبييييبي كان دايما بيدافع عنه لأنــه الوحييييييييد اللي أثبت ان المنايفـــة أوســ...... من اليهــود

    ReplyDelete
  23. كائن الإبداع .... محمد2 August 2009 at 06:46

    مطلوب مننا ايه بقى




    ما تجيبي المقرر نذاكرلك و نشوف منه ايه الكلام اللي بتقوليه ده



    أنا خامس مرة اجي هنا


    جيت 3 مرات و انا بتسحب علشان كنت مهموم و مش عايز أضحك ، و مرتين قلت لما أضحك بقى ما فهاش حاجة


    http://www.ibtesama.com/vb/imgcache2/97010.gif


    دي بس علشا أول مرة أعلق هنا


    و لو ما كنت علقت كنت هتعلق

    ReplyDelete
  24. Ibn Barhoma2 August 2009 at 13:10

    عوكل يبقى توفيق الدقن ... “احلي من الشرف مافيش ... يا اه يا اه“ .... و ماسك الشعب الغلبان و بيقول له “ العلبه فيها ايه؟ ... العلبه فيها فيل ... قول وارايا ... العلبه فيها فيل“

    ReplyDelete
  25. overdose2 August 2009 at 14:12

    اه انتاجونيست دا بناخده ف الكلية بيعمل بلوك للريسيبتور عشان ال
    drug
    ميعرفش يدخل
    بيقله اقققققققققققققف مكانك

    ReplyDelete
  26. Anonymous2 August 2009 at 17:27

    وما الدنيا الا مسرح كبييييير
    بالتوفيق في المذاكره

    ReplyDelete
  27. محمد2 August 2009 at 19:28

    انتي بتدرسي ايه يا نوارة؟

    ReplyDelete
  28. سكوت هنصوت2 August 2009 at 19:41

    بصي بقى يا نوارة

    هالله هالله عالجد والجد هالله هالله عليه....ه وانت يا اختي عشان سي عوكل مش عاجبك ومطلع عينك..تقومي تلزقيه في عبد المنعم ابراهيم...طب وسي عبدالمنعم كان عملك ايه....طب ده انا بتفرج على نص الأفلام القديمة بس عشان اشوف عبد المنعم ابراهيم...يعني قوليلي انت بالذمة...فيلم زي اشاعة حب يتشاف ازاي من غير عبد المنعم ابراهيم...فيلم زي السفيرة عزيزة...يتبلع ازاي ان لم يكن فيه سي عبد المنعم...

    بلاش....هنزلك بقى بالزغلول الكبير...فيلم زي اسماعيل يس في الأسطول...ينفع يتعمل من غير عبد المنعم ابراهيم....طب ده الواحد كان بيبلع سماجة شكري سرحان بس عشان خاطر عبدالمنعم ابراهيم جنبة...تقومي بعد ده كله وتقوليلي ده خطأ في السينما..

    بصي بقى يا نوارة يا حبيبتي انا انصحك كده تسيبك من التعليم الي هيبوظ مخك ده وترجعي لمدونتك...تقولي كلمة وترمي عشرة...وبلاها وجع قلب...

    ReplyDelete

Note: only a member of this blog may post a comment.