جيش الانترنت ابتدى يشتغل اهو

منتشر على المنتديات والمواقع الاجنبية ناس بتقول: احنا لازم نحرر الايرانيين، وناس بيقولوا على نفسهم ايرانيين وبيقولوا: احنا ممكن نستقبل الشيطان بالاحضان اذا خلصنا من النظام ده.

وواحد بيقول: انجلترا واسرائيل على اهبة الاستعداد.

همممممممممممم

مش ده اللي خضني

اللي خضني انه قال ح نحرر ايران وعقبال مصر! انا اصحابي المصريين بيقولوا لي انهم عايزين حرية

!!!!!!!!!!!!!!!!!!!!

مين اللي قال انه عايز حرية يا شباب؟ حيوان مين اللي قال كده؟ على اي حال انا ما سكتش ونفر عليا العرق المصري وقلت له: اه، الكلام ده تقوله لحد غيرنا، احنا نقرقش عضامكوا قبل ما تهوبوا ناحيتنا، احنا ناس عندنا كرامة، لازم تموتوا التمانين مليون كلهم عشان اي حد فيكوا يحط رجل في مصر، بدل ما تسمع لصحابك اقرا مذكرات موشى ديان لما قال على الجنود المصريين: "ان الجنود المصريين مجانين، يتسابقون نحو الموت وكأنهم ذاهبون الى نزهة" احنا مقبرة الغزاة.

انا قلت اخوفه، يمكن يكون جس نبض وللا حاجة 

مصر؟ اوعى رجلك بقى، هم عايزين مننا احنا ايه بقىىىىىىىىىىىى؟ ما احنا قاعدين في حالنا اهو كافيين شيرنا خرنا ونازلين تعزيز لما القرون طلعت لنا في كل حتة، وللا كام عيل راحوا يتفسحوا ويشوفوا المزز على كام واحد بيبعتوا جوابات زي الباز افندي ح يوهموهم اننا نبيع بلدنا؟

الحمد لله ان نسبة الامية عالية وان النخبة مش واصلة للناس، ناس كتير عايشين من ايام ستة وخمسين، ده حتى الكبار في العشوائيات ما يقولوش غير: الرئيس السادات، والصغيرين فاكرين ان حسني مبارك ده رئيسنا من ايام الفراعنة

ولما الدنيا مطرت واحدة قالت لماما: بقيت ادعي واقول، يارب الطف باللي على الحدود.. الجيش التاني والتالت

كويس ده، عشان نبقى مستعدين بس، احنا ما حيلتناش غير الناس اللي بتدعي للجيش التاني والتالت تدافع عن البلد

انما التاني والتالت نفسهم راحوا يباركوا للاول والرابع على الجواز واخدوا معاهم شيكولاتة كفرتينا فالعروسة رمتهم من الشباك