جهول مجهال ابو جهل

تحديث:

انا بس للامانة كتبت اقول: ييجي واحد زي ده، وانا مش عارفة الشخص اللي بعت لي راجل وللا ست لانه يا عيني، ههههههه، باين عليه خواف/ة وللا ايه وخاف/ت من لساني وفضايحي قام/ت مخصوص عمل/ت الاكاونت ده
"Anonymous A" personanony@yahoo.com

انا بعد ما اتغاظت منه عشان نفسية المتسول اللي مسيطرة عليه (او عليها بقى مش عارفة) صعب/ت عليا

افتكرت كلام فرانتز فانون في كتاب "جلد اسود اقنعة بيضاء" بالظبط زي الناس اللي كان بيوصفهم، حتى كان بيقول انه من الغريب ان بعض الافارقة المنسحقين لما تقول لهم انت كان عندك حضارة يتقمص الابيض ويتشنج وينكر حضارة ناسه لانه مصمم على ارتداء القناع الابيض، يارب نخلي بالنا بس وما نعياش اكتر ما احنا عيانين

انا اصلي جالي ميل، ما بقتش عارفة، الاول طنشت قلت ما اردش، بس اللي باعت لي الميل قال لي كلمة استفزتني قوي دونا عن كل الميل، فقلت بقى لزمن افضحه على رؤوس الاشهاد

الميل الطويل العريض شتيمة عادي، انا مش بازعل منها، اللي غاظني الجملة دي:

" في عدائك هذا للغرب لو كان لديك ذرة كرامة لما استخدمت التكنولوجيا الغربية واقلها مدونتك"

هو بعيدا عن اني مش عارفة انا معادية للغرب في ايه؟ يعني لا معادية ولا مصاحبة انا بس ما احبش ابقى شبشب لحد، بس ده مش مهم

المنطق بتاع: ولما بتكرهوا امريكا بتستخدموا الكمبيوتر ليه؟ منطق غبي قوي، وجهول، ولو فيه اكتر من الجهل الواحد يقوله يبقى يقوله، والعجيب ان فيه ناس بتقوله، ولسة امبارح انا ومينا كنا عاملين زي عواجيز الفرح وبنتكلم عن قمة التمانية، وانا كنت باقول له هم مدينين لينا اصلا، مينا اخدته الجلالة وقال لي ولازم يدفعوا لنا تعويضات والفلوس اللي بيدوهالنا دي مش حسنة ده حقنا، قلت له بس يسيبونا في حالنا، وهو معتبر انه: لا.... يدفعوا فلوس ويسيبونا في حالنا برضه

وهو له حق بس ده مش ح يحصل

اولا الحق المعنوي:

بسبب عنصرية اوروبا (المفارقة ان اوروبا عنصرية اكتر من امريكا بكتيييير)، مش مقبول ابدا اي باحث يقول ان الحضارة الغربية والنهضة الصناعية كلها مبنية على الانجاز العربي/الاسلامي. ومع ذلك فيه بعض الباحثين الاوروبيين اللي اتمكنوا من انهم يقولوا كده ويتسابوا في حالهم من غير ما يسقطوهم (خصوصا لما يبقوا يهود عشان ماحدش يقدر يكلم اليهود) ولسة شايفة امبارح باحث عراقي الدكتوراه بتاعته في اثر الادب العربي على رواية دونخيشوت الاسبانية، واخدها من اسبانيا

الحقيقة ان كل الحضارة الغربية، بكل تفاصيلها، بما فيها الكمبيوتر، معتمدة على الانجاز الحضاري العربي/الاسلامي، وده مش عيب، احنا كمان اعتمدنا على اللي قبلنا، بس ما انكرناش فضلهم. وهاتوا مقدمة ابن خلدون واقروا البحث اللي عامله الدكتور محمد عبد الواحد وعارض فيه الجدول الحسابي اللي عمله العرب واللي على اساس الحسابات دي الغرب اتمكن من انه يطورها لحد ما وصل للكمبيوتر، كمان وجدوا مخطوطات عربية قديمة لفك رموز اللغة المصرية القديمة، والمخطوطات كانت متقدمة جدا وفيه اقوال بتقول ان شاملبيون اعتمد عليها سرا. بس الاحسن من كده فيه كتاب اسمه البذور الشرقية للحضارة الغربية، لكاتب امريكي اسمه جون ام هوبسون، بيقول ان كل تفصيلة، حتى التشريعات (بما فيها الجواز والطلاق) حتى العلمانية الغربية والحقوق المدنية (خاصة حقوق الاقليات) كلها مستمدة من الحضارة الاسلامية العربية، وهو بيقول انا عارف ان الكلام ده مش بيعجب بس دي ادلة علمية، واحيانا احنا بنحب نتهرب من الاسهام الاسلامي العربي لاننا حصلنا عليه عنوة بالحرب ونقول انه مش كله عربي واسلامي احنا اعتمدنا على الانجاز الحضاري الصيني، ودي حقيقة، بس احنا ما كناش ح نتمكن من الوصول للانجاز الحضاري الصيني لولا الوساطة العربية

طيب، انا واحدة جدودي عملوا انجاز حضاري وانا خايبة وما عملتش حاجة، ماشي، انا موافقة اني خايبة، بس جدودي دول بذلوا العلم لاي حد ولكل حد من غير النصب بتاع "حقوق الملكية الفكرية" اللي الغرب بيتنطع بيه عشان يحرمني من العلم اللي هو طوره وهو اصلا ميراثي من جدودي

انا جدودي ما كانش عندهم ملكية فكرية، كان عندهم: من كتم علما الجمه الله بلجام من نار يوم القيامة

وجدودي ما كانوش نصابين، ما كانوش ياخدوا من الناس وينكروا فضلهم، يعني المفارقة ان الحضارة الغربية اللي بتدعي لنفسها حقوق الملكية الفكرية ومش ناقص غير تبيع الهوا بفلوس عشان الملكية الفكرية، في نفس الوقت بيحرموا اصحاب الفضل من حق الملكية الفكرية ولو المعنوي، وبينكروا كتير من افضال حضارة اهل الجنوب

لما جدودي ترجموا الحضارة اليونانية واستفادوا بيها، ما خبوش مصادرهم وقالوا احنا اللي عملنا كده، وبالمناسبة بقى، الانجاز العربي والاسلامي والصيني موثق، وصعب انكاره، لكن في وقت ما العرب اكتشفوا اليونان، كان ممكن جدا يخبوا اللي اكتشفوه، وللا حتى يعيدوا نسخه ويحرقوا المخطوطات القديمة، ويدعوا لنفسهم الانجاز ولا حد كان ح ياخد خبر بالموضوع ده لحد اللحظة دي، لكن هم كان عندهم الامانة الكافية اللي تخليهم يرجعوا الفضل لاصحابه، واذا كانوا هم ما دفعوش لليونان او الفرس او الصينيين او الافارقة والهنود فلوس حق الاستفادة بالعلوم دي، فهم كمان ما اخدوش فلوس حق ما علموا غيرهم من الامم، والناس كانت بتيجي من اوروبا لقرطبة وبغداد عشان تتعلم على حساب الخليفة، ولما اتعلموا من الحملات الصليبية، كانوا هم اللي بيغزونا، مش احنا اللي عملنا عليهم حملة فرنسية عشان نجيب لهم مطبعة فرحانين بيها قوي بهبلنا، هم اللي جم زي النهابين واخدوا الحاجات دي ولا كأن ليها صاحب، وفوق ده كله، احنا ادينا الحق المعنوي لاصحابه مظبوط، ما سرقناش سطر، (ارجو قراءة كتاب الخطابة لابن رشد عشان تشوفوا ازاي معقد في موضوع العنعنة دي، يكتب يقول، من اول الكلمة الفلانية للكلمة الفلانية ده كلام ارسطو، ومن اول الكلمة الفلانية للكلمة الفلانية ده كلام، والجملة اللي قبل الاخيرة ده كلام فلان الفلاني، لما يطلع روحك وانت بتقراه) والبجاحة ياخدوا مننا ويشتمونا، ولولا ان اليهود مسيطرين على الاعلام والمؤسسات وهم السبب في ان صلاح الدين الايوبي يبقى له ذكر حسن في كتب التاريخ الغربية، لانه هو اللي انقذهم من الفناء واشترى صكوك عبوديتهم من الصليبيين واعتقهم ولولاه ما كانش ح يبقى فيه يهودي واحد في العالم دلوقت، كان زمان صلاح الدين بيتقال عليه بربيريان هو كمان

ده بالنسبة للحق المعنوي

انا مش بس ليا حق استفادة، انا ليا فلوس، يا يدفعوا لي فلوس، يا يدوني العلم اللي عندهم ببلاش زي ما اخدوا من عندي ببلاش

الحق المادي:

بعد النهضة الصناعية (اللي اتبنت على انجاز ناسي) حصل تضخم ولقوا انه من "الحتمي" احتلال الناس وسرقة مواردهم، والناس دي اللي هم احنا برضه، تاني، تاني احنا، كأننا اجوزنا امهم، طيب انا، في العالم العربي، وافريقيا، والهند، والصين، قد ايه من فلوسي ومواردي الطبيعية والبشرية استغلوا لدعم الحضارة دي؟ قد ايه؟ كل حاجة، كل مواردي وكل فلوسي وكل ناسي استعبدوا عشان يخدموا على الحضارة دي، لما 15 مليون يموتوا في البحر عشان رايحين عبيد يبنوا العالم الجديد (اللي الرحالة بتوعنا اكتشفوه قبلهم بس الفرق اننا ما احتليناش امريكا هم احتلوها) تسوى كام دي؟ لما عشرة مليون بنغالي يموتوا من الجوع عشان انجلترا عايزة ترفع سعر الاغذية، لما عشرة مليون هندي يموتوا وهم بيجمعوا القطن من الجوع والعطش والمرض، تسوى كام دي؟ ده غير استغلال زيتنا ودهبنا وزراعتنا وثرواتنا

فلوسي دي وللا مش فلوسي؟ ناسي دول وللا مش ناسي؟

حقها وللا مش حقهاااااا؟

لما لحد دلوقت، لحد اللحظة دي، بادفع ضرايب فحت ومش باخد بيها اي خدمات لان ضرايبي بتروح فوايد ديون لبنك الاحتياطي الفيدرالي في مقابل انهم يقعدوا حسني مبارك واتحرم من حقي في اني انتخب اللي انا عايزاه، وفوق ده كله، الدين اللي هو اخده واللي انا بادفع ضرايبي فوايده لا اكلت منه ولا شربت عليه مية

سرقة دي وللا مش سرقة؟

يسرقوني وكمان انا المدينة بالفضل ليهم؟ وواحد ذليل مريض زي ده يبعت يقول الكلام الفارغ ده؟ انا اللي غاظني انه صعب عليا

صعب عليا انه يبقى ده تقييمه لذاته ولنفسه، ليه؟ ليه يا جاهل؟ انت كويس، انت قدمت كتير للانسانية وما اخدتش اي حاجة في المقابل غير الاستغلال والقمع والوحشية

خلي عندك كرااااااااااااااااااااااااااااااااااااااااااااااااااااااااااااااامة

انت تستاهل يبقى عندك كرامة