أجهزة الأمن ترتب لحملة اعتقالات موسعة في صفوف التيار الإسلامي بالتزامن مع زيارة اوباما لمصر

الخبر من موقع بر مصر

طبعا انا مش متأكدة من صحة الكلام ده

1- لأن المصدر الأمني مش مذكور اسمه

2- لأن الخبر ما شفتوش غير على الموقع ده

3- لاني كنت قريت انه ح يعمل الخطبة في جامعة القاهرة ما اعرفش بقى غير رأيه وللا ايه؟

ومع ذلك الخبر ده ينفع يبقى صح

1- لأنهم يعملوها

2- لأنهم ما يعملوش غيرها

3- لأنهم اكيد يعملوها

4- لأنهم قطعا ح يعملوها

5- والله يعملوها

واهو فيه فرشة لحملة على الاخوان دلوقت حاليا مع انهم ما عملوش حاجة حاليا دلوقت، فانا دلوقت حاليا مش شايفة اي سبب حاليا دلوقت يخليهم يعملوا الحملة الفظيعة دي على الاخوان الا ان حلو الملامح ابو الرمش سارح ح يطلع علينا بطلعته البهية الشهر الجاي

اسم الله على مقامه من ساعة ما عتبها وهو جايب الخير في رجليه

(الدنيا يعني)

وكنا ناقصينه ييجي عندنا يتحفنا بنحسه عشان اصلنا بنرفل في السعادة فقال يفوقنا لبعدين نفتكر اننا في الجنة وللا حاجة وننسى اخرتنا

كفاااااية

ما تبسطهاش اكتر من كده