حقائق في الشان السوداني

تحديث:

دينا صاحبة التعليق سابت لي تعليق دلوقت بتقول لي انها سودانية

انا والله ما اعرف دي مين، ولا اعرف هي سودانية، وللا هي ناشطة، وللا هي بس واحدة بتستعمل مخها اللي ربنا مديهولها ومش راكناه على جنب، بس انا دخلت لي واحدة اسمها دينا عندها معلومات كويسة عن الشأن السوداني، ولانها عايشة في الولايات المتحدة الامريكية فهي الظاهر ما عندهاش كي بورد عربي وسابت لي تعليق طويل ومهم وانا شفت اني لازم اترجمهولكوا، ح تلاقوا كلام بالاحمر دي تعليقاتي لاني ما قدرتش امسك نفسي:

اولا للاسف فعلا مافيش امكانية للحصول على ادلة مادية للي بيحصل في السودان لان زي ما قلتي كل التقارير جاية من مؤسسات ووكالات معينة لها اغراض في السودان وكلهم مش موضوعيين ولا محايدين. لو اتفرجتي على اليوتيوب مش ح تقدري تحددي بالظبط المادة دي اتصورت فين. على سبيل المثال لما تشوفي الفيديو وتلاقي فيه قوات الجنجويد اللي مفروض انها عربية عمرك ما تقدري تعرفي هم ايه بالظبط لان كل الناس شايفين ان السودانيين شبه بعض لكن بقى السودانيين هم اللي يقدروا يميزوا واي حد منهم يقدر يقول لك ان القوات اللي بيتقال عليها جنجويد في الافلام دي فيهم ملامح كتير من القبائل الافريقية اللي في دارفور وغرب السودان. يعني اي حد يقدر يلبس بشكل معين ويقول انا من الجنجويد واللي مش سوداني عمره ما يقدر يعرف الفرق او حتى يشك فيما اذا كان الادعاء ده صحيح وللا لا.

حاجة كمان، كل الفيديوهات اللي مفروض انها بتبين المشاكل في دارفور، مافيش اي صور لجثث الناس اللي اتقتلت، كلها صور لاكواخ مهدودة، مخيمات لاجئين مافيش غير عضام موتى (وبالمناسبة الجثة بتاخد وقت قد ايه عشان تتحول لعظام، لو فاهمة قصدي؟) وبعض شهادات لناس بتقول انها اغتصبت وبيحكوا عن مدابح إلخ. يعني فعليا مافيش صور اتاخدت حية للمدابح زي اللي حصل في غزة.

ممكن تسمعي عن هجوم المتمردين في دارفور على مخيم او جماعة من الناس او منظمات في المنطقة لكن عمرك ما بتشوفي الصور دي فيديوهات، يا ترى ليه؟
ثانيا، مين اللي بيعد الضحايا؟ هل اساسا فيه احصاء رسمي لتعداد السكان في المنطقة دي (صحيح تلتميت الف في دارفور ازاي؟ هي دارفور كلها كام؟ السودان على بعضها فيها كام تلتميت الف؟/انا) هل الناس اللي بتعد دي حاطة في حسبانها ان الحدود بين السودان وتشاد مفتوحة تماما وان الناس بتدخل وتطلع بحرية؟

في سنة 2003 لما ظهرت مشكلة دارفور على الساحة بالرغم من انها كانت موجودة قبل كده بكتير بسبب تقلص الموارد زي ما قلت قبل كده (هي كانت قالت قبل كده ان تغير المناخ تسبب في تقلص الموارد وجفاف المياه مما ادى الى نشوب حرب اهلية) ابتدت النيويورك تايمز تدي تقارير كتير عن ارقام متضاربة للضحايا، وهي النيويورك تايمز اصلا اللي ابتدت كل حملة "انقذوا دارفور" (انا متهيالي كنت قلت لكوا ان النيويورك تايمز ولاد ستين تيت وكدابين ونصابين والفوا على لساني كلام ما قلتوش، تخيلوا لما يألفوا على لسان واحدة فسلة زيي كلام مالوش اصل امال في قضية زي دي ح يعملوا ايه؟ وعلى فكرة بعت لهم وما ردوش عليا) بالرغم من ان امريكا كانت عاملة حصار على السودان من قبل كده، يعني انا مش عارفة ازاي اي مؤسسة امريكية يبقى عندهم فرصة يعرفوا الارقام دي بشكل مؤكد؟ في الاول كان في حدود متين تلتميت الف وبعدين وصلت لمليون وبعدين رجعت تاني لتلتميت الف.... اصلا مين اللي بيحصي الاعداد دي؟ ولمدة خمس سنين الرقم فضل من متين لتلتميت الف؟ ده معناه ايه؟

انا عايشة في امريكا وحاولت اني اتطوع للعمل مع السودانيين اللاجئين اللي من الجنوب ومن دارفور في منظمة اسمها كير. واكتر حاجة غريبة سمعتها من المنظمة ان كان فيه حالات مزيفة كتير...بمعنى ان كان فيه ناس كتير ادعت انها من دارفور ولما حققوا في الموضوع لقوهم لا من دارفور ولا من السودان اساسا.

هل ده يعني ان الحكومة بريئة تماما من ارتكاب جرائم في دارفور؟ بالطبع لا، لان لما المتمردين ابتدوا الحرب الحكومة حاولت تسيطر عليهم فكان فيه قبائل كتير ادتهم حماية فالحكومة سلحت قبائل تانية عشان تحارب المتمردين...بس ايه اللي حصل؟ القبائل المدعومة من الحكومة قامت بتصفية حساباتها القديمة مع القبائل التانية بسبب نزاعات سابقة على الموارد. (هي بتقول: آمل ان يكون الكلام ده مفهوم – ايوة يا دينا مفهوم جدا، ما يتفهمش غيره على فكرة)

مشكلة دارفور ابتدت من زماااااااااااان قبل 2003 بكتير، بس بعد 2003 بقت فجأة مشكلة "ابادة عرقية" غير قابلة للاثبات فحولوها لجرائم حرب. تسحر المنطقة تسبب في نشوب حرب ما بين الفلاحين والقبائل وبعضهم لان كل واحد فيهم عايز يسيطر على الموارد. هل دارفور منطقة مهملة؟ ايوة، بس الحقيقة السودان كله مهمل. ما كانش فيه تنمية لمدة عشرين سنة فاتت في السودان بسبب الفساد الحكومي وحرب الجنوب. ومع ذلك، الحقيقة لازم تتقال، الحكومة دي فيها اكبر عدد من ابناء غرب السودان، يعني فعليا غرب السودان كان بالفعل ممثل في الحكومة دي (ايه القرف ده؟ غرب ايه اللي ممثل؟ ما كلهم سودانيين، ايه الخيبة اللي هم فيها دي؟ يعني الاسكندراني يسأل هو ممثل في الحكومة وللا لا؟ طب احنا اهو، مافيش تمثيل غير للمنوفية، عملنا حاجة؟) وصدقي او لا تصدقي بعض قادة التمرد زي خليل ابراهيم كانوا بيشتغلوا مع نفس الحكومة دي اللي هم بيحاربوها. حاجة تانية ماحدش واخد باله منها وهي دور محتمل للترابي في الحركة دي. (ده يبقى اخص عليه وعلى وشه بجد، يودي بلده في داهية؟) كل المصايب حصلت في دارفور على طول بعد ما الترابي اتشال وهو له صلات وثيقة بكتير من قادة التمرد زي خليل. يعني هل فيه احتمال انه هو اللي يكون ورا الحرب دي؟

مافيش حد بيتعلم من تجربة جنوب السودان، التدخل الاجنبي في الجنوب كان واضح جدا، يعني كتير من متمردي الجنوب كانوا متدربين على ايد الموساد ووكالات استخبارات اجنبية تانية. معلومات مضللة كتير كانت بتبث في وسائل الاعلام وماحدش كان بيحاول يدور على الحقيقة ... كان فيه تقارير من كير ومن الامم المتحدة بتؤكد ان معظم اللي بيموتوا في الجنوب مش بيموتوا بسبب الحرب مع الشمال ولكن بسبب الحرب ما بين الجنوب وبعضه، بس طبعا التقارير دي ما كانتش بيتعمل لها دعاية لان كان من الضروري خلق حالة عزلة حوالين الحكومة السودانية (اهو ده كلام انا اول مرة اعرفه...اخص اخص فعلا، واخص علينا كمان، عشان مصر كانت بتدعم جارنج هو احنا قابين في كل مصيبة كده؟) وممكن الواحد يحصل على دعم اكبر واحسن لما يقول ان المسلمين العرب الوحشين بتوع الشمال بيقتلوا المسيحيين الغلابة بتوع الجنوب، ومع ذلك، مش كل الشماليين مسلمين ولا عرب، واغلبية سكان الجنوب مش مسيحيين، الحقيقة نسبة المسلمين والمسيحيين في الجنوب تقريبا متساوية، واغلبية سكان الجنوب بيدينوا بالديانات القديمة (اول مرة الاقي حاجة عارفاها في كل اللي هي كاتباه، كنا بناخدها في الجغرافيا) ونفس الحكاية بتحصل دلوقت في دارفور، عشان يبقى فيه ضغط كافي على الحكومة السودانية يبقى من الافضل انه يتقال ان القبائل العربية الوحشة بتمارس ابادة عرقية للقبائل الافريقية، مع ان القبائل هناك مختلطة وفيه اسباب كتير تانية للنزاع غير الاسباب العرقية.

اسفة على التعليق الطويل، بس انا زهقت من الاكاذيب وانصاف الحقائق اللي بيتم الترويج ليها في الشأن السوداني، البشير مسئول، بس مش هو المسئول الوحيد عن اللي بيحصل، والكلام الحقيقي اللي مفروض يتقال مش بيتقال عشان هم مش عايزينه يتقال.

----------

خلص تعليق دينا، اول مرة في حياتي من ساعة ما اتخلقت افهم ايه حكاية دارفور دي، كل الناس عمالة تقول دارفور دارفور، آخد واحد ثقة كده على جنب واقول له: استر عليا يا عم الكوتكوت، السيدة في ضهرك لتقول لي ايه اللي بيحصل في دارفور، يا اما يبقى شجاع ويقول لي الحقيقة مش عارف، يا اما يقول لي: نتكلم بالليل نتكلم بالليل

والناس بس عمالة تهلل وتقول البشير سفاح البشير سفاح، ابص على وشه، يا اخواتي ده شكل سفاح؟ شكله يعني شبه اللي عندنا واللي قبلها واللي قبل اللي قبلها، مش صدام يعني، يعني انا فاكرة صدام الجثث كانت بتنط من عينيه، انما ده عادي يعني، زي اللي عندنا كده

يا ناس، يا عالم اتقوا ربنا، حد فيكوا يرضى كده على بلده؟

يعني انت ترضى ايام حرب الصعيد ما بين الحكومة والجماعات...فاكرينها؟ فاكرينها؟ ايام ما كان الشعب كله متواطئ على تعذيب الناس وقتلهم في الشوارع وحبسهم بالشبهة من غير تحقيق وتقول يا ناس ما ينفعش يتعذبوا يقولوا لك: لا يتعذبوا دول ارهابيين، كلللللللللللل الناس حتى سواقين التاكسي والبياعين، فاكرين؟ فاكرين؟ ماهو اللي ربنا بيعمله فينا ده مش من شوية، انا فاكرة اياميها لما اتقبض عليا وانا في الجامعة الناس بتوع الجماعات كانت بتدعي علينا في وشنا وتقول اخرجنا من هذه القرية الظالم اهلها

طيب حد فيكوا كان يرضى وقتها ان محكمة دولية تدخل وتحاصر مصر وتطلب رئيسها توطئة لانها تنشر فيها قوات متعررة الجنسيات وتعمل فيها اللي اتعمل في افغانستان؟ يا عالم يا مؤمنة، ده الراجل قال حسني مبارك ليه قافل المعبر على الفلسطينيين ما تروحوا تفتحوه فضحتوه وخليتوا اللي ما يشتري يتفرج عليه وقلتوا بيحرض على انقلاب في بلدنا وادعي على ابني واكره اللي يقول امين

مين يرضى على بلده حاجة زي دي؟

طب بقى قفل المعبر في اثناء حرب غزة كان مخالف للقوانين الدولية، ويقدر الفلسطينيين يرفعوا علينا قضية في المحكمة الدولية، ترضوها على بلدكوا بالرغم من الكسفة والمعرة اللي احنا فيها؟

نتقي ربنا عشان يسترها معانا احنا ربنا ح يسخطنا اكتر من كده يعمل فينا ايه؟ ده احنا بقينا عبرة خلقه، واي ضرر ح يحصل للسودان مافيهاش هزار دي، بق المية مش ح نلاقيه، حرااااااااااااااااام، كل الحكاية ان الراجل ضعيف وخايب وما عرفش يسيطر على المتمردين وجه يكحلها عماها والتانيين ماحدش بيسال وصلهم السلاح ازاي، ده مش سلاح خايب زي اللي في الصعيد عندنا، ده سلاح حرب بجد

يا سلام؟ يا سلام؟ طب يعني هي الخيابة دي غريبة علينا مثلا؟ يعني تفتكروا لو عوكل مكانه كان عمل ايه غير كده؟ لا، بس عوكل ناصح، عامل لنا جيش امن مركزي، ومافيش ناموسة تقدر تدخل، بس يعني هو الخايب مالوش نصيب في الزمن ده؟

هي المشكلة في البشير ولا غيره؟ وللا المشكلة في انه مش ح يسلم نفسه، وبصراحة اي ناس عندهم كرامة لو هو بيقطعهم واتعمل فيه كده مش ح يرضوا يسلموه، وحطوا نفسكوا مكانهم، ولما مش ح يسلم نفسه، كما ذكرت في السابق، المجتمع الدولي ح يصعب عليه الفن، ح يضرب الدنيا صرمة وفجأتن نلاقي السودان محتلة

(ماهو ده بالظبط اللي حصل في افغانستان، قالوا لهم سلمونا بن لادن، قالوا لهم طيب ادونا دليل على انه هو اللي عمل حداشر سبتمبر اصله بيقول ان مش هو اللي......بمممممممممم وعينهم ما شافت الا النور)

بس الا السودان بقى، لو حصل ده في السودان احنا كده ضعنا الى الابد

يعني حوشوا من دلوقت بقى لا مؤاخذة بول الابل وبولكوا انتوا كمان عشان ده ح يبقى ثروة قومية بعد كده

الا السودان بقى............ مع كامل احترامي لكل الاخوة العرب في العراق وفلسطين ولبنان وندالتنا معاهم اللي ح تخليهم يقولوا: يا سلام؟ واحنا اللي تف علينا الكلب؟ معلش، بس ان جالك الطوفان حط ابنك تحت رجليك الا السودان الا السودان الا السودان الا السوداااااااااااااان

ومصر الرياض وسودانها/ عيون الرياض وخلجانها/ وما هو ماء ولكنه/ وريد الحياة وشريانها/ تتمم مصر ينابيعه/ كما تمم العين انسانها

يا عوكل، ما تتكلم انت مش ليك دلال عليهم؟