النكتة دييييي قديمة

اتصل بيا ساندمانكي من قطر، هو ايام غزة اتصل بيا عشان يطمن اني لسة عايشة ويغيظني شوية كالعادة، بس المرة دي اتصل بيا وهو مصدوم، وساندمانكي مش من عادته انه يتصدم لانه مؤمن بالنظريات الفلسفية اللي بتقول ان الانسان اصله واطي والمفروض انه مش بيتصدم، وانا بدوري مصدومة انه مصدوم، ليه؟ لان هلبت ساندمانكي مصدوم ان عمرو خالد اخد تسعة مليون دولار معونة امريكية! حد يشيلني من هنا

مبدئيا ساندمانكي في قطر مش عشان يشحت ويتسول، عشان يشتغل ويكدح ويكوم نفسه، وح يجيله او جاله اكتئاب من القعدة هناك، ييجي واحد يقول لي ازاي ساندمانكي صاحبك بينما انتوا الاتنين لا ممكن ابدا تتفقوا في تنتوفة رأي قد كده، اقول له عشان اختلاف الدماغ ده يرجع الى اختلاف التربية واختلاف التعليم واختلاف القرايات، لكن مافيش اختلاف على الاخلاق، يعني مثلا ساندمانكي مش نصاب، مش شحات، مش بيلعب على الحبال، مش مدعي بطولات، مش كداب (وزي ما انتوا عارفين يا اصدقائي الصغار ان اللي بيكدب بيروح النار) ثم ان اراءه دي طالعة من دماغه، ماحدش بيدوس على بطنه يقوم مصقف وعلى حسب القبضية جاية منين النهاردة، له اراء تنقط وتشل ومش باقرا معظمها عشان ما اتخانقش معاه، خصوصا في فترة ضرب غزة اللي كوابيسها لسة بتهاجمني لدرجة اني من كام يوم حلمت بتسيبي ليفني وانا باقول لها:

It is not hamas, it is you who has to know that enough is enough

شفتوا الثقافة؟ كوابيس بالعنجليزي

بس انا عارفة ان دي دماغه، مش شاحتها من الجيران عشان اكلوه فتة بالهبر، وعمره ما عاش في دور المضحي المتفاني ولما حب يكسب فلوس راح زي اي انسان محترم شاف له شغلانة واتغرب عشان ياكل عيش من عرق جبينه

المهم ما علينا

ايه الجديد بقى في ان عمرو خالد بياخد معونة من امريكا؟ عشان ايه ساندمانكي يتصدم يعني؟ مش فاهمة، امال احنا عمالين نهاتي في ايه من الصبح وسيب عليا عياله يسبوا لي الدين ويشتموني بالاب والام والدين والميتين بمنتهى التقوى والورع؟

ماهو قبل كده راح الدنمارك ايام ما كل الناس كانت مقاطعاها وقال على موقعه انا رايح عشان اخد تموين لمشروع صناع الحياة

وواحدة صاحبتي صاحبة جمعية قالت لي ان بتوع صناع الحياة طلبوا منها الانضمام لمشروع ممول من المعونة الامريكية لتنمية العشوائيات، ثم ان ساندمانكي بيقول لي ان المؤتمر الاخراني اللي حدف عليهم عاصفة الصحراء دي في قطر كله كان ميغة وكله رايح يعبي عبي شيل شيل

ايه بقى؟ فين وجه الصدمة؟ على فكرة صدمة ساندمانكي يؤرخ لها، يعني نبتدي نقول: خمس سنين ما قبل صدمة ساندمانكي السنة الثالثة ما بعد صدمة ساندمانكي

طيب بقى قبل ما هاموش عمرو خالد يعف عليا ويدخل يسب لي الدين بكل التقوى والورع كما هو المعتاد احب اقول لكوا

اولا: الفلوس دي حرام، دي فلوس تعاملاتها كلها بالربا، ومصدرها الاساسي شركات صناعة السلاح، وشركات صناعة السلاح، هي اللي عملت قنبلة الدايم اللي عمالة تقطع في لحم الغزاوية لحد دلوقت حيث انها لما بتصيب مش بتسكت، بتفضل تسرح في الدم وتقطع الشرايين، هم بقى دولم الناس اللي بيغطوا فلوس المعونة الامريكية والمؤسسات الخيرية الامريكية اللي بتصرف على الداخل والخارج الامريكي

نفسي الاقي بقى الحلقة بتاعة عمرو خالد اللي كان بيقول فيها: لما تشرب ازازة بيبسي يبقى كأنك بتشرب دم طفل فلسطيني

اه، ماهو كان عامل حملة مقاطعة زمان وانا قصير كنت باحلم ابقى طويل

ثانيا: الفلوس دي سرقة، ناس بتشتغل في اليوم تمن ساعات ومش لاقية تأمين صحي وحضرتك بتقلبهم في الفلوس وتضربها في جيبك، ومش عشان هم امريكان يحل لك انك تاكل شقاهم

ثالثا: مافيش بني ادم محترم يبقى شحات، بجد والله العظيم، ده حتى الشحاتة بتيجي يوم القيامة نقطة سودا في جبين الشحات

يعني كل اللي بيمد ايده في المعونة ده ح ييجي على وشه بلاعة سودا قد كده يوم القيامة

رابعا: "انا عايز اعمل نهضة لبلدنا"، اه، ونهضة ايه دي اللي بتتعمل بالتسول؟ فيه حد بيشحت وينهض؟ ده الافرو امريكان في امريكا ذات نفسيتها طالبوا بان الدولة تقطع الاعانات اللي بتصرفها لفقراء السود في امريكا لانها بتعوقهم وبتخليهم يخلفوا كتير لان كل عيل بياخدوا عليه فلوس وبتخليهم ما يشتغلوش وما يتعلموش

خامسا: ما الدولة بتاخد معونة من امريكا، ما عملتش نهضة ليه؟ عشان بتسرقها؟ طيب ما اسرائيل بتاخد اكبر معونة في العالم من امريكا، ما شفناش على وشها نهضة ولا نيلة، وبعدين الدولة بتاخد بصفتها دولة، شحاتة بقى متسولة، اهي بتاخد بصفتها دولة، لكن المؤسسات الاهلية والافراد والدعاة والصحفيين والمدونين وحنفي ابو دقة وغير ابو دقة بياخدوا معونة بصفتهم ايه؟ ولاد مين في مصر يعني عشان ياكلوا معونة؟

سادسا: مين في الدنيا اللي ح يديلك فلوس ويسيبك تعمل اللي انت عايزه غير المواطن المصري اللي بيدي الحكومة ضرايب ويسيبها تعمل اللي هي عايزاه؟ مين غيرنا بيعمل كده؟ الامريكان دول تجار، من اول حرب الاستقلال وهم تجار، والحرب دي لا كانت عشان كرامة ولا استقلال دي كانت عشان البسبس لا مؤاخذة، يعني لا ممكن ابدا يصرفوا ملين من غير ما يحطوه على وشها تنور على كتفها تنور على كل حتة تنور

يعني مثلا لو دخل لعمرو خالد واحد على الموقع واستشاره في انه مثلي على سبيل المثال والحصر، وقال له انه مش قادر يقاوم ميوله المثلية وانه بيصلي ويصوم وبيحب ابن الجيران، هلبت ح يقدر عمرو خالد يقول ايه عن المثلية الجنسية على موقع ممون من المعونة الامريكية؟ طبعا المثلية الجنسية عليها خلاف داخل امريكا لكن مش خارجها، يعني السياسة الخارجية الامريكية في عز عز فترة بوش كانت بتهاجم ايران لانها ضد المثليين لان دعم المثليين خارجيا دي سياسة مالهاش دعوة بقى برايهم الحقيقي في المثلية

هلبت عمرو خالد ح يقدر يقول ايه عن اسرائيل؟ هل ح يقدر يعمل حملات المليون دعاء بتاعته لنصرة اهلنا في غزة؟ وبالمناسبة هو في الحرب الاخيرة ما عملش حملة المليون دعاء بتاعته اللي متعود يعملها

يا ترى ليه؟

هو عمرو خالد ده ما عندوش حد ينصحه لوجه الله تعالى ويقول له اللي انت بتعمله ده حرام عليك؟ كل اللي حواليه كده بياخدوه على قد عقله؟ مافيش حد يتقي ربنا فيه وينصحه نصيحة تنفعه في اخرته؟ يعني انت بتعمل ايه في الناس؟ تعلمهم الصلاة والحجاب والمعونة الامريكية؟ يعني ده تشريع جديد ده؟ معلش مع احترامي لكلام سيادتكم وليكن ما يكون، الواحد لما يبقى مقطع البطاقة زي سعد الدين براهين كده، اهو الناس ح تقول واحد بيشتغل بالاجرة عند الامريكان وخلاص

لكن واحد عمال يقول للناس قال الله وقال الرسول ويمشيهم وراه والناس بتقتنع بيه فعلا، ويروح ياخد معونة امريكية وهو اصبح، للاسف، مرجعية عند شباب كتير يبقى ده بيخرب اكتر من سعد الدين ابراهيم اللي ما بيخلطش المرمطة عند امريكا بالدين

لكن عمرو خالد بقى تأثيره على العيال اللي ماسحة عقلها وماشية وراه ح يبقى ازاي؟ دول ممكن يتهيالهم ان العمالة عند امريكا والشحاتة منها فرض عين على كل مسلم

وماحدش يقول لي بلاش تخوين احسن ارميه من الشباك، امال يعني امريكا ح تدي فلوس لاي حد في الدنيا ليه؟ في حب الله والوطن؟ لو انت ترضى تدي فلوسك لواحد يشتغل ضد مصلحتك يبقى امريكا تعملها، ومصلحة امريكا اظن واضحة يعني، وللا محتاجة شرح دي كمان