انا مش عايزة غباوة

واحدة طالعة في الجزيرة، من المتظاهرين العرب في احدى الدول الاورومبية بتقول هتلر قال انا تركت عدد قليل من اليهود في العالم ليعلم العالم لماذا كنت ابيدهم

!!!!!!!!!!!!!!

طب وحياة النبي السيدة في ضهر اي حد في الليلة الكحلي دي مش طالبة غباوة خالص يعني، احنا مش ح نقعد نلف وندور في نفس النقطة، وطالعة وتعابة نفسها وسط المظاهرة عشان تقول الكلمتين القطران دول على دماغها

ما هم برضه بيقولوا العرب يستاهلوا الابادة، وما احناش علينا النطلة قوي عشان نبقى عنصريين، ايش حال مضروبين بالجزمة من اللي رايح واللي جاي؟ 

اللي ما بيعرفش يتكلم ما يتكلمش، واليهود دول بني ادمين زي اي بني ادمين، وفيهم كتير قوي مش صهاينة، واللي منهم ضد الصهيونية بيبقى ضدها بقوة اكتر مننا وبيقول كلام مافيش ولا عربي يجرؤ يقوله، ومن مختلف التوجهات شمال ويمين، والمفروض اننا ضد اسرائيل عشان دولة عنصرية وهي الدولة الوحيدة في العالم اللي عملت من الدين عرقية وجنسية، نقوم نعمل زيهم؟

طب ماهو التأكيد على ان اليهود كتلة واحدة كلهم زي بعض (سواء كويسين وللا وحشين) ما اللي اتنين بيخدموا الصهيونية وبيصبوا في مصلحتها، ويبقى اليهودية فعلا بقى عرقية وجنسية مش بس دين، مدام كلهم حاجة واحدة، ويبقى لهم حق يبقى لهم دولة خاصة

اذا كانوا كويسين يبقى هم بقى فوق البشر ولهم دولة لوحدهم

واذا كانوا وحشين يبقى اعزلوهم بقى في دولة لوحدهم عشان يكفوا اذاهم عن الناس

ايه التخرييييييييييف ده؟

اليهودية زي الاسلام والمسيحية والبوذية واي ديانة تانية، اتباعها (خصوصا اللي مولودين على الديانة) كل واحد فيهم له جنسية وعرقية منفصلة عن الدين،

ابوس ايديكوا نركز شوية، الدين دين، والبلد بلد، والعرق عرق ومافيش نقاء عرقي في الدنيا كلها، والقومية قومية، والتوجه السياسي توجه سياسي، كل حاجة من دول لوحدها خاااااااااااااااالص، والبني ادمين بني ادمين، ما بيبقوش وحشين غير لما يحتقروا غيرهم، ولما يحتقروا غيرهم يقوموا يبيدوا غيرهم، وده بيبقى له اسباب في مخ الواحد مش بيرضعها من امه ولا بتبقى موجودة في الجينات

وهتلر ده ابن ستين كلب مخبول وهو اساسا السبب في كل القرف اللي احنا فيه، وهو كمان السبب في ظهور مرض الصهيونية وجنانها ده، ومش ح يكره اليهود ويحبنا احنا مثلا، ده راجل خلل كان بيقعد يسخر علماء المان عشان يثبت ان الجنس الاري اذكى الاجناس والجنس اليهودي غبي ومريض عقليا وخلاهم يعملوا قائمة بحاجة اسمها امراض اليهود، كل ده غير المحرقة، وكانوا بيكتبوا على المحلات: ممنوع دخول الكلاب واليهود، واللي اتعمل فيهم فوق طاقة البشر ولا حتى اتعمل في الافرو امريكان وماحدش يرضى بيه واللي يرضى بيه يبقى يرضى باللي بيتعمل فينا

واللي ضد الصهيونية - سواء بقى غير يهود او يهود وكان لسة في المظاهرات نفسها طالع حاخام بيحرق باسبوره الاسرائيلي - بيحللوا الظاهرة دي بانها عنصرية مضادة ورد فعل مرضي للي عمله هتلر

مافيش حاجة في الدنيا اسمها مجموعة ناس وحشين عشان عرقهم وللا دينهم والا نقبل اللي بيتقال علينا من اننا اصحاب ديانة دموية واننا اغبيا جينيا

هو احنا كمان ح يصيبنا اللي صابهم؟  

ده ايه القرف ده ياربي؟ انا مش قلت ماحدش واكسنا غيرنا؟