يا عيال يا عيال: الواد الاسرائيلي شال كل التعليقات

تحديث:

عملت ريفريش دلوقت والتعليقات ظهرت وكتبت له تعليق، يا اما الصفحة كان فيها حاجة غلط، يا اما هو شالها ورجعها تاني روحوا بقى اتفرجوا على الواد الانتيكة اللي بيقول يا تتحضروا يا تموتوا

شال اوبشن التعليق اساسا من المدونة، هع هع هععععععععععععععععععععععععععع

اصل انتوا مش عارفين، اصله غاب شوية وبعدين اتنين دخلوا، ما اعرفش بقى هو نفسه وللا راح نادا لي صحابه، المهم واحد قال:

العين بالعين، واحنا عايزين سلام، عشان كده لازم نمحي حماس من الوجود:) - شايفين السلام - ، والعدل ان لما يتقتل منا واحد يتقتل قصادهم واحد

واحد تاني راح داخل وقال لي انا ممكن اكتب مجلدات في غبائكم ودمويتكم اللي توارثتوها على مدى التاريخ ودعمها كتابكوا الدموي، وعشان كده مش قادرين تفهموا رقي الحضارة الغربية (انا مش فاهمة بروح امهم منين ولاد عم ومنين غربيين؟ ايه اللخبطة دي؟)

طبعا يعني اي عيل صغير يعرف يرد على الكلام الفارغ ده، كتبت اللي ربنا قدرني عليه وملخصه: كويس قوي العين بالعين دي، انا موافقة، نعد القتلى الفلسطينيين والقتلى الاسرائيليين ونشوف مين الخسران في الصفقة دي ايه رأيك موافق؟

والتاني قلت له، طبعا انا كتابي الدموي الهمجي بيؤمرني اني احترم كل الكتب السماوية، بس فكرني كده انهي كتاب اللي امر اتباعه بانهم يقتلوا اطفال اريحا ونساءها ولما صعب عليهم شوية رضع قام ربنا عاقبهم؟ اصلي بانسى، عموما احنا اغبيا وهمجيين، وانتوا الحقيقة بتضيعوا وقتكوا معانا عشان احنا جينيا زي ما انت بتقول متخلفين، فطبعا مهما يا عيني قتلتوا مننا مافيش فينا فايدة، ايه رأيكوا تروحوا مكان تاني وتحلوا عن سمانا

قام رد عليا وقال لي: لا طبعا، مش ممكن اسيبكوا همجيين، لازم تبقوا متحضرين والا ح تضرونا بمجرد وجودكوا، لان ده زي واحد قاعد في نفس الاودة مع مريض مرض معدي، ولو مش عايزين تتعالجوا يبقى تموتوا

هههههههههههههههه

اه والله العظيم

انا بقى شفت التعليق ده ما قدرتش امسك نفسي، وقلت له

you made my day

انا ح اخد التعليق بتاعك ده واوزعه على الحبايب والاصحاب عشان نضحك، والله ما ح اسيب مخلوق من غير ما افضحك على الكلمتين بتوع يا تبقى متحضر بمفهومي انا عن التحضر يا اقتلك

قوووووووووووووم جيت اعمل ريفريش لقيت الواد شال اوبشن التعليقات خالص، وشال التعليقات كلها

هيهيهيهيييييييييييي

بصوا، انا ما اعرفش هي الحكاية دي مفيدة وللا لا؟ بس الحقيقة هي مسلية قويييييييييييييييييييييييييييي، انا الاول كنت واخدة الموضوع على صدري وقعدت استلهم من فيلم

The great debaters

بتاع دينزيل واشنطن، بس بصراحة الحكاية طلعت كوميدي

انا فكرت ادخل على الميل بتاعه وابعت له اقول له: عملت عيشة؟

بس خفت يعمل لي تريسنج ويهيك بقى الكمبيوتر

بس خسارة التعليقات، ده انا قدحت فيها زنات صدقي،
اه
هو لما تدخلوا ح تلاقوا التعليقات على جنب، بس في البوست نفسه مش شغالة