وطلع الشعب الامريكي كمان عميلة لايران وحزب الله

جالي التعليق ده، وطبعا مدام الامريكان بيقولوا

shame shame Mubarak

يبقى اكيد معاهم حق، هم بس العرب اللي بيكرهوا مصر، وبيتآمروا على مصر، وبيغيروا من مصر، وهو السيد حسن اللي نسي نفسه، وبيدينا اوامر، وهو فاكر نفسه ايه، لكن لما روبرت فيسك يقول على دولة مصر متعفنة واضعف وافسد من انها تتحرك ولما يمسح بكرامة مبارك ومش بس مبارك

ده انا تعمدت انشر مقال روبرت فيسك عشان اشوف رد فعل الناس اللي غيرانة على مصر وسمعة مصر وزعلانة من العرب الاوغاد اللي بيتآمروا على شتيمة مصر على كلام روبرت فيسك اللي بقى مش بيشتم النظام المصري زي ما العرب بيشتموه، ده شتم الشعب المصري وقال عليه مزيف ومنافق ومتدين تدين شكلي والفساد متغلغل فيه وحتى مافيهوش قوة تستجيب لدعوى حسن نصر الله

طبعا على قلبنا بلسم الكلمتين دول، مش جايين من خواجة؟

بصوا خطيبي بيقول ايه؟

اه ما انا من ساعة ما شفته ربع ساعة في لبنان وانا قررت انه خطيبي خلاص، مش ح يعرف يفلت مني

وطبعا الكلمتين دول وحشين من سمير القنطار، ربنا ينفخ في صورة ناعوم تشومسكي عشان يقول اكتر منهم زي ما فيسك قال علينا اوسخ كلام كده، وبرضه كلام تشومسكي ح يبقى عثل عثل عثل، عشان هم دول الشيخ البعيد بجد، وهم اللي سرهم باتع

طب بقى ياريت الاخوة العرب والسيد حسن لما يبقوا يجيبوا نمرة روبرت فيسك، او الميل بتاعه، او حتى يضيفوه على الفيس بوك

ولما يحبوا يخاطبوا شعب مصر يبقوا يتصلوا بالامريكان

احنا ناس عندنا كرامة

ما نتهزأش غير من الخواجات بس