انا كنت فاكرة نفسي اعبط واحدة في الدنيا، بس دايما ربنا يوري الواحد ان القوي فيه الاقوى منه، قال ومصطفى داخل يقول لي دلوقت لما فاق: ايه ده؟ انا مش فاهم حاجة!
ها؟
قلنا كده وللا ما قلناش؟ قلنا الادارة الجديدة ح تطلع ميتين ابونا وللا ما قلناش؟
قلنا الادارة الامريكية باختلافاتها كلها مش ح تسمح لمعارضة حرة تتواجد في مصر من غير ما تحط ايدها عليها وتبلعها في كرشها وعشان كده بيدوا تمويل لاي كلب ماشي في الشارع وهم مش مستخسرين وللا ما قلناش؟
قلنا مش ح يسمحوا لحاجة تتكون من غير ما يعرفوا ابعادها وراسها ورجليها وللا ما قلناش؟
قلنا اللي بيسمح لنفسه انه يتبلع يبقى ايه؟ يبقى ايه؟
قلنا وللا ما قلناش
لالالالالالالالالالالالالالا مافيش داعي لنظرية المؤامرة
ح يموتونا يا كلاوي
ما تبقاش شكاك قوي كده
:D:D:D:D
ReplyDeleteيا ست الناس
الحركه رفضت .. وإسراء ونصار راحوا باعتبارهم من قيادات الإضراب مش الحركه
وده ماله ومال الإداره الجديده .. مع ان ده مش موضوعنا
دلوقتي اللي طالب أفهمه (بدل التسييح ده) هل الدعم اللي بتقدمه الخارجيه الأمريكيه هو بس الدعم المعنوي للحركات دي زي تنظيم المؤتمر ده .. ولا هي بتدعمها مادياً؟؟ أو ممكن تدعمها مادياً؟؟!!
وبعدين الاستفاده واضحه بصرف النظر عن السيطره عليهم لأنها مش منطقيه .. وجود قوى ضغط داخلي قويه على الإداره المصريه يضع الإداره المصريه بصوره أكبر تحت ضغط أمريكي ويجعلها مضطره بصوره أكبر لتنفيذ كل ما تأمر به أمريكا
مش لازم يكونوا باسطين سيطرتهم على الحركات دي ولا حاجه
بصرف النظر عن رفض الحركة او قبولها
ReplyDeleteوبصرف النظر عن الصفة اللي راحت بيها اسراء ونصار
هم ليه مهتمين بحركة ستة ابريل؟
انتوا مش قلتوا لي: يعني هي امريكا بجلالة قدرها ح تهتم بشوية عيال؟
اهي مهتمة بشوية عيال
اما ايه علاقة الادارة الجديدة، فالادارة القديمة فاضل لها شهر وتودع وما تقدرش تورط الادارة الجديدة في التزامات من غير تنسيق هي الحكاية مش سبهللة
ده سيستم
ماهو انا باكره السيستم عشان كده
اه نسيت
ReplyDeleteيا كلاوي
بالله عليكي يا أبله متحشريش كل حاجه في بعض
ReplyDeleteاهتمامهم منطقي وواضح ومبرر .. وبعدين دي حركة معارضه مش شوية عيال .. وحركة المعارضه رفضت المشاركه بصفتها .. وناس قبلوا الذهاب بصفتهم الشخصيه وده معنديش اعتراض عليه
أنا كنت بسأل على جملة على لسان الخارجية الأمريكية انها بتدعم الحركه .. واتسرعت ومقريتش الأخبار المتعلقه .. ولما قريتها فهمت ان ده الدعم
ومش معقول كل الحركات دي حول العالم أيتام الديموقراطيه الأمريكيه بس ما علينا .. ده مش موضوعنا .. وخليه مقفول أحسن
الإداره الجديده حضرتك .. والإداره القديمه أكيد مش هيبقى الفرق بينهم في تفاصيل اهتمامات زي دي .. يعني دي السياسه الأمريكيه .. وبرضه مفيش مشكله فكري فيها زي ما تحبي
وبخصوص كلاوي .. أنا كلاوي يا ستي عندك مانع؟؟ بس على العموم فقد باء بها أحدهما .. وفي نفس البوست مش عارف مين كاتب انه كان فاكر نفسه أ*** حد في الدنيا
على العموم يسعدني اني رجعتلك ثقتك بنفسك
:D:D:D
أحب بس أؤكد على إجابة السؤال .. هم ليه مهتمين بحركة 6 أبريل والإخوان وكفايه و9 مارس والوفد والتجمع والغد
ReplyDeleteلأنهم أحزاب وحركات معارضه موجوده في منطقه ليهم فيها مصلحه وبيمثلوا وسيلة ضغط على الإداره المصريه وقت اللزوم لضمان الولاء .. لازم يبقى ليهم وسيلة اتصال بكل دول .. واللي أعرفهم رافضين وسيلة الاتصال بالإدارة الأمريكية (على فكره أنا مش شايف (الاتصال في حد ذاته عيبه ولا سبه، الخيانه والوطنيه بتكون في فحوى وطبيعة الاتصال مش في الاتصال نفسه .. وده مش موضوعنا) .. اللي أعرفهم رافضين الاتصال ده الإخوان .. مش عارف حركة 6 ابريل رافضاه ولا لا .. لأنهم مقالوش انهم على غير اتصال بالحكومه الأمريكيه
قصيده جميله للشاعر احمد مطر:
ReplyDeleteمِن أوباما..
لِجَميعِ الأعرابِ شُعوباً أو حُكّاما:
قَرْعُ طَناجِرِكُمْ في بابي
أرهَقَني وَأطارَ صَوابي..
(افعَل هذا يا أوباما..
اترُك هذا يا أوباما
أمطِرْنا بَرْداً وسَلاما
يا أوباما.
وَفِّرْ للِعُريانِ حِزاما!
يا أوباما.
خَصِّصْ للِطّاسَةِ حَمّاما!
يا أوباما.
فَصِّلْ للِنَملَةِ بيجاما !
يا أوباما..)
قَرقَعَة تَعلِكُ أحلاماً
وَتَقيء صَداها أوهَامَا
وَسُعارُ الضَّجّةِ مِن حَوْلي
لا يَخبو حتّى يتنامى.
وَأنا رَجْلُ عِندي شُغْلٌ
أكثَرُ مِن وَقتِ بَطالَتكُمْ
أطوَلُ مِن حُكْمِ جَلالَتِكُمْ
فَدَعوني أُنذركُمْ بَدءاً
كَي أحظى بالعُذْر ختاما:
لَستُ بِخادمِ مَن خَلَّفَكُمْ
لأُسِاطَ قُعوداً وَقياما.
لَستُ أخاكُمْ حَتّى أُهْجى
إن أنَا لَمْ أصِلِ الأرحاما.
لَستُ أباكُمْ حَتّى أُرجى
لأكِونَ عَلَيْكُمْ قَوّاما.
وَعُروبَتُكُمْ لَمْ تَختَرْني
وَأنا ما اختَرتُ الإسلاما!
فَدَعوا غَيري يَتَبَنّاكُمْ
أو ظَلُّوا أبَداً أيتاما!
أنَا أُمثولَةُ شَعْبٍ يأبى
أن يَحكُمَهُ أحَدّ غَصبْا..
و نِظامٍ يَحتَرِمُ الشَّعبا.
وَأنا لَهُما لا غَيرِهِما
سأُقَطِّرُ قَلبي أنغاما
حَتّى لَو نَزَلَتْ أنغامي
فَوقَ مَسامِعِكُمْ.. ألغاما!
فامتَثِلوا.. نُظُماً وَشُعوباً
وَاتَّخِذوا مَثَلي إلهاما.
أمّا إن شِئتُمْ أن تَبقوا
في هذي الدُّنيا أنعاما
تَتَسوَّلُ أمْنَاً وَطَعاما
فَأُصارِحُكُمْ.. أنّي رَجُلُ
في كُلِّ مَحَطّاتِ حَياتي
لَمْ أُدخِلْ ضِمْنَ حِساباتي
أن أرعى، يوماً، أغناما!
نوارة
ReplyDeleteمعلش أنا هرد هنا علشان أسيب البوست التاني للحوار ما بين أعضاء الحركة و أنا محترم فكرة ان كل واحد فيهم قادر يوضح وجهة نظره حتي لو فيه شوية ضرب من تحت الحزام
أنا علي فكرة قريت الخبر في المصري اليوم قبل ما خش علي المدونة و أول ما قريته قلت يا نهار اسود نوارة هطين عيشتي و تفكرني بكلاوي هاهاها
أنا محترم جداً قرار الحركة بعدم حضور المؤتمر و لكن نقطة الخلاف ما بينا هي نفسها.. انك بتعتبري نصار و اسراء ارتكبوا الخطيئة الكبري و فيه ناس ابتديت تتهمهم بالعمالة و الخيانة
و هو ده اللي أنا برفضه تماماً
يا نوارة كلنا بنحب البلد دي.. أنا و انت و نصار و اسراء.. هم ممكن يبقي عندهم وجهة نظر مختلفة عنك بس.. و ده مش معناه انهم بيمعملوا حاجة غلط
من حقهم انهم يروحوا و يعرضوا تجربتهم و يقولوا أرائهم في القضية في أمريكا.. أتهمهم بالعمالة أما يرجعوا و قلائيهم غيروا كلامهم و مبادئهم.. أما واحد يروح يقول كلمتين في مؤتمر في أمريكا.. ما يبقاش باع بلده و لا غير مبادئه.. أما يقبض و يستدعي قوة خارجية علينا ابقي قولي عليه الي انت عايزاه..
بص يا كلاوي
ReplyDeleteده تصرف غلط
لو هم مش عارفين ادينا بنعرفهم
خلاص يا كلاوي؟
جميل هو ده اللي أنا عاوز أقوله
ReplyDeleteده تصرف غلط.. و علشان كده أنا قلت اني محترم موقف أحمد ماهر جداً و شايف ان ده التصرف الصح
لكن فيه فرق بين تصرف غلط و تصرف صح
و بين بطل و خائن و عميل..
عارف يا كلاوي - انت من هنا ورايح اسمك كلاوي بالنسبة لي على فكرة :) - عارف انت بتمارس نوع من انواع الارهاب الفكري
ReplyDeleteيعني يعني دلوقت انا دبيت ايدي في جبيك واخدت المحفطة من غير ما تحس
قوم انت قلت عليا نشالة، قام واحد جه قال لك: ارجوك مافيش داعي للتشكيك في ذمم الناس واتهامهم، قول انها مدت ايدها في جيبك واخدت المحفظة من غير ما تحس لكن ما تقولش عليها نشالة
طيب يا كلاوي انا عملت كده
انا في لا قلت خاين ولا عميل
في كل البوستات بتاعتي بالمناسبة الا البوست الاخير
ومع ذلك انت وغيرك اتهمتوني اني قلت خاين وعميل، ولما اقول لواحد فيكوا طلع لي كلمة خاين وعميل يقوموا يقولوا لي ماهو اتفهم ضمنا
طيب انا ذنبي ايه؟ انا وصفت الفعل بامانة
انت شفت ان ده اتهام ضمني بالخيانة والعمالة، والله ده يبقى تفسيرك انت بقى للتصرف اللي انا وصفته
لكن لو سمحت تاني طلع لي كلمة خاين وعميل في اي بوست كتبته
البوست الاخير كتبت قلت دي خيانة لاني بصراحة لما لقيت اني لما باوصف الاشياء زي ماهي من غير ما اجيب سيرة الخيانة والعمالة ضمنا يبقى بقى وجع دماغ بوجع دماغ اقول اللي في قلبي كله واسمي الاشياء بمسمياتها
واخيرا
هي الناس مالها بقت نية كده؟
يا نوارة
ReplyDeleteبصي لكلامي كويس
أنا ما قلتش انك قلتي كلمة خاين و عميل
و علشان كده أنا قلتلك اني متفق معاكي في انهم عمله حاجة غلط (من وجهة نظرنا التي تحتمل الصواب و الخطأ)
أنا كنت بقول ان ما نقلش عليهم خونة و عملاء علي اساس ما سوف يحدث
و ما كانش قصدي منك انت بالذات.. أنا قصدي من الناس عموماً و بصراحة انتي مكتدبتيش خبر و فعلاً وصفتيهم بالخيانة و العمالة في بوستك الأخير
أنا مختلف معاكي في المثال بتاعك.. لو أخدتي المحفظة من جيبي و الناس شافتك تبقي نشالة.. مالهاش كلمة تانية.. يعني ده معناها في القاموس..
بس ما فيش حاجة في الدنيا بتقول ان اللي يسافر مؤتمر في أمريكا يبقي خاين و عميل
و يا ستي كلاوي كلاوي.. أنا معنديش مانع
ده أنا حتي بفكر أشيل عم مينا دي و أمشيها كلاوي هاها
ده الجينياس بتاعنا