تاني بالنوسبة لمرات الدكتور

يا شباب لو سمحتوا اقروا البوست كله
انا باقول في البوست: انا مش بالوم على مرات الراجل، انا بالوم على اللي وصلنا اننا ما بقاش عندنا كرامة
---
الانسان بطبعه عنده كرامة وهي عندها كرامة بس الست تتساب كده وحاسة انها لوحدها لحد ما تضطر تذل نفسها كأن مالهاش بلد ولا اهل، كأن مالهاش سفارة
دي لو كانت من الكونغو كانوا اهتموا بيها اكتر من كده
تتساب وتحس انها لوحدها لدرجة انها تقول انا مستعدة اذل نفسي بس ارحموا جوزي؟ يبقى دي مسئولية مين؟ مين اللي يوصل اي انسان في الدنيا انه يحس انه لوحده، وهم اصلا اخدوا كل اللي حيلتهم، لو كان حيلتها فلوس كانت قالت خدوا الهدوم اللي عليا وطلعوه، دلوقت ما حيلتهاش غير كرامتها ومستعدة تتبرع بيها، ومستعدة تشحت الرحمة، ايه اللي يوصلها لكده؟ مين اللي يوصلها لكده؟ خلاص مافيش بني ادمين في الدنيا؟ لسة فيه بني ادمين في الدنيا، انشالله بيعبدوا النار، بس بني ادمين
وواحدة تقول لي: هي ماقالتش ابوس رجل الملك هي قالت ابوس رجل الريس!
وهي تبوس رجلين اي حد ليه؟ ليه تحس انها لوحدها للدرجة دي؟ ليه تحس انها قليلة الحيلة ومش عارفة تعمل ايه غير انها تذل نفسها؟ معاها الحق ومش لاقية حد يساندها ليه؟ ومجبرة تتذل للمعتدي ويوصل بيها الامر انها ييجي في بالها اصلا الفكرة
يعني محسن السكري ارتكب جريمة في الامارات وبيتحاكم هنا عشان هو مواطن مصري
انا بقى مش ح ابرأ الدكتور، ولا ح اقول ملفقينها له، خلينا نقول ان الدكتور مجرم اثيم وقاتل لئيم وانه فعلا عمل كل اللي بيقولوا عليه واكتر
مش له ام بلد يتحاكم فيها؟ بلاش يتحاكم فيها، مش له بلد فيها هيئة قضائية يبقى لها ممثلين اثناء محاكمته؟ بقى ده لو كان خواجة كان اتساب كده؟

احنا من حقنا على الاقل اذا ما كانش ح يتحاكم عندنا زي محسن السكري يبقى نتدخل في التحقيق وناس تمثلنا، من حقنا نضمن سير التحقيق صح

ده اولا

ثانيا

1500 جلدة؟ احنا فين هنا؟
عمل حاجة يتحاكم وفقا للقانون بتاع الناس العاقلة

1500 جلدة دول ايه؟ بتوع ايه؟

لو في السعودية بيدعوا انهم بيحكموا بالشريعة الاسلامية اقصى اعداد الجلد 100 وبيبقى بجريد النخل على الهدوم وبيتم فحص المحكوم عليه ولو ثبت انه مريض (ولو حتى كان عنده برد شديد شوية) وما يستحملش الجلد بيتلغي عقوبة الجلد وبينفذوا فيه حاجة كده شبه التوبيخ والتقريع قدام الناس بس عشان يشعر بغلطه

ثم ان الجلد عمره ما كان مصاحب للسجن يا اما سجن يا اما جلد، انما جلد وسجن؟ دول ناقص يقولوا للمأمور بتاع السجن: كل يوم عضه في دراعه وشده من مناخيره

ده بالنسبة للشريعة الاسلامية

لو مش شريعة اسلامية، ايه 1500 جلدة دول؟ تبع ايه؟ انهي قانون ده غير قانون ابو لهب وابي بن خلف؟ طب هو عمل ايه؟ صبأ عن دين أبائه؟
انا حالا ح اقعد اكتب الجواب ونبعته لاي حتة في الدنيا، ولازم نضغط على الحكومة المصرية انها تطالب بوقف الحكم واعادة التحقيق ويبقى فيه ممثلين للمصريين يتابعوا سير التحقيق
ده هشام طلعت كان متهم وطلعوا له قرار من النائب العام بحظر النشر عشان مشاعره ما تتجرحش
لو عايزين فلوس نلم من بعض وندفع لهم اللي هم عايزينه، فيه مواطنة سعودية تضررت، نلم من بعض ونبعتها تتعالج في اي حتة في العالم على حسابنا، وييجي هنا يتحاكم عندنا، هو احنا يعني ما عندناش قانون؟ انشالله نعيش عمرنا كله ندفع تعويض للسعودية، بس يعني ايه 1500 جلدة، ومعلش يعني الدكتور حمدي السيد اللي بيقول للدكاترة ماحدش يسافر بقى السعودية
ياسلاااااااااااااام
على اساس ان الدكاترة هنا سايبين القصور والفلل وبيحبوا الغربة والشحططة كنوع من انواع التنزه والترفيه؟ يعني اي دكتور مصري لو اخد في مصر ربع اللي بياخده في السعودية ما ح يتنيل يقعد ومش ح يعتب برة البلد ولا المرمطة وتسويد الوش عند الناس، تدوهم 200 جنيه وتقولوا لهم ما تخروجوش برة البلد، يعني بجد حالة الطبيب المصري حالة مزرية جدا، هو نفسه مش فاهم هو ايه؟ المفروض انه مركزه الاجتماعي: طبيب، ومهيته تحت خط الفقر
والست تتجوز دكتور وفي الاخر تلاقي نفسها بتبوس الجدم كأنها متجوزة القن مسرور
ده ايه الغلب ده ياربي؟ هو احنا انكتب علينا الغلب؟ كاتبين معاه عقد؟