هو هاني سرور ايه؟

تحديث:
على فكرة طفاطيفو المفروض يلم من كل واحد بيتفرج على الفيديو جنيه

هو هاني سرور صادق وللا ممثل شاطر؟

غير ان طريقته في الكلام مؤثرة، بيقول نقطة مهمة سانده فيها كل الاطباء اللي اتصلو، حد دكتور يقول لي، الدكاترة اللي اتصلوا بيقولوا الكلام اللي حيدر بغدادي قاله مش علمي وبيخرف(ملحوظة: حيدر بغدادي ده نائب عن منطقة منشية ناصر ومصر القديمة...ايون هو بتاع الدويقة اللي الدوايقة كانوا بيدعوا عليه)، الدكاترة يفيدونا، الكلام ده صحيح؟

هو هاني سرور عضو في الحزب الوطني ومجلس الشعب وبصراحة ده ما ينفعش يبقى واحد في الحكومة ويبقى رجل اعمال، دي قصة تانية، والحزن الوثني بيطلع تلاتين رجال الاعمال اللي بيدخلوا في عجلته عشان بس يحرموا

بصرف النظر عن رأيي في رجال الاعمال، بس يمكن هم فاكرين ان دي وسيلة لحماية البزنس بتاعهم عشان ما يجيش عين وللا جيم يبرشط على البزنس بتاعه، اهو عمال يطلع تلاتينهم اهو، واظن هم عارفين مين اللي بيعمل فيهم كده، سبحان الله ذنب ناس يخلصه ناس، المظلوم منهم والظالم، حتى المظلوم في قضاياه هو ظالم عشان في مجلس الشعب، او على الاقل ظالم عشان قابل يستفيد من التسهيلات اللي الحكومة بتعملها لهم، ايه الحكومة دي؟

ايه اللي بيعملوه في الناس ده؟ حرام عليهم، سواء هاني سرور مدان وللا بريء وسواء هشام طلعت مدان وللا مدان

ومش ح نتكلم عن مندوح سماعين عشان ده اللي ع الحجر، له يوم، هم دول يعني مش بني ادمين زينا كانوا عايشين عيشتنا؟ يطمعوهم ويسيبوا لهم الحبل ع الغارب لحد ما يشنقم نفسهم بيه على راي زكي رستم في فيلم نهر الحب؟ او هم يشنقوهم بيه؟ ده اسمه كلام؟ دي معاملة انسانية للبني ادمين؟

عرفتوا ليه انا باكره الراسمالية وحاسة انها لازم يعاقب عليها القانون والدين والانسانية؟ عشان هي بتخلق مناخ عام بيخلي الناس تتقيم من خلال الفلوس اللي معاهم، وتخليهم يجروا جري الوحوش وبعدين يطيروا يطيروا يطيروا وبعدين يروحوا واقعين على جدور رقبتهم. طبيعة البني ادم يحب انه يكون انسان محترم في مجتمعه، والرأسمالية بتخلي البني ادم محترم بس عشان معاه فلوس، او مظاهر فلوس، عشان كده تلاقي واحد في العشوائيات ومعاه موبايل وسارق وصلة دش، وما بقتش احلامه انه يعلم ولاده ولا يتعالج ولا يعيش بكرامة، احلامة انه يلحس التراب ويتذل بس عشان يكسب فلوس، لانه لما ح يكسب فلوس ح يبقى محترم، فلوس كتير كتير قوي، كل ما زادت كل ما بقى محترم اكتر، وبتبقى مصاحبة لمناخ الليبرالية اللي بتخلي ناس كتير تقول: سو واط؟ على كل حاجة، مساحة الاخلاقية بتضيق، عشان كده ناس مثلا تدافع عن ساويرس انه بيتعامل مع اسرائيل، وايه يعني؟ ماهو بنزنس، المهم انه مش حرامي مش فاسد مش بيستغل نفوذ! واللا اخلاقية والخيانة والتقرين كمان ممكن يبقوا وجهة نظر

ويضحكوا على الناس ويقولوا لهم انتوا بتنتجوا وانتوا بتنموا اقتصاد البلد، وهو يبقى متهياله - زي هاني سرور كده - انه ينفع يبقى مليادرير ومناضل وصاحب سلطة....ويصلح بوابير جاز.

وبعد ما احلامه كلها اتحققت بقى طالع في التلفزيون بورق عشان يبرأ نفسه من جناية

ليه كده؟ بلاش عشان الفقرا، يولعوا بجاز، ماهم ح يروحوا الجنة يعني ح ياخدوا دنيا واخرة؟ بس ليه البني ادمين يتعمل فيهم كده ويتلعب بيهم وباحلامهم ومفاهيمهم واخلاقهم بس عشان يبقى معاه فلوس؟

هاني سرور ده طبيب، وبيقول على نفسه عالم وكذا واحد قال عليه كده، عالم وتبقى شغلته يكسب فلوس كتير ويبقى في مجلس الشعب؟

لا حول ولا قوة الا بالله

ياللا، ربنا يفك ضيقته اذا كان مظلوم، وحقه بقى يرجع موظف في الحكومة تاني، وللا ياخد منحة من الدولة ويتفرغ للبحث العلمي وتبقى صناعة زي دي شغلانة الدولة وتحت رقابة الدولة مش اي حد كده سوا كويس وللا وحش تبقى ارواحنا في ايده، ان فاتك الميري اتمرغ في ترابه، واذا كان مش مظلوم يبقى ربنا يقيم عليه حكمه وياخد جزاءه.

وتاني مرة بقى كل واحد يحترم نفسيته، ينعل ابو الفلوس الكتير على ابو الاحلام اللي مبنية على اوهام، عشان تريح نفسك احب اقول لك ان الفلوس مش بتولد فلوس، بس الفلوس بتجيب فلوس، بتجيبها من جيوب ناس تانية

افتح محفظتك وبص في الفلوس اللي فيها، ايوة، افتكر بقى ان الفلوس دي معاك عشان فيه غيرك مش معاه الفلوس دي، وما تحاولش بقى تزود عدد الناس اللي انت واخد منهم فلوس، كفاية الناس اللي انت فعلا واكل اكلهم وواخد فلوسهم

اتبطوا بقى، يا رب كل البنوك اللي في الكون تتحرق، والفلوس تتلغي ونرجع لنظام المقايضة تاني، يجرا ايه لو كل الناس تعيش لا اغنيا ولا فقرا ويبقى كل واحد عايش محترم عشان هو بيعمل حاجة محترمة مش عشان عنده رصيد محترم؟

هههههههههههههه ماكنتش اتخيل ان ح ييجي يوم الاغنيا يصعبوا عليا

انا ورايا شغل وعمالة استهبل احاول اقوم اخلصه بقى