مين اللي بيحرق بقى؟

مصانع المحلة بتتحرق. انا لو حمارة ببردعة وبناهق وقدامي البرسيم لا ممكن اصدق ابدا ان كل ده صدفة.
ولا انه اهمال، ايه اهمال دي؟ هو احنا من امتى يعني ما كناش مهملين؟ عرفنا النظام سنة كام وعدى علينا في انهي شارع؟ وكان نازل في فندق ايه؟
ما طول عمرنا مهملين وربنا ساترها معانا، ده احنا لو نظمنا بيوتنا ح تتخرب.
مين اللي بيعمل كده؟
يعني هم لو جناح من الحكومة بيعمل فوضى خلاقة منسقة مع امريكا عشان يركب على السلطة لوحده يبقى ربنا يحرقهم بجاز وسخ
ولو هم حاجة كده يعني...اممممممم ممكن يعني جناح وطني جوة الحكومة قرفان من الفساد وعايز برضه يركب على السلطة من غير ما ينسق مع امريكا، اقصد يعني وطنيين بجد. يبقوا لو كويسين ربنا يوفقهم
عموما حرق البلد حاجة وحشة والخاطر الاول يقول ان مش ممكن حد يبقى كويس يعمل كده
بس مينا نبهني ان اللي بيحرق بيتعمد ان ما يبقاش المكان فيه ناس
يعني ده حد مش عايز يعمل خسائر في الارواح، حد خايف على الناس وعايز في نفس الوقت يهز الحكومة!
المهم يعني من الاخر كده الحكومة تدور جوة نفسها وتشوف مين فيهم اللي بيعمل كده، وما اعتقدش انها ح تدور لانها فعلا خافت
احنا عن نفسنا قاعدين على الحيطة مستنيين الزيطة وعلى رأي ابن إياس لما كان بينقل صورة الشارع المصري في اثناء صراع المماليك: ولم تنتطح في ذاك شاتان. احنا عن نفسنا ناس في حالنا
انا باتكلم عن الشيعب يعني
بالنوسبة للمعارضة نو نو نو...لا يستحيل يقدروا ولا يفكروا ولا يجيلهم في المنام انهم يعملوا حاجة زي دي
ببساطة عشان بيخافوا، دول جالهم هسهس وماشيين يبصوا وراهم
اللي بيعمل كده حد واصل ومش خايف، بس والنبي يا رب، وحياة حبيبك النبي يارب، ما يبقاش متسقط من امريكا على راسنا، والنبي يارب اجبر بخاطرنا ده احنا غلابة
ياللا ياخبر بفلوس بكرة يبقى ببلاش