انتوا بتضغطوا عليا ليه يا شعب غير مثقف بيبيهيا

تحديث عاجل:
ايمانا منا بتشجيع المواهب الشابة، ورغبة منا في المشاركة الايجابية في حملة إتثقف وشخ فإنه من دواعي سرورنا أن ننشر هذه القصيدة للموهبة شابة فهلاو، ويروي لنا فهلاو قصة نضاله وكيف غير شعبولا حياته إليكم رسالته التي أرسلها إلينا عبر صندوق بريد ص ب ع ل ر ش 12394859158402643:

إيمانا من القعده العريضه بجماهير الدويقه ولدعم الحمله الكوميه لمنع الشخاخ في المقطم ولتلمييع وجه مصر العزيمه اتكدم اليكم بهذا الجهد المتواضع واتمني يا استاذه نواره أن يري عداد النور وتبقي المرحومه امي داعيه ليا لو قبل مطرب الشرق الاستاذ شعبولا وغناها وقال بعد كل مطنع عبارته المؤثره ايهههههههههههه
أنا من ساعة ما شفته بيغني ي السجن وانا اتغيرت حياتي مع كلماته الرقيكه وفعلا والنعمه بطلت اشرب سجاير وامتنعت عنه نهائيا مكتفيا بحتة الحشيش اللي بتهبط من فضل الكريم كل حين ومين


المهم يا ستنا خدي عندك الكصيده

ما تطرطرشي هنا أرجوك
تحتك ساكن صاحبك اخوك
ميه تسرسب تهد دويقتك
تقعد جنبه وتقول ظلموك

(ممكن هنا ينتع الاستاذ شعبولا واحده من ايهاته العبقريه)

اصبر بقي ده الصبر ينول
تندق مزاهرك وتبقي الاأول
عز دخيلتك يجيبلك شقتين
وتبقي ميغه والكل يحول

ما تطرطرشي يا بن الاناس
قوم لم الدكه شد اللباس
لك قعده برحه وعفشة ميه
وصدقني حقك ما هينداس

دي ماما سوزان بنتلك شقتك
قلبها الكبير كان حاسس بزنقتك
فمتفضحناش يا ابو المخ زين
وما تطرطرشي وامسك شختك

احبس الميه ازنق الخرا
اجمد و لو هاتفرقع من ورا
هيقولو غسيل كلاوي وابصر ايه
ما تصدقهمشي وان مهما جري

ما تطرطرشي هنا أرجوك
تحتك ساكن صاحبك اخوك
ميه تسرسب تهد دويقتك
تقعد جنبه وتقول ظلموك

الشاعر الغنائي الزجال
مزنوق المحصور الشهير بحزقه
الدويقه - جنب الخرابه البحريه
---------

يعني انا شفت الخبر، وقلت يا بت اسكتي احسن انت لما بتتعصبي لسانك بيطول وامك اتعلمت النت وكل شوية تيجي تديكي درس في الاخلاق، دخل لي مصري جدا وساب الخبر، سكت، دخل لي مواطن مصري وساب الخبر، الله انتوا بتضغطوا عليا ليه؟ مش كفاية انكوا شعب ماعندوش ثقافة البيبي؟
كيف تعمل بيبي من غير ما تهد البيت على دماغك؟ هي دي الحملة القومية الجديدة
عشان تعرفوا يا شعب معفن الحكومة مجوعاكوا ليه؟ عشان شختكوا بتهد جبال، عرفتوا بقى؟ وهم ساكتين وساترين عليكوا وبيقولوا اهلنا ومننا وعلينا، وانتوا نازلين زن زن زن، واضطريتوهم يحرجوكوا.
وظالمينهم دايما، مجوعينا مجوعينا، طب ما تخلوا الطابق مستور، لا وايه؟ العالم البطنية بتوع العيشوائيات لما الحكومة تجوعهم مش يمسكوا نفسيتهم كده ويقولوا اهو ريجيم، لا، المعفنين يروحوا ياكلوا من الزبالة، واكيد طبعا ح يعملوا زبالة الزبالة، ويلوثوا البيئة ويهدوا الجبل ولما يموتوا من شختهم يرموا بلاهم على الحكومة.

وأضاف المسئول: قررنا عمل حملات توعية للمواطنين في المنطقة بعد نقلهم لمساكن التطوير خلال المرحلة المقبلة، وذلك لتعريفهم بكيفية استخدام الحمامات والأحواض.

بس انا نفسي اعرف الحملة دي ح يبقى شكلها ايه؟ يعني ح يعملوا اعلانات في التلفزيون ويجيبوا لنا واحد بيشخ قدامنا وشعبان عبد الرحيم واقف جنبه يغني: اسمع مني...اوعى تشخ...احسن الهضبة..على دماغك ترخ...على دماغك ترخ اييييييييييييييييييييييييييه

ايييييييييييييييييييييييييييييه

وقال المسئول لـجريدة المصري اليوم: هناك أساليب خاطئة لاستخدام الحمامات يقوم بها سكان المنطقة، هذه الأساليب تسببت في تلف مواسير الصرف، وتسريب جزء كبير من المياه إلي صخور هضبة المقطم، مما أدي إلي تفككها، وبالتالي إذابتها وانهيارها.

تلف المواسير؟ يعني انا نفسي افهم واحد دخل يعمل زي الناس وخرج وقلنا له شفيتم، المواسير تتلف ليه؟ بياكل ايه يعني؟ حمض الكبرتيك؟

طب انا باقترح بقى وباضم صوتي لصوت الناس اللي بتطالب بتدريس الثقافة الجنسية في المدارس وياريت كمان يبقى معاها الثقافة الشخاخية وتبقى مادة نجاح وسقوط، و انتوا عارفين نظام الدراسة عندنا العيل يخش يطرش الكلام في الورقة ويمشي وينسى كل حرف، فبدل ما يطرش اللي ح يطرشه يطلعه من الناحية التانية، ياريت تبقى مادة عملي عشان تثبت في مخ...قصدي بواسير الطلبة.

انا عمري ما شفت حكومة مش طايقة شعب بالطريقة دي، ده كأن الحكومة دي عيلة عندها تلاتاشر سنة ومجوزينها ابن عم ابوها اللي عنده 90 سنة وبتكرهه وبتحب سي حسن

يعني كمان ما نعملش زي الناس عشان ما نكلفهمش؟

طب يا ستي روحي وانت طالقة بالتلاتة...فارقينا بقى وارحمي نفسك من قرفنا وشختنا في ذات الوقت