هو انت ليه مش مصري يا حسني؟

انتوا مش ملاحظين الحكاية دي؟ الواحد مش حاسس انه مصري خالص
بجد يعني طلعنا وللا نزلنا عبد الناصر والسادات كانوا مصريين
مصريين يعني، بينكتوا، بيقولوا قفشات، عبد الناصر لما يتخانق مع حد يمسح بكرامة امه البلاط ويخلي اللي ما يشتري يتفرج ويضحك البشرية كلها عليه بما فيهم الشخص اللي بيتهزأ نفسه يلاقي نفسه بيضحك على روحه، وبيقول قاصاد، ولما يتغاظ من حد يعايره بامه، ولما دماغه تقفش تبقى قفشت خلاص ويغتت على مراته غتاتة صعيدي بمحبة وهي ما تبقاش متضايقة ما اعرفش ليه مع انه بيبقى بيغتت، عادي يعني راجل مصري غتت وست مصرية مبسوطة قوي ان جوزها غتت
السادات، مع انه كان عايش في دور اللورد وبيشرب بايب وبيقول ماي وايف ايز هاف انجيليييييش، بس كان بيبعت كحك وغريبة وعاشورا للجيران، لا مش وهو في مجلس قيادة الثورة، وهو في الرئاسة، مش عارفة بقى هل كانوا هم الاتنين (ناصر والسادات يعني) بيفتحوا باب البيت طول النهار عشان يعملوا تيار مع الشباك ويرشوا قدام الباب ويشربوا شاي بنعناع ساعة العصر ويوصوا في البيت ستاتهم يمسحوا كل جمعة بالجاز وللا لا؟
بس اكيد
اقصد يعني فيه حاجة في ناصر والسادات تحسسك انهم في البيت عندهم بيمسحوا بالجاز وبياكلوا كشري وبيفطروا شاي بلبن وطعمية وعلى الاكل العيلة كلها يشربوا في كوباية مية واحدة تلف على كل اللي قاعدين ياكلوا (يعععععععع ما اعرفش ليه بيعملوا كده ولما اقول لحد انا باقرف يزعل) اه بس لو كنت قلت لناصر والسادات انا باقرف اكيد كان حطني في السجن، وبيرشوا قدام البيت حتى لما غيروا العنوان وبقى بيتهم بيت الريس وشكلهم كده كانوا بياكلوا الرز في طبق الشوربة بالمعلقة زي بقية المصريين ويفرشوا تحت الاكل جرايد ويتكلموا في اللي ما يعرفوش فيه، ولازم يبقى على السفرة عيش حتى لو كل الاكل مكرونة ورز ولو مافيش عيش يبقى مافيش اكل
حتى مآخذي انا على عبد الناصر هي مآخذي على اي صعيدي يعني، خصوصا لما يبقى صعيدي اسكندراني
وغيظي من السادات زي غيظي من اي منوفي مافيهوش حاجة زيادة عنهم
اشمعنى حسني مبارك؟ ليه الواحد مش حاسس انه مصري؟ ولا ابنه، ولا مراته، ماحدش يقول لي مراته امها ويلش، طب ما جيهان اللي كانت بتتكلم بايديها وبالتشه كانت امها انجليزية يعني وما كانش ناقصها غير تتربع على الارض وتزغد المذيعة في ركبتها كل دقيقة ونص وهي بتتكلم وبين كل جملة وجملة تقول لها واخدة بالك؟
طب اشمعنى العيلة المالكة دي الواحد مش حاسس انهم مصريين، ولا حاسس انهم خواجات كمان، ولا عرب ولا عجم، ولا فلاحين ولا ترك، ولا شرقيين ولا غربيين
طب ايه؟ تقفيل صيني وللا ايه؟