الاختين الحلوين اسرائيل ومصر تمنعان نسيبة بلير

اخت مرات بلير حست على دمها وراحت تحتج على الحصار المفروض على غزة، جات تخرج قام الاختين الحلوين هناء وشرين منعوها من الخروج، ومصر رفضت تعديها من معبر رفح ولما سألتهم ليه قالوا لها اسرائيل ح تزعل
اه والله اقروا الخبر اهو
هي بقت كده؟ طب دي حتى خواجاية وخواجاية انجليزية يعني تتعامل بالشكل ده من مصر ازاي يعني ده احنا عاشقين الخواجات في الضلمة واي زبال اشقر يسوى عندنا الدنيا ومافيها...ايه حكاية اسرائيل تزعل؟ لا بجد انا كنت فاكرة ان اسرائيل مثلا ماسكة علينا صور مخلة بالاداب، ظبطتنا مع الخدامة في المطبخ الساعة اتنين ونص وخمسة بالليل وخايفين تقول لمراتنا احسن تاخد العيال وتغضب عند ابوها، ماسكة علينا ايصالات امانة بتلاتلاف جنيه وسبعمية ستة وعشرين وخمسة واربعين قرش، مصورانا في الشارع واحنا بنتخانق وبتهددنا تنشرها على اليوتيوب والموظفين يشوفونا...لكن الموضوع واضح انه اكبر من كده

طب ح نقرا الفاتحة امتى؟ وللا العروسة طلباتها كتير وللا ايه؟ يعني ما احنا بنعمل اللي يقدرنا عليه ربنا وادناهم زراعتنا وغازنا وصحراءنا ودي مقدرتنا دلوقت وكل انسان بيبتدي صغير ويكبر واحنا لسة بنكون نفسنا والحمد لله من امريكا لاسرائيل ومن اسرائيل لامريكا لا قعاد على قهوة ولا مخدرات ولا نسوان لان مالناش فيهم حتى السيجارة ما بنشربهاش مافيش غير هي كوباية الشاي بلبن اللي بنشربها على الفطار ونقعد عليها طول اليوم عشان نوفر، وهم مفروض يقدرونا زي ما احنا مقدرينهم، المهم الراحة النفسية ومدام دمنا وافق بعضه يبقى خدوهم فقرا يغنيكم ربنا، والمفروض ياخدوا اللي يحبهم مش اللي هم يحبوه
وبعدين يعني اهم حاجة في الجواز انك تشتري تمن حلاوة وربع جبنة بيضا تلاجة من عند ابو سمير البقال لان ابو خالد مغلوانجي وبعدين رغاي وعلى ما يمشيك يكون نص النهار عدى لان ما بقاش حد يشتري راجل خلاص...البضاعة دي ما لهاش تصريف وح تبور وتقدد وما بقاش لها استخدامات كمان ثم انها فيها خاصية تدمير ذاتي...العلم اتطور دلوقت والعالم قرية صغيرة ومهموزة كبيرة ومدام الخازوق اتقلوظ يبقى احنا في الامان لانه ليس في الامكان ابدع مما كان، وقال على رأي المثل قرد يسليني ولا غزال شارد، ثم انه منين يا فرج يجيلك الشماتة؟ ومدام عايسها وح تبقى جوسها الغالي لجلك يبقى جيص اكتب عليها يابن الخسيس
ما الانسة دي تكلم الامارات يتوسطوا لها عند مصر، او ينقلوا معبر رفح في الامارات او يبعتوا هشام طلعت يسيخ نفسه بحديد هز ويعمل شبكة اتصالات ويشغل وزير الدفاع ساعي عنده بس ما يديلوش اقل من تلاتة شيكل في التيبس عشان يرضى ينزل يجيب كشري من عند التحرير لان كشري ابو طارق مش حلو
اللهم اني صايمة وباخرف