احلى بقين سمعتهم الاسبوع اللي فات ده

في اذاعة الموكوس لما كان بيتكلم بلسان سونة اجدع ناس:
كل رئيس كان له انجاز، عبد الناصر دخل اسرائيل سينا، السادات دخل اسرائيل وامريكا مصر، انا بقى ح اطلع الشعب برة البلد

صحيح، اللسان يعجز امام هذا الانجاز.
باقول لكوا ايه، انا عندي اقتراح كدهون بخصوص الرسائل الايجابية، ولو اني باتكسف من الكلام ده
اه وربنا موضوع الرسائل الايجابية بيكسفني، بس كنت بافكر فيه، على عدة اصعدة، منهم الصعيد التاريخي
معلش يعني لو التاريخ مش مهم زي ما احنا موهومين امال غيرنا مهتم بيه ليه؟
يعني الثابت علميا ان الثورة الصناعية الاوروبية مبنية على الانجازات العلمية والفنية والثقافية وحتى الاجتماعية (بما فيهم العلمانية الغربية) للحضارة الاسلامية والكلام ده بيتدرس في الجامعات الكبرى بس هم مصممين يطرمخوا عليه، لو التاريخ مش مهم يبقى بيطرمخوا ليه؟
اهتمام اسرائيل بتزوير التاريخ، طيب لو التاريخ مش مهم يبقى بيزوروه ليه؟
التعتيم على حقائق تاريخية بتدي الفضل في اكتشاف الامريكتين للعرب، لو التاريخ مش مهم يبقى بيعتموا ليه؟
ورغم التعتيم والطرمخة، بس الحقيقة اوروبا وامريكا ما عندهمش جرأة اسرائيل في تأليف تاريخ، هم بيكتفوا بانهم يسكتوا
اللي مالوش تاريخ مالوش حاضر ولا مستقبل
ماحدش سأل نفسه ليه دلوقت بيتم التركيز على النقاط السلبية لتاريخنا؟
ماحدش ملاحظ ان كل ده مصاحب لاحساس بالاحباط وكلام عن: طول عمر الشعب المصري شعب خانع وفاشل...ايه الروح دي؟ ماحدش حاسس ان الروح دي بتسري كالنار في الهشيم
مش مهم المهم اني البوست الجاي ح اكمل فرانتز فانون ان شاء الله
ولما نخلصه نبقى نتكلم في موضوع الرسائل الايجابية ده