على مسئولية كريم البحيري

فيه تعديل حصل في الخبر بتاع اليافطة، كريم بيقول ان صاحب مدونة لسة عايشة راح وبيقول ان اليافطة اتعلقت في قرية جنب الدويقة تحولت الى مقبرة جماعية، اليافطة بتقول كده، تحويل القرية الى مقبرة جماعية
اللهم صلي على حضرة النبي
زيد النبي صلاة
لا زيده كمان...لا مش ح ينفع حضرتك الصلاة العادية دي...زيد زيد
اكتر اكتر، ميت صلاة ع الحبيب في الايام المفترجة
صليت؟ طيب 900 مرة بقى حسبنا الله ونعم الوكيل بعد صلاة العشاء
يعني بعد ما جبنا فقر افريقيا وتعذيب امريكا وقمع الصين وكوارث اسيا ...سراييفو وصلت يا رجاااااااااالة
ده اللي كان ناقصنا...مقابر جماعية ورسمي وبرخصة ويافطة
مينا اتصل بيا النهاردة وقال لي: طيب من هنا لحد الكارثة الجاية ح نعمل ايه دلوقت؟ قلت له: لا ما تقلقش يعني مش ح نقعد فاضيين كتير يمكن على بالليل كده ربنا يسهل
بس بصراحة، بجد يعني، اعترفوا، كل واحد فيكوا لازم يعترف بينه وبين نفسه اننا بنعيش في ازهى عصور التسلية، مافيش لحظة ملل واحدة، فعلا على راي زياد الرحباني فيلم امريكي طويل، وفيلم اكشن على ابوه، لدرجة ان الواحد مش عارف يستطعم لا مسلسلات ولا افلام، احنا كل لحظة عندنا جديد بالصلاة ع النبي، لعبونا كل الالعاب كيكا ع العالي وكيكا ع الواطي، والاحداث بتتسارع ووصلنا للعقدة، وبقالنا مدة في العقدة وكل شوية العقدة تتعقد، نفسي اعرف بقى مسلسل الجرئ والمصيبات ده ح يخلص على ايه
وللا النهاية ح تبقى مفتوحة