دم المسيحي مقدس وكلوة المسلم للحيوانات

بلغني من مصادر مواقعاتية موثوق بيها اللي هي مينو خطيبي المسيحي ان مالك مستاء من بوستاتي الكتير، طبعا بعد الله اكبر في عينك يا مالك، طب انا اعمل ايه؟ حد يوصف لي مهدئ او يشيل الريدر من قدامي ولجل غباوتي مشتركة في معظم المدونات ووكالات الانباء وعلى رأسهم مدونة مينو اللي كاتب النهاردة بوست يحرق الدم
البوست السعيد لمراقب مصري بيزف لنا خبر ان الدكتور حمدي السيد - اللي انا كنت باحبه قوي بالمناسبة - طلع قرار حكيم (بيدي حقن) بمنع نقل الاعضاء ما بين المسلمين والمسيحيين وتعلل باننا مجتمع لم يصل الى هذه الدرجة من الانسانية اللي تخلي المسلم يتبرع لمسيحي ومسيحي يتبرع لمسلم ببلاش! وانا اقول ياربي يعني مينو ذاكر في الثانوية العامية لما اتعمى واهله صرفوا اللي وراهم واللي قدامهم عليه في كلية الطب وبعدين ساب الطب؟ ده اكيد مجنون، طلعت انا اللي مجنونة
وعشان مينو يحب يكركب المصايب ذكر تصريح الانبا بيشوي اللي قال من فترة انه لا يجوز للمسيحي يتبرع للمسلم بالدم عشان دم المسيحي مقدس
ييجي واحد من الازهر يعترض على قرار حمدي السيد ويقول: لا ازاي ما نتبرعش للمسيحيين ده الاسلام امر بحسن معاملة الحيوانات فما بالك باهل الكتاب
بس نسي يقول: اللي ما يفرقوش عن الحيوانات حاجة، او على احسن التقديرات افضل شوية من الحيوانات في نظر المخاليل اللي متحكمين في حياتنا وامخاخنا
يعني قلنا رجال الدين المصايب بتيجي من تحت راسهم قام ربنا رد عليا عشان الظاهر اتجنيت على رجال الدين وبعت لي التصريح بتاع الدكتور حمدي السيد عشان يعرفني اننا شعب واطي على رأي مينا
دكتور...طبيب...عالم..يقول اصلنا عملنا بحث ولقينا 48 مسلم اتبرعوا لمسيحيين بينما 5 مسيحيين بس اتبرعوا لمسلمين وده دليل على انها تجارة اعضاء؟
ايوة ده دليل على انها تجارة اعضاء على اساس ايه؟ ان المسلمين اوطى من المسيحيين بالطبيعة؟ وللا هو خايف على اعضاء المسلمين ليلهفها المسيحيين ويدخلوا بيها الجنة زي ما الانبا بشوي خايف المسلمين ياخدوا دم من المسيحيين ليدخلوا بيه الجنة لا سمح الله؟ وللا عشان المسيحيين اغنيا ولاهفين بقى فلوس البلد وعندهم صيدليات ومحلات جواهرجية بقى وبيلغوا في الفتة والمسلمين - اللي زي احمد عز - فقرا ياعيني؟ يعني مش فاهمة المقدمات المنطقية بتاعة عدد المسلمين والمسيحيين ادت ازاي لانها تجارة؟ يفهمنا منطقه...آه آه عشان القسيس بيسحر، وممكن ياخد فص الكبد وللا الكلوة ويشرب مية بالل فيها ورقة بالحبر الاحمر ويتف فيها..صح؟ ياااااااه ده العلم نورن صحيح
عموما احب اطمنهم اننا ان شاء الله كلنا داخلين الجنة لان مش معقولة ربنا يودينا النار دنيا واخرة
الا اذا كانت القيامة قامت واحنا فعلا في الجحيم دلوقت والاخ السيد وقطب وبشوي هم الزبانية
مش عارف الدكتور المحترم اللي متعلم مناهج بحث ان القضية مش قضية مسلم ومسيحي وانما قضية غني وفقير؟
مش عارف ان معظم - ان لم يكن كل - اللي بيتبرعوا بالاعضاء بيتبرعوا لانهم فقرا ومستعدين يبيعوا عيل من عيالهم عشان لقمة عيش؟ بدل ما كان يتعب نفسه ويعمل بحث واسقتصاء عشان يشوف نسبة المسلمين المتبرعين من نسبة المسيحيين المتبرعين (اللي طبيعي يبقوا اقل لانهم اقل في العدد يعني) ما عملش ليه بحث عشان يشوف نسبة الفقرا المتبرعين ونسبة الاغنيا المتبرع اليهم؟
انا واثقة انه كان ح يلاقي نسبة الفقرا المتبرعين للاغنيا مية في المية بصرف النظر عن الدين
وعليه فكان واجب عليه يطلع قرار بان المتبرع يقدم بيان حالة اقتصادية لمنع تبرع الفقراء باعضائهم اللي مالهمش غيرها عشان ياكلوا بيها عيش
حسبنا الله ونعم الوكيل