يخرب بيت الشعب الشيوعي

أنا ح ابتدي اصدق كلام صحابي الشيوعيين اللي بيقولوا ان المصريين شيوعيين بالفطرة

بس الحقيقة انا شفت يساريين وشيوعيين بعدد شعر راسي اللي لنيني واللي ماوي واللي تروتسكي وفيه بقى يسار ديمقراطي واشتراكي ثوري

انما حركة شيوعيون كحيانون من اجل التفييس دي الحقيقة ما شفتهاش قبل النهاردة

خليني بس قبل ما اتكلم اطلب منكوا تبصوا لي، ايوة كده، بصيتوا؟ طيب: انتوا كحيانين..لا لا ما تدورش وشك، انتوا كحيانين

انت حضرتك يا عم الفييس انت وهو صباعك طالع من الشراب زي الكحيت وبتشبرق بضرايبك على رجال الاعمال؟ بتتصدق عليهم يعني؟

دلوقت جمال من تمن سنين طلع في التلفزيون وقال لسيه باسية لسيه فير

يعني ايه؟ دي كلمة بالفرنصاوي معناها: دعه يعمل دعه يمر. يعني ايه؟ يعني فيه ناس جات وقالت الدولة مش بابا ولا ماما، الدولة دي شغلتها بس حماية الامن الداخلي والامن الخارجي والمرافق العامة زي الطرق والكباري، فيه ناس قالت طب والتعليم الاساسي، قالوا زي بعضه التعليم الاساسي بس، بحيث تبقى بتفك الخط، وناس قالت والتأمين الصحي، ناس زي انجلترا قالت زي بعضه وناس تانية قالت واحنا مالنا ده شغل اصحاب العمل يقتطعوا جزء من الرواتب ويعملوا تأمين صحي للي بيشتغلوا عندهم. غير كده الثروة كلها في ايد التجار اللي هم رجال الاعمال، الزراعة والصناعة والتجارة الدولة مالهاش دعوة بيها اللي عليها انها تعمل تسهيلات ضريبية وبنكية للي عايز يشتغل ويزرع ويصنع ويتاجر ولسيه باسيه لسيه فير. آه طب ونظام الحكم. نظام الحكم بقى تبع اللي بيزرع وبيصنع، يعني اهل مكة ادرى بشعابها ومن حقهم مدام هم اللي ماسكين الثروة انهم يبقوا في مكان اللي بيسن القوانين او على الاقل ورا الشخص اللي بيسن القوانين عشان يعرف يعمل ويمر براحته بس ده يبقى على حسابهم برضه. يعني مدام ح ياخدوا تسهيلات ويسنوا قوانين ويلعبوا يا مدرسة الالعاب والدولة مالهاش غير انها تشرف يبقى كل حاجة هم يدفعوها ما عدا الشرطة والجيش، حتى المجالس النيابية اللي هم قاعدين فيها او على الاقل وكلاءهم قاعدين فيهم، الحملات الانتخابية، المشاريع الكبرى، وكمان المشاريع الصحية الكبرى، وملاجئ الايتام واي حاجة بقى، هم مسئولين عن كل حاجة زي المجتمع الامريكي ده مجتمع قايم على التبرعات كله على بعضه، كل حاجة فيه بلا استثناء قايمة على التبرعات ما عدا وزارة الدفاع طبعا دي كل المواطنين بيدفعوا فيها ضرايب. رجال الكونجرس والسينات الامريكي كلهم يا رجال اعمال يا ممولين من رجال اعمال، الرئيس الامريكي نفسه يا رجل اعمال يا ممول من رجل اعمال، وكل حاجة ماشية كده، لما الكونجرس يتحرق اللي ممولينه هم اللي ح يدفعوا تكاليفه، المواطن الامريكي ضرايبه للشارع اللي بيمشي فيه والاتوبيس او المترو اللي بيركبه والمدرسة لحد الصف الثامن والجيش والشرطة. غير كده هو مش مسئول عن اي حاجة بتوع البزنس هم المسئولين عن البلد

جم ناس تانية قالوا: لا...ليه يعني اعمل الشعب شحات وناس تبقى هي اللي بتتبرع؟ حتى لو تسهيلات وثروة البلد بس في النهاية يبقى فيه ناس معاها فلوس وناس عادية ويبقى بيمدوا ايدهم لرجال الاعمال؟ لا،البزنس ده بيدخل فيه مصالح ووساخات وممكن رجل الاعمال اللي في المجلس النيابي او اللي متمول من رجال الاعمال يلعبوا بالبلد والناس عشان يخدموا نفسهم واللي بيدفعوه باليمين ياخدوا قده عشر مرات بالشمال، يبقى احنا عملنا ايه؟ لا، الدولة دي رب الاسرة وهي اللي تمسك المصروف، لو افترضنا الثروة قد الكبشة دي، لو فيه ناس اخدت زيادة، يبقى اكيد فيه ناس ح تاخد اقل، طب وليه؟ الدولة توزع بالعدل على الناس، وهي اللي تبقى في ايدها الثروة هي اللي تمسك الزراعة والصناعة والتجارة وحتى لو فيه مشاريع صغيرة هي اللي تحط خطتها وهي اللي تحدد تبقى في انهي مجال ويبقى مداها ايه ولو كبر المشروع يبقى في الحالة دي المشروع دخل في اطار الثروة القومية ويتأمم، وكل الناس تدفع ضرايب وتشارك في كل حاجة، والدولة هي اللي تعلم وتعالج وتحط القوانين لانها هي المنتخبة من الشعب وهي بتمثل الشعب كله والمفروض تخدم مصالح الشعب كله، وفي الحالة دي المجلس النيابي ده ممكن يدخله راجل حافي وللا هدومه مقطعة لانه انتخب من الشعب، ومش ح يبقى ممول من حد ده يدخل حملة انتخابية فقرانة وكحيانة لان الدولة اللي مسئولة عن الانتخابات، وهي اللي بتصرف على المجلس النيابي وهي اللي بتصرف على كل حاجة من مصادر الثروات اللي هي متحكمة فيها

ماشي؟ طيب انا مش شيوعية ولا رأسمالية، انا احب النظام، احب اعرف راسي من رجليا. يا احنا دولة رأسمالية يبقى في الحالة دي المجلسين التشريعيين اللي فيهم اعضاء يا اما هم رجال اعمال يا اما ممولين من رجال اعمال مسئولية رجال الاعمال اللي بياخدوا تسهيلات بنكية وقروض واسهم البورصة بتاعتي كلها في جيبهم لان المفروض اني ضرايبي للجيش والشرطة والطرق اللي مليانة مطبات دي

يا اما المجلس التشريعي ده بتاع الدولة يبقى من بكرة نأمم رجال الاعمال ونعزلهم من مناصبهم ونرجع كلمة "دولة اشتراكية" في الدستور تاني

انما بروح اهالينا قاعدين زي الكحيت نصرف على رجال الاعمال وهم ما بيقوموش باي مسئولية؟ امال التسهيلات دي على اي اساس؟

لا بيعملوا تعليم ولا بيعملوا صحة وبيمولوا حملاتهم الانتخابية وينجحوا فيها ومش عايزين يبقوا مسئولين عن المجلسين التشريعيين اللي هم استحوذوا عليه بفلوسهم اللي جاية اصلا من التسهيلات اللي عملتها لهم الدولة

يا يرمموا هم المجلس يا الدولة تأمم فلوسهم

انما السمك لبن تمر هندي ده ما ينفعش احنا رأسمالية لما نيجي لتسهيلات رجال الاعمال واشتراكية لما نيجي لمصارف الضرايب؟ ده انهي مخ ده؟ انهي مخ؟ انهي مخخخخخخخخخخخخخ؟