البلطجة حق ذكوري...زي رئاسة الجمهورية كده

هي دي كمان قضاء ورئاسة جمهورية عشان تبقى بتاعة الرجالة بس؟
فيديو انتشر على المدونات ومش ح انشره ولا ح ادي له لنك عشان انا مش منضمة للحملة اللي ضد البنت دي
الفيديو ما صورش غير البنت وهي بتشتم ومطلعة عصايا، لكن من كلامها سامعينها بتقول: انت عايز تضربني انت؟ انت تضربني؟ لو راجل وراضع من ...امك خليك واقف
وبعدين رايحة جاية مش عارفة تعمل ايه وراحت ماسكة الموبايل وعملت نفسها ان ابوها ظابط شرطة وباين جدا انها كدابة عشان تخوفه وبتقول: خبطت له العربية ودفعت له الفلوس وواقف يبلطج عليا في الشارع

طيب...الشوم والعصيان بقوا من المعدات الاساسية اللي في عربيات الشباب، وشباب والله ولاد ناس والمفروض انهم متربيين احسن تربية، ولما تكلمهم يقول لك: ماهي البلد بقت ماشية بالبلطجة ولو استنيت القسم يمكن انا اللي البس قضية مخدرات
متهيالي اي حد بيمشي في الشارع زي اي مواطن بيشوف كتير شباب ماسكين شوم لبعض وكل واحد فيهم بيقول للتاني: انت عارف انت بتكلم مين؟ انا اخفيك...انا اوديك ورا الشمس
وهو اصلا بيهوبص في الكلام عشان يخوف التاني

المشاهد دي بتعدي عادي وماحدش بيصورها. لكن لما بنت عملت كده اتصورت واتوزع الفيديو على الناس، مش بس اتصورت، ده اللي صور ما رضيش يصور قلة ادب الواد اللي كان عايز يضربها بعد ما دفعت له فلوس الخبطة، على اساس ان ده طبيعي يعني، راجل وعايز يضرب ست فيها ايه دي؟ عادي ده دوره في الحياة، دوره في الحياة انه يفشل في كل حاجة، يفشل في انه يشتغل ولما يشتغل يبقى شبشب في رجل المدير ويفشل انه يقف قصاده، يفشل في ان الظابط لما يوقفه ويقول له بطاقتك يالا يقول له انت مش من حقك تعاملني كده، يفشل في انه يدافع عن الف واحد ماتوا في عبارة وينزل يعتصم في الشارع وللا حتى يتضامن مع اهالي الضحايا، يفشل في انه يدافع عن بلده اللي بقت مداس لاسرائيل وامريكا ورجال الاعمال والشركات المالتي ناشونال
وينجح بس في انه ينزل يضرب ست في الشارع ولما هي ترد عليه بنفس طريقته تبقى سافلة وكلبة وبنت ستين في سبعين
لان الست دورها في الحياة انها تبقى مفشة يفش الراجل فيها غله وفشله وعجزه وخيبته
امال يعني احنا ربنا خلقنا ليه؟
صح؟

اذا كلنا متفقين على ان سياسة البلطجة اللي عمت الشارع المصري سياسة مرفوضة شكلا وموضوعا
يبقى انا مستعدة كل يوم اتحفكم بفيديو لاتنين شباب ماسكين الشوم والكرابيج لبعض
مش بس لبعض
دول بيقلعوا الحزام وينزلوا يضربوا العيال الصغيرة اللي بتسوق العربيات الكارو عشان اتجرأ ومشي قدامه
بس قبل ما نحارب البلطجة نشوف مصدرها
مصدرها غياب القانون وان زي ما بعض الشباب قالوا لي: انا لو استنيت القسم ياخد لي حقي في حادثة عربية ح اخرج شايل قضية مخدرات ده الى جانب احساس المصريين المتنامي بالفشل والاحباط والعجز والسلبية اللي بيخليهم يستضعفوا لهم عيل صغير سايق عربية كارو او واحدة ست وينزلوا ضرب وقلة ادب
انا مرة كنت واقفة في الاشارة، عادي الاشارة حمرا وانا واقفة فيها حاجة دي؟ فيها جريمة يعني؟ قام الراجل اللي ورايا خبطني في ضهر عربيتي، حلو، والله حلو لاني بصيت في المرايا وقلت معلش تلاقيه زهقان من ان الاشارة واقفة بقالها كتير...الله يسامحه..لازم نشيل بعضينا يا حورية، وطنشت ولا كأن فيه حاجة حصلت ولا حتى بصيت له من الشباك
فيها حاجة؟
اه طلع فيها، عشان حبيب امه نزل من العربية وقعد يبلطج عليا وعايز يتخانق معايا ويضربني
انا خفت وسكت لانه راجل وممكن يضربني فعلا وانا مش معايا شومة ومش من عادتي اني اطلع التليفون وامثل اني باكلم اللواء اركان حرب، اصلا كان ح يبان عليا اني كدابة
طيب لما بنت يوم بعد يوم تتعرض للموقف ده، والله اعلم يمكن سبق لها وانضربت زي ما واحدة صاحبتي انضربت من راجل وسخ قبل كده مع انه هو اللي خابطها وده بيحصل كتير على فكرة، قوم البنت اللي في الفيديو دي قررت انها مدام ماحدش بياخد لها حقها تاخد حقها بايدها
اشمعنى لما الرجالة بيعملوا كده يبقوا معذورين وكمان جدعان ويمشوا يفتخروا في كل حتة انه: ثبته...خليته واقف ح يشخ على روحه
ولما بنت تعمل كده تبقى سافلة، انا صاحبتي لما انضربت في الشارع من راجل هو اللي كان خابطها
اولا: ماحدش اتدخل عشان يحوش عنها يا رجالة مصر
اتفو
ثانيا: راحت القسم والراجل اتهمها بانها هي اللي ضربته وعور نفسه عليها
ثالثا: الظباط بصوا لها وضحكوا وعرفوا ان الراجل كداب لان البت اصلا سفيفة وهو قد الطور وعملوا محضر صلح وما اخدولهاش حقها
ها؟