ايه اللي حصل في العاشرة مساء

اول امبارح كنت باتكلم مع غادة وقالت لي ان منطقة الجبخانة في عزبة خير الله مقطوع عليهم المية بقالهم اسبوع واللي حصل هناك كالاتي:
محطة المية اللي في شارع النجاح عند محطة ابو نادية فيها اربع مواتير مية، كان اتنين بيضخوا المية الصبح، وورش الرخام كانت بتاخد كل المية فالسكان مش بيوصلهم مية، واتنين تانيين بيضخوا بالليل والمية توصل للسكان بالليل فكانوا بيملوا المية بالليل عشان تكفيهم لتاني يوم، وفيه ناس ما عندهاش مواسير اصلا فكانت بتملا من جيرانها. حاول بعض السكان يلموا من بعض عشان يجيبوا موتور كبير لكن المحافظة ما رضيتش، جم اتنين من المواتير باظوا فبقت المحافظة بتضخ المية الصبح لورش الرخام وتقفل المواتير بالليل والسكان يولوعوا بجاز وسخ، اظن معروف ان عزبة خير الله منطقة عشوائية، المهم غادة قالت لي عايزين نعمل حاجة نكلم العاشرة مساء؟ قلت لها طيب انا ح اكلم حد من المعدين واخليهم يتصلوا بيكي وتشرحي لهم.

تاني يوم خرجت الصبح واليوم كان طويل ما عرفتش اروح الشغل يادوبك دخلت البيت لقيت العاشرة مساء بيتصلوا بيا الساعة تمانية بالليل بيقولوا لي انتي ح تطلعي كمان ساعتين، واضح ان كان عندهم ضيف واعتذر على اخر لحظة، المهم طبعا وافقت عشان سببين: عزبة خير الله ومحمد مرعي اللي غلطت في اسمه امبارح وقلت مراعي.

رحت وحصل اللي شفتوه امبارح، واللي ما شافش احكي له بالمختصر، كل ما اتكلم منى تحلق عليا وتقاطعني وتقتم عليا عشان خايفة مني، وما كانش باين في الكاميرا انها بتبص لي على اساس اني واحدة مجنونة باتبلى على الحكومة وللا متشائمة من غير سبب مع ان الحياة لونها بمبي
المهم فين في الاخر لما اخدت فرصة وجبت سيرة محمد، وما سابتنيش اتكلم عن بتوع عزبة خير الله، وانا بطبعي مش باحب اتكلم وبازهق من الكلام ولما حد بيناهدني باسكت واسيبه يتكلم بقى مدام مصمم يتكلم، ولما حد يقعد يقول كلام من قبيل: انيس منصور كان فقير وبعدين بقى انيس منصور، ماهو يا اما اقول لها ايه انيس منصور ده يعني؟ ده احنا كنا بنقراه في الاعدادي مع رجل المستحيل. يا اما اسكت
بس طلبت منها انهم يروحوا عزبة خير الله وتبعت كاميرات فقالت لي حاضر
ح نشوف
انا حبيت اوضح لاني حسيت اني قصرت في الموضوعين اللي انا رايحة عشانهم، انا مش نجمة سينمائية عشان اعمل لقاءات بشروط زي بعض المدونين :) انا رايحة اضرب كرسي في الكلوب واقول اللي عايزاه مش اجاوب على الاسئلة بتاعة احلام المصريين
احلام ايه؟ احنا بنقول يا رب مش عايزين كوابيس
----
شكر خاص (بمناسبة النجومية:)) لتفاتيفو لانه تعب نفسه ونزل لي الحلقة على اليوتيوب
نتعب لك في الافراح يا تفاتيفو